Olketa Reference for Laef and Ministry Meeting Buk
© 2024 Watch Tower Bible and Tract Society of Pennsylvania
NOVEMBER 4-10
GUD SAMTING FROM BIBLE PSALM 105
“Hem Tingim Covenant blo Hem for Olowe”
Hao Nao for Strongim Faith blo Iumi lo Promis blo Jehovah for Wanfala Niu World?
11 Tingim samfala promis wea luk olsem hem hard for kamap tru wea Jehovah talem lo pipol blo hem lo bifor. Hem promisim Abraham and Sarah hao tufala bae garem pikinini taem tufala olo. (Gen. 17:15-17) Hem talem tu lo Abraham hao hem bae givim land blo Canaan lo olketa pikinini blo hem. Taem olketa Israelite wea olketa nao pikinini blo Abraham, slave lo Egypt for staka year, luk olsem datfala promis hem hard for happen. Bat gogo hem kamap tru. Jehovah promisim tu Elizabeth hao nomata hem olo bae hem garem pikinini. Hem talem tu Mary, wea hem virgin, dat bae hem bornem Son blo Hem, wea datwan fulfillim promis blo Jehovah wea hem talem staka thousand year finis lo garden blo Eden!—Gen. 3:15.
12 Taem iumi ting raonem wei wea Jehovah talem samting and hem fulfill, datwan strongim faith blo iumi dat Jehovah garem paoa for mekem wanfala niu world. (Readim Joshua 23:14; Isaiah 55:10, 11.) Taem iumi duim datwan, bae iumi savve helpem olketa narawan for luksavve promis blo God for niu world bae kamap tru. Jehovah seleva sei olsem abaotem niu heven and niu earth: “Man savve trustim olketa toktok hia [bikos] hem barava tru.”—Rev. 21:1, 5.
it-2-E 1201 ¶2
Toktok, Datfala
Olketa samting wea God creatim wea laef and wea no laef followim toktok blo God, and hem savve iusim for fulfillim olketa plan blo hem. (Ps 103:20; 148:8) Iumi savve trustim olketa toktok blo hem; wat God promisim hem bae no forget for duim. (De 9:5; Ps 105:42-45) Olsem hemseleva talem, toktok blo Hem bae “stap for olowe”; hem bae no kam bak nating, and bae hem barava followim plan blo hem.—Isa 40:8; 55:10, 11; 1Pe 1:25.
Faendem Gudfala Point
w86-E 11/1 19 ¶15
Young Wan, Responsibility blo Iu Insaed Famili wea Hapi and Wan Mind
15 “Olketa taengem feet blo hem [Joseph] witim chain, Putim iron raonem nek blo hem; Go kasem taem toktok wea hem talem hem kamap tru, Toktok blo Jehovah nao samting wea mekem hem klin.” (Psalm 105:17-19) For 13 years, Joseph safa olsem wanfala slave and wanfala prisoner go kasem taem promis blo Jehovah kamap tru. Wat hem experiencem nao mekem hem for klin. Nomata Jehovah no kosim olketa nogud samting wea happen, hem letem datwan for kamap bikos lo plan blo hem. Waswe, bae Joseph gohed for garem hope lo “toktok blo Jehovah” nomata hem mas go thru lo olketa hard taem hia wea savve mekem hem for klin? Waswe, hem savve impruvim moa olketa gudfala wei blo hem, mekem grow wei for patient, hambol, strong lo spiritual wei and disaed strong for duim olketa assignment wea no isi? Olketa samting hia wea happen hem mekem Joseph kamap olsem gold wea moa pure taem hem kamaot from fire, and hem kamap moa spesol lo God and God iusim hem moa bihaen for duim olketa nambawan waka.—Genesis 41:14, 38-41, 46; 42:6, 9.
NOVEMBER 11-17
GUD SAMTING FROM BIBLE PSALM 106
“Olketa Forgetim God wea Hem Savior blo Olketa”
“Hu Nao Saedem Jehovah?”
13 Olketa Israelite fraet taem olketa lukim dark cloud, laetning, and olketa nara spesol saen from God. So olketa talem Moses for go story for olketa witim Jehovah long Maunt Sinai. (Eksodas 20:18-21) Moses stap antap long datfala maunten for longtaem. And olketa Israelite stap seleva long wilderness and leader wea olketa trustim hem no stap witim olketa. Luk olsem, faith bilong olketa Israelite hem strong nomoa taem Moses stap witim olketa. From datwan, olketa Israelite barava wari so olketa askem Aaron olsem: “Wanem nao hemi hapen long Mosis, disfala man hu hemi bin lidim yumi kamaot from Ijip ya? Maet samting nogud hemi hapen long hem nao. So mifala laekem yu fo wakem wanfala god fo yumi, mekem hemi save lidim yumi moa.”—Eksodas 32:1, 2.
Faendem Gudfala Point
Olketa Main Point From Buk Thri and Foa Bilong Psalms
106:36, 37. Olketa verse hia showim hao wei for worshipim olketa idol hem semsem witim wei for mekem sakrifaes long olketa demon. Diswan showimaot hao olketa demon savve affectim man wea iusim olketa idol. Bible warnim iumi olsem: “Stap klia from olketa idol.”—1 John 5:21.
NOVEMBER 18-24
GUD SAMTING FROM BIBLE PSALMS 107-108
“Talem Thankiu lo Jehovah, Bikos Hem Gud”
Evriwan Long Kongregeson Praisem Jehovah
2 Kongregeson hem no olsem olketa nara grup long community wea mekem chance for pipol wea interest long sem samting for kaban tugeta, olsem wanfala youth or sports club. Bat main reason why kongregeson arrangement hem stap hem for praisem Jehovah God. And datwan hem semsem tu long taem bifor kam. Long Psalm 35:18, hem sei: “Mi bae praisem iu long big kongregeson; midolwan plande pipol mi bae praisem iu.” Olsem tu, Psalm 107:31, 32 givim disfala encouragement: “Hem fitim for pipol talem thankiu long Jehovah for loving-kaeness bilong hem and for olketa nambawan samting wea hem duim for olketa man. And hem fitim for praisem hem long kongregeson bilong olketa pipol.”
Talem Thankiu Long Jehovah and Bae Hem Blessim Iu
4 Tufala samting nao savve helpem iumi for gohed tinghae long Jehovah. First samting, iumi mas luksavve long olketa wei wea Jehovah blessim iumi. Mek-tu samting, iumi mas ting raonem wei wea olketa blessing hia showimaot Jehovah hem barava lovem iumi. Taem man wea raetem psalm duim tufala samting hia, datwan helpem hem for tinghae long evri nambawan samting wea Jehovah duim for hem.—Readim Psalm 40:5; 107:43.
Faendem Gudfala Point
it-2-E 420 ¶4
Moab
Bihaen, taem David hem king, faet hem kamap tu between Israel and Moab. Olketa Moabite mas stap anda and duim evri samting wea David askem olketa for duim. Luk olsem, lo end blo datfala faet, tufala grup blo olketa man blo Moab wea faet, olketa mas killim dae. Maet David mekem olketa leidaon lo graon followim wanfala row and hem iusim rope for measurem row hia for disaedem dat tufala grup mas dae and wanfala grup mas stap laef. (2Sa 8:2, 11, 12; 1Ch 18:2, 11) Maet lo datfala sem faet nomoa, Benaiah, son blo Jehoiada “hem killim dae tufala son blo Ariel, man lo Moab.” (2Sa 23:20; 1Ch 11:22) Wei wea David winim olketa Moabite hem fulfillim disfala profesi wea Balaam talem winim 400 years bifor datwan: “Wanfala star bae kam from Jacob, And wanfala scepter bae kam from Israel. And hem bae brekem forhed blo Moab, And skull blo evri raf soldia.” (Nu 24:17) And tu, taem man wea raetem psalm story abaotem wei wea olketa Israelite win, hem sei, God ting lo olketa lo Moab olsem ‘basin blo hem for waswas.’—Ps 60:8; 108:9.
NOVEMBER 25–DECEMBER 1
GUD SAMTING FROM BIBLE PSALMS 109-112
Sapotim Jesus, Datfala King!
Olketa Main Point From Buk Faev Bilong Psalms
110:1, 2—Wanem nao ‘Lord bilong David,’ Jesus Christ, duim taem hem sidaon weit long right hand bilong God? Bihaen Jesus resurrect, hem go ap long heven and weit saed long God go kasem 1914, year wea hem start for rul olsem King. Long taem hia wea hem weit, Jesus rul ovarem olketa anointed follower bilong hem, and hem givim direction long olketa for preach and for mekem pipol kamap disaepol. And tu, hem redyim olketa for rul witim hem long Kingdom bilong hem.—Matthew 24:14; 28:18-20; Luke 22:28-30.
Olketa wea Faet Againstim God Bae No Win!
3 Pipol bilong Jehovah kasem attak from start bilong mek-20 century kam kasem distaem. Long planti kantri, olketa man wea garem wicked plan lukaotem wei for spoelem—tru nao, for stopem—waka for talemaot gud nius abaotem Kingdom bilong God. Datwan wea bihaenem olketa nao hem main Enemy bilong iumi, datfala Devil, wea “wakabaot olsem wanfala lion wea singaot strong, and lukaotem samwan for kaikaim.” (1 Peter 5:8) Bihaen “taem bilong olketa nation wea set finis” hem end long 1914, God putim Son bilong hem olsem niu King bilong earth, and givim hem disfala komand: “Go ahed for rul midolwan long olketa enemy bilong iu.” (Luke 21:24; Psalm 110:2) Christ go ahed for iusim paoa bilong hem and aotem Satan from heven and forcem hem for stap klosap long earth. From Devil savve taem bilong hem short, hem sutim kros bilong hem long olketa anointed Christian and olketa wea fren witim olketa. (Revelation 12:9, 17) Wanem nao kamaot from planti attak bilong olketa hia wea faet againstim God?
Muv Ahed—Kamap Moabeta
Disfala encouragement for iusim present bilong iu minim iu nao mas startim samting. Waswe, iu nao wan wea invaetem narawan for waka witim iu long field ministry? Waswe, iu lukaotem eni wei wea iu savve helpem olketa long kongregeson wea niu, young, or sik? Waswe, iu volunteer for klinim Kingdom Hall or for help long olketa difren wei long olketa convention and assembly? Waswe, iu savve auxiliary pioneer samfala taem? Waswe, iu fit for serve olsem wanfala regular pioneer or help long wanfala kongregeson wea garem bigfala need? Sapos iu wanfala brata, waswe, iu trae hard for kasem olketa spiritual mark for olketa ministerial servant and elder? Wei wea iu willing for help and acceptim responsibility hem showimaot hao iu muv ahed.—Ps. 110:3.
Faendem Gudfala Point
it-1-E 524 ¶2
Covenant
Covenant for Kamap Wanfala Priest Olsem Melchizedek. Psalm 110:4 storyim disfala covenant, and man wea raetem Bible buk blo Hebrew applyim diswan lo Christ lo Hebrew 7:1-3, 15-17. Hem wanfala covenant wea Jehovah mekem witim Jesus Christ seleva. Luk olsem Jesus minim tu datfala covenant taem hem storyim wanfala kingdom witim olketa disaepol blo hem. (Lu 22:29) Thru lo promis blo Jehovah, Jesus Christ, Son blo God lo heven, bae kamap priest semsem olsem Melchizedek. Melchizedek hem king and priest blo God lo earth. Jesus Christ bae duim disfala waka for king and lo semtaem hae priest tu, no lo earth, bat lo heven. Hem duim datfala waka for olowe afta hem go ap lo heven. (Heb 6:20; 7:26, 28; 8:1) Datfala covenant bae stap for olowe bikos Jesus bae duim datfala waka for King and Hae Priest anda lo direction blo Jehovah for olowe.—Heb 7:3.
DECEMBER 2-8
GUD SAMTING FROM BIBLE PSALMS 113-118
Wat Nao Bae Mi Givim Bak lo Jehovah?
Letem Love Buildimap Iu
13 From toktok bilong Jesus, hem klia hao first and main wan wea iumi shud lovem hem nao Jehovah. Bat, iumi no born witim wei for lovem Jehovah. Hem samting wea iumi mas mekem grow. Taem iumi firstaem lane abaotem hem, iumi laekem hem from samting wea iumi herem. Isisi, iumi lanem hao hem redyim earth for olketa man. (Genesis 2:5-23) Iumi lanem hao hem deal witim olketa man, hem no lusim iumi taem sin firstaem kasem olketa man, bat hem duim samting for baem bak iumi. (Genesis 3:1-5, 15) Long kaenfala wei hem deal witim olketa wea faithful, and gogo hem provaedem only-born Son bilong hem for iumi kasem forgiveness long olketa sin bilong iumi. (John 3:16, 36) Disfala savve wea kamap moa big mekem wei wea iumi tinghae long Jehovah hem grow. (Isaiah 25:1) King David sei hem lovem Jehovah bikos long loving kea bilong Hem. (Psalm 116:1-9) Distaem, Jehovah kea, gaedem, strongim, and encouragem iumi. Taem iumi lanem moa samting abaotem hem, love bilong iumi kamap moa deep.—Psalm 31:23; Zephaniah 3:17; Romans 8:28.
Hapi for Kasem Help Givim Samting From Heart
Man wea raetem psalm hem tingting olsem: “Wanem nao mi savve givim long Jehovah for evri gudfala samting wea hem duim for mi?” (Ps. 116:12) Wanem gudfala samting nao Jehovah duim for hem? Jehovah strongim hem taem hem “wari fogud and barava sorre.” And Jehovah ‘sevem hem tu mekem hem no dae.’ Disfala man hia laek “givim samting” long Jehovah for olketa gud samting wea Jehovah duim for hem. Wanem nao hem savve givim? Hem sei: “Mi bae duim evri samting wea mi promisim long Jehovah.” (Ps. 116:3, 4, 8, 10-14) Hem disaed strong for duim evri samting wea hem promisim long Jehovah and for duim wanem Jehovah askem hem for duim.
Iu tu savve duim sem samting. Long wanem wei? Iu mas followim olketa law and toktok bilong God evriday. Dastawe, wei for worshipim Jehovah nao mas barava important long laef bilong iu. Holy spirit bilong God mas leadim iu long evri samting wea iu duim tu. (Eccl. 12:13; Gal. 5:16-18) Hem tru, iu hard for givim samting long Jehovah for thankiu long hem for evri samting wea hem duim for iu. Nomata olsem, “Jehovah hapi” taem hem lukim iu duim best bilong iu for worshipim hem. (Prov. 27:11) Hem barava spesol samting taem iumi savve duim olsem for mekem Jehovah hapi!
Olketa Leson wea Iumi Savve Lanem From Buk blo Leviticus
9 Mek-tu leson: Iumi servem Jehovah bikos iumi tinghae lo hem. For helpem iumi luksavve lo datwan, bae iumi storyim olketa communion sakrifaes, wea hem nara important samting lo worship blo Israel bifor. Lo buk blo Leviticus, iumi lanem dat wanfala Israelite savve givim wanfala communion sakrifaes “fo talem tengkiu.” (Levitikas 7:11-13, 16-18) Hem no givim disfala sakrifaes bikos hem samting wea hem mas duim, bat hem bikos hem laek for duim datwan. Disfala offering hem samting wea man seleva nao bae disaed for givim bikos hem lovem Jehovah God. Man wea givim datfala sakrifaes, famili blo hem, and olketa priest, bae kaikaim meat blo datfala animal wea olketa sakrifaesim. Bat samfala part lo animal hia hem for Jehovah nomoa. Olketa wanem part nao datwan?
10 Mek-thri leson: Love nao mekem iumi givim best blo iumi lo Jehovah. Lo Jehovah, gris blo wanfala animal hem nao best part. Hem chusim tu samfala nara part blo animal wea barava important lo hem, wanfala lo olketa hem kidney. (Readim Levitikas 3:6, 12, 14-16.) So Jehovah hapi tumas, especially taem wanfala Israelite disaed for sakrifaesim gris and olketa nara important part blo wanfala animal. Taem wanfala Israelite mekem kaen sakrifaes olsem, hem showimaot hem barava laek for givim best samting lo Jehovah. Lo sem wei tu, Jesus willing for givim lo Jehovah best blo hem taem hem servem hem witim full soul bikos hem lovem hem. (John 14:31) Wei for duim wanem God laekem hem samting wea Jesus hapi tumas for duim bikos hem barava lovem law blo God. (Sams 40:7, 8) Jehovah mas hapi tumas for lukim Jesus willing for servem hem!
11 Olsem olketa communion sakrifaes bifor, service blo iumi for Jehovah hem samting wea iumi willing for duim for showimaot hao iumi feel abaotem hem. Iumi givim best blo iumi lo Jehovah, and iumi duim datwan bikos iumi lovem hem witim full heart. Jehovah mas hapi tumas taem hem lukim staka million pipol willing for servem hem bikos olketa barava lovem hem and olketa wei blo hem! Hem barava comfortim iumi taem iumi tingim hao Jehovah lukim and tinghae, no just lo wanem iumi duim, bat why iumi duim datwan. Olsem example, sapos iu olo and no fit nao for duim staka samting wea iu laekem, iu savve sure hao Jehovah luksavve lo datwan. Maet iu feel iu no fit for duim staka samting, bat Jehovah luksavve lo bigfala love blo iu wea muvim iu for duim wanem iu fit for duim. Hem hapi for acceptim best samting wea iu savve givim lo hem.
Faendem Gudfala Point
Kwestin From Reader
Man wea raetem psalm hem sei: “Hem nogud samting long Jehovah for olketa wea faithful long hem for dae.” (Ps. 116:15) Laef bilong evriwan wea worshipim Jehovah hem spesol long hem. Bat toktok long Psalm 116 no storyim dae bilong wanfala man nomoa.
Taem brata duim funeral tok for wanfala Christian wea faithful, hem no fitim for hem sei Psalm 116:15 hem fitim disfala Christian wea dae. Why nao olsem? Bikos datfala verse hem garem difren mining. Diswan minim God bae no letem evri faithful wakaman bilong hem for dae bikos datwan bae nogud tumas long hem.—Lukim Psalm 72:14; 116:8.
DECEMBER 9-15
GUD SAMTING FROM BIBLE PSALM 119:1-56
“Hao Nao Wanfala Young Man Savve Garem Laef wea Hem Klin?”
w87-E 11/1 18 ¶10
Waswe, Iu Gohed Klin lo Evriting wea Iu Duim?
10 Lo Ephesus 5:5 Paul givim disfala warning: “Samting wea iufala lukim and wea iufala barava minim tu, hem olsem: Man wea durong or wea no klin or wea greedy, wea datwan olsem wei for worshipim idol, bae no kasem Kingdom bilong Christ and bilong God.” Nomata olsem, each year staka thousand olketa kasem repruv or disfellowship bikos lo wei for durong wea datwan hem wei for “sin againstim body.” (1 Corinth 6:18) Staka taem, diswan hem bikos olketa no “gohed obeyim toktok blo [God].” (Psalm 119:9) Olsem example, staka brata and sista no gohed keepim standard blo God saed lo fasin taem olketa go holiday. From olketa no laek associate witim olketa brata and sista, olketa start for fren witim pipol lo world wea olketa holiday tugeta. Samfala Christian tingse from olketa hia ‘gud pipol,’ olketa joinim olketa lo activity wea maet no fitim. Olsem tu, olketa narawan barava klos lo olketa workmate blo olketa. Wanfala elder hem klos tumas witim wanfala woman wea tufala waka tugeta gogo hem lusim famili blo hem and go stap witim woman hia! From datwan hem disfellowship. Wat Bible talem hem barava tru, “Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem”!—1 Corinth 15:33.
“Mi Lovem Olketa Reminder Bilong Iu”
JEHOVAH talem olketa reminder long pipol bilong hem for helpem olketa deal witim olketa hevi wea kamap long olketa hard taem distaem. Iumi kasem samfala reminder hia taem iumi seleva readim Bible, and from information wea iumi herem long olketa Christian meeting and koment bilong olketa narawan tu. Staka samting wea iumi readim or herem hem no niu samting long iumi. Maet iumi herem finis kaen information olsem. Nomata olsem, from iumi savve forget, iumi evritaem needim olketa reminder saed long olketa plan, law, and instruction bilong Jehovah. Iumi shud tinghae long olketa reminder bilong God. Olketa encouragem iumi taem olketa helpem iumi for evritaem tingim olketa reason wea muvim iumi for garem living wea followim will bilong God. Dastawe man wea raetem psalm hem sing olsem long Jehovah: “Mi lovem olketa reminder bilong iu.”—Psalm 119:24.
No Lukluk Long Olketa Rabis Samting!
2 Bat wanem iumi lukim savve mekem iumi kasem nogud samting tu. Hem savve go long mind bilong iumi and mekem iumi start for laekem wanfala samting or hem savve mekem iumi laekem tumas samting wea stap finis long heart bilong iumi. And from iumi stap long world bilong Satan, staka nogud piksa and information savve mekem iumi followim world, nomata sapos iumi lukluk lelebet nomoa long nogud piksa hia or lisin long information olsem. (1 John 5:19) Dastawe man wea raetem psalm hem barava askem God: “No letem eye bilong mi lukim rabis samting bat protectim mi mekem mi savve followim olketa wei bilong iu.”—Ps. 119:37.
Faendem Gudfala Point
Trustim Toktok Bilong Jehovah
2 Psalm 119 hem mekhae long toktok, or message bilong God. Luk olsem man wea raetem disfala song hem iusim alphabet for helpem man baeheartim. Disfala psalm garem 176 verse wea each verse hem start witim difren leta bilong alphabet. Long Hebrew languis, disfala psalm hem garem 22 sekson, and each sekson garem 8-fala laen wea start witim sem leta. Hem storyim toktok, law, olketa reminder, wei, komandment, and olketa judicial disison bilong God. Long disfala article and long next article tu, bae iumi iusim stretfala transleison bilong Hebrew Bible for story raonem Psalm 119. Taem iumi ting raonem olketa experience bilong olketa servant bilong Jehovah bifor and distaem tu, datwan savve mekem iumi barava minim gud disfala song from God and tinghae go moa long Word bilong hem, Bible.
DECEMBER 16-22
GUD SAMTING FROM BIBLE PSALM 119:57-120
Hao for No Givap Taem Iumi Safa
“Mi Barava Lovem Law Bilong Iu!”
2 Hao nao law bilong God savve kamap samting wea comfortim man wea raetem psalm? From hem sure Jehovah interest long hem, datwan strongim hem. Wei wea hem savve long olketa gudfala samting wea kamaot from wei for followim olketa law wea God givim, datwan mekem hem hapi, nomata hem kasem hard taem from olketa wea againstim hem. Hem luksavve hao Jehovah showimaot kaenfala fasin long hem. And tu, taem hem followim law bilong God, datwan mekem hem moa wise winim olketa enemy bilong hem and datwan sevem hem tu. Wei for obeyim law hem mekem hem garem peace and klinfala conscience.—Psalm 119:1, 9, 65, 93, 98, 165.
Iu Barava Lovem Olketa Kaonsel Bilong Jehovah?
3 Olketa kaonsel bilong God hem spesol long man wea raetem disfala psalm: “Mi hariap, and mi no delay for keepim olketa komand bilong iu. Olketa rope bilong olketa wea wicked stap raonem mi. Law bilong iu mi no forgetim.” (Psalm 119:60, 61) Olketa kaonsel bilong Jehovah helpem iumi for stand strong taem iumi kasem persecution bikos iumi trust hao Father bilong iumi long heven savve katem olketa rope wea olketa enemy taemapem raonem iumi. Long taem wea fitim, hem bae mekem iumi free from kaen problem olsem mekem iumi savve go ahed for duim Kingdom-preaching waka.—Mark 13:10.
Olketa Main Point From Buk Faev Bilong Psalms
119:71—Waswe, eni gud samting nao savve kamaot from olketa hard samting wea iumi kasem? Olketa hard samting wea iumi kasem savve teachim iumi for depend evribit long Jehovah, strong for prea, and strong for studyim Bible and followim wanem hem talem. And tu, wei wea iumi deal witim hardfala samting savve showimaot wanem kaen wik point nao iumi need for stretem. Sapos iumi letem hard samting wea kasem iumi mekem fasin bilong iumi kamap moabeta, bae iumi no feel nogud taem iumi kasem hard taem.
Krae Witim Olketa wea Krae
3 Dadi bilong iumi, Jehovah, hem God wea kaen tumas, and hem main wan wea savve comfortim iumi. (Readim 2 Corinth 1:3, 4.) Hem nambawan example long wei for tingim feeling bilong pipol, and hem promisim pipol bilong hem olsem: “Mi nao datwan wea savve comfortim iu.”—Isa. 51:12; Ps. 119:50, 52, 76.
5 Iumi barava sure Jehovah bae helpem iumi. So iumi shud evritaem prea long hem and talemaot feeling bilong iumi taem iumi sorre. Iumi hapi for savve Jehovah hem minim feeling bilong iumi, and hem savve givim iumi comfort wea iumi needim! Bat wanem nao Jehovah iusim for comfortim iumi?
Faendem Gudfala Point
Olketa Main Point From Buk Faev Bilong Psalms
119:96—Wanem nao disfala toktok ‘end bilong evri samting wea perfect’ hem minim? Man wea raetem disfala psalm storyim tingting bilong man abaotem wei for perfect. Luk olsem hem tingim wei wea man no minim evribit wei for perfect. Bat, komandment bilong God hem no olsem. Direction bilong hem fitim evri samting iumi duim long laef. New International Version hem talem olsem: “Mi lukim hao evri samting wea perfect hem garem spialaen, bat olketa komand bilong iu no garem eni spialaen.”
DECEMBER 23-29
GUD SAMTING FROM BIBLE PSALM 119:121-176
Hao for Avoidim Kaen Sorre wea Shud No Happen
Letem Olketa Law and Principle Bilong God Trainim Konsens Bilong Iu
5 Sapos iumi laekem olketa law bilong God for helpem iumi, iumi mas duim moa samting winim wei for readim and for savve abaotem olketa nomoa. Iumi need for lovem and tinghae long olketa law hia. Bible talem iumi for: “Barava heitim olketa rabis samting and hol strong long samting wea hem stret.” (Rome 12:9) Bat hao nao iumi savve duim datwan? Main samting hem for lane for garem sem tingting olsem Jehovah. Tingim disfala example: Maet iu garem problem for no sleep gud. Doctor talem iu for kaikaim olketa healthy kaikai, exercise, and changem samfala samting long laef bilong iu. Bihaen iu followim samting wea doctor talem, iu luksavve datwan helpem iu! Taem olsem, iu bae barava tinghae long doctor hia bikos hem helpem iu for stap gud.
6 Long sem wei, Creator bilong iumi givim olketa law for protectim iumi from olketa nogud samting wea kamaot from sin and tu for helpem iumi stap gud. Olsem example, Bible teachim iumi hao iumi bae kasem gud samting sapos iumi no laea, raverave, steal, durong, raf, or duim spiritism. (Readim Provebs 6:16-19; Rev. 21:8) Taem iumi kasem olketa gud samting wea kamaot from wei for duim wanem Jehovah laekem, datwan bae mekem grow wei wea iumi lovem and tinghae long Jehovah and olketa law bilong hem.
w93 8/1 25 ¶12
YOUNG PEOPLE—WANEM NOW YUFELLA WORK HARD FOR FOLLOWIM?
12 But samting where barava important hem olsem, yu mas learn for barava hate-im and barava no laikim badfella samting. (Psalm 97:10) How now yu hate-im samting where mait mekim yu happy first taim? Long way where yu tingim samting where bai kam out from dis wan! “No giamanim yufella seleva: yufella no savvy trickim God. Samting where man plantim, hem bai kasim too; from man where plantim samting long said bilong body bai kasim no good samting from body.” (Galatians 6:7, 8) Taim yu face-im test for doim dirty fashion, tingting long barava no good samting where savvy kamap—way where dis wan bai givim pain long Jehovah God. (Lookim Psalm 78:41.) Tingting too, long way where yu mait kamap babule nating or kasim no good sick, olsem AIDS. Tingting long way where yu bai suffer from no good feeling bilong yu and yu lusim respect bilong yuseleva. And too, mait dis wan bringim kam problem more long future. Wanfella Kristian woman hemi say: “Olo bilong mi and mi, mifella doim sex withim narafella people bifor mifella meetim each other. No matter mi twofella Kristian people dis taim, way where mi twofella doim sex olsem bifor, hem mekim fashion for rowa and jealous kamap insaid long marit bilong mifella.” Tingting too, long way where yu lusim theocratik privilege bilong yu or mait yu disfellowship from Kristian kongregesen! (1 Corinthians 5:9-13) Waswe, yu willing for kasim every no good samting hia for yu enjoyim happy for shortfella taim?
Faendem Gudfala Point
Iumi Trustim Hao ‘Evri Toktok blo God Hem Barava Tru’
2 From iumi worshipim Jehovah, iumi bilivim hao hem nao “God blo truth” and hem evritaem laekem iumi for kasem gud samting. (Ps. 31:5; Isa. 48:17) Iumi savve trustim wanem iumi readim lo Bible from ‘evri toktok blo God hem barava tru.’ (Readim Sams 119:160, SIPB) Iumi agree witim wanfala savveman wea sei: “Evri samting wea God talem hem tru and hem evritaem kamap tru. Pipol blo God savve trustim wanem hem talem bikos olketa trustim God.”
DECEMBER 30–JANUARY 5
GUD SAMTING FROM BIBLE PSALMS 120-126
Olketa Plantim Seed Witim Tias, Bat Harvest Witim Hapi
Olketa wea Givim Glory Long God Bae Kasem Blessing
10 Taem iumi tekem yoke bilong wei for olsem disaepol, iumi faet againstim Satan. James 4:7 hem promis: “Againstim Devil, and hem bae ranawe from iufala.” Diswan no minim bae hem isi. Iumi need for barava waka hard for servem God. (Luke 13:24) Bat Bible talem disfala promis long Psalm 126:5: “Olketa wea plantim seed witim krae bae harvest witim hapi singaot.” Tru nao, iumi worshipim wanfala God wea tinghae long samting iumi duim. Hem nao “givim reward long olketa wea barava luk aotem hem,” and hem blessim olketa wea givim hem glory.—Hebrews 11:6.
Waswe, Bae Iumi Garem Strong Faith Taem Olketa Hard Samting Happen?
17 Maet iu tu deal witim wanfala big test distaem. Waswe, samwan iu lovem hem dae? Iu savve strongim faith blo iu taem iu readim olketa story lo Bible abaotem olketa wea laef bak from dae. Waswe, iu barava sorre from samwan insaed famili disfellowship? Hem gud for duim study wea bae mekem iu sure hao hem stret for Jehovah disciplinem olketa wea no repent. Nomata wanem hard taem iu kasem, datwan hem chance for iu strongim faith blo iu. Storyim evri feeling blo iu lo Jehovah. No stap seleva, bat spendem taem witim olketa brata and sista. (Provebs 18:1) Duim olketa spiritual samting nomata maet hem no isi bikos datwan bae helpem iu for gohed faithful. (Sams 126:5, 6) So gohed for go lo olketa meeting, duim preaching waka, and readim Bible. And gohed for tingim olketa nambawan blessing wea Jehovah promisim for iumi lo future. Taem iu lukim hao Jehovah helpem iumi distaem, datwan bae barava strongim faith blo iumi.
Go Ahed Strong Long Harvest Waka!
13 Samting wea givim bigfala comfort long olketa wakman bilong harvest bilong God, and main wan nao olketa wea kasem persecution, hem toktok bilong Psalm 126:5, 6: “Olketa wea plantim seed witim krae bae harvest witim hapi singaot. Datwan wea evritaem go aot, nomata hem krae, wea karem basket wea fulap long seed, bae sure for kam bak witim hapi singaot, and karem harvest bilong hem.” Toktok bilong man wea raetem psalm abaotem wei for plant and harvest hem showimaot kea and blessing bilong Jehovah long smol sekson wea go bak from wei for olsem prisoner long Babylon bifor. Olketa hapi tumas taem olketa kamap free, bat maet olketa krae taem olketa plantim seed long datfala nogud graon wea no eniwan waka long hem taem olketa stap 70 year olsem prisoner. Nomata olsem, olketa wea no givap for plant and build kasem frut and satisfae from hard waka bilong olketa.
14 Maet iumi krae taem iumi kasem test or taem olketa brata bilong iumi safa for saed bilong raeteous fasin. (1 Peter 3:14) Long harvest waka bilong iumi, firstaem maet iumi kasem hard taem bikos luk olsem iumi no kasem eni gud samting from hard waka bilong iumi insaed ministry. Bat sapos iumi go ahed for plant and watarem, God bae mekem olketa samting grow, planti taem winim samting wea iumi tingim. (1 Corinthians 3:6) Diswan hem showaot klia tumas long samting wea kamaot from wei wea iumi givimaot olketa Bible and Bible buk.
Faendem Gudfala Point
Paoa for Protect—“God Hem Sef Ples Bilong Iumi”
15 Tingim firstaem wei wea hem protectim iumi long physical wei. From iumi olketa worshiper bilong Jehovah, iumi expectim hem for protectim iumi olsem wanfala sekson. Sapos nomoa, bae hem isi for Satan finisim iumi. Tingim diswan: Satan, “ruler bilong disfala world,” hem laekem tumas for finisim tru worship evribit. (John 12:31; Revelation 12:17) Samfala barava strong gavman long earth tambuim preaching waka bilong iumi and trae for finisim iumi evribit. Nomata olsem, pipol bilong Jehovah go ahed strong and no givap for preach! Why nao olketa strongfala nation no savve stopem waka bilong disfala sekson bilong olketa Christian wea luk smol and luk olsem isi for spoelem olketa? Bikos Jehovah protectim iumi witim tokpiksa wing bilong hem!—Psalm 17:7, 8.