Klosap lo Babel, wanfala taon stap wea nem blo hem Ur, pipol lo there worshipim staka difren God. Bat wanfala man stap wea worshipim Jehovah nomoa. Nem blo hem Abraham.

Jehovah sei lo Abraham: ‘Go from hom blo iu and olketa relative blo iu, and go lo land wea mi bae showim iu.’ Then God promisim hem olsem: ‘Mi bae mekem wanfala maeti nation kam from iu, and mi bae duim gud samting for staka pipol lo earth bikos lo iu.’

Abraham no savve wea nao Jehovah bae sendem hem, bat hem trustim Jehovah. So Abraham, waef blo hem Sarah, dadi blo hem Terah, and nephew blo hem Lot olketa obeyim Jehovah, and redyim evriting blo olketa and startim long trip blo olketa.

Abraham hem 75 years old taem hem and famili blo hem kasem land wea Jehovah laekem olketa for lukim. Nem blo datfala land hem Canaan. Lo there God story lo Abraham and talem disfala promis: ‘Evri land hia wea iu lukim, bae mi givim lo pikinini blo iu.’ Bat Abraham and Sarah olo finis and no garem eni pikinini. So hao nao disfala promis blo Jehovah bae fulfill?

Abraham and Sarah bin marit for staka year finis. Tufala lusim gud laef wea tufala garem lo Ur and stap lo tent. Bat Sarah no komplen, bikos hem trustim Jehovah.

Sarah laekem tumas wanfala pikinini so hem sei lo Abraham: ‘If servant blo mi Hagar garem wanfala pikinini, bae hem olsem pikinini blo mi nomoa.’ Gogo, Hagar garem wanfala son, nem blo hem Ishmael.

Staka year bihaen, taem Abraham hem 99 years old and Sarah hem 89 years, tufala garem thrifala visitor. Abraham invaetem olketa for kam sidaon andanit wanfala tree and olketa kaikai tugeta. Iu savve hu nao olketa visitor hia? Hem olketa angel! Olketa talem Abraham: ‘Lo semtaem next year, iu and waef blo iu bae garem wanfala son.’ Sarah hem insaed lo tent and lisin lo story blo olketa. Hem laf insaed heart blo hem and ting olsem: ‘Tru ia, mi savve garem pikinini nomata mi olo finis?’

Lo next year nomoa, Sarah bonem wanfala son nao, barava olsem hao angel blo Jehovah bin promisim. Abraham nemim hem Isaac, wea minim “Laflaf.”

Taem Isaac hem samting olsem faev years old, Sarah lukim Ishmael tok spoelem Isaac. Sarah laek protectim son blo hem, so hem go lo Abraham and askem hem for sendem Hagar and Ishmael for go stap lo nara ples. Firstaem, Abraham no laek for duim datwan. Bat Jehovah sei lo Abraham: ‘Herem Sarah. Bae mi lukaftarem Ishmael. Bat thru lo laen blo Isaac nao bae mi fulfillim olketa promis blo mi.’