Waswe, Olketa Jehovah’s Witness Trae Forcem Pipol for Changem Biliv blo Olketa?
Nomoa, mifala no duim datwan. Lo Wastaoa magasin, wea hem nao main magasin blo mifala, hem sei hem no stret for forcem pipol for changem biliv blo olketaa Mifala no duim datwan bikos:
Jesus no forcem pipol for acceptim olketa teaching blo hem. Hem savve no staka pipol bae acceptim message blo hem. (Matthew 7:13, 14) Wanfala taem, samfala disaepol blo hem feel nogud lo samting wea hem talem. Hem letem olketa for go. Hem no trae for stopem olketa.—John 6:60-62, 66-68.
Jesus teachim olketa follower blo hem for no forcem nara pipol for changem biliv blo olketa. Winim wei for trae forcem pipol for acceptim gud nius abaotem Kingdom, hem talem olketa disaepol for lukaotem pipol wea tinghae lo datwan and wea willing for lisin.—Matthew 10:7, 11-14.
Hem iusles nomoa for putim hevi lo samwan for worshipim God bikos God hem acceptim nomoa worship wea kam from heart blo man.—Deuteronomy 6:4, 5; Matthew 22:37, 38.
Waswe, mifala trae changem biliv blo pipol?
Mifala preachim message from Bible evriwea lo world, and mifala duim datwan lo wei for preach lo “pablik and long haos tu haos.” (Acts 1:8; 10:42; 20:20) Samfala accusim mifala lo sem samting wea olketa accusim lo olketa Christian lo taem blo olketa aposol. Olketa sei mifala brekem law taem mifala duim preaching waka. (Acts 18:12, 13) Bat samting olketa accusim lo mifala hem no stret. Mifala no forcem pipol for garem sem biliv olsem mifala. Bat mifala luksavve, pipol mas garem chance for kasem moa information mekem olketa savve disaed followim wanem olketa lanem.
Mifala no forcem pipol for changem biliv blo olketa, or iusim selen or eni nara samting for switim pipol for joinim religion blo mifala. Mifala no join insaed politik, and mifala no olsem samfala religion wea iusim religion for haedem wei wea olketa insaed politik, wea datwan hem no mekhae lo God.b
Waswe, man garem raet for changem biliv blo hem?
Profet Abraham lusim religion blo olketa relative blo hem
Yes, Bible showimaot pipol garem raet for changem biliv and religion blo olketa. Hem storyim staka wea chus for no gohed followim biliv blo olketa relative blo olketa, mekem olketa savve worshipim tru God. Samfala wea duim olsem hem Abraham, Ruth, samfala pipol lo Athens, and aposol Paul. (Joshua 24:2; Ruth 1:14-16; Acts 17:22, 30-34; Galatia 1:14, 23) Bible showimaot tu man hem garem raet for lusim worship wea God laekem nomata datwan hem karangge samting for duim.—1 John 2:19.
Datfala Universal Declaration of Human Rights sapotim raet blo pipol for changem biliv blo olketa. United Nations sei datfala Universal Declaration of Human Rights hem “faondeson blo law wea defendim human raets evriwea lo world.” Datfala pepa sei evriwan garem “freedom for changem religion or biliv blo hem” and “for lukaotem, kasem, or givimaot information and olketa idea,” wea insaed diswan hem olketa idea wea join witim religion tu.c So from iumi garem raet for disaedem biliv blo iumiseleva, iumi mas respectim tu raet blo narawan for keepim biliv blo hem and for no acceptim eni teaching wea hem no agree lo hem.
Waswe, man wea changem biliv blo hem showimaot hem no respectim famili blo hem?
Nomoa. Bible encouragem iumi for respectim evriwan, nomata olketa garem difren biliv. (1 Peter 2:17) And tu, Olketa Jehovah’s Witness obeyim komand lo Bible for respectim parents blo olketa, nomata parents garem difren biliv.—Ephesus 6:2, 3.
Nomata olsem, no evriwan agree witim samting Bible talem. Wanfala woman wea growap lo Zambia hem sei: “Lo tingting blo pipol lo community blo mifala, man wea changem biliv blo hem no faithful lo famili and community blo hem.” Hem nao hao pipol ting lo disfala woman taem hem start for studyim Bible witim olketa Jehovah’s Witness and no longtaem bihaen disaed for changem biliv blo hem. Hem sei: “Evritaem parents blo mi sei olketa barava no hapi lo samting wea mi duim. Datwan mekem mi feel sorre, bikos mi laekem tumas for mami and dadi hapi lo mi. . . . Mi laek for faithful lo Jehovah, no lo wanfala church. Bat datwan no minim mi no faithful lo famili blo mi.”d
a Lukim Wastaoa blo January 1, 2002, page 12, paragraf 15.
b Olsem example, Lo samting olsem 785 C.E., Charlemagne mekem wanfala law for eniwan wea no willing for kamap Christian and baptaes mas dae. And tu, olketa sekson wea faet againstim each other lo Rome bifor saenem datfala Peace of Augsburg agreement lo 1555 C.E. Datfala agreement hem sei evri ruler blo olketa province mas Roman Catholic or Lutheran and evriwan lo province wea hem rulim mas followim religion blo hem. Olketa wea no willing for duim datwan mas go stap lo nara kantri.
c Olketa nara toktok wea sapotim olketa raet olsem hem datfala African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, ASEAN (Association of Southeast Asian Nations) Human Rights Declaration, European Convention on Human Rights, and International Covenant on Civil and Political Rights. Nomata olsem, staka kantri wea sei olketa sapotim olketa raet hia, no barava strong for duim datwan.
d Jehovah hem nem blo God olsem Bible talem.