Jehovah Lukaftarem Pipol blo Hem

1. Why nao Jesus askem Jehovah for lukaftarem olketa follower blo hem?

LO NAET bifor Jesus hem dae, hem prea lo Jehovah and askem hem for lukaftarem olketa follower blo hem. (John 17:15, 20) Hem tru, Jehovah hem evritaem lukaftarem and protectim pipol blo hem. Bat Jesus luksavve Satan bae attakim iumi, and hem luksavve tu hao iumi bae needim Jehovah for helpem iumi for deal witim datwan.

2. Olsem Sams 33:18-20 storyim, why nao iumi shud no wari tumas abaotem olketa hard taem wea iumi feisim?

² World blo Satan kosim staka problem for iumi olketa Christian distaem. Iumi feisim olketa hard taem wea savve mekem iumi discourage and wea savve testim tu faith blo iumi. Bat disfala article bae helpem iumi for luksavve hao iumi shud no wari tumas. Jehovah lukim olketa hard taem wea iumi feisim and hem laek for helpem iumi for deal witim datwan. Bae iumi storyim tufala Bible example wea showimaot hao Jehovah “lukaftarem olketa wea i tinghae long hem.”​—Readim Sams 33:18-20.

TAEM IUMI FEEL OLSEM NO ENIWAN FOR HELPEM IUMI

3. Wat nao samfala samting wea mekem iumi feel olsem no eniwan for helpem iumi?

³ Nomata iumi garem staka brata and sista lo kongregeson, samfala taem iumi mas deal witim samfala samting seleva. For example, taem olketa young wan need for explainim biliv blo olketa front lo olketa classmate lo skul or taem olketa muv lo niu kongregeson, maet olketa feel olsem no eniwan for helpem olketa. Or taem samwan discourage or depress, maet hem feel olsem no eniwan for helpem hem. Sapos olsem, maet iumi hol bak for story lo olketa narawan bikos iumi wari nogud olketa bae no minim iumi. Samfala taem maet iumi tingse no eniwan tingim iumi. Taem iumi feel olsem, datwan savve mekem iumi for sorre and wari. Jehovah no laekem iumi for feel olsem. Hao nao iumi savve lo datwan?

4. Why nao profet Elijah sei: ‘Mi nomoa profet wea mi stap’?

⁴ Tingim example blo faithful man Elijah. From Jezebel laek for killim hem dae, hem ranawe for sevem laef blo hem. Hem wakabaot for winim 40 day, gogo hem kasem wanfala cave. (Fas Kings 19:1-9) Taem hemseleva lo datfala cave, hem sei lo Jehovah: ‘Mi nomoa profet wea mi stap.’ (Fas Kings 19:10) Bat olketa nara profet still laef lo Israel. For example, Obadiah sevem 100 profet taem Jezebel laek killim olketa dae. (Fas Kings 18:7, 13) So why nao Elijah feel olsem no eniwan for helpem hem? Maet hem tingse evri profet wea Obadiah sevem olketa dae finis. Or maet hem feel olsem bikos no eniwan joinim hem for worshipim Jehovah bihaen Jehovah showimaot hem nao trufala God lo Maunt Carmel. Or maet hem tingse no eniwan minim situation blo hem and no eniwan kea abaotem hem. Bible no storyim why Elijah hem feel olsem. Bat iumi sure Jehovah minim why Elijah feel olsem and wanem Hem bae duim for helpem hem.

5. Hao nao Jehovah helpem Elijah for luksavve hem stap witim Elijah?

⁵ Jehovah duim samfala samting for helpem Elijah. Hem encouragem Elijah for storyim feeling blo hem. Tufala taem hem askem Elijah: “Wanem nao yu duim long hia?” (Fas Kings 19:9, 13) Lo tufala taem hia Jehovah lisin lo prea blo Elijah. Jehovah showimaot hem minim feeling blo Elijah taem hem helpem Elijah for luksavve hao hem no lusim hem and hem garem bigfala paoa. Hem talem Elijah tu hao staka Israelite stap wea still worshipim hem. (Fas Kings 19:11, 12, 18) Masbi Elijah barava hapi bihaen hem storyim feeling blo hem lo Jehovah, and lukim hao Jehovah stap witim hem. Jehovah givim samfala important assignment lo Elijah. Hem askem Elijah for anointim Hazael for king ovarem Syria, Jehu for king ovarem Israel, and anointim Elisha for kamap profet. (Fas Kings 19:15, 16) Olketa assignment wea Jehovah givim lo Elijah helpem hem for garem positive tingting. And tu, Jehovah talem Elisha for waka witim Elijah. Hao nao iumi savve kasem help blo Jehovah taem iumi feel olsem no eniwan helpem iumi?

6. Wat nao iu savve prea abaotem taem iu feel olsem no eniwan for helpem iu? (Sams 62:8)

⁶ Jehovah laekem iumi for prea lo hem. Hem lukim olketa hard taem wea kasem iumi, and hem sei bae hem lisin lo olketa prea blo iumi enitaem. (1 Thess. 5:17) Hem hapi for herem olketa prea blo olketa wea worshipim hem. (Provebs 15:8) Wat nao iu savve prea abaotem taem iu feel olsem no eniwan for helpem iu? Olsem Elijah, iu savve storyim feeling blo iu lo Jehovah. (Readim Sams 62:8.) Talem hem olketa wari blo iu and hao datwan affectim iu. Askem Jehovah for helpem iu for savve hao for deal witim datwan. For example, sapos iuseleva lo skul and iu fraet for givim witness, askem Jehovah for helpem iu for no fraet for story. Iu savve askem hem for givim iu wisdom for explainim biliv blo iu. (Luke 21:14, 15) Sapos iu depress or discourage, askem Jehovah for helpem iu for no hol bak for story witim wanfala mature brata or sista. Askem Jehovah tu for helpem datfala brata or sista for minim feeling blo iu. Storyim feeling blo iu lo Jehovah, lukim hao hem ansarem prea blo iu, and acceptim help wea olketa narawan givim. Datwan bae mekem iu luksavve Jehovah stap witim iu.

7. Wat nao iumi lanem from example blo Mauricio?

⁷ Jehovah givim iumi waka wea mekem iumi hapi. Iumi savve sure Jehovah lukim and tinghae lo evri samting wea iumi duim lo kongregeson and lo ministry. (Sams 110:3) Taem iumi busy lo disfala waka, hao nao datwan helpem iumi taem iumi feel olsem no eniwan sapotim iumi? Tingim example blo Mauricio,b wanfala young brata. No longtaem bihaen Mauricio baptaes, gud fren blo hem isisi lusim truth. Mauricio sei: “Taem mi lukim hem wikdaon and isisi lusim truth, hem mekem mi no sure sapos mi savve keepim promis blo mi for gohed worshipim Jehovah. Mi feel olsem mi no garem eniwan for sapotim mi, and mi tingse no eniwan bae minim feeling blo mi.” Wat nao helpem Mauricio? Hem sei: “Mi duim moa samting lo ministry. Datwan helpem mi for no tingim miseleva nomoa and for no feel sorre. Mi hapi and mi no lonely taem mi waka witim olketa narawan lo ministry.” Nomata maet iumi no savve go aot lo ministry witim olketa narawan, taem iumi duim leta raeting and telephone witnessing witim olketa, datwan bae strongim iumi. Wat moa helpem Mauricio? Hem sei: “Mi busy lo kongregeson tu. Mi waka hard for redyim and duim gud olketa student part lo meeting. Taem mi duim olsem, mi luksavve Jehovah and olketa narawan hapi lo mi.”

TAEM IUMI DISCOURAGE FROM IUMI FEISIM BARAVA HARD TAEM

8. Hao nao iumi savve feel taem iumi feisim olketa problem?

⁸ Iumi savve lo olketa last day bae iumi feisim olketa hard taem. (2 Tim. 3:1) Bat maet iumi seke taem wanfala hard taem kasem iumi wea iumi no expectim. Maet seknomoa iumi kasem problem saed lo selen, maet iumi kasem big sik, or maet samwan wea iumi lovem hem dae. Maet datwan mekem iumi wari and discourage, especially taem iumi kasem problem afta problem or tu-thri problem lo semtaem. Bat hem gud for tingim hao Jehovah hem lukim olketa hard taem blo iumi, and hem bae helpem iumi for deal witim datwan.

9. Storyim samfala hard taem wea kasem Job.

⁹ Tingim example blo datfala faithful man Job. Hem kasem staka hard taem insaed short taem nomoa. Insaed wanday, Job herem hao samfala stealim olketa animal blo hem, staka animal and olketa wakaman blo hem tu dae, and worse samting, evri pikinini blo hem dae. (Job 1:13-19) Taem Job sorre yet wanfala big sik kasem hem. (Job 2:7) From situation blo Job hem nogud tumas, hem sei: “Mi givap long disfala laef nao. Mi les nomoa fo laef.”​—Job 7:16.

10. Wat nao Jehovah duim for helpem Job deal witim olketa hard taem wea hem feisim? (Lukim piksa lo front page.)

¹⁰ Jehovah lukim hard taem wea Job kasem. From Jehovah lovem Job, hem duim samting for helpem hem for no givap and for gohed faithful. Jehovah story witim Job. Hem remindim hem hao Hem garem bigfala wisdom and hao hem barava lukaftarem olketa animal. And hem storyim olketa spesol samting abaotem staka animal wea hem wakem. (Job 38:1, 2; 39:9, 13, 19, 27; 40:15; 41:1, 2) Jehovah iusim tu Elihu, wanfala faithful young man, for strongim and comfortim Job. Elihu talem hem hao Jehovah evritaem rewardim olketa wea faithful. Bat Jehovah iusim Elihu tu for kaonselem Job. Elihu helpem Job for no tingting tumas abaotem hemseleva taem hem remindim Job hao position blo Jehovah hem hae tumas winim iumi olketa man. (Job 37:14) Jehovah givim tu assignment lo Job for prea for thrifala man wea no talem tru samting lo hem. (Job 42:8-10) Distaem, hao nao Jehovah helpem iumi taem iumi kasem olketa hard taem?

11. Wat nao samfala scripture wea savve comfortim iumi taem iumi kasem olketa hard taem?

¹¹ Jehovah no story witim iumi olsem hem story witim Job, bat hem givim iumi Bible. (Rome 15:4) Hem comfortim iumi from hem givim iumi hope for future. Hem gud for tingim samfala scripture lo Bible wea savve comfortim iumi taem iumi kasem olketa hard taem. Wanfala scripture sei, no eni samting, wea minim tu olketa hard taem, “savve stopem iumi for no kasem love bilong [Jehovah].” (Rome 8:38, 39) Jehovah sei tu hem “redi nomoa fo helpem eniwan hu hemi kol go long hem” lo prea. (Sams 145:18) Jehovah sei sapos iumi trustim hem bae iumi savve deal witim eni hard taem, and savve gohed hapi. (1 Cor. 10:13; Jas. 1:2, 12) And tu, Bible remindim iumi hao olketa hard taem wea iumi kasem hem for shortfala taem nomoa taem iumi markem witim laef for olowe. (2 Cor. 4:16-18) Jehovah sei tu bae hem finisim Satan and olketa narawan wea kosim olketa samting wea mekem iumi for safa. (Sams 37:10) Waswe, iu memorizim samfala scripture wea bae helpem iu for deal witim eni hard taem wea bae kasem iu?

12. Wat nao Jehovah laekem iumi for duim mekem iumi kasem gud samting from Bible?

¹² Jehovah laekem iumi for markem taem for studyim Bible evritaem and for ting raonem. Taem iumi followim wanem iumi lanem, datwan bae strongim faith blo iumi and bae iumi fren gud witim Jehovah, and iumi bae fit for deal witim eni hard taem. And tu, Jehovah givim holy spirit lo olketa wea trustim toktok blo hem insaed Bible. Datfala spirit savve givim iumi “strong wea winim strong bilong man” for deal witim eni hard taem.​—2 Cor. 4:7-10.

13. Taem iumi kasem hard taem, hao nao spiritual kaikai wea “datfala wakaman wea faithful and wise” provaedem helpem iumi for no givap?

¹³ Jehovah iusim “datfala wakaman wea faithful and wise” for producem staka article, video, and music wea savve strongim faith blo iumi, and wea bae helpem iumi for gohed fren gud witim Jehovah. (Matt. 24:45) Iumi need for iusim gud evri samting hia wea Jehovah provaedem for iumi lo barava taem. Wanfala sista lo United States storyim hao hem tinghae lo olketa spiritual kaikai hia. Hem sei: “Insaed 40 year wea mi worshipim Jehovah, staka taem mi kasem olketa hard taem wea testim faith blo mi.” Grandadi blo hem dae from draeva blo nara car hem drunk and bangam car blo hem, then dadi and mami blo hem kasem big sik gogo tufala dae tu, and tufala taem cancer kasem hemseleva. Wat nao helpem hem for no givap? Hem sei: “Jehovah hem evritaem lukaftarem mi. Spiritual kaikai wea datfala wakaman wea faithful and wise provaedem helpem mi for no givap, and mi savve talem sem toktok wea Job talem. Hem sei: ‘Go kasem taem mi dae, mi bae gohed faithful!’”​—Job 27:5, NWT.

14. Hao nao Jehovah iusim olketa brata sista for sapotim iumi taem iumi feisim olketa hard taem? (1 Thessalonica 4:9)

¹⁴ Jehovah trainim pipol blo hem for showimaot love and for comfortim each other lo olketa hard taem. (2 Cor. 1:3, 4; readim 1 Thessalonica 4:9.) Olsem Elihu, olketa brata and sista laekem tumas for helpem iumi for gohed faithful taem iumi kasem hard taem. (Acts 14:22) For example, tingim hao olketa brata and sista lo kongregeson blo Diane encouragem and helpem hem for gohed faithful bihaen hasband blo hem kasem big sik. Hem sei: “Nomata disfala situation hem no isi for mitufala, mitufala luksavve Jehovah barava helpem mitufala. Jehovah iusim kongregeson for sapotim mitufala. From olketa brata and sista visitim, hagem, and ringim mifala, datwan mekem mifala for no givap. Mi no savve draev, bat olketa brata and sista mek sure mi savve go lo olketa meeting and preaching lo taem wea mi fit for duim.” Hem wanfala blessing for garem spiritual famili wea barava lovem iumi.

IUMI TINGHAE LO HAO JEHOVAH LUKAFTAREM IUMI

15. Why nao iumi sure iumi savve deal witim olketa hard taem wea kasem iumi?

¹⁵ Iumi evriwan bae feisim samfala hard samting lo laef. Bat olsem iumi lanem, Jehovah bae lukaftarem iumi. Olsem wanfala dadi wea lovem iumi, hem bae evritaem tingim iumi, hapi for herem iumi taem iumi ask for help, and bae sapotim iumi. (Aesaea 43:2) Iumi sure iumi savve deal witim olketa hard taem bikos hem provaedem evri samting wea iumi needim for deal witim datwan. Hem givim iumi Bible, staka spiritual kaikai, hem laekem iumi for prea lo hem enitaem, and hem iusim olketa brata and sista for helpem iumi.

16. Wat nao iumi need for duim for Jehovah gohed lukaftarem iumi?

¹⁶ Iumi hapi for garem wanfala Dadi lo heven wea laek for lukaftarem iumi. Bible sei: “Hemi gohed fo mekem yumi hapi.” (Sams 33:21) Taem iumi iusim gud evri samting wea Jehovah provaedem for helpem iumi, datwan showimaot iumi tinghae lo hem. Iumi need for duim best blo iumi for evritaem obeyim God and duim wanem hem laekem. Taem iumi duim olsem, hem bae lukaftarem iumi for olowe!​—1 Pet. 3:12.