1. Wanem nao olketa Bible profesi helpem iumi for savve?

WANEM nao bae klosap for happen lo pipol blo Jehovah? Hem no hard for kasem ansa. Bible profesi hem olsem wanfala window wea iumi savve luk thru lo hem for lukim olketa big samting wea bae happen, wea bae affectim iumi evriwan. Wanfala Bible profesi bae helpem iumi for lukim wat nao samfala gavman wea garem big paoa lo disfala world bae duim. Datfala profesi hem stap lo Daniel chapter 11 wea storyim tufala king wea faetem each other, wea hem nao king blo north and king blo south.b Bigfala part lo datfala profesi hem bin fulfill, so iumi savve sure dat nara part blo datfala profesi bae fulfill tu.

2. Olsem Jenesis 3:15 and Revelation 11:7 and 12:17 storyim, wanem nao iumi mas tingim taem iumi studyim datfala profesi blo Daniel?

² For helpem iumi minim datfala profesi lo Daniel chapter 11, iumi need for tingim hao profesi blo Daniel hem only story abaotem olketa ruler and gavman wea duim samting wea affectim pipol blo Jehovah. Pipol blo Jehovah olketa no staka nomoa taem iumi comparem witim population blo full world, so why nao olketa gavman hia targetim pipol blo God? Bikos Satan and world blo hem garem wanfala goal nomoa, wea hem nao for spoelem olketa wea servem Jehovah and Jesus. (Readim Jenesis 3:15 and Revelation 11:7; 12:17.) And iumi need for tingim tu hao disfala profesi blo Daniel mas agree witim olketa nara profesi lo Bible. Only wei for iumi savve minim gud datfala profesi hem sapos iumi comparem witim olketa nara part lo Bible.

3. Wat nao bae iumi storyim lo disfala study and lo next study?

³ Tingim olketa point hia taem iumi storyim Daniel 11:25-39. Iumi bae story raonem hu nao king blo north and hu nao king blo south from 1870 go kasem 1991, and bae iumi storyim why iumi need for changem hao iumi minim wanfala part blo disfala profesi. Lo nextfala study, iumi bae storyim Daniel 11:40–12:1, and bae iumi kasem kliafala mining lo wanem datfala part lo profesi hem showimaot abaotem datfala taem wea start lo 1991 go kasem war blo Armageddon. Taem iu studyim tufala article hia, hem gud for lukluk lo datfala chart “Tufala King wea Againstim Each Other lo Taem blo End.” Bat firstaem, iumi need for savve hu nao tufala king lo disfala profesi.

HAO FOR LUKSAVVE LO HU NAO KING BLO NORTH AND KING BLO SOUTH

4. Wanem nao thrifala samting wea helpem iumi for luksavve lo hu nao king blo north and king blo south?

⁴ Lo firstaem, tufala title hia “king blo north” and “king blo south,” hem for olketa gavman wea stap lo north and south saed lo land blo Israel. Why nao iumi sei olsem? Lukim message wea datfala angel talem lo Daniel, hem sei: “Mi kam for mekem iu luksavve lo olketa samting wea bae kasem pipol blo iu lo last part blo olketa day.” (Dan. 10:14, NW.) Kasem Pentecost 33 C.E., datfala real nation blo Israel nao pipol blo God. Bat start lo datfala taem, Jehovah showimaot klia hao olketa faithful disaepol blo Jesus nao pipol blo hem. So big part lo datfala profesi lo Daniel chapter 11, hem abaotem olketa disaepol blo Christ and no datfala real nation blo Israel. (Acts 2:1-4; Rome 9:6-8; Gal. 6:15, 16) And start kam lo bifor, olketa gavman wea kamap king blo north and king blo south hem gohed for change. Nomata olsem, samfala samting wea olketa duim hem semsem. First samting, rul blo olketa king hia barava affectim pipol blo Jehovah. Mek-tu, hao olketa treatim pipol blo God showimaot olketa heitim trufala God, Jehovah. And mek-thri, tufala king hia compete witim each other for kasem paoa.

5. Waswe, iumi savve luksavve hu nao king blo north and king blo south lo olketa year start lo 100 C.E. go kasem 1870? Explainim.

⁵ Bihaen 100 C.E., olketa false Christian wea followim olketa laea teaching and haedem truth lo Bible, start for kamap staka insaed lo tru Christian kongregeson. From datfala taem kam kasem olketa year lo end blo 19 century, no eni organization blo God stap lo earth. Olketa false Christian kamap staka olsem rabis grass, and datwan mekem hem hard for luksavve lo hu nao olketa tru Christian. (Matt. 13:36-43) Why nao hem important for savve lo datwan? Bikos, diswan showimaot wanem iumi readim abaotem king blo north and king blo south hem no stand for eni king or gavman wea kamap start lo 100 C.E. go kasem 1870. Bikos no eni organization blo God hem stap lo datfala taem mekem olketa savve attakim.c Nomata olsem, iumi savve hao king blo north and king blo south bae showaot moa no longtaem bihaen 1870. Hao nao iumi savve lo datwan?

6. Wanem taem nao pipol blo God showaot klia moa? Explainim.

⁶ Start lo 1870, pipol blo God start for organize moa olsem wanfala grup. Lo datfala year nao Charles Taze Russell and olketa fren blo hem startim wanfala Bible study class. Brata Russell and olketa fren blo hem nao olsem datfala messenger wea Bible profesi abaotem wea bae “redim rod” bifor Kingdom blo Messiah hem start. (Malakae 3:1) Lo datfala taem, pipol blo God showaot klia moa! Waswe, eni world paoa wea rul lo datfala taem hem duim samting wea affectim pipol blo God? Bae iumi lukim.

HU NAO KING BLO SOUTH?

7. Go kasem midol lo World War I, hu nao king blo south?

⁷ Lo 1870, Britain rul ovarem staka ples winim eni nara kantri, and hem garem strongfala army lo full world. Lo profesi blo Daniel, datfala smol horn wea aotem nara thrifala horn hem piksarem Britain, and thrifala horn hia piksarem France, Spain, and Netherlands. (Daniel 7:7, 8) And go kasem midol lo World War I Britain nao king blo south. Lo datfala taem tu, United States of America hem kamap wanfala rich kantri lo full world and hem start for waka tugeta witim Britain.

8. Hu nao king blo south lo olketa last day?

⁸ Midol lo World War I, United States and Britain join tugeta and kamap wanfala strongfala army. Lo datfala taem, Britain and America kamap England-America World Paoa. Olsem Daniel profesi abaotem, disfala king hipimap wanfala big maeti army. (Dan. 11:25, NW) Lo olketa last day, England-America nao king blo south.d Bat, hu nao kamap king blo north?

KING BLO NORTH HEM SHOWAOT MOA

9. Wanem taem nao king blo north hem showaot moa, and hao nao Daniel 11:25 fulfill?

⁹ Lo 1871, wan year bihaen Russell and olketa fren blo hem startim datfala Bible study grup, king blo north hem showaot moa. Lo datfala year, Otto von Bismarck duim samting wea mekem Germany for garem big paoa. Prussian King Wilhelm I kamap firstfala emperor blo Germany, and hem chusim Bismarck for kamap first chancellor.e Lo olketa year bihaen, Germany kontrolem samfala kantri lo Africa and lo Pacific Ocean, and hem trae for garem moa paoa winim Britain. (Readim Daniel 11:25 lo footnote.f) Germany hipimap wanfala big army and hem garem mek-tu strongfala navy lo full world. Lo World War I, Germany iusim datfala army for againstim olketa enemy blo hem.

10. Hao nao Daniel 11:25b, 26 fulfill?

¹⁰ Then Daniel profesi abaotem wanem bae happen lo Germany and military force blo hem. Datfala profesi talem hao king blo north, “bae no savve standap.” Why nao olsem? “Bikos olketa bae mekem olketa nogud plan againstim hem. And olketa wea kaikaim naesfala kaikai blo hem bae mekem hem for foldaon.” (Dan. 11:25b, 26a, NW) Lo taem blo Daniel, olketa wea savve kaikaim naesfala kaikai blo king hem olketa wea waka for king. (Daniel 1:5) So hu nao disfala profesi storyim? Hem olketa bigman lo gavman blo Germany, olsem olketa bigman lo army and olketa narawan wea waka for king. Olketa hia duim samting wea gogo hem mekem datfala king for lusim paoa.g Profesi hia no storyim nomoa hao datfala gavman bae lusim paoa, bat hem storyim tu samting wea bae kamaot from datfala war witim king blo south. Profesi hia sei olsem abaotem king blo north: “Olketa bae swipim full army blo hem, and staka bae foldaon and dae.” (Dan. 11:26b, NW) Olsem profesi talem, lo World War I, olketa “swipim full army” blo Germany and staka “foldaon and dae.” Datfala war killim dae staka pipol winim eni nara war bifor.

11. Wat nao king blo north and king blo south duim?

¹¹ Daniel 11:27, 28 storyim olketa samting wea bae happen bifor World War I. Hem storyim hao king blo north and king blo south bae ‘sidaon raonem wanfala tebol and gohed for laea lo each other.’ And hem sei tu dat king blo north bae tekem staka samting. Datwan hem happen taem Germany and Britain talem each other dat olketa laekem peace, bat taem tufala start for faetem each other lo 1914, datwan showimaot tufala laea nomoa. And lo olketa year bifor 1914, Germany kamap mek-tu rich kantri lo world. Then, for fulfillim profesi lo Daniel 11:29 and first part lo verse 30, Germany faet witim king blo south bat hem lus.

TUFALA KING HIA FAETEM PIPOL BLO GOD

12. Wat nao King blo north and king blo south duim lo World War I?

¹² Start kam lo 1914, wei wea tufala king hia faetem each other and againstim pipol blo God hem kamap big go moa. Olsem example, lo World War I, gavman blo Germany and British gavman persecutim pipol blo God wea no laek for faet insaed lo datfala war. And gavman lo U.S. putim olketa brata wea lead lo preaching waka insaed lo prison. Diswan fulfillim profesi lo Revelation 11:7-10.

13. Wanem nao king blo north duim bihaen 1930 and lo taem blo World War II?

¹³ Then lo olketa year bihaen 1930, and especially lo taem blo World War II, king blo north barava attakim pipol blo God. Taem Nazi party kontrolem Germany, Hitler and olketa wea followim hem banim waka blo pipol blo God. Datfala king blo north killim dae staka handred pipol blo God and putim staka thousand lo concentration camp. Daniel profesi abaotem olketa samting hia. Datfala king blo north “spoelem datfala holy ples” and “aotem datfala samting wea stap evritaem” thru lo wei wea hem banim preaching waka. (Dan. 11:30b, 31a, NW) Hitler wea hem leader blo Nazi party, hem promis tu for killim dae evri pipol blo God lo Germany.

WANFALA NIU KING BLO NORTH

14. Bihaen World War II, hu nao kamap king blo north? Explainim.

¹⁴ Bihaen World War II, Communist gavman blo Soviet Union tekovarem olketa big territory wea hem blo Germany bifor and hem kamap king blo north. Olsem wei wea rul blo Nazi hem raf tumas, Soviet Union tu persecutim eniwan wea putim worship blo trufala God first lo laef blo hem winim gavman blo Soviet Union.

15. Wanem nao king blo north duim bihaen World War II hem end?

¹⁵ No longtaem bihaen World War II hem end, datfala niu king blo north, Soviet Union and olketa wea sapotim hem, start for attakim pipol blo God. Olsem profesi lo Revelation 12:15-17 storyim, datfala king banim preaching waka blo iumi and sendem staka thousand pipol blo Jehovah lo prison. Tru nao, from taem wea olketa last day start, datfala king blo north hem pourimaot persecution olsem wanfala “river” bat hem no fit for stopem waka blo pipol blo God.h

16. Hao nao Soviet Union fulfillim Daniel 11:37-39?

¹⁶ Readim Daniel 11:37-39. King blo north fulfillim datfala profesi taem hem nating showimaot respect lo god wea olketa grani blo hem worshipim. Hao nao hem duim datwan? Soviet Union garem goal for finisim religion, so hem laek for aotem paoa wea olketa religion garem ovarem olketa pipol. For kasem goal blo olketa, start kam lo 1918, Soviet gavman givim wanfala order wea lead go lo wei wea olketa skul start for teachim hao no eni God hem stap. Hao nao king blo north givim glory lo god blo olketa strongfala ples? Soviet Union spendem staka selen for garem strongfala army and for wakem staka thousand nuclear weapon for strongim paoa blo hem. Gogo, king blo north and king blo south tufala evriwan garem olketa strongfala weapon wea savve killim dae staka billion pipol!

TUFALA KING WAKA TUGETA

17. Wat nao “datfala barava rabis samting wea spoelem evri samting”?

¹⁷ Wanfala important samting wea king blo north sapotim king blo south for duim, hem nao for setim ap datfala “barava rabis samting wea spoelem evri samting.” (Dan. 11:31, NW) Datfala “rabis samting” nao hem United Nations.

18. Why nao datfala “rabis samting” hem piksarem United Nations?

¹⁸ United Nations organization hem piksarem datfala “rabis samting,” bikos datfala organization sei hem nao bae mekem full world for garem peace, wea diswan hem samting wea Kingdom blo God nomoa fit for duim. And datfala profesi sei datfala rabis samting “spoelem evri samting” bikos United Nations nao bae main wan for attakim and distroem evri false religion.—Lukim chart “Tufala King wea Againstim Each Other lo Taem blo End.”

WHY NAO IUMI NEED FOR SAVVE ABAOTEM DISFALA INFORMATION?

19-20. (a) Why nao iumi need for savve abaotem disfala information? (b) Wanem kwestin nao bae iumi ansarem lo next study?

¹⁹ Iumi need for savve abaotem disfala information bikos hem pruvim hao start lo 1870 kam kasem 1991, profesi blo Daniel abaotem king blo north and king blo south hem fulfill. So iumi savve sure hao last part blo datfala profesi bae fulfill tu.

²⁰ Lo 1991, Soviet Union lusim paoa blo hem. So hu nao kamap king blo north distaem? Next study bae ansarem datfala kwestin.

1-2. Wanem nao bae iumi storyim lo disfala study?

WINIM enitaem bifor, iumi garem staka pruv wea showimaot iumi stap lo end blo olketa last day blo disfala world. Klosap nao, Jehovah and Jesus Christ bae finisim evri gavman wea faet againstim Kingdom blo God. Bifor datwan happen, king blo north and king blo south bae gohed faet againstim each other and againstim pipol blo God.

² Lo disfala study, iumi bae storyim profesi lo Daniel 11:40–12:1. Iumi bae lukim hu nao king blo north distaem, and bae iumi storyim why iumi barava sure dat iumi bae no fraet taem iumi feisim olketa challenge wea bae kamap.

WANFALA NIU KING BLO NORTH

3-4. Hu nao kamap king blo north? Explainim.

³ Bihaen Soviet Union lusim paoa lo 1991, pipol blo God wea bin stap anda lo rul blo Soviet Union olketa kamap free for samfala taem. Daniel kolem datwan “lelebet help.” (Daniel 11:34) From diswan, olketa free for preach and no longtaem nomoa, namba blo olketa pablisa lo olketa kantri wea bin part lo Soviet Union kasem staka handred thousand. Gogo, Russia and olketa kantri wea sapotim hem nao kamap king blo north. Olsem iumi storyim lo study bifor diswan, for wanfala gavman kamap king blo north or king blo south, hem mas duim thrifala samting: (1) bae hem duim samting wea barava affectim pipol blo God, (2) wanem hem duim showimaot hem enemy blo Jehovah and olketa pipol blo hem, and (3) tufala king hia bae compete for paoa.

⁴ Lukim olketa reason why iumi savve sei Russia and olketa wea sapotim hem nao king blo north distaem. (1) Olketa duim samting wea barava affectim pipol blo God, olketa banim preaching waka and persecutim staka handred thousand brata and sista wea stap lo olketa ples wea olketa rulim. (2) Olketa samting hia wea olketa duim showimaot olketa heitim Jehovah and pipol blo hem. (3) Olketa gohed for compete witim king blo south, wea hem England-America World Paoa. Bae iumi lukim wanem Russia and olketa wea sapotim hem duim wea pruvim olketa nao king blo north.

KING BLO NORTH AND KING BLO SOUTH GOHED AGAINSTIM EACH OTHER

5. Daniel 11:40-43 hem story abaotem wanem taem, and wat nao bae happen lo datfala taem?

⁵ Readim Daniel 11:40-43 lo footnote.b Disfala part lo profesi storyim olketa samting wea bae happen lo taem blo end. Disfala profesi storyim hao king blo north and king blo south bae compete witim each other. Olsem Daniel profesi abaotem, lo taem blo end, king blo south and king blo north, “tufala bae againstim each other.”—Dan. 11:40, NW.

6. Wanem pruv nao showimaot tufala king hia gohed for againstim each other?

⁶ King blo north and king blo south gohed for compete for kasem big paoa ovarem full world. Olsem example, tingim samting wea happen bihaen lo World War II, Soviet Union and olketa wea sapotim hem tekovarem staka part lo Europe. Samting wea king blo north duim hem mekem king blo south for mas mekem agreement witim olketa nara kantri for startim wanfala international military organization wea olketa kolem NATO. King blo north gohed for compete witim king blo south lo wei for spendem staka selen for wakem olketa samting for faet. Tufala king hia faet againstim each other, taem tufala bihaenem and sapotim tu olketa war wea kamap midolwan lo olketa enemy blo each other lo Africa, Asia, and Latin America. Lo olketa year wea just go pas, Russia and olketa wea sapotim hem garem big paoa evriwea lo world. And tu, olketa attakim king blo south lo wei for iusim cyber warfare. Olketa king hia accusim each other lo wei for iusim olketa computer program for spoelem economy and gavman blo each other. And olsem Daniel talem, king blo north gohed for attakim pipol blo God.—Dan. 11:41, NW.

KING BLO NORTH HEM GO INSAED “LAND WEA LUK NAES”

7. Wanem nao datfala “land wea Luk Naes”?

⁷ Daniel 11:41 sei king blo north bae go insaed lo datfala “land wea Luk Naes.” Wanem nao datwan minim? Lo bifor, hem minim datfala land blo Israel wea barava luk naes tumas winim eni nara land. (Esikiel 20:6) Samting wea mekem datfala land for barava spesol hem bikos tru worship stap lo there. Start lo Pentecost 33 C.E., datfala “land” hem no minim wanfala ples nomoa lo earth, bikos distaem pipol blo Jehovah stap evriwea lo earth. Bat, distaem datfala “land wea Luk Naes” hem minim waka wea pipol blo Jehovah duim, olsem for worshipim Jehovah lo olketa meeting and for duim preaching waka.

8. Hao nao king blo north go insaed datfala “land wea Luk Naes”?

⁸ Lo olketa last day, staka taem nao king blo north go insaed datfala “land wea Luk Naes.” Olsem example, taem Nazi Germany kamap king blo north, especially lo taem blo World War II, datfala king go insaed lo datfala “land wea Luk Naes” taem hem persecutim and killim pipol blo God. Then bihaen World War II taem Soviet Union kamap king blo north, hem go insaed datfala “land wea Luk Naes” taem hem persecutim pipol blo God and sendem olketa olsem prisoner lo nara ples.

9. Lo olketa year wea just go pas, hao nao Russia and olketa wea sapotim hem go insaed “land wea Luk Naes”?

⁹ Lo olketa year wea just go pas, Russia and olketa wea sapotim hem tu go insaed datfala “land wea Luk Naes.” Lo wanem wei? Lo 2017, disfala king blo north distaem banim waka blo pipol blo Jehovah and putim samfala brata and sista lo prison. Hem banim tu olketa pablikeson, and New World Translation. And tu, hem tekem branch office lo Russia and olketa Kingdom Hall and Assembly Hall. Bihaen datwan happen, lo 2018 Governing Body sei Russia and olketa wea sapotim hem nao king blo north. Bat, pipol blo Jehovah bae no againstim or trae for changem eni gavman, nomata sapos datfala gavman persecutim olketa. Bat, olketa followim wanem Bible talem for prea for “olketa king and olketa bigman” especially taem olketa gavman bae mekem olketa disison wea bae affectim wei wea pipol blo God free for worship.—1 Tim. 2:1, 2.

WASWE, KING BLO NORTH BAE WINIM KING BLO SOUTH?

10. Waswe, king blo north bae winim king blo south? Explainim.

¹⁰ Main samting wea profesi lo Daniel 11:40-45 story abaotem hem olketa samting wea king blo north duim. Waswe, datwan minim hem bae winim king blo south? Nomoa. Datfala king blo south bae still “laef yet” taem Jehovah and Jesus finisim evri gavman blo man lo war blo Armageddon. (Rev. 19:20) Why nao iumi barava trustim datwan? Tingim samting wea olketa profesi blo Daniel and Revelation storyim.

11. Wanem nao Daniel 2:43-45 hem minim? (Lukim piksa lo kava.)

¹¹ Readim Daniel 2:43 lo footnotec and verse 44, 45 lo Bible. Profet Daniel storyim olketa gavman blo man wea rul blo olketa hem affectim pipol blo God. Hem storyim olketa gavman hia olsem didifren part blo wanfala big maeti image. Last gavman lo datfala profesi hem nao feet blo datfala image wea hem iron wea mix witim clay. Datfala feet piksarem England-America World Paoa. So datfala profesi showimaot England-America World Paoa bae still rul taem Kingdom blo God finisim evri gavman blo man.

12. Wanem nao mek-seven hed blo datfala wild animal hem piksarem, and why nao hem important for iumi savve lo datwan?

¹² Aposol John tu storyim olketa world paoa wea rul blo olketa affectim pipol blo Jehovah. John storyim olketa gavman hia olsem wanfala wild animal wea garem sevenfala hed. Mek-seven hed blo datfala animal hem piksarem England-America World Paoa. Important samting abaotem diswan nao, bae no eni nara hed moa kamap. Mek-seven hed blo disfala animal bae still rul taem Christ and army blo hem lo heven bae distroem hem witim datfala full wild animal.d—Rev. 13:1, 2; 17:13, 14.

WAT NAO BAE KING BLO NORTH KLOSAP FOR DUIM?

13-14. Hu nao ‘Gog from land blo Magog,’ and wat nao maet mekem hem for attakim pipol blo God?

¹³ Wanfala profesi wea Ezekiel raetem hem helpem iumi for savve lo wanem maet happen lo olketa last day blo king blo north and king blo south. Luk olsem datfala profesi blo Esikiel 38:10-23; Daniel 2:43-45; 11:44–12:1; and Revelation 16:13-16, 21 hem storyim sem samting, and sapos datwan hem tru, diswan nao wanem iumi expectim for happen.

¹⁴ No longtaem bihaen bigfala trabol start, “olketa king evriwea long earth” bae join tugeta olsem wanfala grup blo olketa nation. (Rev. 16:13, 14; 19:19) Bible kolem datfala grup blo olketa nation, ‘Gog from land blo Magog.’ (Esikiel 38:2) Datfala grup blo olketa nation bae mekem wanfala last attak for finisim pipol blo God. Wat nao bae mekem hem duim datwan? Lo wanfala profesi abaotem datfala taem, aposol John lukim olketa bigfala hail ston foldaon kam lo olketa enemy blo God. Datfala hail ston hem piksarem wanfala strong judgment message wea pipol blo Jehovah bae talemaot. Luk olsem datfala message nao bae mekem Gog blo Magog for attakim pipol blo God witim disfala tingting for finisim olketa from disfala earth.—Rev. 16:21.

15-16. (a) Wanem samting nao maet Daniel 11:44, 45 storyim? (b) Wat nao bae happen lo king blo north and datfala Gog blo Magog?

¹⁵ Datfala strong message and datfala last attak wea olketa enemy blo God bae duim maet hem olketa sem samting wea Daniel 11:44 storyim. (Readim.) Daniel sei ‘wanfala nius hem kam from east and from north’ wea bae mekem datfala king for kros tumas. Datfala king blo north bae laek for ‘killim dae plande pipol.’ Luk olsem datfala toktok “plande pipol” hem minim pipol blo Jehovah.e So Daniel maet story abaotem datfala last attak againstim pipol blo God.

¹⁶ Datfala attak wea king blo north witim evri gavman lo world duim, bae mekem Olmaeti God for barava kros and then war blo Armageddon bae start. (Rev. 16:14, 16) Lo datfala taem, king blo north and evri nation wea join tugeta for kamap Gog blo Magog bae finis, and “no eniwan bae helpem hem.”—Dan. 11:45, NW.

17. Hu nao Michael wea Daniel 12:1 storyim, and wanem nao bae hem duim?

¹⁷ Lo next verse Daniel storyim samfala information moa abaotem hao king blo north and olketa wea sapotim hem bae finis, and hao iumi bae sev. (Readim Daniel 12:1.) Wat nao disfala verse hem minim? Michael hem nara nem blo King blo iumi Jesus Christ wea rul distaem. Hem bin “lukaftarem” pipol blo God start kam lo 1914 taem Kingdom blo hem start lo heven. Klosap nao, bae hem duim samting for distroem olketa enemy blo hem lo war blo Armageddon. Datfala war bae kamap lo end blo taem wea Daniel hem kolem lo ‘taem blo trabol’ wea barava nogud tumas winim eni nara taem. Lo Revelation, John kolem datfala taem wea lead go lo Armageddon, “datfala big trabol.”—Rev. 6:2; 7:14.

WASWE, NEM BLO IU BAE ‘STAP INSAED DATFALA BUK’?

18. Nomata wanem nao bae happen lo future, why nao iumi no need for fraet?

¹⁸ Daniel and John sei Jehovah and Jesus bae sevem olketa servant blo tufala lo taem blo big trabol, so iumi no need for fraet nomata wanem bae happen lo future. Daniel sei olketa wea nem blo olketa ‘stap insaed lo datfala buk’ bae sev. (Daniel 12:1) Wanem nao iumi savve duim mekem nem blo iumi stap insaed datfala buk? Iumi mas duim samting for showimaot iumi garem faith lo Jesus, datfala Pikinini Sheepsheep blo God. (John 1:29) Iumi need for baptaes for showimaot iumi dedicate lo God. (1 Pet. 3:21) And iumi mas showimaot iumi sapotim Kingdom blo God taem iumi duim wanem iumi fit for duim for helpem olketa narawan for lane abaotem Jehovah.

19. Wanem nao iumi shud duim distaem, and why nao olsem?

¹⁹ Distaem nao hem taem for strongim trust wea iumi garem lo Jehovah and olketa faithful servant lo organization blo hem. Distaem nao hem taem for sapotim Kingdom blo God. Sapos iumi duim datwan, bae iumi sev taem Kingdom blo God hem finisim king blo north and king blo south.

Samfala profesi lo disfala chart storyim olketa samting wea happen lo semtaem. Evri profesi hia pruvim iumi lo taem blo end.—Daniel 12:4.

• 

  

  Scripture Rev. 11:7; 12:13, 17;13:1-8, 12

  Profesi “Datfala wild animal” rul ovarem pipol lo earth for staka thousand year. Lo taem blo end, mek-seven hed blo hem garekil. Bihaen, datfala hed hem heal ap and “evri pipol long earth” followim datfala wild animal. Satan iusim datfala wild animal for ‘faetem olketa pikinini bilong datfala woman wea stap yet.’

  Fulfill Bihaen lo Flood, olketa gavman blo man wea againstim Jehovah start for kamap. Staka thousand year bihaen, Rul blo Britain no strong lo taem blo World War I. Then taem United States joinim hem, hem kamap strong moa. Especially lo taem blo end, Satan iusim evri gavman lo earth for persecutim pipol blo God.

• 

  Scripture Dan. 11:25-45, NW

  Profesi Lo taem blo end, king blo north and king blo south bae faetem each other for paoa.

  Fulfill Germany and England-America World Paoa tufala compete. Lo 1945, Soviet Union and olketa wea sapotim hem kamap king blo north. Lo 1991, Soviet Union hem finis, and bihaen, Russia and olketa wea sapotim hem kamap king blo north.

• 

  Scripture Aesaea 61:1; Malakae 3:1; Luke 4:18

  Profesi Jehovah sendem datfala ‘messenger’ for “redim rod” bifor Kingdom blo Messiah hem start. Datfala grup start for talemaot gud nius lo olketa wea hambol.

  Fulfill Start lo 1870, Charles Taze Russell and olketa fren blo hem waka hard for explainim wanem nao Bible really teachim. Lo 1881, olketa start for talemaot hao hem important for olketa servant blo God for preach. Olketa pablisim olketa article olsem “Wanted 1,000 Preachers” and “Anointed to Preach.”

• 

  Scripture Matt. 13:24-30, 36-43

  Profesi Wanfala enemy plantim rabis grass midolwan olketa wheat, olketa grow tugeta and rabis grass haedem wheat go kasem taem blo harvest; then olketa separatem wheat from rabis grass.

  Fulfill Start lo 1870, wei wea olketa tru Christian difren from olketa false Christian hem start for kamap klia. Lo taem blo end, olketa hipimap olketa tru Christian and separatem olketa from olketa false Christian.

• 

  Scripture Dan. 2:31-33, 41-43, NW

  Profesi Feet wea hem iron and clay blo wanfala image wea olketa wakem from olketa didifren metal.

  Fulfill Clay hem piksarem pipol wea anda lo England-America World Paoa bat olketa gohed for againstim datfala gavman, bikos lo datwan, datfala world paoa no savve iusim full paoa blo hem wea olsem iron, for duim samting.

• 

  

  Scripture Matt. 13:30; 24:14, 45; 28:19, 20

  Profesi Olketa putim “datfala wheat” lo ‘haos for keepim’ datwan and datfala “wakaman wea faithful and wise” kasem waka for “lukaftarem olketa nara wakaman.” Disfala “gud nius abaotem Kingdom” start for kasem “evri ples long world.”

  Fulfill Lo 1919 datfala wakaman wea faithful and wise hem kasem waka for lukaftarem pipol blo God. Start lo datfala taem, olketa Bible Student barava busy for duim preaching waka. Distaem, olketa Jehovah’s Witness preach lo winim 200 kantri and pablisim olketa Bible pablikeson lo winim 1,000 languis.

• 

  Scripture Daniel 12:11; Rev. 13:11, 14, 15

  Profesi Wanfala wild animal wea garem tufala horn hem main wan wea bihaenem wei for wakem datfala “karving wea luk olsem datfala wild animal” and hem ‘mekem datfala wild animal for brith.’

  Fulfill England-America World Paoa hem main wan wea bihaenem wei for startim League of Nations. Olketa nara kantri tu sapotim datfala organization. Gogo, king blo north joinim tu League of Nations bat only from 1926 go kasem 1933. Olsem United Nations (UN) wea kamap bihaen, datfala League kasem praise wea Kingdom blo God nomoa shud kasem.

• 

  

  Scripture Daniel 8:23, 24

  Profesi Wanfala king wea luk raf tumas hem ‘spoelem staka samting.’

  Fulfill England-America World Paoa spoelem staka samting. Olsem example, lo World War II, United States duim wanfala barava nogud samting taem hem dropim tufala atomic bomb lo wanfala kantri wea hem enemy blo England-America World Paoa, diswan barava spoelem staka samting.

• 

  Scripture Dan. 11:31, NW; Rev. 17:3, 7-11

  Profesi Datfala “wild animal wea kala bilong hem red” wea garem tenfala horn hem kamaot from wanfala deep hol and hem mek-eit king. Buk blo Daniel kolem king hia “datfala barava rabis samting wea spoelem evri samting.”

  Fulfill Datfala League of Nations finis lo World War II. Bihaen datfala war, olketa setim ap UN. Olsem League bifor, UN kasem praise wea Kingdom blo God shud kasem. UN bae attakim religion.

• 

  

  Scripture 1 Thess. 5:3; Rev. 17:16

  Profesi Olketa nation talemaot peace and security, and “tenfala horn” and “datfala wild animal” attakim “datfala jury woman” and finisim hem. Bihaen datwan, olketa nation bae finis.

  Fulfill Olketa nation maet sei olketa win for mekem peace and security lo full world. Then olketa nation wea sapotim UN distroem olketa organization blo false religion. Diswan nao start blo bigfala trabol. Datfala trabol bae end taem Jesus distroem disfala full system blo Satan lo Armageddon.

• 

  Scripture Esikiel 38:11, 14-17; Matt. 24:31

  Profesi Gog tekovarem land blo pipol blo God. Then, olketa angel hipimap olketa wea God chusim.

  Fulfill King blo north, and olketa nara gavman bae attakim pipol blo God. Bihaen datfala attak hem start, olketa last anointed bae go lo heven.

• 

  Scripture Esikiel 38:18-23; Daniel 2:34, 35, 44, 45; Rev. 6:2; 16:14, 16; 17:14; 19:20

  Profesi “Man wea sidaon antap” lo “wanfala horse wea kala bilong hem white” hem “winim olketa enemy bilong hem,” taem hem distroem Gog and army blo hem. Hem torowem “datfala wild animal” lo “lake bilong fire,” and datfala ston pisisim datfala image.

  Fulfill Jesus, hem King lo Kingdom blo God, and hem bae sevem pipol blo God. Jesus witim 144,000 wea rul witim hem, and olketa angel blo hem, olketa bae finisim olketa nation and full world blo Satan.