Spesol Skin blo Sea Cucumber

Sea cucumber hem animal wea savve stap botom lo sea and lo olketa reef. Body blo hem fat lelebet and skin savve garem olketa nila lo hem tu. Olketa savve soft fogud mekem olketa savve isi for bend and then kwiktaem nomoa olketa savve kamap strong olsem ston. Kaen wei for savve change olsem mekem olketa fit for go insaed ples wea taet, then kamap strong mekem olketa pas insaed and fish no savve aotem olketa. Hem savve duim olsem bikos lo skin blo hem wea spesol tumas.

Tingim diswan: Skin blo sea cucumber savve strong, no strong tumas, and soft. For changem skin hem joinim tugeta olketa string insaed skin, and then aotem moa bihaen. Olketa protein nao mekem skin for olsem.

For mekem skin hem strong, olketa protein kamap olsem olketa sismol bridge, or chain, for joinim tugeta olketa string insaed skin. Olketa nara protein aotem olketa bridge and chain hia for mekem skin hem soft moa. Skin blo sea cucumber savve barava soft and luk olsem hem melt.

Olketa savveman blo science traem best for wakem olketa samting wea savve kamap soft or strong olsem sea cucumber hia. For operate lo brain, olketa laek wakem olketa electrode wea savve strong lelebet, mekem doctor savve putim lo barava ples for hem insaed brain, bat then for hem kamap soft bihaen. Wei for electrode kamap soft bihaen savve stopem body for trae aotem hem.

Wanem nao tingting blo iu? Waswe, skin blo sea cucumber kamap seleva nomoa? Or waswe, samwan nao designim?