Vía Crucis—Festival Long Mexico
FROM MAN WEA RAET FOR WEKAP! LONG MEXICO
FOR celebratem dae bilong Jesus, pipol long Mexico garem samting olsem thri handred festival each year. Wanfala festival wea big tumas hem Vía Crucis wea olketa duim olketa march and actim moa olketa last day long laef bilong Jesus. Vía Crucis hem kam from Latin languis and hem minim “Wei bilong Cross.” Long Iztapalapa distrik bilong Mexico City, director bilong local House of Culture explainim hao nao diswan hem start: ‘Long 1833, datfala sik cholera kamap big tumas long Iztapalapa. For helpem pipol deal witim bigfala sorre wea olketa garem from staka pipol dae, olketa member bilong community startim disfala wei for actim moa wei wea Christ hem safa.’
Diswan nao samting wea happen insaed wanfala Vía Crucis: Staka pipol hipap for lukim wanfala drama abaotem olketa leader bilong Jew, olketa soldia, olketa aposol bilong Jesus, and olketa woman wea followim hem, and Mary tu. Wanfala young man actim Jesus. Hem rememberim samfala toktok insaed Bible mekem hem savve baeheartim taem diswan hem go ahed. Olketa wea duim akson iusim laea hair, beard, and mustache and werem olketa hevi kaleko. “Olketa bilong Nazareth” tu wakabaot followim “Jesus.” Olketa savve werem leather sandol, and werem crown bilong nila for copyim wei wea Jesus safa. Samfala taem, namba bilong olketa hia savve kasem 2,500. Long day, olketa karem olketa cross go ap long Cerro de la Estrella (Star Hill), ples wea olketa chusim for “nilam Jesus long cross.”
Olketa pipol for duim market singaot for pipol kam baem olketa hat, drink, balloon, loli for olketa pikinini, lotu piksa wea olketa drawim long feis or arm, and staka moa samting. Pipol savve pleim tu difren game and enjoyim olketa nara samting saed long hapitaem.
Long taon bilong Querétaro, olketa man wea repent from sin trae for wakabaot witim olketa chain wea olketa putim long leg. Long Taxco, olketa man karem olketa bandol nila long baksaed wea maet 40 go kasem 50 kilogram, for klosap faev hour. Olketa narawan whipim olketa seleva taem olketa wakabaot followim datfala march. Planti taem samfala hia need for go long hospital for treatment.
Kaen wei for worship olsem remindim iumi long toktok bilong aposol Paul taem hem tok againstim “wanfala wei for worship wea man seleva disaedem and giaman hambol fasin, wei for spoelem body.” (Colossians 2:23) Olketa tru Christian celebratem dae bilong Christ, bat stap klia long olketa kastom wea garem faondeson long samting wea false and wea againstim olketa Bible principle.