Tingting Bilong Bible
Hao for Chusim Marit Partner
WANFALA SINGLE WOMAN KASEM DISFALA KWESTIN, “WASWE, ENITAEM IU TINGTING FOR MARIT?” “TINGTING?” HEM KWIKTAEM ANSA. “MI WARI.”
DISFALA short ansa bilong woman hia talem klia strong feeling bilong samfala pipol for garem love and wei for fren. Planti ting long wei for faendem marit partner olsem wanfala barava important samting long laef. Dastawe, olketa office wea pipol savve kasem help for faendem marit partner kamap evriwea long world. Nomata olsem, long planti ples long world, namba bilong olketa marit wea fail hem big winim namba wea win.
Long olketa Western kantri pipol savve chusim marit partner seleva. Bat hem kastom long samfala part bilong Asia and Africa for arrangem marit. Nomata wanem nao pipol duim, olketa mas no ting smol long diswan. No staka samting wea man mas disaedem long laef savve mekem hem hapi or sorre olsem wei for disaed for marit. Wanfala marit wea garem love savve kamap gud and mekem man satisfae. For tok stret, marit wea no garem wan mind savve kamap ples for kasem sorre and wari.—Proverbs 21:19; 26:21.
Olsem nara pipol, olketa tru Christian laekem marit bilong olketa for garem hapi and mekem man satisfae. Bat tu olketa barava want for mekem God hapi and honorim hem. (Colossians 3:23) From God nao Creator and Man Wea Startim marit, hem savve gud wanem nao barava need bilong iumi and wanem nao best for iumi. (Genesis 2:22-24; Isaiah 48:17-19) And tu, God lukim planti million gud and nogud marit, from taem wea man start for laef. Hem savve wanem samting nao gud and nogud. (Psalm 32:8) Thru long Word bilong hem, Bible, hem talem olketa barava klia principle wea savve helpem eni Christian for disaed gud. Wanem nao samfala long olketa principle hia?
Luk Winim Lukluk Bilong Body
Long ples wea pipol free for chusim hu nao bae olketa maritim, maet olketa meetim partner bilong olketa thru long samfala fren or famili. Planti taem, feeling for laekem samwan hem kam from man lukluk long body. Nomata diswan hem gud and strongfala paoa, Bible encouragem iumi for luk deep moa winim wanem iumi savve lukim sapos iumi tingting for marit.
Proverbs 31:30 hem sei: “Swit toktok maet giaman, and for luk naes maet hem samting nating; bat woman wea fraet long Jehovah nao hem fit for kasem praise.” Aposol Peter story abaotem “kaleko wea no savve rotten bilong kwaet and hambol spirit, wea God hem barava tinghae long hem.” (1 Peter 3:4) Tru nao, spiritual fasin bilong man or woman wea iu ting for maritim—wei wea dat wan hem worshipim God and love bilong hem for God and tu Christian fasin bilong hem—barava winim wei wea body bilong hem luk naes. Hem important for markem inaf taem for tingting gud, for chusim samwan wea garem olketa sem spiritual goal olsem iu and wea waka hard tu for showimaot frut bilong spirit bilong God. Diswan bae barava help for garem wanfala hapi marit.—Proverbs 19:2; Galatians 5:22, 23.
‘Marit Only Insaed Long Lord’
Hem barava important for garem olketa sem goal and biliv witim dat wan wea iu laek maritim. Marit hem wanfala bigfala challenge, hem needim tufala evriwan for changem fasin and tingting bilong olketa. For tok stret, sapos iutufala garem sem tingting long planti samting, bae hem moa isi for change.
Diswan helpem iumi for minim why nao aposol Paul encouragem olketa Christian for stap klia long wei for “join tugeta long rong wei witim olketa wea no biliv.” (2 Corinthians 6:14) Paul hem savve hao wei for maritim samwan wea no garem sem faith and no minim olketa Bible principle savve mekem raoa and wei for no agree kamap. Disfala kaonsel for ‘marit only insaed long Lord’ hem stret. (1 Corinthians 7:39) Hem showimaot tingting bilong God. Olketa wea wise for followim stap klia long planti serious trabol and problem.—Proverbs 2:1, 9.
Olketa Marit wea Pipol Arrangem
Waswe long olketa ples wea wei for arrangem marit hem part long kastom? Olsem example, long south India, samfala sei 80 percent long olketa marit, dadi and mami nao arrangem. Nomata Christian dadi and mami followim diswan or nomoa, hem samting for olketa seleva disaedem. Wei for arrangem marit olsem bae win sapos spiritual fasin nao bossim olketa.
Olketa wea saportim diskaen wei for arrangem marit talem hao hem putim responsibility for disaedem samting long pipol wea garem moa savve and mature. Wanfala Christian elder long Africa sei: “Samfala dadi and mami sei from pikinini hem young and no garem planti savve, bae pikinini no savve judgem gud sapos dis wan wea hem laek maritim hem mature long spiritual saed.” Wanfala traveling overseer long India sei tu: “Olketa young wan no garem planti savve abaotem laef and maet olketa disaedem samting followim feeling.” From dadi and mami savve gud long fasin bilong pikinini winim eniwan, olketa ting olketa nao best wan for chus long wisefala wei for pikinini bilong olketa. Bae hem wise tu for olketa ting raonem tingting bilong disfala young man or woman.
Bat, taem dadi and mami no followim olketa Bible principle, olketa maet safa from samting wea kamap sapos gogo disfala marit hem garem problem. From no inaf taem stap for tufala wea bae marit for savve gud long narawan, maet problem savve kamap. And taem hem happen, wanfala Christian dadi long India hem sei, “planti taem dadi and mami nao kasem blame.”
Olketa Christian dadi and mami wea arrangem marit mas ting raonem wanem nao muvim olketa. Sapos wei for aftarem material samting or for garem big nem nao bossim wei for arrangem marit, problem bae kamap. (1 Timothy 6:9) Dastawe, olketa wea arrangem marit mas askem olketa seleva, ‘Waswe, disfala wei for chusim marit partner hem for mek sure tufala wea bae marit bae garem hapi and strong spiritual laef? Or, waswe, hem for mekem famili garem bignem or kamap rich or for kasem selen?’—Proverbs 20:21.
Bible kaonsel hem klia and savve help. Nomata sapos iu seleva chusim or eniwan nao arrangem marit, fasin and spiritual saed bilong dat wan wea iu ting for maritim nao mas evritaem main samting. Taem diswan nao happen, Jehovah God, Man Wea Startim marit arrangement, kasem honor and olketa wea marit bae startim long wanfala strongfala spiritual faondeson. (Matthew 7:24, 25) Diswan bae barava mekem marit hapi and kamap gud tumas.