WORLD FULAP LO TRABOL

4 | Protectim Hope blo Iu

WHY HEM IMPORTANT

Taem pipol wari abaotem hao world hem fulap lo trabol, datwan savve affectim feeling and laef blo olketa. Staka wea olketa nogud samting hia affectim olketa, tingse no eni hope hem stap. Wat nao olketa duim?

Samfala no laek for ting abaotem future.
Olketa narawan drinkim alcohol or tekem drug mekem olketa no tingim problem blo olketa.
Samfala laek for dae winim for laef. Olketa ting olsem, “Iumi laef for wat nomoa ia?”

Samting Iu Need for Savve

Samfala problem wea iu feisim distaem maet hem for lelebet taem nomoa and maet hem change and kamap gud moa.
Nomata situation hem no change, samfala samting stap wea iu savve duim for helpem iu for deal witim.
Bible givim iumi trufala hope, hem sei klosap nao evri trabol lo world bae finis for olowe.

Wanem Iu Savve Duim Distaem

Bible sei: “No warim samting wea bae happen tumoro, leavim go datwan for tumoro nao, bikos evri day bae olketa problem kamap.”—Matthew 6:34.

Tingim nomoa wat iu need for duim each day. No letem olketa wari blo tumoro for mekem iu stop for duim olketa samting wea iu shud duim tuday.

Taem iu wari abaotem olketa negative samting wea iu ting hem maet happen, bae hem mekem iu just stress go moa and hope blo iu for garem gud future bae hem wikdaon.

HAO FOR DEAL WITIM—Samfala Idea

TINGIM POSITIVE SAED

Bible sei: “Man garem hadtaem, laef hemi stragol olowe. Man hemi hapi, laef hemi olsem fist.” (Provebs 15:15) Wei for garem negative tingting savve mekem iu for no luksavve lo samting wea iu fit for duim for stretem problem. Bat, for garem positive tingting maet helpem iu luksavve hao for deal witim situation blo iu.

No spendem staka taem for lukluk tumas lo nius.
Lo end blo each day, raetem tu or thrifala samting wea iu savve hapi lo hem.
Raetem list lo olketa samting wea iu fit for duim tuday. For eni big waka wea iu plan for duim, markem haomas samting iu fit for duim tuday. Datwan bae helpem iu for lukim gud samting wea savve kamaot from waka blo iu for datfala day.

ASKEM HELP FROM NARAWAN

Bible sei: “Man hem tingim seleva nomoa . . . hemi agensim eni gudfala tingting.” (Provebs 18:1) Hem no isi for iu klae kamaot from wanfala deep hol seleva, bat sapos samwan helpem iu, iu savve kamaot.

Askem help from olketa famili member or olketa fren.
And tu, evritaem lukaotem wei for iu helpem olketa. Taem iu helpem olketa narawan, datwan mekem iu for garem stretfala tingting lo olketa problem blo iu.
If iu lus hope and feel olsem iu laek for dae nomoa, maet hem gud for iu go lukim doctor. Samtaem diskaen feeling hem saen wea showim man hem sik, olsem for garem depression. Staka pipol faendem wei for kasem treatment hem helpem olketa.a

a Wekap! magasin no sei man mas kasem diskaen health treatment.

Bible Givim Trufala Hope

Man wea raetem psalm prea olsem lo God: “Tru toktok blong yu nao hemi laet wea mi save falom. An hemi gohed fo saen long wei blong mi.” (Sams 119:105) Lukim hao Word blo God, Bible, hem olsem laet.

Lo naet wea hem dark, iumi savve iusim laet for helpem iumi disaedem wea for wakabaot. Olsem tu, Bible garem wisdom wea savve helpem iumi for mekem olketa disison wea no isi.

Wanfala laet savve showim klia road wea iumi wakabaot followim. Lo sem wei tu, Bible savve showim klia hope wea iumi garem for future.

Bible no just storyim nomoa hao history blo olketa man hem start, bat hem storyim tu, trufala hope for future. Hem ansarem olketa kwestin hia:

Hao?

Hao nao wei for safa hem start? Bible sei “sin hem kasem evriwan long world bikos long wanfala man nomoa. . . . Dastawe evriwan dae bikos evriwan sin.”—Rome 5:12.

Why?

Why nao rul blo man no savve stretem olketa problem blo iumi? Bible sei “no eni man save mekem laef blong hem fo kamap barava olsem hemi laekem.” (Jeremaea 10:23) Olketa trabol wea happen lo world distaem hem pruvim datwan hem tru.

Wat?

Wat nao God bae duim for stretem olketa problem wea kasem iumi? Bible sei: “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:4.