HAO FOR MEK DISAEPOL
LESON 11
Teach lo Simpol Wei
Principle: “Sapos iufala talem toktok wea hard for man minim. No eniwan bae savve long wanem iufala story abaotem.”—1 Cor. 14:9.
Wat Jesus Duim
1. Watchim VIDEO, or readim Matthew 6:25-27. Then ting raonem olketa kwestin hia:
Wat kaen illustration nao Jesus iusim for showim hao Jehovah tingim iumi?
Nomata Jesus savve staka samting abaotem olketa bird, wat nao wanfala simpol samting wea hem storyim? Why nao datwan hem wanfala gud wei for teach?
Wat Nao Iumi Lanem From Jesus?
2. Taem iumi teach lo simpol wei, pipol bae tingim wat iumi storyim and bae hem kasem heart blo olketa.
Followim Example Jesus
3. No story tumas. Instead for storyim evri samting wea iu savve abaotem lo wanfala subject, storyim nomoa wat insaed lo datfala study pablikeson. Afta iu askem kwestin, weit for student blo iu ansa. If hem no savve lo ansa or storyim samting wea hem no stret witim wat Bible talem, iusim olketa extra kwestin for helpem hem minim point. Taem student minim main point, muv lo next wan.
4. Iusim wat student blo iu lanem finis for helpem hem minim olketa niu teaching. For example, bifor iutufala startim leson abaotem resurrection, maet iu reviewim wat student lanem finis abaotem wat happen lo olketa wea dae.
5. Ting raonem gud illustration wea iu bae iusim. Bifor iu iusim wanfala illustration askem iuseleva:
‘Hao, disfala illustration hem simpol?’
‘Bae student blo mi isi for minim?’
‘Hao, bae hem helpem student blo mi for tingim main point and no just disfala illustration?’