Truth Abaotem Soul Hem Important
“Iufala bae savvy long truth, and truth bae mekem iufala free.”—JOHN 8:32.
1. Why nao hem important for lukluk gud long olketa samting wea iumi believim abaotem soul and dae?
OLKETA belief abaotem dae and laef bihaen dae planti taem kamaot from religion and kastom bilong olketa man. Olsem iumi lukim finis, olketa belief olsem savvy barava different. Samfala believim hao soul kasem lastfala goal bilong hem bihaen hem born moa staka taem, samfala hao lastfala goal bilong iumi hem depend long wanfala full laef nomoa. From diswan, wanfala person maet sure hem bae kasem nambawan goal taem hem dae, narawan for kasem Nirvana, and narawan for kasem reward long heven. So, wanem nao hem truth? From samting wea iumi believim hem affectim tingting, samting iumi duim, and disaedem, waswe, fitim iumi for ting strong for faendem ansa long datfala kwestin?
2, 3. (a) Why nao iumi savvy trustim samting wea Bible talem abaotem soul? (b) Olsem Bible talem, wanem nao truth abaotem soul?
2 Barava oldfala buk long world, Bible, story abaotem history bilong man go back long creation bilong firstfala soul. Olketa teaching bilong hem free from olketa idea and kastom bilong man. Bible talemaot klia truth abaotem soul: Soul bilong iu hem iu nomoa, olketa wea dae finis nating stap moa, and olketa wea God rememberim bae resurrect long taem wea hem markem. Way for savvy long diswan meanim wanem samting for iu?
3 “Iufala bae savvy long truth, and truth bae mekem iufala free,” Jesus Kraest talem olsem for olketa follower bilong hem. (John 8:32) Yes, truth hem mekem man kamap free. But truth abaotem soul bae mekem iumi kamap free from wanem?
Free From Fraet and Way for Lus Hope
4, 5. (a) Truth abaotem soul hem aotem wanem kaen fraet? (b) Hao nao resurrection hope givim strong long wanfala teenager wea sik nogud?
4 “Planti pipol fraet long dae and trae for no ting abaotem,” The World Book Encyclopedia hem talem. “Datfala word ‘dae’ hem kamap samting wea pipol long Western kantri nating savvy tok abaotem,” wanfala man for raetem history hem talem. And long samfala ples olketa iusim toktok olsem “lus” and “pass awe” for story abaotem man hem dae. Disfala way for fraetem dae hem really way for fraetem samting wea olketa no savvy, bikos long planti pipol dae hem hard for meanim. Trufala savvy abaotem samting wea happen taem iumi dae hem aotem datfala way for fraet.
5 For example, ting long tingting bilong Michaelyn, wea hem 15 year. Hem garem leukemia and face-im nogud dae. Mami bilong hem, Paula, say: “Michaelyn say hem no worry abaotem way for dae bikos hem savvy dae hem for lelebet taem nomoa. Mifala story planti taem abaotem niu world bilong God and evriwan wea bae resurrect insaed. Michaelyn garem barava bigfala faith long Jehovah God and long resurrection—and no garem eni daot.” Resurrection hope mekem disfala strongfala young girl free from way for barava fraetem dae.
6, 7. Truth abaotem soul hem mekem iumi kamap free from wanem feeling for lus hope? Givim example.
6 Hao nao truth affectim dadi and mami bilong Michaelyn? “Dae bilong girl bilong mitufala pain tumas winim eni narafala samting wea happen long mitufala,” Jeff, dadi bilong hem talem. “But mitufala trust evribit long promis bilong Jehovah long resurrection, and mitufala luk forward wan day for holem moa Michaelyn. Datwan bae barava hapi taem!”
7 Yes, truth abaotem soul hem mekem man kamap free from feeling for lus hope wea kasem hem taem samwan wea hem love-im hem dae. Hem tru, no eni samting savvy aotem evribit pain and sorry wea man kasem taem samwan wea hem love-im hem dae. But, resurrection hope hem daonem datfala sorry and mekem hem fit for face-im datfala pain.
8, 9. Truth abaotem samting wea kasem olketa wea dae finis hem mekem iumi kamap free from wanem way for fraet?
8 Truth bilong Bible abaotem wanem nao kasem olketa wea dae finis hem mekem iumi free tu from way for fraetem olketa wea dae finis. Taem olketa learnim disfala truth, planti wea garem hevi bifor for keepim olketa kastom for pipol wea dae finis no worry moa long olketa curse, magic, and kastom samting, and tu olketa no offerim sakrifaes wea kost tumas for mek peace withim olketa laen dadi bilong olketa wea stopem olketa for kam back and spoelem olketa wea laef yet. Tru nao, from olketa wea dae finis “nating savvy long eni samting,” olketa samting olsem iusles nomoa.—Ecclesiastes 9:5.
9 Truth abaotem soul, wea stap insaed long Bible, hem barava mekem man kamap free and man fit for trustim. But tingim tu wanfala spesel hope wea Bible givim for iu.
[Blurb long page 29]
Truth abaotem soul mekem iu kamap free from fraet long dae, fraet long pipol wea dae, way for lus hope taem samwan iu love-im hem dae