1, 2. Olketa circuit overseer raonem world luksavve staka elder need for duim wanem samting?

WANFALA circuit overseer hem garem meeting witim olketa elder, and meeting hia hem klosap for finis. Hem barava tinghae long olketa brata hia wea waka hard long kongregeson, wea samfala long olketa olo winim hem. Nomata olsem, hem warim yet wanfala samting. Hem sei: “Olketa brata, wanem nao iufala duim for trainim olketa narawan for duim samfala waka moa long kongregeson?” Olketa elder hia savve circuit overseer encouragem olketa for duim diswan long last visit bilong hem. Gogo, wanfala elder sei: “For tok stret, mifala no duim datwan.” Olketa nara elder tu agree witim wanem datfala elder talem.

² Sapos iu wanfala elder, maet iu tu luksavve iu no duim staka samting for trainim olketa narawan. Olketa circuit overseer raonem world luksavve staka elder need for duim moa samting for trainim olketa brata wea young and olo for duim samfala waka moa for lukaftarem kongregeson. Bat maet diswan hem no isi. Why nao olsem?

3. (a) Wanem nao Bible talem wea showimaot hem important for trainim narawan, and why nao iumi evriwan shud interest long diswan? (Lukim footnote.) (b) Why nao maet hem no isi for olketa elder trainim narawan?

³ Iufala olketa elder savve hem important for trainim olketa brata long kongregeson.a Iufala luksavve iumi needim staka brata moa for strongim olketa kongregeson distaem, and for lukaftarem olketa niu kongregeson wea bae kamap long future. (Readim Isaiah 60:22.) Bible sei iufala shud teachim olketa narawan. (Readim 2 Timothy 2:2.) Nomata olsem, maet hem no isi for iu faendem taem for duim datwan. Iu mas lukaftarem famili, waka for selen, duim olketa waka long kongregeson, and duim olketa nara important samting tu. Hem tru, iumi evriwan busy, bat why nao hem barava important for iu markem taem for trainim narawan? Bae iumi storyim olketa reason why diswan hem important.

BIGFALA NEED HEM STAP FOR TRAINIM NARAWAN

4. Wanem nao maet wanfala reason why staka elder no trainim olketa brata?

⁴ Why nao maet hem no isi for faendem taem for trainim olketa brata long kongregeson? Maet samfala elder ting olsem: ‘Mi luksavve hem important for trainim narawan, bat mi garem olketa nara waka for duim long kongregeson wea important winim datwan. Nomata mi no trainim narawan distaem, kongregeson bae hem olraet nomoa.’ Waswe, hem stretfala tingting for garem? Hem tru, maet iu garem staka nara samting for duim. Bat sapos iu no trainim olketa brata distaem, maet gogo diswan bae affectim kongregeson.

5, 6. Wanem tokpiksa nao showimaot stretfala tingting wea olketa elder shud garem abaotem wei for trainim olketa brata?

⁵ Tingim disfala example: Man wea ownim trak hem savve hem mas evritaem changem oil long trak mekem trak hia gohed ran gud. Nomata olsem, maet hem ting hem moa important for putim petrol insaed long trak, bikos sapos trak no garem eni petrol bae hem no muv nao. And tu, maet hem tingse nomata hem no garem taem for changem oil, datfala trak bae hem still muv for lelebet taem. Bat hem danger samting for garem kaen tingting olsem. Sapos hem no changem oil evritaem, gogo datfala trak bae hem nogud, and hem mas spendem staka taem and selen for fixim datfala trak. Wanem nao iumi savve lanem from diswan?

⁶ Hem tru, olketa elder mas kwiktaem deal witim olketa important samting wea kamap long kongregeson. Sapos nomoa, kongregeson bae kasem nogud samting. Olsem man luksavve hem mas evritaem putim petrol long trak, olketa elder mas “luksavve long olketa samting wea barava important.” (Phil. 1:10) Bat maet samfala elder busy tumas long olketa important samting long kongregeson, so olketa no garem taem for trainim narawan. Diswan hem olsem man wea no changem oil long trak. Sapos olketa elder no trainim olketa brata, gogo kongregeson bae no garem inaf brata for duim evri waka.

7. Why nao iumi shud tinghae long olketa elder wea spendem taem for trainim olketa narawan?

⁷ So iumi mas no tingse hem no important for trainim olketa narawan. Olketa elder wea tingim wanem kongregeson bae needim long future and spendem taem for trainim olketa narawan, olketa duim wise samting and olketa barava helpem kongregeson. (Readim 1 Peter 4:10.) Wanem gud samting nao kongregeson kasem from diswan?

WISE SAMTING FOR DUIM

8. (a) Why nao hem important for olketa elder trainim olketa brata? (b) Olketa elder wea muv go long ples wea garem need olketa mas duim wanem important samting? (Lukim box “Wanfala Important Waka.”)

⁸ Evri elder, nomata olketa wea elder for longtaem finis, mas luksavve taem olketa gogo for olo bae olketa no fit for duim staka samting wea olketa duim distaem. (Mic. 6:8) And tu, olketa elder shud luksavve “seknomoa samting wea olketa no tingim” maet kasem olketa, wea mekem hem no isi for olketa duim waka bilong olketa long kongregeson. (Eccl. 9:11, 12; Jas. 4:13, 14) From olketa elder tingim pipol bilong Jehovah, olketa waka hard for trainim olketa young brata long kongregeson and teachim olketa brata hia wanem olketa lanem.—Readim Psalm 71:17, 18.

9. Why nao hem barava important for trainim olketa brata distaem?

⁹ Olketa elder wea trainim olketa narawan barava helpem and strongim kongregeson. Datfala training mekem staka nara brata fit for helpem olketa insaed long kongregeson for garem wan mind and gohed faithful for worshipim God. Hem barava important for olketa long kongregeson garem wan mind and faithful long olketa last day distaem, and long datfala big trabol wea klosap for kam. (Ezek. 38:10-12; Mic. 5:5, 6) So plis olketa elder, spendem taem for trainim olketa brata distaem.

10. Wanem nao maet wanfala elder mas duim mekem hem garem taem for trainim olketa narawan?

¹⁰ Hem tru, mifala luksavve iufala spendem staka taem for duim olketa important waka long kongregeson. So maet iu need for katdaon long haomas taem iu markem for duim samfala waka hia, and iusim datfala taem for trainim olketa brata. (Eccl. 3:1) Hem bae gud tumas for iusim samfala taem bilong iu for trainim narawan, and kongregeson bae kasem gud samting from datwan.

REDYIM HEART BILONG MAN

11. (a) Olketa idea wea olketa elder talem abaotem wei wea olketa trainim narawan hem pruvim wanem samting? (b) Olsem Proverbs 15:22 hem showimaot, why nao hem important for storyim olketa idea wea olketa elder hia talem?

¹¹ No longtaem go nomoa, samfala elder wea trainim olketa nara brata for duim moa waka long kongregeson storyim hao olketa duim datwan.b Nomata olketa elder hia kam from difren ples, bat samting wea olketa talem abaotem wei wea olketa trainim narawan hem klosap semsem. Datwan pruvim disfala important samting: Training wea kam from Bible hem helpem olketa brata wea stap long “olketa kongregeson long evri ples.” (1 Cor. 4:17) Long disfala study bae iumi storyim samfala idea wea olketa elder hia talem.—Prov. 15:22.

12. Wanem nao first samting wea elder wea trainim olketa narawan mas duim, and why nao olsem?

¹² First samting, elder mas redyim heart bilong brata wea hem laek trainim. Why nao diswan hem important? Olsem man wea wakem garden mas redyim graon bifor hem plantim eni seed, elder mas redyim heart bilong man bifor hem start for trainim hem. So wanem nao elder savve duim for redyim heart bilong man? Hem savve duim sem samting wea profet Samuel duim taem hem trainim narawan.

13-15. (a) Wanem nao Jehovah talem Samuel for duim? (b) Wanem nao Samuel duim for redyim Saul for niu assignment wea hem kasem? (Lukim piksa long start bilong study.) (c) Why nao olketa elder shud interest long story bilong Samuel?

¹³ Winim 3,000 year go finis, Jehovah sei long olo profet Samuel: “Tumoro long semtaem olsem distaem, bae mi sendem kam wanfala man from tribe bilong Benjamin for lukim iu. Iu mas anointim hem for leadim pipol bilong mi, Israel.” (1 Sam. 9:15, 16) Samuel luksavve hem bae no leadim nao olketa Israelite, and Jehovah laekem hem for markem wanfala niu leader. So Samuel ting raonem diswan and disaedem wanem hem bae duim for redyim datfala man for leadim olketa Israelite.

¹⁴ Long next day Samuel meetim Saul, and Jehovah sei long hem: “Diswan nao man wea mi storyim long iu.” Semtaem nomoa, Samuel start for followim wanem hem disaed for duim. Samuel laek story witim Saul, so hem invaetem Saul and wakaman bilong hem for kaikai witim hem, and givim tufala best ples for sidaon and olketa best meat. Samuel sei: “Iu kaikaim diswan bikos olketa keepim for disfala taem wea iu bae kam.” Bihaen olketa kaikai finis, Samuel invaetem Saul for go long haos bilong hem. Taem tufala wakabaot, tufala story gud. Taem tufala kasem haos bilong Samuel, tufala go ap long ruf bilong haos, and Samuel “gohed for story long Saul” go kasem taem olketa redi for sleep. Long next day, Samuel anointim Saul, kissim hem, and givim samfala instruction moa long hem. Bihaen datwan, Saul lusim Samuel and redi for duim assignment bilong hem.—1 Sam. 9:17-27; 10:1.

¹⁵ Hem tru, wei wea Samuel anointim Saul for kamap leader bilong olketa Israelite, hem barava difren from wei for trainim wanfala brata for kamap elder or ministerial servant long kongregeson. Nomata olsem, olketa elder savve lanem staka samting from wei wea Samuel redyim heart bilong Saul. Distaem bae iumi storyim tufala samting wea olketa elder savve lanem.

WILLING FOR TRAINIM NARAWAN AND KAMAP GUDFALA FREN

16. (a) Hao nao tingting bilong Samuel taem olketa Israelite talem hem olketa laekem wanfala king? (b) Hao nao tingting bilong Samuel taem Jehovah talem hem for anointim Saul?

¹⁶ Mas willing, and no hol bak. Taem olketa Israelite talem Samuel olketa laekem wanfala king for rulim olketa, datwan mekem Samuel feel nogud. (1 Sam. 8:4-8) Thrifala taem nao Jehovah talem Samuel for duim wanem olketa askem, bikos Samuel hem no laek for anointim wanfala king for olketa. (1 Sam. 8:7, 9, 22) Nomata Samuel hem feel olsem, hem no jealous or kros long man wea bae changem hem for leadim olketa Israelite. Taem Jehovah talem Samuel for anointim Saul, Samuel no hol bak for duim datwan. Hem willing for obey bikos hem lovem Jehovah, and no bikos hem samting wea hem mas duim nomoa.

17. Long wanem wei nao olketa elder savve followim example bilong Samuel, and why nao olketa hapi for duim datwan?

¹⁷ Distaem staka wea elder for longtaem finis followim example bilong Samuel for showimaot love and kaen long olketa brata wea olketa trainim. (1 Pet. 5:2) Olketa elder hia willing for trainim olketa narawan, and no hol bak for givim samfala privilege wea olketa garem long olketa brata wea olketa trainim. Long tingting bilong olketa elder hia, olketa “waka tugeta” witim olketa brata wea olketa trainim for lukaftarem kongregeson. (2 Cor. 1:24; Heb. 13:16) Olketa elder hia hapi taem olketa lukim olketa brata wea olketa trainim duim gudfala samting for helpem kongregeson.—Acts 20:35.

18, 19. Wanem nao elder savve duim for redyim heart bilong brata wea hem trainim, and why nao datwan hem important?

¹⁸ Kamap gudfala fren. Taem Samuel meetim Saul, hem no stretawe anointim hem for kamap king. Sapos hem duim olsem, Saul hem kamap king, bat bae hem no savve hao for leadim pipol bilong God. Samting wea Samuel duim nao hem spendem taem witim Saul for redyim hem for datfala niu assignment. Bifor Samuel anointim Saul, tufala kaikai tugeta, wakabaot tugeta, story tugeta for longtaem, and rest lelebet tu. Bihaen Samuel duim evri samting hia, hem savve hem taem nao for anointim Saul olsem king.

¹⁹ Olketa elder distaem shud duim sem samting tu. Bifor wanfala elder start for trainim wanfala brata, hem shud fren gud witim datfala brata. Wanem datfala elder duim for fren gud witim datfala brata wea hem trainim bae hem depend long wei and kastom bilong pipol long ples wea olketa stap. Bat nomata wanem ples iu stap, sapos iu spendem taem witim brata wea iu trainim, bae hem feel savve iu tingim hem. (Readim Rome 12:10.) Olketa brata wea iu trainim bae olketa tinghae long wei wea iu showimaot love and iu spendem taem witim olketa.

20, 21. (a) Wanem nao olketa elder mas tingim mekem olketa duim gud disfala waka for trainim narawan? (b) Wanem nao bae iumi storyim long nextfala study?

²⁰ Olketa elder, plis tingim diswan: For duim gud disfala waka for trainim narawan iu mas laek for duim disfala waka, and tu, hem important for iu lovem brata wea iu trainim. (Comparem John 5:20.) Why nao diswan hem important? Sapos brata wea iu trainim hem luksavve iu lovem hem, hem bae willing for duim samting followim wanem hem lanem. So olketa elder, traem best bilong iu for fren gud witim olketa wea iu trainim.—Prov. 17:17; John 15:15.

²¹ Bihaen elder hem redyim heart bilong man, hem savve start for trainim hem. Long nextfala study bae iumi storyim hao olketa elder savve duim datfala training.

1. (a) Hao nao tingting bilong pipol bilong God long bifor and distaem abaotem wei for trainim narawan? (b) Wanem nao bae iumi storyim long disfala study?

PIPOL bilong God savve hem important for trainim narawan. Olsem example, Abram and olketa man bilong hem “wea kasem training,” olketa win long faet taem olketa go for sevem Lot. (Gen. 14:14-16) Long taem bilong King David, olketa wea “kasem training” for singsing olketa praisem Jehovah. (1 Chron. 25:7) Distaem, iumi insaed long wanfala spiritual faet againstim Satan and world bilong hem. (Eph. 6:11-13) And tu, iumi waka hard for praisem Jehovah taem iumi story abaotem hem long nara pipol. (Heb. 13:15, 16) Olsem olketa servant bilong God long bifor, hem important for iumi mas kasem training tu. Long kongregeson, Jehovah givim olketa elder datfala waka for trainim olketa narawan. (2 Tim. 2:2) Wanem nao samfala elder duim for trainim olketa brata for lukaftarem kongregeson?

STRONGIM LOVE WEA DATFALA BRATA GAREM FOR JEHOVAH

2. Bifor elder start for trainim wanfala brata, maet wanem nao hem duim, and why nao olsem?

² Elder hem olsem man wea wakem garden. Bifor man wea wakem garden hem plantim eni seed, maet hem need for addim fertilizer long graon hia mekem olketa seed bae grow gud. Olsem tu, bifor elder start for trainim wanfala brata, maet hem laek for storyim samfala Bible principle long brata hia wea bae encouragem hem for followim wanem hem lanem.—1 Tim. 4:6.

3. (a) Hao nao elder savve iusim Mark 12:29, 30 for helpem brata wea hem trainim? (b) Why nao hem gud for elder prea witim brata wea hem trainim?

³ Hem important for elder mas savve long spiritual saed bilong brata wea hem laek trainim. For savve long datwan, maet iu savve askem hem hao nao wei wea hem disaed for dedicate long Jehovah hem affectim wanem hem duim long laef bilong hem. Taem iu askem hem datwan, maet hem lead go long wei for iutufala story abaotem hao for worshipim Jehovah long full heart. (Readim Mark 12:29, 30.) Maet iu savve prea witim hem tu and askem Jehovah for givim hem holy spirit for helpem hem followim training wea hem kasem. Taem datfala brata herem iu prea for hem, datwan bae encouragem hem for duim moa samting long waka bilong God!

4. (a) Wanem nao samfala scripture wea savve encouragem brata wea kasem training for gohed gud long spiritual wei? (b) Wanem goal nao olketa elder wea trainim narawan shud garem?

⁴ Taem iu start for trainim wanfala brata, hem gud for storyim samfala scripture wea savve encouragem hem for willing, duim gud olketa assignment bilong hem, and hambol. (1 Ki. 19:19-21; Neh. 7:2; 13:13; Acts 18:24-26) Olketa wei hia bae helpem hem for gohed gud long spiritual wei, olsem fertilizer hem helpem olketa plant for grow gud. Jean-Claude, wanfala elder from France, sei goal bilong hem nao for helpem brata wea hem trainim for disaedem samting followim olketa Bible principle. Hem sei: “Mi lukaotem eni chance for readim scripture witim hem wea bae helpem hem for barava tinghae long olketa nambawan samting insaed long Bible.” (Ps. 119:18) Wanem nao samfala nara samting wea iu savve duim for strongim brata wea iu trainim?

STORYIM OLKETA GOAL, TALEM REASON

5. (a) Why nao hem important for iu story abaotem olketa spiritual goal long brata wea iu trainim? (b) Why nao olketa elder shud trainim olketa brata taem olketa young yet? (Lukim footnote.)

⁵ Askem brata wea iu trainim wanem nao olketa spiritual goal wea hem garem. Sapos hem no garem eni goal, helpem hem for markem wanfala goal wea hem fit for kasem. Storyim wanfala goal wea iu garem bifor, and wei wea iu barava hapi taem iu kasem datfala goal. Olketa elder wea duim olsem helpem staka brata wea olketa trainim. Victor, wanfala elder and pioneer long Africa, sei: “Taem mi young, wanfala elder askem mi wanem nao olketa goal bilong mi. Datwan helpem mi for tingting strong abaotem ministry bilong mi.” Olketa brata wea elder for longtaem finis sei hem barava important for trainim olketa brata taem olketa young yet, maet taem olketa just kamap teenager. Iu savve givim olketa samfala waka long kongregeson wea olketa fit for duim. Sapos olketa brata kasem training taem olketa young yet, datwan bae helpem olketa for gohed strong long spiritual wei nomata taem olketa start for big and staka samting long world savve pullim tingting bilong olketa.—Readim Psalm 71:5, 17.a

6. Wanem gudfala example nao Jesus showimaot taem hem trainim olketa narawan?

⁶ Sapos iu laek for encouragem brata wea iu trainim for duim samfala waka moa long kongregeson, hem important for no just talem hem nomoa wanem for duim. Iu mas talem hem reason why hem shud duim datwan. Olsem example, Jesus, wea hem datfala Nambawan Teacher, hem talem olketa aposol for preach. Bat firstaem hem talem olketa reason why olketa shud obeyim hem. Hem sei: “God givim paoa long mi ovarem evri samting long heven and earth. So iufala go and teachim pipol long evri kantri for kamap disaepol bilong mi.” (Matt. 28:18, 19) Taem iu trainim narawan, hao nao iu savve followim disfala example bilong Jesus?

7, 8. (a) Taem olketa elder trainim narawan, hao nao olketa savve followim example bilong Jesus? (b) Why nao hem important for praisem brata wea iu trainim? (c) Wanem nao samfala samting wea olketa elder savve duim for trainim olketa narawan? (Lukim box “Hao for Trainim Olketa Narawan.”)

⁷ Taem iu askem wanfala brata for duim wanfala waka, storyim scripture wea showimaot reason why datfala waka hem important. Taem iu duim datwan, iu trainim hem for duim samting followim olketa Bible principle, and no followim olketa rul nomoa. Olsem example, sapos iu askem wanfala brata for klinim Kingdom Hall and wakem gud road wea go for kasem Kingdom Hall, maet iu savve showim hem Titus 2:10. Talem hem hao samting wea hem duim bae mekem pipol “barava tinghae long teaching bilong God.” And tu, talem hem for ting raonem hao disfala waka wea hem duim bae helpem olketa olo long kongregeson. Wei for story olsem witim hem bae trainim hem for tingim pipol, and no olketa rul nomoa. Taem hem luksavve olketa brata and sista kasem gud samting from waka wea hem duim, bae hem hapi for duim datfala waka.

⁸ Nara samting tu, taem hem followim training wea hem kasem, praisem hem. Why nao hem important for duim datwan? Tingim diswan: Wei for watarem garden nao hem savve mekem olketa plant for barava grow gud. Olsem tu, wei for praisem man wea iu trainim bae strongim hem and encouragem hem for duim moa samting long waka bilong Jehovah.—Comparem Matthew 3:17.

NARA SAMTING WEA MAET NO ISI FOR DEAL WITIM

9. (a) Why nao maet hem no isi for olketa elder wea stap long olketa rich kantri for trainim olketa nara brata? (b) Why nao Kingdom hem no first samting long laef bilong samfala young brata?

⁹ Olketa elder wea stap long olketa rich kantri maet faendem hem no isi for encouragem olketa young brata wea samting olsem 20 or 30 year, and wea baptaes finis, for duim samfala waka moa long kongregeson. Mifala askem samfala wea elder for longtaem finis, long 20-fala difren kantri, for storyim olketa reason why samfala young brata hol bak for duim samfala waka moa long kongregeson. Staka long olketa elder hia sei taem olketa brata hia growap dadi and mami no encouragem olketa for garem olketa spiritual goal. And taem samfala young brata laek for kasem olketa spiritual goal, dadi and mami encouragem olketa for markem goal for kasem hae education or for garem big waka! So Kingdom hem no first samting long laef bilong olketa young brata hia.—Matt. 10:24.

10, 11. (a) Wanem nao elder savve duim for helpem wanfala brata for isisi changem tingting bilong hem? (b) Wanem nao samfala scripture wea elder savve iusim for helpem brata hia, and why nao hem gud for duim diswan? (Lukim footnote.)

¹⁰ Sapos luk olsem wanfala brata hem hol bak for duim samfala waka moa long kongregeson, bae hem no isi for changem tingting bilong hem. Nomata olsem, sapos elder waka hard and patient bae hem savve helpem brata hia for garem stretfala tingting. Tingim diswan: Man wea wakem garden savve duim samfala samting for mekem wanfala plant for isisi grow stret. Long sem wei, elder savve helpem wanfala brata for isisi changem tingting bilong hem mekem hem willing for duim samfala waka moa long kongregeson. Hao nao elder savve duim diswan?

¹¹ Fren gud witim datfala brata. Talem brata hia hem fit for helpem kongregeson. Then, taem olketa chance kamap iu savve showim hem olketa scripture wea savve helpem hem for ting raonem wei wea hem dedicate long Jehovah. (Eccl. 5:4; Isa. 6:8; Matt. 6:24, 33; Luke 9:57-62; 1 Cor. 15:58; 2 Cor. 5:15; 13:5) Maet iu savve askem hem samfala kwestin olsem: ‘Wanem nao iu promisim long Jehovah taem iu dedicate long hem? Iu ting hao nao Jehovah feel taem hem lukim iu baptaes?’ (Prov. 27:11) ‘Hao nao Satan feel taem hem lukim iu baptaes?’ (1 Pet. 5:8) Olketa scripture hia savve barava kasem heart bilong datfala brata and helpem hem for changem tingting bilong hem.—Readim Hebrew 4:12.b

OLKETA WEA KASEM TRAINING, SHOWIMAOT IU FAITHFUL

12, 13. (a) Hao nao Elisha showimaot hem garem gudfala tingting taem Elijah trainim hem? (b) From Elisha hem faithful, wanem reward nao Jehovah givim long hem?

¹² Olketa young brata, iufala savve helpem kongregeson! Iufala shud ting hao long training wea iufala kasem from olketa elder? For ansarem disfala kwestin, bae iumi storyim samfala samting wea happen long Elisha, wea kasem training from Elijah.

¹³ Samting olsem 3,000 year go finis, profet Elijah askem Elisha for helpem hem. Elisha, wea young nomoa, hem stretawe go for helpem Elijah and hem duim olketa waka wea Elijah askem hem for duim. (2 Ki. 3:11) Elijah trainim Elisha for samting olsem sixfala year. Then, taem waka bilong Elijah olsem profet hem klosap for finis, hem talem Elisha for no followim hem moa. Bat thrifala taem nao Elisha sei: “Bae mi no lusim iu.” Hem barava laek for stap witim Elijah wea trainim hem. From Elisha hem faithful, Jehovah givim reward long hem. God letem hem for lukim taem wanfala big wind tekem Elijah go ap long skae.—2 Ki. 2:1-12.

14. (a) Hao nao olketa wea kasem training savve followim example bilong Elisha? (b) Why nao hem important for iu faithful for duim olketa assignment bilong iu?

¹⁴ Sapos iu nao kasem training, hao nao iu savve followim example bilong Elisha? Iu mas willing for duim eni assignment, nomata waka wea iu ting hem no important tu. Fren gud witim elder wea trainim iu. Talem hem iu tinghae long wanem hem duim for helpem iu, and showimaot iu laekem hem for gohed trainim iu. And barava important samting nao hem for iu faithful for duim olketa assignment bilong iu. Why nao diswan hem important? Taem iu faithful for duim olketa assignment bilong iu, olketa elder bae luksavve Jehovah laekem iu for kasem samfala privilege moa long kongregeson.—Ps. 101:6; readim 2 Timothy 2:2.

RESPECTIM OLKETA ELDER

15, 16. (a) Hao nao Elisha showimaot hem respectim Elijah wea trainim hem? (Lukim piksa long start bilong study.) (b) Wanem nao mekem olketa nara profet for trustim Elisha?

¹⁵ Example bilong Elisha showimaot hem important tu for olketa brata wea kasem training for respectim olketa elder. Bihaen Elijah and Elisha go visitim samfala profet long Jericho, tufala wakabaot go for Jordan River. Taem tufala kasem long there, “Elijah holem kaleko bilong profet wea hem werem, hem rolimap datfala kaleko and hitim long wata hia, and semtaem nomoa datfala river hem divaed nao.” Taem tufala akrosim datfala river, tufala wakabaot long drae graon and tufala “gohed for story taem tufala wakabaot go.” Elisha barava lisin gud long evri samting wea Elijah talem long hem. Elisha laek for gohed kasem training from Elijah, and hem no tingse hem savve finis long evri samting. Then wanfala big wind tekem Elijah go ap long skae, and Elisha wakabaot go bak long Jordan River. Taem hem kasem long there, hem hitim wata hia witim datfala kaleko bilong Elijah, and hem sei olsem: “Wea nao Jehovah, datfala God bilong Elijah?” Then nomoa, river hia hem divaed moa.—2 Ki. 2:8-14.

¹⁶ Waswe, iu lukim disfala first mirakol bilong Elisha hem semsem olsem mirakol wea Elijah just duim? Wanem nao iumi lanem from diswan? Elisha no tingse from hem nao niu profet, hem mas duim disfala waka long difren wei from hao Elijah duim. Taem Elisha duim olketa samting wea semsem olsem Elijah, datwan showimaot hem respectim man wea trainim hem, and datwan mekem olketa nara profet trustim Elisha. (2 Ki. 2:15) Elisha duim waka bilong profet for 60 year, and Jehovah givim hem paoa for duim staka mirakol winim Elijah. Wanem nao olketa brata wea kasem training distaem savve lanem from example bilong Elisha?

17. (a) Hao nao olketa brata wea kasem training distaem savve followim example bilong Elisha? (b) Taem iu gohed long waka bilong iu, maet wanem nao bae Jehovah helpem iu for duim?

¹⁷ Taem iu kasem samfala privilege long kongregeson, no tingse iu mas duim disfala waka long difren wei from hao olketa elder duim long bifor. No forgetim diswan: Reason why olketa change shud kamap, hem bikos kongregeson garem need, or bikos organization bilong Jehovah givim instruction for duim datwan. Iu shud no changem olketa samting long kongregeson bikos iuseleva nao laek for duim datwan. Taem Elisha duim olketa samting wea semsem olsem Elijah, datwan mekem olketa nara profet trustim Elisha, and hem showimaot hem respectim Elijah. Long sem wei, hem gud for iu duim olketa responsibility bilong iu followim hao olketa wea elder for longtaem finis olketa duim. Taem iu duim olsem, iu showimaot iu respectim olketa elder hia, and olketa brata and sista long kongregeson bae trustim iu. (Readim 1 Corinth 4:17.) Nomata olsem, taem iu gohed long waka bilong iu, bae iu changem samfala samting long kongregeson followim instruction wea iu kasem from organization bilong Jehovah. And olsem Jehovah helpem Elisha, gogo maet bae hem helpem iu tu for duim olketa waka wea winim waka wea olketa elder wea trainim iu olketa duim.—John 14:12.

18. Why nao hem barava important for trainim olketa brata long kongregeson distaem?

¹⁸ Mifala hope wanem iumi storyim long tufala study hia bae encouragem iufala olketa elder for markem taem for trainim olketa nara brata. And tu, mifala hope iufala olketa brata bae willing for kasem training, and followim wanem iufala lanem and lukaftarem pipol bilong Jehovah. Taem iufala olketa elder trainim olketa nara brata, diswan bae strongim olketa kongregeson evriwea long world. And tu, diswan bae helpem iumi evriwan for gohed faithful long taem bilong datfala big trabol wea klosap for kam.