TAEM iu read big, waswe, iu faendem hem hard lelebet for talem samfala toktok? Or taem iu standap front long wanfala audience for givim tok, waswe, iu stragol for tingim olketa word wea fitim? Sapos olsem, maet iu garem problem long wei for tok long smoothfala wei. Man wea tok long smoothfala wei hem savve read and tok long wei wea olketa word and idea kamaot long smoothfala wei, wea luk olsem hem isi. Hem no minim hem tok evritaem, tok fast tumas, or hem no tingting firstaem abaotem wanem hem talem. Toktok bilong hem here gud and naes. Wei for tok long smoothfala wei hem wanfala important point insaed long Theocratic Ministry Skul.

Planti samting maet mekem man no savve tok long smoothfala wei. Waswe, iu need for tingting gud long olketa samting hia? (1) Taem iu read long narawan, wei wea iu no savve gud long samfala word maet mekem iu hol bak lelebet. (2) Wei for stopstop olowe maet mekem tok no here smooth. (3) Wei for no prepare firstaem maet wanfala samting wea mekem disfala problem for kamap. (4) Taem hem story long wanfala grup, samting wea planti taem mekem man no savve tok long smoothfala wei hem wei wea hem no organizem gud datfala information. (5) Wei for no savve long staka word savve mekem man hol bak taem hem stragol for faendem olketa word wea fitim. (6) Wei for strongim tumas word bae katem daon wei for tok long smoothfala wei. (7) Wei for no savve gud long olketa rul bilong grammar maet help for mekem disfala problem kamap tu.

Sapos iu no savve tok long smoothfala wei, audience bae no lusim Kingdom Hall long really wei, bat mind nao bae lusim ples. From diswan, bae olketa no kasem tumas samting from wanem iu talem.

Long narasaed, mas careful nogud toktok wea fitim for hem strong and smooth hem ova tumas and mekem audience no feel isi. Sapos pipol wea garem difren kastom and living ting long wei wea iu toktok olsem ova tumas and no tingim feeling bilong narawan, bae iu no savve helpem olketa. Hem gud for tingim hao nomata aposol Paul garem bigfala savve olsem wanfala speaker, hem go long olketa long Corinth “long wei for wik and long fraet and long bigfala seksek” for mekem olketa no ting tumas long hem.—1 Cor. 2:3.

Olketa Samting for Stap Klia Long Hem. Planti pipol garem fasin for talem samfala toktok olsem “ammm” taem olketa story. Samfala, planti taem startim story long wei for sei “so” or “iu savve” nomata wanem nao olketa bae talem. Maet iu no savve haomas taem nao iuseleva duim sem samting. For faendaot, askem samwan for lisin taem iu story and for talem iu each taem iu talem kaen toktok olsem. Maet iu sapraes.

Samfala pipol read and toktok long wei for evritaem stop and talem moa samting wea olketa talem finis.

Olketa narawan start for talem samting bat bifor olketa finisim sentence olketa changem story bilong olketa. Nomata olketa savve story gud, wei for changem story olsem savve mekem story no here smooth tumas.

Hao for Kamap Moabeta. Sapos iu stragol for tingim word wea fitim, iu need for traem best bilong iu for mekem grow namba bilong olketa word wea iu savve long hem. Markem olketa word wea iu no savve long olketa insaed long Wastaoa, Wekap!, and olketa nara pablikeson wea iu readim. Faendem olketa insaed long dictionary, lukim hao nao for talem olketa and mining bilong olketa, and addim go long olketa word wea iu savve long hem finis. Sapos iu no savve kasem wanfala dictionary, askem samwan wea savve gud long datfala languis for helpem iu.

Wei for read big evritaem bae helpem iu for kamap moabeta. Markem olketa hardfala word, and talem big tu-thri taem.

For mekem iu savve read long smoothfala wei, hem important for minim wei wea olketa word waka tugeta insaed long sentence. Planti taem iu mas readim olketa sekson bilong olketa word mekem iu savve talem idea wea man raetem. Luksavve long olketa sekson bilong olketa word. Sapos iu need for duim, putim mark long olketa. Goal bilong iu hem no for just readim olketa word long stretfala wei, bat tu, for mekem klia idea bilong samting iu readim. Bihaen iu lukluk gud long wanfala sentence, lukluk long next wan go kasem taem iu studyim full paragraf. Luksavve hao wanfala point hem lead go long narawan. Then practice for readim big. Go ahed for readim paragraf go kasem taem iu savve readim and no mekem eni mistek or stop long ples wea no fitim. Then go moa long olketa nara paragraf.

Next samting, trae for read moa fast. Sapos iu minim wei wea olketa word waka tugeta insaed long sentence, bae iu fit for lukim winim wanfala word long wantaem and for tingim wanem nao shud kam next. Diswan shud barava helpem iu for read gud.

Wei for practicem reading evritaem hem gudfala training. Olsem example, readim big text and koment for each day; duim evritaem. Lane for mekem eye lukim olketa sekson bilong olketa word and readim olsem wanfala idea winim wei for just lukim olketa word wanwan.

For tok long smoothfala wei taem iu story witim samwan, iu need for tingting firstaem bifor iu tok. Mekem hem fasin bilong iu for duim olsem long evritaem iu story. Disaedem wanem nao olketa samting iu laek for talem and wanem nao first samting for talem, then start for story. No story kwiktaem. Trae for talem wanfala full idea long wei for no stop or changem story bilong iu. Maet iu faendem hem help for iusim olketa sentence wea short and simpol.

Sapos iu savve gud long wanem iu laek for talem, iu shud faendem hem isi for tingim olketa word for iusim. Planti taem, iu no need for chusim olketa word wea iu bae iusim. Hem moabeta for mek sure iu savve gud long datfala idea and then tingim olketa word for iusim taem iu go ahed for story. Sapos iu duim olsem, and sapos iu tingim idea wea iu laek for talem winim olketa word wea iu iusim, olketa word bae kam nomoa, and iu bae talem samting followim wanem iu tingim and feelim. Bat sapos iu start for tingim olketa word winim olketa idea, toktok bilong iu bae no smooth. Sapos iu practice, iu savve win for tok long smoothfala wei, wanfala important part bilong wei for story and read gud.

Taem hem kasem assignment for stand for Jehovah front long nation bilong Israel and front long Pharaoh bilong Egypt, Moses feel olsem hem no fit. Why nao olsem? Hem no savve tok long smoothfala wei; maet hem garem problem long toktok. (Ex. 4:10; 6:12) Moses talem olketa excuse, bat God no acceptim olketa. Jehovah sendem Aaron olsem man for toktok, bat Hem helpem Moses for toktok tu. Evritaem and long gudfala wei, Moses story no long olketa man wanwan and long olketa smol grup nomoa bat long full nation. (Deut. 1:1-3; 5:1; 29:2; 31:1, 2, 30; 33:1) Sapos iu duim evri samting wea iu fit for duim and trust long Jehovah, iu savve iusim toktok bilong iu for honorim God.

WEI for stop lelebet long ples wea fitim hem important. Diswan hem tru nomata iu givim wanfala tok or iu story long wanfala man. Sapos iu no duim, pipol bae no minim gud idea wea iu laek for talem. For stop lelebet long ples wea fitim bae help for mekem toktok bilong iu klia. Iu savve iusim tu for mekem pipol no forgetim olketa main point wea iu talem.

Hao nao iu savve minim wea nao for stop lelebet? For hao long nao iu shud stop lelebet?

Stop Lelebet Long Ples Olketa Markem. Wei for stop lelebet hem important part bilong languis wea iu savve raetem. Hem maet showimaot end bilong wanfala toktok or kwestin. Long samfala languis hem for markem toktok bilong wanfala man. Samfala taem hem showimaot wei wea wanfala part bilong sentence hem join witim nara part bilong hem. Man wea read long hemseleva savve lukim olketa mark for stop lelebet. Bat taem hem read big front long olketa narawan, voice bilong hem mas followim olketa mark insaed reading wea minim for stop lelebet. (For kasem moa information, lukim Study 1, “Stretfala Reading.”) Sapos iu no stop lelebet long ples wea olketa markem, diswan savve mekem hem hard for pipol minim samting wea iu readim or maet iu changem tu mining.

For join witim diswan, wei wea olketa raetem olketa idea insaed long sentence bae affectim wea nao for stop lelebet. Wanfala man for pleim music wea garem bignem hem sei: “Mi no pleim olketa note long wei wea moabeta winim planti nara man. Bat hao and wea nao for stop lelebet midolwan olketa note, datwan nao needim man for savve long hem.” Hem klosap semsem long wei for story. Wei for stop lelebet wea fitim bae mekem information wea iu preparem garem moa mining and here naes tumas.

Taem iu prepare for read long pablik, maet iu faendem hem help for putim olketa mark insaed samting iu bae readim. Drawim wanfala laen long ples wea iu bae need for stop for lelebet taem nomoa. Drawim tufala laen wea klosap long each other long ples wea stop hem bae moa long. Sapos iu faendem hem hard for readim samting long stretfala wei, and evritaem iu stop long rongfala ples, drawim olketa mark witim pencil for joinim tugeta olketa word wea iu mas readim tugeta. Then readim datwan from start go kasem end. Planti speaker wea garem savve duim olsem.

Planti taem wei for stop lelebet hem isi nomoa long toktok wea iu iusim evriday from iu savve long wanem iu laek for talem. Bat, sapos hem wei bilong iu for stop lelebet evritaem nomata hem no fitim samting wea iu talem, toktok bilong iu bae no muvim man and bae no klia. Samfala idea for kamap moabeta long diswan stap long Study 4, “Tok Long Smoothfala Wei.”

Stop Lelebet Taem Idea hem Change. Taem iu muv from wanfala main point go long narawan, wei for stop lelebet savve givim audience chance for ting raonem, for followim idea, for luksavve iu bae storyim difren samting, and for minim next point wea iu bae storyim long wei wea moa klia. Long sem wei wea hem important for trak hem slow daon taem hem raonem wanfala kona, hem important for stop lelebet taem iu change from wanfala idea go long narawan.

Samting wea mekem samfala speaker hariap go long nextfala idea and no stop lelebet hem wei for trae talem tumas information. Samfala duim olsem from olketa followim nomoa wei wea olketa toktok evritaem. Maet evriwan wea stap raonem olketa olsem tu. Bat datwan spoelem wei wea man savve teach gud. Sapos iu garem samting for talem wea fitim man for herem and rememberim, iusim inaf taem for mekem datfala idea hem klia. Luksavve hao wei for stop lelebet hem barava important for talem klia olketa idea.

Sapos iu bae givim tok from wanfala aotlaen, iu shud organizem information bilong iu long wei wea hem klia wea nao for stop lelebet midolwan olketa main point. Sapos iu readim wanfala manuscript, drawim laen long olketa ples wea hem change from wanfala main point go long next wan.

Taem iu go long nextfala point, wei wea iu stop lelebet hem moa long winim taem iu stop lelebet insaed long sentence—bat, hem shud no long tumas mekem tok hem muv slow. Sapos hem long tumas, audience bae tingse iu no prepare gud and iu trae for disaedem next samting for talem.

Stop Lelebet for Strongim Samting. Planti taem wei for stop lelebet for strongim samting hem barava pullim interest. For duim diswan iu stop lelebet bifor or bihaen wanfala toktok or kwestin wea iu talem strong. Diswan savve givim audience chance for ting raonem wanem iu talem, or hem mekem olketa interest for herem next samting wea iu bae talem. Olketa hia no semsem. Disaed which wan hem fitim for iusim. Bat remember hao wei for stop wea hem for strongim samting, hem for toktok wea barava important. Sapos iu duim evritaem, hem bae mekem olketa toktok olsem iusles nomoa.

Taem Jesus hem read big insaed long synagogue bilong Nazareth, hem iusim wei for stop lelebet long gudfala wei. Firstaem, hem readim assignment bilong hem from scroll bilong profet Isaiah. Bat, bifor hem talem hao datfala toktok fulfill long hem, hem klosim scroll, givim go bak long attendant, and hem sidaon. Then, taem evriwan long synagogue luk strong long hem, hem sei: “Tuday disfala scripture wea iufala just herem hem fulfill.”—Luke 4:16-21.

Stop Lelebet Long Taem wea Fitim. Samting wea disturb maet samfala taem mekem iu need for stopem story bilong iu. Noise from wanfala trak or pikinini wea krae maet mekem iu need for stopem wei wea iu story witim man wea iu meetim long field ministry. Sapos long wanfala meeting wanfala noise hem no big tumas, maet iu apim laod bilong iu nomoa. Bat sapos datfala noise hem big tumas and no finis kwiktaem, iu mas stop for lelebet taem. Audience bae no lisin long iu sapos bigfala noise olsem go ahed. So iusim wei for stop lelebet long gudfala wei, witim goal for helpem audience kasem evribit gudfala samting wea iu want for talem.

Stop Lelebet for Letem Audience Ansa. Nomata tok wea iu givim no needim audience for tekpart, hem important for letem audience ansa, no long wei for talem samting, bat long mind bilong olketa. Sapos iu talem kwestin for mekem audience ting raonem samting bat iu no stop for lelebet taem wea fitim, olketa bae no really kasem point from datwan.

Hem important for stop lelebet no long taem wea iu givim tok nomoa, bat long taem iu witness long olketa narawan tu. Taem samfala pipol story hem saond olsem olketa nating stop lelebet. Sapos iu garem datfala problem, traem best bilong iu for waka long hem. Wei wea iu savve story long narawan and wei wea iu duim ministry bilong iu bae kamap moabeta. Wei for stop lelebet hem helpem man wea lisin for minim samting, hem strongim samting, hem mekem pipol lisin, and hem mekem olketa hapi for lisin go moa.

Wei for story hem needim tufala pipol. Narawan bae moa willing for lisin long iu sapos iu lisin long hem and showimaot interest long wanem hem talem. Diswan minim iu mas stop for lelebet taem wea fitim mekem hem garem chance for talem samting.

Long field ministry, witnessing bilong iumi hem duim moa samting sapos iumi duim long wei for story tugeta witim man. Bihaen olketa sei hello, planti Witness faendem hem gud for talem subject wea olketa laek for storyim, and then askem wanfala kwestin. Olketa stop lelebet mekem man garem chance for ansa, and then olketa talem samting fitim ansa wea man givim. Taem story hem go ahed olketa givim datfala haosholder planti chance for talem samting. Olketa savve hao olketa savve duim moa samting for helpem datfala man sapos olketa savve long tingting bilong hem abaotem samting wea olketa storyim.—Prov. 20:5.

Hem tru, no evriwan bae willing for ansa long wei wea iumi laekem. Bat datwan no stopem Jesus for givim chance for story nomata long olketa wea againstim hem. (Mark 3:1-5) Taem iumi letem narawan for story, datwan encouragem hem for tingting, and from datwan, maet hem talem wanem nao insaed long heart bilong hem. Wanfala purpose bilong ministry bilong iumi hem for muvim pipol for disaed and ansa from heart bilong olketa taem iumi storyim olketa important kwestin from Bible.—Heb. 4:12.

Tru nao, hem important for savve hao for stop lelebet long ples wea fitim insaed long ministry. Taem iumi iusim gud wei for stop lelebet, samting iumi talem hem bae moa klia and bae hard for forgetim.

TAEM iu tok or read big, hem important no for talem olketa word long stretfala wei nomoa bat tu for strongim olketa main word and toktok long wei wea mekem samting iu readim hem klia.

Stretfala wei for strongim samting hem needim moa samting winim wei for strongim samfala or maet planti word. Iu mas strongim olketa word wea fitim. Sapos iu strongim olketa rong word, mining bilong samting iu talem maet no klia long audience, wea from diswan, maet olketa letem mind go difren. Nomata maet information hem gud, sapos iu no strongim olketa word long gudfala wei, tok bilong iu bae no barava muvim audience.

Iu savve strongim olketa word long samfala difren wei, planti taem iu savve iusim olketa wei hia long semtaem: long wei for moa laod, talem witim feeling wea moa strong, wei for story slow and klia, stop lelebet bifor or bihaen wanfala toktok (or tufala evriwan), and for iusim olketa akson and changem feis. Long samfala languis, iu savve strongim olketa word long wei for mekem saond bilong voice hem low or hae. Tingim datfala information and wea nao iu storyim for disaedem wanem nao bae fitim.

Taem iu disaedem wanem for strongim, tingim olketa samting hia. (1) For disaedem olketa word wea iu shud strongim insaed wanfala sentence, hem no depend long wanem datfala sentence talem nomoa, bat olketa sentence raonem tu. (2) Iu savve iusim wei for strongim mining for strongim start bilong wanfala niu idea, nomata wanfala main point or for change from wanfala pruv go long narawan. And tu, hem maet mekhae long wei wea wanfala toktok for pruvim samting hem finis. (3) Wanfala speaker maet strongim samting for showimaot wei wea hem feel abaotem samting. (4) Iumi savve iusim stretfala wei for strongim word for mekhae long olketa main point bilong wanfala tok.

For iusim stretfala wei for strongim olketa samting olsem, wanfala speaker or pablik reader mas minim gud datfala information and barava wantem audience bilong hem for minim tu. Nehemiah 8:8 talem olsem abaotem instruction wea pipol kasem long taem bilong Ezra: “Olketa go ahed for read big from datfala buk, from law bilong trufala God, and olketa explainim, and givim mining long hem; and olketa go ahed for helpem pipol luksavve taem olketa read.” Hem klia hao olketa wea readim and explainim Law bilong God long datfala taem, luksavve hao hem important for helpem audience for minim, rememberim, and followim samting olketa readim.

Wanem Savve Mekem Problem Kamap. Klosap evriwan savve story long wei wea pipol minim. Bat, taem olketa readim samting wea difren man nao raetem, olketa maet faendem hem wanfala challenge for disaedem wanem word or toktok nao for strongim. For disaed, iumi mas minim gud datfala information. Diswan minim iumi need for studyim gud datfala information. So, sapos olketa askem iu for readim samting long kongregeson meeting, iu shud barava prepare gud.

Samfala pipol strongim samfala word evritaem bat hem no word wea strongim mining. Olketa narawan strongim tumas olketa word olsem “long,” “and,” “for,” and “witim.” Sapos wei wea iu strongim word hem no help for mekem klia samting iu talem, hem bae mekem audience taed for herem evritaem.

From olketa trae for iusim wei for strongim mining, samfala speaker apim laod bilong voice long wei wea maet mekem audience feel olsem hem tok strong long olketa. Datwan barava no helpem audience. Sapos wei wea iu strongim mining hem no olsem wei wea iu toktok evritaem, maet audience feel olsem iu daonem olketa. Hem moabeta for story long loving wei and helpem olketa for luksavve hao samting iu talem hem from Bible and hem balance!

Hao for Kamap Moabeta. Planti taem man wea garem problem saed long wei for strongim mining hem no savve long diswan. Maet narawan need for talem hem. Sapos iu need for kamap moabeta long diswan, skul overseer bae helpem iu. And tu, feel free for askem help from eni gudfala speaker. Askem hem for lisin gud long reading and toktok bilong iu and for givim samfala idea for helpem iu.

First samting, man wea givim kaonsel long iu maet talem iu for iusim wanfala article insaed long Wastaoa olsem samting for iu practice long hem. Hem bae talem iu for lukluk gud long olketa sentence for disaedem olketa word and toktok wea iu need for strongim mekem reading hem isi for minim. Hem maet talem iu for mek sure iu strongim samfala word wea stap long italic raeting. Remember hao olketa word insaed long sentence waka tugeta. Planti taem, iu mas strongim wanfala sekson bilong olketa word, no just wanfala word nomoa. Long samfala languis, student maet needim encouragement for lukluk gud go moa long samting wea olketa diacritic showim for strongim.

Olsem next step for lanem wanem nao for strongim, man wea givim kaonsel maet encouragem iu for tingim idea wea full paragraf storyim, no just datfala sentence nomoa. Wanem nao main idea wea paragraf storyim? Hao nao datwan shud affectim wanem iu bae strongim long olketa sentence? Lukim title bilong article and subheding wea information bilong iu stap anda long hem. Hao nao bae olketa hia affectim wanem iu chus for strongim? Iumi mas tingim olketa samting hia. Bat careful nogud iu strongim tumas word.

Nomata iu givim tok long extemporaneous wei or iu read, wan wea givim kaonsel maet encouragem iu for letem wei wea iu laek for pullim tingting affectim wanem nao iu strongim. (Lukim page 174.) Iu need for savve long wea nao wanfala idea hem finis or wea tok hem muv from wanfala main point go long narawan. Hem bae helpem audience sapos wei wea iu givim tok hem helpem olketa luksavve long olketa part bilong tok olsem. Iu savve duim diswan long wei for strongim olketa word olsem first samting, mek-tu samting, long narasaed, and so.

Wan wea kaonselem iu bae helpem iu for tingim olketa idea wea iu want for talem witim spesol feeling. For duim diswan maet iu strongim olketa word olsem barava, tru tumas, iumi nating savve duim, important, and evritaem. Wea for duim olsem savve affectim feeling bilong audience abaotem samting wea iu talem. Iumi bae kasem moa information abaotem diswan long Study 11, “Showimaot Feeling.”

For kamap moabeta long wei for strongim mining, iu bae kasem encouragement for savve gud long olketa main point wea iu laekem audience for rememberim. Bae iumi kasem moa information abaotem diswan saed long pablik reading long Study 7, “Strongim Olketa Main Idea” and saed long wei for story long Study 37, “Showimaot Klia Olketa Main Point.”

Sapos iu go ahed for trae for kamap moabeta long field ministry, lukluk gud long wei wea iu readim olketa scripture. Mekem hem wei bilong iu for evritaem askem iuseleva, ‘Why nao mi readim disfala scripture?’ Olsem wanfala teacher, planti taem hem no inaf for talem olketa word long stretfala wei nomoa. Nomata wei for readim scripture witim feeling hem maet no inaf tu. Sapos iu ansarem wanfala kwestin or iu teachim wanfala main truth, hem gud for strongim olketa word or toktok insaed long scripture wea saportim point wea iu storyim. Sapos iu no duim, man wea iu read long hem bae no kasem datfala point.

From wei for strongim samting hem needim man for talem witim moa strong samfala word and toktok, speaker wea no savve gud yet maet garem wei for strongim tumas olketa word and toktok olsem. Toktok and reading bilong hem bae olsem olketa note wea man wea just start for lanem guitar hem pleim. Bat taem hem go ahed for practice, each “note” bae kamap part bilong “music” wea here naes and smooth.

Bihaen iu lanem olketa main samting, iu bae fit for kasem gudfala samting taem iu lisin long olketa speaker wea garem savve. No longtaem bae iu luksavve hao iu savve helpem audience for minim samting from iu iusim olketa difren wei for strongim mining. And iu bae minim why nao hem gud for iusim olketa difren wei for strongim mining for mekem samting iu talem hem klia. For mekem grow stretfala wei for strongim mining bae barava helpem reading and toktok bilong iu for kasem goal bilong hem.

No satisfae for savve hao for strongim mining nomoa. For tok long gudfala wei, iu mas go ahed for waka long wei for strongim mining go kasem taem wea iu barava savve long hao for duim and savve iusim long wei wea here gud long pipol.

WANFALA gudfala reader no lukim nomoa wanfala sentence or paragraf. Taem hem read, hem tingim olketa main idea long full information bilong hem. For duim olsem barava affectim wanem part nao hem chus for strongim.

Sapos hem no duim olsem, bae no eni part long reading bilong hem showaot olsem spesol. No eni point bae showaot klia tumas. Taem datfala reading hem finis, bae hard for man wea herem for rememberim eni main point.

Stretfala wei for strongim olketa main idea savve barava help for mekem wanfala Bible reading moa interesting. Wei for strongim samting olsem savve givim moa mining long olketa paragraf long wanfala hom Bible study or long wanfala kongregeson meeting. And hem barava important taem man givim tok from wanfala manuscript, olsem iumi garem samfala taem long olketa convention bilong iumi.

Hao for Duim. Iu maet kasem assignment long skul for readim wanfala part long Bible. Wanem nao iu shud strongim? Sapos information wea iu bae readim hem story abaotem wanfala main idea or important samting wea happen, hem fitim for mekem datwan showaot klia.

Nomata part wea iu bae readim hem poetry or toktok wea pipol iusim evriday, wise toktok or story, audience bilong iu bae kasem gud samting sapos iu readim long gudfala wei. (2 Tim. 3:16, 17) For duim olsem iu mas tingim olketa verse wea iu bae readim and audience bilong iu.

Sapos iu bae read big insaed wanfala pablikeson long wanfala Bible study or kongregeson meeting, wanem nao olketa main idea wea iu need for strongim? Ting long olketa ansa bilong olketa study kwestin olsem olketa main idea. And tu, strongim olketa point wea join witim subheding wea stap antap long information.

Hem no fitim for evritaem iusim wanfala manuscript for olketa tok wea iu givim insaed long kongregeson. Bat, long samfala taem, samfala convention tok followim olketa manuscript, mekem olketa sem point kamaot long sem wei long evri convention. Speaker mas firstaem ting raonem information long careful wei, mekem hem fit for strongim olketa main idea insaed wanfala manuscript tok. Wanem nao olketa main point? Hem shud fit for luksavve long olketa. Olketa main point no olketa idea nomoa wea hem tingse hem interesting. Olketa nao olketa main idea wea datfala information point go long hem. Samfala taem wanfala shortfala toktok wea talem wanfala main idea insaed manuscript, hem introducem wanfala story or olketa idea for pruvim samting. Planti taem, wanfala strongfala toktok hem kam bihaen long olketa pruv. Taem speaker hem luksavve long olketa main point hia, hem shud putim mark long olketa insaed long manuscript bilong hem. Planti taem tu-thri nomoa stap, maet no winim fofala or faevfala. Next samting, hem mas practice for readim diswan long wei wea audience bae isi for luksavve long olketa point hia. Olketa nao olketa spesol part long datfala tok. Sapos hem readim datfala information witim stretfala wei for strongim samting, hem bae helpem audience for rememberim olketa main idea hia. Hem nao goal bilong speaker.

Speaker savve iusim samfala difren wei for strongim olketa main point long wei wea helpem audience for luksavve long olketa. Hem maet talem long wei wea moa strong, changem fast bilong hem, witim moa feeling, or akson wea fitim, and samfala samting moa.