Piksa wea Hem Nating Forgetim

KAREN, wanfala Witness Bilong Jehovah winim 20 year finis, faendem hao dadi bilong hem nating interest for story witim hem abaotem religion. Bat, no longtaem go nomoa, diswan hem change. Hem stap long wanfala hospital for kamap strong bihaen operation. Wanday, for hem no boring tumas, hem readim wanfala full niuspepa. Hem feel sorre tumas. Bihaen taem hem go bak hom, hem ringim dota bilong hem. Karen story olsem: “Long telephone Dadi sei long mi, ‘Karen, world hem nogud nao.’ Hem barava feel sorre long hao pipol deal nogud long olketa pikinini.

“Bifor mi garem chance for encouragem hem, seknomoa hem sei: ‘Tufala woman kam long haos bilong mi tuday. Planti taem mi savve stap long garden bihaen long haos, bat olketa kasem mi taem mi stap long front. Wanfala woman showim mi piksa bilong wanfala naesfala garden. Mi laek for talem hem, “Iu shud lukim garden bilong mi bihaen long haos​—hem naesfala garden,” bat mi nating talem. Then hem sei hao klosap nao full world bae garem peace. Hem sei bae hem olsem datfala garden, for evriwan enjoyim. Mi nating tekem datfala buk. Bat bihaen olketa go, datfala piksa nating savve lus from mind bilong mi. Mi tingting nomoa abaotem datwan and idea bilong peace for evriwan. Waswe, iu savve wanem buk nao mi minim? Waswe, iu savve tekem kam wanfala copy for mi?’ ”

Karen hem hapi for duim. Piksa wea dadi bilong hem tok abaotem nao iu savve lukim long hia. Title bilong buk hia hem Savvy Wea Lead Go long Laef Olawe. Waswe, iu laek for savve moa abaotem promis bilong Bible hao God bae klosap mekem earth for kamap wanfala garden wea pipol bae stap long peace? Iu savve kasem disfala buk taem iu raetem information long daon and sendem go long address wea stap long daon or long address wea fitim long page 5 bilong disfala magasin.

□ Sendem mi wanfala copy long buk Savvy Wea Lead Go long Laef Olawe.

□ Plis kam lukim mi for wanfala free hom Bible study.