12 Garem Goal

WANEM HEM MINIM

Goal hem no samting wea iu tingim nomoa then bae hem happen. For kasem wanfala goal, iu mas garem plan, willing for changem samting, and for waka hard.

Iu savve markem olketa goal wea iu bae kasem insaed samfala day or week, or bihaen samfala month, or winim wanfala year. Iu savve kasem olketa goal wea iu plan for kasem insaed wanfala year taem iu kasem firstaem olketa nara smolfala goal.

WHY HEM IMPORTANT

Taem iu kasem olketa goal wea iu markem, datwan savve mekem iu feel gud abaotem iuseleva, fren gud witim olketa narawan, and iu bae barava hapi.

Barava sure long wanem for duim: Taem iu markem olketa goal wea isi for iu kasem, diswan bae helpem iu for markem olketa nara goal wea no isi for kasem. Datwan savve mekem iu no fraet tu for feisim eni hard samting, olsem wei for no letem olketa narawan switim iu for duim eni rong samting.

Fren witim olketa narawan: Pipol laek for fren witim man wea garem olketa goal bikos hem savve long wanem hem laekem, and hem willing for waka hard for kasem datwan. Wanfala best wei wea pipol savve fren gud tugeta hem taem wea olketa waka tugeta for kasem sem goal.

Hapi. Taem iu markem goal and iu kasem datwan, iu bae barava hapi.

“Mi laekem tumas for garem olketa goal, bikos datwan bae mekem mi busy and mi garem samting for evritaem luk forward for kasem. And taem iu kasem goal wea iu markem, iu barava feel gud and maet iu ting olsem, ‘Mi duim nao! Mi kasem nao wanem mi planim.’”—Christopher.

BIBLE PRINCIPLE: “Sapos yu wari long win, bae yu no save plantem gaden blong yu. An sapos yu wari long olketa klaod blong ren, bae yu no tekemaot kaikai long gaden.”—Eklesiastes 11:4.

WANEM IU SAVVE DUIM

For markem and kasem olketa goal, duim olketa samting hia.

Markem goal. Listim olketa goal bilong iu, then chusim which wan nao iu laek for kasem firstaem, which wan nao second, which wan nao mek-thri, and olsem.

Mekem plan. Duim evri samting hia for each goal wea iu markem:

• Markem date wea hem fitim for iu kasem datfala goal.

• Savve long wanem iu need for duim for kasem datfala goal.

• Luksavve long eni hard samting wea bae kamap, and ting raonem hao for deal witim datwan.

Duim samting. Iu no need for weit go kasem taem iu savve long evri samting bifor iu start for duim samting. Ting raonem disfala kwestin, ‘Wanem nao first samting wea mi savve duim for kasem goal bilong mi?’ Then iu duim nao. Evritaem chekim wanem nao iu duim finis for kasem datfala goal.

BIBLE PRINCIPLE: “Olketa plan bilong man wea waka hard and wea tingting gud firstaem bae win.”—Proverbs 21:5; NW.