Muv Witim Wind
FROM MAN WEA RAET FOR WEKAP! LONG CANADA
“GIVIM MI SAMFALA NYLON AND ROPE DISTAEM, AND MI BAE SHOWIM IU SAMTING WEA BAE MEKEM WORLD SAPRAES!”—JOSEPH-MICHEL MONTGOLFIER, 1782.
WHOOSH! Wanfala fire sut go ap insaed wanfala maeti kalakala balloon and mekem hem for isisi go ap long skae. Wei for float long air insaed wanfala naesfala balloon, wea garem kala olsem rainbow mekem man feel naes tumas, and mekem man lelebet feel relax from wei for busy long laef. Hem “kwaet and long semtaem mekem man feel hapi,” wanfala man bifor wea interest tumas long hot-air balloon hem sei.
Start from taem wea Joseph-Michel and Jacques-Étienne Montgolfier win for testim wanfala balloon long olketa firstfala year bihaen 1780, olketa man barava interest nao long wei for flaem balloon. (Lukim box long daon.) Nomata olsem, start long olketa year bilong 1960 nao—taem olketa start for iusim material wea no isi for bone, witim sef wei for bonem propane gas wea no kost tumas for hotem and kontrolem air temperature insaed datfala balloon—wei for flae long balloon olsem sport hem really start.
Lukluk Gud Insaed
Sapos iu lukluk gud long wanfala balloon iu bae lukim olketa longfala pis kalakala kaleko wea olketa sewim ap tugeta wea smol long top and botom and waed long midol. Taem olketa fulimap witim air, big bilong samfala balloon savve kasem 15 meter waed and winim 25 meter hae.
Samfala man for flae wakemaot long mind olketa difren kaen sheip and size bilong balloon, wea samfala luk olsem olketa animal, botol and nomata sheip bilong olketa fani samting tu. Nomata wanem kaen sheip, rul abaotem hao for flaem olketa balloon hem no change.
Pilot and passenger evriwan go insaed wanfala laetfala bat strongfala samting wea olsem basket, wea olketa taemapem go andanit long mouth bilong datfala balloon witim olketa cable. Samfala basket olketa wakem from aluminum. Lukluk go ap lelebet winim datfala basket. Iu bae lukim wanfala samting for bonem fuel and regulator wea olketa taetem go long wanfala metal platform andanit hol bilong datfala balloon. Olketa fuel tank stap insaed datfala basket.
Prepare for Go Ap
Aeroplane hem needim longfala air-field for tek-off long hem. Bat, hot-air balloon hem needim nomoa open area wea size bilong hem samting olsem smol field. Important samting nao hem for faendem wanfala ples wea no eni samting antap savve satem. Waswe, iu laek for go insaed disfala kwaetfala aircraft? Bifor iu klaem insaed datfala basket, iu need for duim samfala samting.
Firstaem, olketa spreadim aot datfala emti balloon long graon followim direction bilong wind awe from datfala basket, wea olketa putim long saed bilong hem. Then olketa blowim go air insaed datfala balloon witim wanfala bigfala engine fan. Bihaen datwan, olketa putim hot air insaed datfala balloon for mekem hem go ap and liftimap stret datfala basket. Then, olketa chekim gud evri samting, insaed diswan hem olketa fuel connection, witim olketa laen for kontrol for mek sure olketa hange kam daon insaed datfala basket. Distaem pilot hem redy nao for tekem olketa passenger and go ap. Samfala man wea go ap long balloon karem radio and go ahed for story witim olketa crew long daon wea go followim olketa long wanfala trak for pikimap datfala balloon and olketa passenger taem olketa land.
Muv Witim Wind
Planti man wea go ap long balloon no want for go ap winim samting olsem 100 meter mekem olketa savve isisi float ovarem olketa ples and lukluk long olketa samting long daon. From hia, iu savve herem nomoa saond bilong laflaf and singaot bilong pipol long daon. Taem man lukim kam balloon hia from graon hem luk naes tumas and hem olsem wan kaen seed wea isisi float thru long air taem wind blowim. Samfala man for flae go ap kasem 600 meter hae or winim. Bat hem no sef for go ap winim 3,000 meter sapos man no iusim samting for brithim oxygen.—Lukim box “Flae Go Ap Hae.”
Taem iu long antap, hao nao bae iu kamdaon? Gravity. And iu savve kamdaon taem iu pullim datfala laen for kontrolem and aotem samfala hot air. Bat wei for travel forward hem narafala samting. Evritaem pilot hem depend long weather. Wanfala man wea garem savve long hao for flaem balloon hem sei: “Evritaem iu flae hem difren, from wind nao kontrolem direction and speed.” Strong bilong wind wea no semsem evritaem savve changem speed and direction bilong balloon. Planti taem wind savve muv long wanfala direction 100 meter from graon bat 200 meter from graon hem blow long opposite direction.
From balloon hem gogo followim speed bilong wind, iu feel olsem iu stap long sem ples taem earth hem tan raon andanit long iu. Smithsonian magasin hem sei: “Olketa man for flae long balloon followim speed bilong wind [so] taem olketa hae ap olketa savve spreadim aot wanfala map and wind no savve blowim awe.”
Kasem Savve for Flaem Wanfala Balloon
Gudfala taem for flae nao hem taem wea wind no strong tumas. Planti taem diswan hem no longtaem bihaen sun kamap or no longtaem bifor sun hem go daon. Morning taem nao gud, bikos hem nao taem wea air hem cold and balloon garem moa force for go ap. Danger bilong wei for flae long aftanun nao hem wei wea daylaet hem no long nao.
Man savve kasem savve long wei for flaem balloon bihaen hem duim planti practice. Main samting hem for faendem wind wea blow long direction wea iu laekem and followim datwan. Olketa man for flae wea garem savve savve tumas hao for duim wanem olketa kolem stair-stepping. Olketa savve go ap hae and keepim datfala balloon long sem ples. Then bihaen olketa wantaem mekem go fire, hot air go ap kasem top bilong balloon hia and liftimap go hae moa.
Stretfala taeming for mekem go fire and wei for lukluk gud long hem evritaem hem important samting for mekem pilot go ahed for kontrolem balloon. Nomata lelebet taem wea mind tan difren from wei for kontrolem savve mekem datfala balloon for go daon, wea iu no expectim. Wanfala pilot wea redy evritaem bae tingim hao datfala fire hem stap long botom, wea hem 15 go kasem 18 meter from top bilong datfala balloon, so bihaen olketa onem datfala fire hem bae tekem midolwan 15 and 30 second for hot air go ap long top bilong datfala balloon and liftim.
Wei for land savve mekem man fraet lelebet, especially sapos wind hem strong and iu bae land long smol open area! Long taem olsem, wanfala man wea savve gud long balloon sei, “hem moabeta for land long raf wei long raet ples winim wei for isisi land insaed fence bilong lion.” Bat hem naes tumas for isisi kamdaon taem wind barava fitim.
Planti difren kaen kalakala hot-air balloon for duim hapitaem bae kamap taem planti pipol tekpart long olketa resis, competition, festival and olketa narafala wei for flae for enjoy nomoa.
[Box/Pictures on page 22, 23]
HISTORY BILONG WEI FOR FLAE LONG BALLOON
Joseph-Michel and Jacques-Étienne Montgolfier, tufala son bilong wanfala rich man wea ownim company for wakem pepa long Annonay, France, kasem honor long history for buildim and flaem firstfala hot-air balloon. Early long olketa year bilong 1780 tufala first traem olketa pepa balloon, wea tufala bilivim hao smoke from grass and wool wea bone nao liftimap diswan long air. Bat no longtaem tufala luksavve hao datfala hot air nao liftimap datfala balloon.
Bihaen, taem olketa start for wakem olketa balloon from kaleko, olketa lukim hao sapos olketa flaem olketa balloon wea moa big, olketa savve go ap hae moa and olketa savve liftimap lelebet hevi samting moa. Long June 1783, long wanfala pablik ples long Annonay, olketa releasem balloon wea big winim eni nara balloon olketa buildim long datfala taem. Hem gogo ap for samting olsem ten minute bifor hem kam daon moa long graon.
From diswan, olketa bilivim hao hem taem nao for flaem wanfala balloon wea karem pipol. Bat, firstaem long September 1783, planti thousand pipol hipap long Versailles for lukim olketa releasem wanfala balloon wea karem wanfala kokorako, wanfala duck, and wanfala sheep. Thrifala animal hia winim datfala flae wea tekem eitfala minute and olketa no kasem eni problem. No longtaem bihaen datwan, long November 21, 1783, olketa flaem firstfala balloon wea karem olketa man. Olketa askem Louis XVI for letem tufala bigman for kasem datfala honor. Olketa flae from Château de la Muette and go ovarem Paris for samting olsem 8 kilometer. Bihaen samting olsem 25 minute, olketa mekem wanfala emergency landing taem fire kasem datfala balloon.
Long datfala taem, Academy of Sciences long Paris showimaot interest long disfala samting. Professor Jacques Charles, wanfala scientist wea staka pipol savve long hem, waka tugeta witim tufala kleva mechanic, Charles and M. N. Robert, and buildim firstfala balloon wea olketa fulimap witim hydrogen. Olketa testim long August 27, 1783. Hem float long air for 45 minute, and travel for samting olsem 24 kilometer, and gogo pipol kolem kaen balloon olsem wanfala Charlière. Kam kasem distaem pipol still iusim diskaen balloon wea klosap luk semsem olsem first wan wea olketa wakem.
[Box long page 25]
FLAE GO AP HAE
Wanfala man bilong England wea nem bilong hem Henry Coxwell hem kamap barava nambawan pilot for flae go ap hae. Long September 1862, James Glaisher bilong British Meteorological Society markem hem for tekem hem go ap hae for duim study saed long science. Tufala go ap kasem winim 9 kilometer and no iusim samting for givim oxygen for brith!
Bihaen tufala kasem winim 8,000 meter and tufala hard for brith nao long air wea cold and no garem inaf oxygen, Coxwell redyim balloon for go daon. Bat, bikos datfala balloon hem go ahed for tan raon, datfala rope for aotem air insaed balloon hem twist and Coxwell mas klaem go long olketa cable for stretem bak diswan. Glaisher hem haf dead finis, and Coxwell mas pullim datfala laen witim teeth bilong hem, from hand bilong hem paralyze nao from cold. Gogo, tufala start for go daon.
Gogo tufala kamap gud moa and slowim daon lelebet kam daon bilong datfala balloon. Tufala kasem samting olsem 10,000 meter, wanfala record wea no eni wan kasem for winim wan handred year. Disfala flae bilong tufala insaed wanfala open-basket balloon hem kamap wanfala long olketa nambawan samting wea pipol win for duim saed long wei for flae, from tufala duim diswan nomata tufala no garem samting for brithim oxygen long hem, no inaf kaleko for protectim tufala, and no garem savve abaotem weather antap.
[Piksa longn page 23]
Insaed bilong balloon taem olketa fulimap witim air
[Piksa long page 23]
Olketa putim hot air insaed for liftim datfala balloon
[Piksa long page 24]
Olketa difren kaen sheip bilong balloon