Message for Olketa Christian Dadi and Mami:

Iufala olketa dadi and mami laek for helpem olketa pikinini blo iufala for lovem Jehovah and for dedicate lo hem. Wanem nao iufala savve duim for helpem olketa for redi for baptaes? Wanem nao bae showimaot olketa redi for baptaes?

Jesus sei lo olketa disaepol blo hem: “Teachim pipol long evri kantri for kamap disaepol blo mi. Baptaesim olketa.” (Matt. 28:19) Olsem disfala scripture talem, main samting wea mekem man fit for baptaes nao hem from hem kamap disaepol blo Christ. Hem bae minim and bilivim samting wea Jesus teachim, and tu, hem bae followim lo laef blo hem. Nomata olketa young wan tu savve duim datwan.

Showimaot gudfala example for olketa pikinini blo iufala, and teachim olketa abaotem Jehovah. (Diutronomi 6:6-9) Iusim information lo buk Enjoyim Laef for Olowe! for teachim olketa main Bible truth lo pikinini blo iu, and teachim hem for evritaem ting raonem and followim olketa Bible principle. Helpem olketa pikinini for explainim wanem olketa bilivim lo toktok blo olketa seleva. (1 Pet. 3:15) Wanem olketa pikinini lanem from iufala parents, and encouragement wea olketa kasem from iufala, witim wei wea olketa duim study seleva, duim famili worship, attendim olketa meeting, and chusim olketa gudfala fren, bae helpem olketa kamap fit for baptaes and for gohed worshipim Jehovah bihaen datwan. Helpem olketa pikinini blo iufala for gohed traem best for strongim wei wea olketa fren witim Jehovah.

Provebs 20:11 hem sei: “Yu save, nomata pikinini, wanem hemi duim i somaot wei blong hem. Taem wei blong hemi i gud an stret, bae yu save nomoa.” Wanem nao samfala samting wea pikinini bae duim, nomata boy or gele, wea bae showimaot hem kamap disaepol blo Jesus Christ and hem redi for baptaes?

Pikinini wea laek for baptaes mas obeyim dadi and mami blo hem. (Acts 5:29; Col. 3:20) Bible sei olsem abaotem Jesus taem hem 12 year: “Hem gohed for obeyim [dadi and mami blo hem].” (Luke 2:51) Hem tru, iu no savve expectim pikinini blo iu for perfect. Nomata olsem, pikinini wea laek for baptaes bae traem best for followim example blo Jesus and bae evritaem obeyim parents blo hem.

And tu, hem bae showimaot hem interest for lanem olketa Bible truth. (Luke 2:46) Waswe, pikinini blo iu laek for go lo olketa meeting and givim koment? (Sams 122:1) Waswe, hem laek for readim Bible evritaem and duim study seleva?—Matt. 4:4.

Pikinini wea laek for baptaes bae mekem Kingdom hem first samting lo laef blo hem. (Matt. 6:33) Hem luksavve hem garem responsibility for storyim wanem hem bilivim lo olketa narawan. Hem savve share lo olketa difren kaen wei for duim ministry, and hem no fraet for talem olketa teacher and skulfren hem wanfala Jehovah’s Witness. Hem tinghae lo olketa assignment blo hem lo Laef and Ministry Meeting.

Hem bae traem best for protectim gudfala wei blo hem, and diswan bae showaot lo wei wea hem no fren witim pipol wea garem nogud wei. (Provebs 13:20; 1 Cor. 15:33) Diswan bae showaot tu lo wanem kaen music, movie, TV program, and video game hem laekem, and lo wei wea hem iusim Internet.

Staka young wan followim gudfala samting wea dadi and mami blo olketa teachim olketa, olketa tinghae lo truth, and olketa kamap fit for baptaes. Jehovah bae blessim wei wea iufala parents gohed helpem olketa pikinini blo iufala for kasem disfala important goal for baptaes.

Message for Anbaptaes Pablisa:

Hem privilege for waka tugeta witim kongregeson olsem wanfala anbaptaes pablisa. Mifala praisem iu for olketa gud samting wea iu duim finis lo waka blo God. From iu studyim Bible iu savve gud lo God, and olketa samting wea iu duim hem showimaot iu garem faith lo olketa promis blo hem.—John 17:3; Heb. 11:6.

Bifor iu studyim Bible witim Olketa Jehovah’s Witness, maet iu member blo wanfala difren religion, or maet iu no joinim eni religion. Maet iu duim samfala nara samting wea hem againstim olketa Bible principle. Bat distaem iu showimaot faith lo wei wea iu repent, wea minim iu sorre tumas abaotem olketa rong samting wea iu duim bifor, and iu changem wei blo iu, wea minim iu rejectim olketa rong samting wea iu duim bifor and iu disaed strong for duim olketa samting wea God laekem.—Acts 3:19.

Or, maet iu savve lo olketa holy raeting “start kam from taem iu baby yet.” Diswan hem protectim iu and helpem iu for no duim olketa samting wea no fitim Christian and for no duim olketa bigfala sin. (2 Tim. 3: 15) Iu no letem hevi from olketa wea sem age witim iu, or olketa nara samting, for mekem iu duim samting wea Jehovah heitim. Iu showimaot iu garem faith lo wei wea iu strong for sapotim tru worship and iu storyim biliv blo iu lo nara pipol. Iu kasem training for duim Christian ministry. And iu disaed seleva for servem Jehovah olsem wanfala anbaptaes pablisa.

Nomata sapos iu lane abaotem Jehovah taem iu big, or iu lanem olketa wei blo Jehovah start kam from taem iu young, maet distaem iu tingting for duim tufala samting moa for gohed lo spiritual wei—dedicate and baptaes. Iu savve dedicatem iuseleva lo Jehovah lo wei for prea lo hem and talem hem iu bae worshipim hem nomoa for olowe. (Matt. 16:24) Then, for showimaot iu dedicate, iu bae baptaes lo wata. (Matt. 28:19, 20) Taem iu dedicate and baptaes, iu kamap wanfala wakaman blo Jehovah God. Datwan hem nambawan privilege!

Bat, olsem iu lanem taem iu studyim Bible, maet iu kasem olketa hard taem bihaen iu baptaes. Tingim hao no longtaem bihaen Jesus baptaes, “spirit bilong God leadim Jesus go long wilderness for Devil savve traem hem.” (Matt. 4:1) Bihaen iu baptaes for showimaot iu kamap disaepol blo Christ, bae iu kasem samfala test moa. (John 15:20) Olketa difren kaen test savve kasem iu. Maet famili blo iu againstim iu. (Matt. 10:36) Maet olketa skulfren, olketa wakfren, and pipol wea iu fren witim bifor mekfani lo iu. Evritaem tingim toktok blo Jesus lo Mark 10:29, 30, wea sei: “Mi talem iufala tru samting: Eniwan wea lusim haos or olketa brata or sista or mami or dadi or pikinini or olketa garden bikos long mi and bikos long datfala gud nius bae hem kasem bak staka samting distaem winim wanem hem lusim. Bae hem kasem olketa haos, olketa brata, sista, mami, pikinini, and olketa garden, and tu, pipol bae spoelem hem. Then long world wea bae kam, bae hem kasem laef olowe.” So gohed waka hard for fren gud witim Jehovah and followim olketa raeteous standard blo hem.

Taem iu laek for baptaes, talem datwan lo coordinator blo olketa elder lo kongregeson. Lo olketa page bihaen disfala message bae iu lukim samfala kwestin. Olketa elder bae meet witim iu and olketa bae iusim olketa kwestin hia taem olketa story witim iu, for helpem olketa luksavve sapos iu fit for baptaes. Iu savve iusim taem wea iu duim study seleva for studyim olketa kwestin hia bifor iu meet witim olketa elder.

For helpem iu prepare for story witim olketa elder, spendem taem for readim and ting raonem olketa Scripture wea join witim olketa kwestin. Iu savve raetem note blo iuseleva insaed disfala buk or lo nara pepa. Taem iu story witim olketa elder, iu savve lukluk lo disfala buk and olketa note blo iu. Sapos iu no minim gud eni kwestin, feel free for askem Bible study conductor blo iu or olketa elder for helpem iu.

Taem iu story witim olketa elder, no tingse iu mas talem olketa longfala ansa or talem staka point tumas for ansarem olketa kwestin. Best samting nao hem for talem ansa wea simpol and wea hem lo toktok blo iuseleva. For staka kwestin, hem bae gud tu for storyim wan or tufala Scripture wea sapotim ansa blo iu.

Sapos olketa elder luksavve iu no kasem inaf savve yet abaotem olketa main Bible teaching, olketa bae arrange for iu kasem help mekem iu savve storyim mining blo olketa Scripture lo toktok blo iuseleva. Datwan bae helpem iu for kamap fit for baptaes lo narataem.

[Note for olketa elder lo kongregeson: Olketa instruction lo wanem for duim taem iu story witim olketa wea laek baptaes hem stap lo page 54-59.]