Pipol Savve Stap Gud Tugeta

Samting wea helpem staka million pipol for no ting daonem narawan, hem nao for followim olketa Bible principle wea iumi storyim finis lo olketa nara article. Nomata olsem, iumi hard for stopem pipol for ting daonem narawan. So wanem nao savve helpem pipol for change?

Gudfala Gavman

Olketa gavman blo man no savve changem tingting blo pipol. Bat waswe, eni gavman stap wea savve duim datwan?

For stretem tingting blo pipol datfala gavman bae need for

1. 1. Helpem pipol for laek changem hao olketa ting lo narawan.

2. 2. Finisim wei wea pipol safa mekem olketa no tingim moa nogud samting wea kasem olketa bifor.

3. 3. Garem leader wea treatim evriwan semsem.

4. 4. Teachim pipol for stap gud tugeta.

Bible sei wanfala gavman olsem stap finis. Gavman hia hem “Kingdom bilong God.”—Luke 4:43.

Wanem nao bae datfala gavman duim?

1. Teachim Pipol Stret Samting

“Bae olketa lanem stretfala wei blong yu.”—AESAEA 26:9.

“Bikos olketa falom disfala stretfala wei, bae olketa save stap long piis, an bae olketa save stap gudfala olowe an no wari moa long enisamting.”—AESAEA 32:17.

Wanem nao tufala verse hia minim? Kingdom blo God bae teachim pipol stretfala samting. Taem pipol lanem wanem hem stret, datwan bae helpem olketa for no ting daonem narawan. Then bae olketa lovem evri difren kaen pipol.

2. Finisim Wei for Safa

God “bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—REVELATION 21:4.

Wanem nao verse hia minim? Kingdom blo God bae finisim evri samting wea no stret mekem pipol no safa moa. Bae pipol no gohed tingim nogud samting wea happen lo olketa bifor and no gohed heitim man wea duim datwan.

3. Garem Gudfala Leader

“Hemi no jajem man jes long wanem hemi herem an lukim, bat bae hemi jajem . . . olketa pua pipol long stretfala wei.”—AESAEA 11:3, 4.

Wanem nao verse hia minim? Taem Jesus Christ hem rul lo Kingdom blo God lo heven, bae hem no favorim evriwan. Jesus bae no mekhae lo wanfala kantri winim nara kantri, and hem bae mek sure evriwan followim olketa law blo datfala gavman.

4. Bae Evriwan Stap Gud Tugeta

Kingdom blo God teachim pipol for garem “love, wan mind, and wan tingting.”—PHILIPPI 2:2.

Wanem nao verse hia minim? Evriwan wea stap anda lo Kingdom blo God bae stap gud tugeta bikos olketa lovem each other.