Hem Kam Witim Wind

Wanfala man hem wakabaot long olketa street bilong Mumbai, long India, taem wind blow lelebet and blowim kam wanfala tract long leg bilong hem. Disfala tract hem Kingdom Nius No. 36, wea garem title “Niu Millennium—Wanem Nao Future Garem for Iu?” Datfala title barava mekem hem interest. Hem kwiktaem pikimap and readim full tract. Diswan mekem interest bilong hem kamap moa big, and hem laek for savve moa, so hem ask for wanfala Bible and olketa nara pablikeson.

Olketa Jehovah’s Witness nao pablisim disfala tract, and hem garem olketa toktok wea savve strongim faith. Hem explainim long kliafala wei olketa problem wea iumi feisim, olsem sik, poor living, and war, evri samting hia kamap from “greedy fasin, wei for no garem trust, and selfish tingting—olketa fasin wea research bilong science, technology, or politik no savve finisim evribit.” And datfala tract showimaot tu klosap nao long future, God bae finisim evribit nogud fasin long disfala earth.

Waswe, iu laek for lane moa abaotem olketa promis bilong Bible for future? Olketa Jehovah’s Witness teachim planti million pipol long haos bilong olketa abaotem Bible, and olketa iusim olketa pablikeson wea kam from Bible, olsem disfala brochure Wanem Nao God Mas Kasem From Iumi? Disfala brochure ansarem olketa kwestin olsem: Hu nao God? Wanem nao purpose bilong God for earth? Wanem nao Kingdom bilong God? Hao nao Bible savve mekem famili laef bilong iu kamap moabeta?

Sapos iu laekem Olketa Jehovah’s Witness for kam long haos bilong iu for helpem iu for minim wanem nao God bae klosap for duim long future, olketa bae hapi for visitim iu and givim iu moa information abaotem Kingdom bilong God. Plis raet long spes long daon mekem Olketa Jehovah’s Witness savve helpem iu.

□ Sendem kam wanfala copy bilong brochure Wanem Nao God Mas Kasem From Iumi?

□ Plis kam lukim mi for wanfala free hom Bible study.