Isaac hem 40 years old taem hem maritim Rebekah. Hem lovem tumas Rebekah. Gogo, tufala garem twin boy.

Firstborn nem blo hem Esau, and second born nem blo hem, Jacob. Esau hem man wea laek for raraon lo bush, and hem savve tumas hao for huntim olketa animal. Bat Jacob hem man wea laek for stap lo haos.

Lo datfala taem, firstborn son nao savve kasem big part lo land and selen taem dadi blo hem dae. Olketa kolem datwan hem raet or inheritance. Lo famili blo Isaac, datfala promis wea Jehovah talem for Abraham hem insaed tu lo datfala inheritance. Esau nating kea nomoa abaotem olketa promis hia, bat Jacob savve olketa promis hia hem important tumas.

Wanday Esau kam bak afta hem go hunting for full day and hem taed tumas. Hem smelem naes supsup wea Jacob kukim and hem sei: ‘Mi hangere nogud! Givim mi lelebet red supsup!’ Jacob sei: ‘Bae mi duim, bat iu mas salem lo mi firstaem, raet blo iu olsem firstborn.’ Esau sei: ‘Mi no kea abaotem raet blo mi olsem firstborn! Iu tekem for iu. Kaikai nao mi laekem.’ Iu tingse hem wise for Esau duim datwan? Nomoa. Esau givim raet blo hem olsem firstborn, just for wanfala pleit supsup nomoa.

Taem Isaac hem olo fogud, hem taem nao for hem givim blessing lo firstborn son blo hem. Bat Rebekah helpem Jacob for tekem datfala blessing. Taem Esau savve lo datwan, hem kros fogud and plan for killim dae twin brata blo hem. Isaac and Rebekah laek for protectim Jacob, so tufala talem hem: ‘Go and stap witim brata blo mami blo iu, Laban, go kasem taem kros blo Esau hem kat daon.’ Jacob followim advaes blo parents blo hem and ranawe.

Jehovah promisim Jacob dat hem bae protectim hem olsem hem bin protectim Abraham and Isaac. Jacob stap lo wanfala ples wea olketa kolem lo Haran, hem marit lo there, garem big famili and hem rich fogud.

Gogo Jehovah talem Jacob: ‘Iu go bak lo land blo dadi blo iu.’ So Jacob and famili blo hem startim wanfala long trip for wakabaot go bak. Taem olketa followim road samfala man kam lo Jacob and sei: ‘Brata blo iu Esau hem kakam for meetim iu, and 400 man nao kam witim hem!’ Jacob fraet tumas, nogud Esau laek killim hem and famili blo hem. Hem prea lo Jehovah: ‘Plis sevem mi from brata blo mi.’ Lo next day, Jacob sendem olketa present lo Esau, hem givim staka sheepsheep, goat, buluka, camel, and olketa donkey.

Lo datfala naet taem Jacob stap seleva, hem lukim wanfala angel! Datfala angel start for wrestling witim hem. Tufala wrestling gogo kasem morning. Nomata join lo hips blo Jacob hem miss, hem no givap. Datfala angel sei: ‘Iu let go lo mi.’ Bat Jacob sei: ‘Bae mi no let go lo iu go kasem taem iu blessim mi.’

Then angel hia blessim Jacob. So Jacob savve nao Jehovah bae no letem Esau for killim hem.

Lo morning Jacob luk go and lukim Esau kam witim 400 man blo hem. Jacob wakabaot go first lo famili blo hem and baodaon lo brata blo hem sevenfala taem. Esau ran go lo Jacob and hangem hem. Tufala brata hia krae big and mek peace. Lo tingting blo iu, hao nao Jehovah feel abaotem hao Jacob deal witim situation hia?

Bihaen, Esau go bak lo hom blo hem, and Jacob tu hem go. Jacob garem 12-fala son. Nem blo olketa nao hem Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, and Benjamin. Wanfala lo olketa son hia, wea hem Joseph, Jehovah iusim for sevem pipol blo Hem. Iu savve hao nao hem duim? Bae iumi lukim.