Lot stap witim uncle blo hem Abraham, lo datfala land blo Canaan. Gogo, Abraham and Lot garem staka animal and datfala land no big fitim evriting wea olketa onam. Abraham sei lo Lot: ‘Iumi no fit for stap tugeta nao lo wanfala ples. Plis chusim which saed nao iu laek go stap lo hem, and bae mi go stap lo nara saed. Datwan showim Abraham no tingim hemseleva, iaman?

Lot lukim wanfala naes land klosap lo taon wea olketa kolem lo Sodom. Datfala land garem staka wata and staka green grass tu. So hem chusim datfala ples and tekem go famili blo hem lo there.

Pipol lo Sodom and Gomorrah, wei blo olketa nogud tumas. Dastawe Jehovah disaed for distroem tufala taon hia. Bat God laek for sevem Lot and famili blo hem, so hem sendem tufala angel for warnim olketa: ‘Hariap! Go aot from disfala ples! Jehovah bae distroem disfala taon.’

Lot no kwiktaem for go. Hem gohed delay. So olketa angel hia holem hand blo Lot, waef blo hem, and tufala dota blo hem and leadim olketa go aot from datfala taon and sei: ‘Iufala ran for laef blo iufala! And no luk bak. If iufala luk bak, iufala bae dae!’

Taem olketa kasem taon wea olketa kolem lo Zoar, Jehovah mekem sulfur and fire foldaon olsem rain lo Sodom and Gomorrah. Tufala taon hia distroe nao. Taem waef blo Lot disobeyim Jehovah and luk bak, hem change lo solt wea standap olsem post! Bat Lot and tufala dota blo hem, olketa sev bikos olketa obeyim Jehovah. Masbi olketa sorre tumas bikos waef blo Lot hem no obey. Bat olketa hapi from olketa followim instruction blo Jehovah.

Abraham teachim son blo hem Isaac for lovem Jehovah and for trustim evri promis blo hem. Bat taem Isaac hem samting olsem 25 years old, Jehovah askem Abraham for duim samting wea barava no isi for hem. Wat nao datwan?

God talem Abraham: ‘Plis tekem only son blo iu and go lo land lo Moriah and sakrifaesim hem.’ Abraham no savve why nao Jehovah askem hem for duim datwan. Bat hem still obeyim Jehovah.

Next day lo early morning, Abraham tekem Isaac and tufala servant and wakabaot go for Moriah. Afta thrifala day, olketa savve lukim go nao olketa maunten lo datfala ples. Abraham talem olketa servant blo hem for weit taem hem and Isaac go for offerim sakrifaes. Abraham talem Isaac for karem firewood, and Abraham tekem wanfala naef. Isaac askem dadi blo hem: ‘Wea nao animal wea iumi tufala bae sakrifaesim?’ Abraham sei: ‘Son blo mi, Jehovah nao bae provaedem sheepsheep.’

Taem olketa kasem datfala maunten, olketa wakem wanfala altar. Then Abraham taengem hand and feet blo Isaac and putim hem ontop datfala altar.

Abraham tekem datfala naef. Semtaem nomoa, angel blo Jehovah tok kam from heven: ‘Abraham! No killim hem dae! Distaem mi savve iu garem faith lo God bikos iu willing for sakrifaesim son blo iu.’ Then Abraham lukim wanfala man sheepsheep wea horn blo hem pas lo wanfala smol tree. Hem kwiktaem aotem rope from hand and feet blo Isaac and hem sakrifaesim datfala man sheepsheep.

Start from datfala day, Jehovah kolem Abraham fren blo hem. Iu savve why? Abraham duim eni samting wea Jehovah askem hem for duim, nomata hem no minim why Jehovah askem hem for duim datwan.

Jehovah talem moa promis blo hem for Abraham: ‘Mi bae blessim iu, and mi bae mekem pikinini blo iu for staka.’ Diswan minim evri gud pipol bae kasem blessing from Jehovah thru lo famili blo Abraham.