Leson 5
Wanem Nao Purpose Bilong God for Earth?
Why nao Jehovah workim earth? (1, 2)
Why nao earth hem no paradaes distaem? (3)
Wanem nao bae happen long badfala pipol? (4)
Long future, wanem nao bae Jesus duim for sik pipol? olketa olo? olketa wea dae finis? (5, 6)
For kasem olketa blessing long future, wanem nao iu need for duim? (7)
1. Jehovah workim disfala earth for olketa man stap hapi long hem for olowe. Hem laekem raeteous, hapi pipol for stap olowe long disfala earth. (Psalm 115:16; Isaiah 45:18) Earth bae nating finis; hem bae stap olowe.—Psalm 104:5; Ecclesiastes 1:4.
2. Bifor God workim man, Hem choosim wanfala smallfala part long earth and mekem kamap paradaes wea luk nice tumas. Hem kolem disfala ples, gaden bilong Eden. Long there nao hem putim firstfala man and woman, Adam and Eve. Hem purpose bilong God for tufala mas garem pikinini and fulimap disfala earth. Go-go olketa bae mekem disfala full earth kamap paradaes.—Genesis 1:28; 2:8, 15.
3. Adam and Eve sin taem tufala mean for brekem law bilong God. So Jehovah aotem tufala from gaden bilong Eden. Paradaes hem finis nao. (Genesis 3:1-6, 23) But Jehovah no forgetim purpose bilong hem for disfala earth. Hem promis for mekem earth kamap paradaes, wea olketa man bae stap for olowe. Hao nao bae hem duim diswan?—Psalm 37:29.
4. Bifor disfala earth savvy kamap paradaes, badfala pipol mas finis. (Psalm 37:38) Diswan bae happen long Armageddon, wea hem nao war bilong God for finisim badfala fasin. Bihaen, Satan bae stap insaed long prison for 1,000 year. Diswan hem meanim no eni badfala man bae stap for spoelem earth. Pipol bilong God nomoa bae stap.—Revelation 16:14, 16; 20:1-3.
5. Then Jesus Kraest bae rul olsem King ovarem disfala earth for 1,000 year. (Revelation 20:6) Hem bae easyeasy aotem sin from mind and body bilong iumi. Iumi bae kamap perfect olsem Adam and Eve bifor they sin. Then sik, way for olo, and dae bae finis. Olketa sikman bae kamap gud moa, and olketa olo bae kamap young moa.—Job 33:25; Isaiah 33:24; Revelation 21:3, 4.
6. Insaed long Wan Thousand Year Rul bilong Jesus, olketa faithful man bae work for mekem full earth kamap paradaes. (Luke 23:43) And tu, planti million pipol wea dae finis bae resurrect for laef moa long earth. (Acts 24:15) Sapos olketa duim samting wea God talem olketa for duim, olketa bae go ahed for stap long earth for olowe. Sapos no moa, olketa bae finis for olowe.—John 5:28, 29; Revelation 20:11-15.
7. So, firstfala purpose bilong God for disfala earth bae happen. Waswe, iu laek for kasem olketa blessing hia long future? Sapos olsem, iu need for go ahed for learn abaotem Jehovah and obeyim olketa samting wea hem talem iumi for duim. Way for attendim olketa meeting long Kingdom Hall bilong Olketa Witness Bilong Jehovah long ples bilong iu bae helpem iu for duim diswan.—Isaiah 11:9; Hebrews 10:24, 25.
[Piksa long page 10]
Paradaes hem finis
[Olketa piksa long page 11]
Bihaen long Armageddon, earth bae kamap paradaes