Barava Nogud Namba Bilong AIDS!
FROM MAN WEA RAET FOR WEKAP! LONG SOUTH AFRICA
THEMBEKA hem wanfala girl wea 12 year and hem stap long wanfala vilij long south part bilong Africa. Parents bilong hem dae from AIDS, and hem nao mas lukaftarem thrifala sista bilong hem wea ten, six, and foa year. “Olketa girl no garem eni selen and depend long kaenfala fasin bilong olketa neiba . . . lelebet bred, tu-thri potatoe,” wanfala niusman hem sei. Wanfala piksa long fofala girl hia wea no garem parents hem stap long front page bilong wanfala niuspepa long South Africa wea mekem report long mek-13 International Aids Conference, long July 2000 long Durban, South Africa.
Staka million pikinini wea no garem parents bikos long AIDS feisim semkaen samting olsem Thembeka and olketa smol sista bilong hem. Datfala conference storyim olketa wei for deal witim AIDS, olsem education long hao for no kasem AIDS thru long wei for iusim condom, medicine for AIDS wea no kost tumas and stap distaem, and moa selen for wakem wanfala vaccine for AIDS. Olketa storyim tu wei wea olketa woman, especially olketa young girl, isi for kasem AIDS.
Sorre tumas, samfala man lukaotem olketa pikinini wea lusim parents from AIDS, from olketa biliv hao wei for duim sex witim wanfala young girl bae finisim olketa sik wea kamaot from dirty fasin. And tu, planti man bae no maritim wanfala girl sapos hem no bornem pikinini firstaem. Diswan minim olketa tingim condom olsem samting wea stopem marit and wei for girl kamap wanfala mami.
Sorre tumas, planti girl no savve long danger bilong AIDS. South Africa niuspepa Sowetan storyim wanfala report wea kamaot long conference bilong United Nations Children’s Fund (UNICEF): “Survey bilong Unicef faendem hao 51 percent long olketa girl midolwan 15 and 19 year long South Africa no savve hao samwan wea luk healthy maet garem HIV and savve pasim long olketa.”
Nara samting moa wea mekem AIDS kamap big hem wei wea man spoelem woman saed long sex. Ranjeni Munusamy, wea go long datfala conference, reportim long Sunday Times bilong Johannesburg, South Africa: “Raf fasin againstim olketa woman, datfala barava nogud wei wea man iusim paoa, hem mekem hem hard for stopem HIV. Olketa difren kaen wei—rape, incest, killim waef and spoelem saed long sex—wea minim planti taem olketa forcem sex, diswan nao mekem chance moa hae for kasem HIV.”
Olketa namba wea kamaot long datfala conference hem mekem man fraet, olsem chart long narasaed showimaot. Evriday samting olsem 7,000 young pipol and 1,000 baby kasem HIV. Long wan year, 1999, olketa teacher bilong samting olsem 860,000 pikinini long sub-Saharan Africa dae from AIDS.
Long survey wea Medical Research Council bilong South Africa nao pablisim, 4.2 million pipol long South Africa kasem HIV, diswan minim 1-fala long evri 10-fala pipol. Diswan hem moa worse long olketa neiba kantri. The Natal Witness mekem report long namba wea U.S. Census Bureau nao givim: “Population bilong samfala kantri long Africa wea AIDS hem big tumas bae start for katdaon taem staka million dae from sik hia, and haomas year man savve laef bae katdaon kasem 30 year nomoa insaed next ten year.”
Sorre samting wea kamaot from AIDS hem pruv moa hao man stap long “nogud taem wea hard for deal witim” wea Bible profesi talem bae kamap “long olketa last day.” (2 Timothy 3:1-5) Olketa wea lovem Word bilong God, Bible, luk forward long taem wea AIDS hem finis evribit witim evri nara problem wea kasem man tu. Klosap nao Kingdom bilong God bae start for lukaftarem evri samting long disfala earth. Long niu world bilong raeteous fasin, wei for poor and kasem hard taem bae nomoa nao. (Psalm 72:12-14; 2 Peter 3:13) Winim datwan, evriwan long earth bae garem perfect health, and no eniwan bae sei: “Mi sik.”—Isaiah 33:24.
[Blurb long page 30]
Raonem world samting olsem 13,000,000 pikinini no garem parents bikos long AIDS
[Chart/Map long page 31]
(Lukim pablikeson for olketa nara information)
NAMBA BILONG FULL-GROWN MAN (15 kasem 49 YEAR) WEA GAREM HIV/AIDS, END LONG 1999
North America 890,000
Caribbean 350,000
Latin America 1,200,000
Western Europe 520,000
Eastern and Central Europe 410,000
North Africa and Middle East 210,000
Sub-Saharan Africa 3,400,000
South and Southeast Asia 5,400,000
East Asia and Pacific 530,000
Australia and New Zealand 15,000
[Credit Line]
Source: UNAIDS
[Piksa long page 31]
(Lukim pablikeson for olketa nara information)
PERCENT BILONG FULL-GROWN MAN (15 kasem 49 YEAR) WEA GAREM HIV/AIDS LONG 16 KANTRI LONG AFRICA, END LONG 1999
1 Botswana 35.8%
2 Swaziland 25.2
3 Zimbabwe 25.0
4 Lesotho 23.5
5 Zambia 20.0
6 South Africa 20.0
7 Namibia 19.5
8 Malawi 16.0
9 Kenya 14.0
10 C.A.R. 14.0
11 Mozambique 13.2
12 Djibouti 11.7
13 Burundi 11.3
14 Rwanda 11.2
15 Côte d’Ivoire 10.7
16 Ethiopia 10.6
[Credit Line]
Source: UNAIDS
[Piksa]
Thembeka witim olketa sista bilong hem
[Credit Line]
Photo: Brett Eloff