Hao for Patient

“Evriday hasband and waef mas patient lo each other. Taem man hem singol, maet wei for patient hem no important samting lo hem, bat for garem gudfala marit hem barava important for patient.”—John.

• Why nao iu mas patient?

• Hao nao iu savve showimaot iu patient?

• “Hem barava important for patient”

Why nao iu mas patient?

• Taem iu marit bae iu savve gud lo olketa wik point blo marit partner blo iu.

  “Bihaen iu marit for lelebet taem, bae hem isi for lukluk nomoa lo olketa wik point blo marit partner blo iu. Taem iu start for tingim nogud wei blo hem, hem isi for iu no patient nao.”—Jessena.

• Sapos iu no patient, maet iu kwiktaem talem samting bat no tingting firstaem.

  “Mi savve kwiktaem tumas for talemaot feeling blo mi and samfala taem mi talem samting wea mi shud no talem. Sapos mi patient, mi savve ting raonem firstaem sapos mi need for talem samting or nomoa.”—Carmen.

  Bible sei: “Man wea garem love hem patient and kaen.” (1 Corinth 13:4) Hem fitim for tufala wea lovem each other for patient lo each other. Bat hem no evritaem happen olsem. John, wea iumi storyim finis, hem sei: “Hem isi for iumi no patient winim wei for patient. Iumi mas waka hard for patient.”

Hao nao iu savve showimaot iu patient?

• Taem seknomoa wanfala samting hem happen wea maet mekem hem hard for patient.

  Example: Marit partner blo iu talem samting wea no kaen. Maet first samting iu laek duim hem for talem nogud samting bak lo hem.

  Bible principle: “Hemi nogud fo yu kros kuiktaem, bikos hem nao wei blong krangge man.”—Eklesiastes 7:9.

  Hao for patient: Weit lelebet. Bifor iu talem eni samting lo marit partner blo iu, no kwiktaem for tingse masbi hem laek for tok spoelem iu. Disfala buk Fighting for Your Marriage hem sei: “Plande lo iumi savve feel nogud lo marit partner blo iumi no from wanem hem talem bat bikos lo wanem iumi tingse hem minim taem hem talem datfala samting.”

  

  Nomata sapos marit partner blo iu trae for mekem iu feel nogud, wei wea iu patient and no duim sem samting lo hem bae help for mekem iutufala stap gud tugeta. Bible sei: “No eni faeawud, faea bae dae.”—Provebs 26:20.

  “Sapos iu start for tingse waef blo iu hem enemy blo iu, iu mas stop and tingim reason why iu lovem hem and kwiktaem duim naes samting for hem.”—Ethan.

  Samting for tingim:

  • Wanem nao iu duim taem marit partner talem or duim samting wea no kaen lo iu?

  • Wanem nao iu savve duim for showimaot iu patient lo hem taem datwan hem happen narataem moa?

• Taem marit partner blo iu gohed duim sem samting wea mekem iu kros.

  Example: Marit partner blo iu evritaem leit, and iu mas weit for hem and diswan mekem iu kros.

  Bible principle: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.”—Colossae 3:13.

  Hao for patient: Trae for tingim wei for iutufala fren gud hem moa important winim feeling blo iuseleva. Tingim diswan, ‘Sapos mi feel nogud abaotem samting wea happen or argue witim marit partner blo mi abaotem datwan, waswe, bae datwan strongim wei wea mitufala fren gud or bae hem spoelem?’ And tingim tu hao “iumi evriwan savve sin staka taem.” (James 3:2) Diswan minim iu tu garem olketa wik point wea iu need for waka lo hem.

  “Samfala taem mi savve patient witim fren blo mi winim hasband blo mi. Maet hem bikos mi savve spendem moa taem witim hasband blo mi and mi lukim olketa wik point blo hem. Bat taem mi patient hem showimaot mi lovem and respectim hem, and wei for duim olsem hem barava important lo marit blo mitufala.”—Nia.

  Samting for tingim:

  • Waswe, iu patient witim partner blo iu nomata hem garem olketa wik point?

  • Wanem nao iu savve duim for showimaot iu moa patient?