Taem iu studyim Bible witim Olketa Jehovah’s Witness iu lanem truth. Samting wea iu lanem hem helpem iu for fren gud witim God and hem givim iu hope for laef lo paradaes and kasem staka blessing anda lo rul blo Kingdom blo God. Distaem iu garem strongfala faith lo Bible, and iu kasem staka blessing from wei for associate witim olketa nara Christian lo kongregeson. Iu luksavve lo wanem Jehovah duim for lukaftarem pipol blo hem distaem.—Sekaraea 8:23.

From iu redi for baptaes distaem, iu bae kasem gudfala samting from wei for reviewim olketa main samting wea olketa Christian bilivim. Iu bae meet witim samfala elder lo kongregeson for duim datwan. (Heb. 6:1-3) Mifala prea for Jehovah blessim wei wea iu gohed traem best for lane abaotem hem, and for hem givim lo iu datfala reward wea hem promisim.—John 17:3.

1. Why nao iu laek for baptaes?

2. Hu nao Jehovah?

   • “Jehovah nao hem trufala God lo heven antap and lo earth andanit. No eniwan moa hem stap.”—Deut. 4:39, NW.

   • “Iu, wea nem blo iu Jehovah, iu nomoa Barava Haefala God ovarem full earth.”—Ps. 83:18, NW.

3. Why nao hem important for iu iusim nem blo God?

   • “So iufala mas prea long wei olsem: ‘Dadi bilong mifala long heven, mifala laekem nem bilong iu for holy.’”—Matt. 6:9.

   • “Eniwan wea prea long Jehovah for helpem hem, bae hem sev.”—Rome 10:13.

4. Wanem nao samfala toktok wea Bible iusim for story abaotem Jehovah?

   • “[Jehovah] nao hemi God hu hemi stap kam fo evritaem olowe, an hem nao hemi mekem evrisamting long wol.”—Aesaea 40:28.

   • “Dadi bilong mifala long heven.”—Matt. 6:9.

   • “God hem love.”—1 John 4:8.

5. Wanem nao iu savve givim lo Jehovah God?

   • “Iu mas lovem God bilong iu Jehovah long full heart bilong iu, long full soul bilong iu, long full mind bilong iu, and long full strong bilong iu.”—Mark 12:30.

   • “Iu mas baodaon long God bilong iu Jehovah, and iu mas worshipim hem nomoa.”—Luke 4:8.

6. Why nao iu laek for gohed faithful lo Jehovah?

   • “Pikinini blong mi, sapos yu kamap waes, bae mi hapi, an bae mi save ansarem eniwan hu hemi tokspoelem mi.”—Provebs 27:11.

7. Hu nao iu prea lo hem, and iu talem prea lo nem blo hu?

   • “Mi [Jesus] talem iufala tru samting, Sapos iufala askem Dadi for eni samting long nem bilong mi, bae hem givim long iufala.”—John 16:23.

8. Wanem nao samfala samting wea iu savve prea abaotem?

   • “So iufala mas prea long wei olsem: ‘Dadi bilong mifala long heven, mifala laekem nem bilong iu for holy. Mifala laekem Kingdom bilong iu for kam. Duim samting wea iu laek for duim long earth, olsem iu duim long heven. Givim mifala kaikai wea mifala needim for tuday, and forgivim sin bilong mifala, olsem mifala tu forgivim olketa wea sin againstim mifala. Helpem mifala for no foldaon long eni samting wea switim mifala for duim wanem hem no stret, and sevem mifala from Satan.’”—Matt. 6:9-13.

   • “Samting wea iumi barava sure long hem, hem olsem: Eni samting wea iumi askem wea followim tingting bilong God, God hem herem iumi.”—1 John 5:14.

9. Wanem nao samfala reason why Jehovah maet no lisin lo prea blo samwan?

   • “Bae yufala kraeaot go long [Jehovah] fo helpem yufala, bat hemi nating ansarem yufala . . . bikos yufala falom nomoa olketa ravis wei.”—Maeka 3:4.

   • “Jehovah hem lukluk long olketa wea raeteous and hem herem prea bilong olketa. Bat Jehovah hem againstim olketa wea duim nogud samting.”—1 Pet. 3:12.

10. Hu nao Jesus Christ?

    • “Simon Peter hem sei: ‘Iu nao datfala Christ, wea hem Son bilong datfala God wea laef.’”—Matt. 16:16.

11. Why nao Jesus kam lo earth?

    • “Son bilong man . . . no kam for olketa narawan mas waka for helpem hem. Hem kam for hem savve waka for helpem olketa, and for givim laef bilong hem, wea datwan hem price for baem bak staka pipol.”—Matt. 20:28.

    • “Mi [Jesus] mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.”—Luke 4:43.

12. Wanem nao iu savve duim for showimaot iu tinghae lo sakrifaes blo Jesus?

    • “Hem dae for evriwan and hem laef bak, mekem olketa wea laef no duim nomoa wanem olketa seleva laekem, bat for olketa mas duim wanem hem laekem.”—2 Cor. 5:15.

13. Wanem paoa nao Jesus hem garem?

    • “God givim paoa long mi ovarem evri samting long heven and earth.”—Matt. 28:18.

    • “God givim hem position wea hae winim position bilong hem bifor. From God hem kaen tumas, hem givim hem nem wea winim evri nara nem.”—Phil. 2:9.

14. Waswe, iu bilivim Governing Body blo Olketa Jehovah’s Witness nao hem “datfala wakaman wea faithful and wise” wea Jesus markem?

    • “Hu nao datfala wakaman wea faithful and wise wea Boss markem hem for lukaftarem olketa nara wakaman and for givim kaikai long olketa long barava taem?”—Matt. 24:45.

15. Waswe, holy spirit hem wanfala man?

    • “Angel sei olsem long hem: ‘Holy spirit bae kam long iu and paoa bilong Barava Haefala God bae protectim iu. Dastawe datfala pikinini wea born bae hem holy and olketa bae kolem hem Son bilong God.’”—Luke 1:35.

    • “Iufala olketa man wea sin bat iufala givim olketa gudfala samting long olketa pikinini bilong iufala, iaman? Sapos olsem, Dadi bilong iufala long heven bae barava givim holy spirit long olketa wea askem hem tu!”—Luke 11:13.

16. Wanem nao samfala wei wea Jehovah iusim holy spirit blo hem?

    • “[Jehovah] nao hemi mekem evrisamting long skae, long toktok blong hem nomoa. Hemi tok nomoa, den san an mun an olketa sta i stap long skae nao.”—Sams 33:6.

    • “Taem iufala kasem holy spirit datwan bae strongim iufala, and iufala bae talem pipol abaotem mi . . . long evri farawe ples long earth.”—Acts 1:8.

    • “No eni profesi long olketa Holy Raeting hem kam from tingting bilong olketa man. No eni profesi wea man talem hem followim tingting bilong hemseleva, bat holy spirit nao leadim olketa man for talemaot toktok wea kam from God.”—2 Pet. 1:20, 21.

17. Wanem nao Kingdom blo God?

    • “God long heven bae hemi mekem wanfala kingdom fo kamap wea no eniwan save spoelem enitaem. An bae no eni narafala king moa save winim hem. Disfala kingdom ya bae hemi pisisim finis olketa narafala kingdom, an rul blong hem bae hemi stap evritaem olowe.”—Daniel 2:44.

18. Wanem nao samfala gud samting wea Kingdom blo God bae duim for iu?

    • “Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Rev. 21:4.

19. Why nao iu sure olketa Kingdom blessing klosap for kam?

    • “Olketa disaepol kam long hem and sei: ‘Mifala laek savve, Wanem taem nao olketa samting hia bae happen and wanem nao saen wea bae showimaot iu stap and world hem gogo for finis?’ So Jesus hem sei long olketa: ‘. . .Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa taem bilong bigfala hangre bae kasem plande pipol, and olketa earthquake bae sekem staka ples. Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.’”—Matt. 24:3, 4, 7, 14.

    • “Long olketa last day bae hem barava difren and bae evri samting hem hard tumas. Pipol bae tingim olketa seleva nomoa, laekem tumas selen, tok praod, mekhae long olketa seleva, tok spoelem God and man, and no obeyim dadi and mami. Olketa bae no savve tinghae, bae no faithful, no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting. Olketa bae spoelem fren bilong olketa, bighed, and praod tumas. Olketa bae no lovem God, bat bae interest nomoa for enjoyim seleva. Hem bae luk olsem olketa worshipim God bat samting wea olketa duim showimaot olketa nating worshipim hem nomoa.”—2 Tim. 3:1-5.

20. Wanem nao iu savve duim for showimaot Kingdom hem barava important lo iu?

    • “So evritaem Kingdom and olketa samting wea God sei hem stret mas first samting long laef bilong iufala.”—Matt. 6:33.

    • “Jesus sei long olketa disaepol bilong hem: ‘Sapos eniwan laek followim mi, hem mas givim laef bilong hem for God and hem mas karem post wea mi karem, and gohed followim mi olowe.’”—Matt. 16:24.

21. Hu nao Satan and olketa demon?

    • “Devil nao dadi bilong iufala . . . Start from taem wea hem laea abaotem God, hem man for killim man dae.”—John 8:44.

    • “Olketa torowem go daon long earth datfala big snek witim olketa angel bilong hem. Hem nao datfala snek bilong bifor kam wea nem bilong hem Devil and Satan, wea hem laea long evriwan long earth.”—Rev. 12:9.

22. Wanem nao Satan talem for accusim lo Jehovah and olketa wea worshipim Hem?

    • “Woman ya hemi tok olsem, “Nomoa ya. Mitufala save kaikaim frut blong olketa tri long ples ya, bat wanfala nomoa wea hemi stap long midol long ples ya nao mitufala no kaikaim frut blong hem. God hemi stopem mitufala fo no kaikaim o tasim frut blong hem. An hemi talem sapos mitufala brekem tambu ya, bae mitufala dae.” Bat snek ya hemi tok olsem, “Hemi no tru ya, yutufala no save dae. Hemi talem olsem bikos hemi save finis sapos yutufala kaikaim frut ya, bae ae blong yutufala i open nao, an bae yutufala kamap olsem hem, wea bae yutufala save long olketa wei wea i nogud an olketa wei wea i gud.’”—Jenesis 3:2-5.

    • “Seitan hemi tok olsem, ‘Skin sensim skin. Man save lusim evrisamting blong hem fo mekem hem seleva i laef.’”—Job 2:4.

23. Wanem nao iu savve duim for showimaot samting wea Satan accusim hem no tru?

    • “Yu mas barava obeim [God].”—Fas Kronikols 28:9.

    • “Go kasem taem mi dae, mi bae gohed faithful!”—Job 27:5, NW.

24. Why nao pipol savve dae?

    • “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.”—Rome 5:12.

25. Wanem nao happen lo man taem hem dae?

    • “Olketa hu i laef yet, olketa save dat bae olketa mas dae. Bat olketa hu i dae finis, olketa nating save long enisamting.”—Eklesiastes 9:5.

26. Wanem hope nao stap for olketa wea dae?

    • “God bae mekem pipol wea raeteous and pipol wea no raeteous for laef bak.”—Acts 24:15.

27. Haomas pipol nao bae go lo heven for rul witim Jesus?

    • “Mi lukim datfala Pikinini Sheepsheep hem standap antap long Maunt Zion. Olketa narawan tu standap witim hem. Namba bilong olketa hem 144,000 and olketa garem nem bilong hem and nem bilong Dadi bilong hem long forhed bilong olketa.”—Rev. 14:1.

Taem iu studyim Bible, iu lanem olketa samting wea Jehovah laekem iu for duim and iu lanem hao for followim olketa raeteous standard blo hem. Maet iu changem samfala wei blo iu for followim wanem iu lanem, and maet iu changem tingting blo iu abaotem laef tu. From iu disaed for followim olketa raeteous standard blo Jehovah, datwan mekem iu fit for kamap wakaman blo God for talemaot gud nius lo pipol.

Olketa kwestin lo disfala sekson bae helpem iu for ting strong lo olketa raeteous standard blo Jehovah. And tu, taem iu go thru olketa kwestin hia diswan bae remindim iu lo samfala samting wea iu savve duim for mekem God hapi. Disfala information bae helpem iu for luksavve hem barava important for evritaem garem gudfala konsens abaotem wanem iu duim, and evri samting wea iu duim mas givim glory lo Jehovah.—2 Cor. 1:12; 1 Tim. 1:19; 1 Pet. 3:16, 21.

From iu tinghae lo wanem iu lanem lo study blo iu, iu barava laek stap anda lo rul blo Jehovah and kamap part lo organization blo hem. Olketa kwestin and Scripture lo disfala sekson bae helpem iu for savve gud lo wanem hem minim for stap anda lo Jehovah insaed lo kongregeson, lo famili, and saed lo politik blo disfala world. Disfala sekson bae helpem iu for barava tinghae lo olketa samting wea Jehovah provaedem for teachim and strongim faith blo pipol blo hem. Wanfala samting wea Jehovah provaedem hem olketa kongregeson meeting wea iu shud attendim and tekpart lo hem sapos fitim.

Disfala sekson bae storyim why hem important for evritaem preach abaotem Kingdom and helpem olketa narawan for savve lo Jehovah and wanem hem duim distaem for olketa man. (Matt. 24:14; 28:19, 20) And tu, disfala sekson bae helpem iu for luksavve hem serious samting for dedicatem iuseleva lo Jehovah God and for baptaes. Iu savve sure Jehovah hem barava hapi lo wei wea iu showimaot iu tinghae lo wei wea hem kaen tumas lo iu.

1. Wanem standard saed lo marit nao olketa Christian followim? Wanem nao only reason for divorce wea fitim wanem Bible talem?

   • “Hao, iufala no readim finis? Start kam long taem wea God wakem olketa man, hem wakem man and woman and hem sei: ‘Dastawe, man bae lusim dadi and mami bilong hem and hem bae stap olowe witim waef bilong hem. Datfala man and woman bae kamap wanfala body nomoa.’ Diswan minim tufala hia no tufala body, bat wanfala nomoa. So no eni man mas aotem samting wea God joinim finis. . . . Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.”—Matt. 19:4-6, 9.

2. Why nao olketa wea stap tugeta olsem hasband and waef mas marit followim law blo kantri? Sapos iu marit, waswe, iu barava sure marit blo iu hem followim law blo kantri and gavman acceptim?

   • “Gohed talem olketa for stap anda and obeyim olketa gavman and olketa wea garem paoa.”—Titus 3:1.

   • “Evriwan mas respectim marit, and hasband and waef mas keepim marit promis bilong tufala, bikos God bae judgem olketa wea durong and wea duim adultery.”—Heb. 13:4.

3. Wanem nao waka blo iu insaed lo famili arrangement?

   • “San, lisin gudfala long evri toktok wea dadi hemi talem, an no fogetem evri tising wea mami hemi givim.”—Provebs 1:8.

   • “Hasband hem hed bilong waef olsem Christ hem hed bilong kongregeson. . . . Iufala olketa hasband mas gohed for lovem waef bilong iufala, olsem Christ tu hem lovem kongregeson.”—Eph. 5:23, 25.

   • “Iufala olketa dadi mas no mekem olketa pikinini bilong iufala for kros, bat lukaftarem olketa gud long wei for stretem and trainim olketa followim samting wea Jehovah talem.”—Eph. 6:4.

   • “Iufala olketa pikinini mas evritaem obeyim dadi and mami bilong iufala, bikos diswan hem mekem Lord for barava hapi.”—Col. 3:20.

   • “Iufala olketa waef mas stap anda long hasband bilong iufala.”—1 Pet. 3:1.

4. Why nao iumi shud showimaot respect for laef?

   • “[God] nao mekem olketa man laef and savve brith and hem givim evri samting long olketa. . . . Hem nao mekem iumi laef and savve wakabaot and duim samting.”—Acts 17:25, 28.

5. Why nao iumi shud no killim dae eniwan, wea diswan minim tu wanfala baby wea no born yet?

   • “Sapos samfala man faet and olketa killim wanfala woman wea babule and . . . sapos eniwan lo tufala dae, iufala mas changem laef for laef.”—Ex. 21:22, 23, NW.

   • “Taem mi no bon kam yet, yu lukim mi. Bifoa olketa de long laef blong mi hemi stat, yu bin mekem olketa finis, an yu raetemdaon long buk blong yu.”—Sams 139:16.

   • “[Jehovah] hemi les long . . . wei fo . . . kilim man dae fo nating.”—Provebs 6:16, 17.

6. Wanem nao komand blo God abaotem blood?

   • “Stap klia long blood, [and] no kaikaim eni animal wea olketa skwisim nek bilong hem.”—Acts 15:29.

7. Why nao iumi mas lovem olketa Christian brata and sista blo iumi?

   • “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.”—John 13:34, 35.

8. For no givim wanfala sik wea isi for spred lo narawan and wea savve killim man dae: (a) Why nao man wea garem datfala sik shud no duim kaen samting olsem for hagem and kissim narawan for showimaot love? (b) Why nao hem shud no feel nogud sapos samfala disaed for no invaetem hem for kam lo haos blo olketa? (c)  Why nao man wea maet hem kasem sik olsem shud willing for kasem blood test bifor hem start for frenim samwan wea hem laek maritim? (d)  Why nao man wea garem sik olsem shud talem coordinator blo olketa elder abaotem datwan bifor hem baptaes?

   • “Iufala mas no kaonem samting wea iufala no fit for peim bak, bat samting wea iufala mas duim nao hem for lovem narawan. . . . ‘Iu mas lovem narawan long sem wei wea iu lovem iuseleva.’ Man wea lovem narawan hem no duim nogud samting long hem.”—Rome 13:8-10.

   • “Evritaem tingim olketa narawan and no tingim iufala seleva nomoa.”—Phil. 2:4.

9. Why nao Jehovah expectim iumi for forgivim narawan?

   • “Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala.”—Col. 3:13.

10. Wanem nao iu shud duim sapos wanfala brata hem laea for spoelem iu or hem ravem iu?

    • “Sapos brata bilong iu hem sin againstim iu, iuseleva nao go story witim hem, mekem hem savve samting hem duim hem no stret. Sapos hem acceptim wanem iu talem, iu helpem hem nao for duim stret samting moa. Bat sapos hem no acceptim wanem iu talem, go bak long hem narataem moa. Tekem wan or tufala man for herem samting wea iutufala story abaotem. From iu duim datwan, tu or thrifala witness bae stap wea savve long evri samting abaotem datfala problem. Sapos hem no acceptim samting wea olketa hia talem, then talem kongregeson. Sapos hem no acceptim wanem kongregeson talem, then iu mas ting long hem olsem wanfala man long world and wanfala man for tekem tax.”—Matt. 18:15-17.

11. Hao nao Jehovah ting lo olketa sin hia?

    • ▪ Wei for durong

    • ▪ Iusim image lo worship

    • ▪ Homosexual fasin

    • ▪ Wei for steal

    • ▪ Wei for gambol

    • ▪ Wei for drunk

    • “No laea long iufala seleva. Pipol wea durong, worshipim idol, duim adultery, olketa man wea stap for nara man durong witim olketa, or olketa man wea sleep witim nara man, pipol wea steal, wea greedy, wea savve drunk, tok spoelem nara pipol, or demandim selen, olketa hia bae no kasem Kingdom bilong God.”—1 Cor. 6:9, 10.

12. Saed lo wei for durong, wea minim wei for olketa wea no marit duim olketa samting saed lo sex, wanem nao iu disaed strong for duim?

    • “Ranawe from eni samting wea switim iufala for durong.”—1 Cor. 6:18.

13. Why nao iumi shud no iusim olketa drug or nara samting olsem wea savve affectim tingting blo man and wea man savve addict lo hem sapos datwan hem no for medical reason?

    • “Givim body bilong iufala olsem wanfala sakrifaes wea laef and holy and wea God savve hapi long hem. Long wei olsem, bae iufala worshipim God witim gudfala tingting. No gohed followim wei bilong pipol long disfala world. Changem wei bilong iufala long wei for changem tingting, mekem iufala luksavve long samting wea God laekem iumi for duim, wea hem gudfala and stret and wea hem hapi long hem.”—Rome 12:1, 2

14. Wanem nao samfala samting wea join witim devildevil wea God sei iumi mas no duim?

    • “Yufala mas no letem eniwan mekem sakrifaes fo save abaotem wanem bae hemi kamap bihaen. Yufala mas no letem eniwan fo mekem enikaen majik o poesen. Yufala mas no letem eniwan wakem grinlif. An yufala mas no letem eniwan fo kolem olketa devoldevol, o toktok long spirit blong man hu hemi dae.”—Diutronomi 18:10, 11.

15. Sapos man duim bigfala sin and hem laek for fren bak witim Jehovah, wanem nao hem mas kwiktaem for duim?

    • “Nao mi tok olsem, ‘Bae mi talemaot sin blong mi long [Jehovah].’ Mi talemaot olketa sin blong mi long yu, an mi no haedem moa olketa nogud samting wea mi bin duim.’”—Sams 32:5.

    • “Waswe, eniwan long iufala hem sik? Hem mas askem olketa elder long kongregeson for helpem hem. Olketa mas prea for hem and putim oil long hem long nem bilong Jehovah. Datfala prea wea olketa talem from olketa garem faith bae mekem datfala man wea sik hem gud bak, and Jehovah bae mekem hem strong. And tu, God bae forgivim eni sin wea hem duim finis.”—Jas. 5:14, 15.

16. Sapos iu savve wanfala Christian hem duim bigfala sin, wanem nao iu shud duim?

    • “Sapos samwan lukim narawan duim rong samting or herem story abaotem sin wea narawan duim and hem herem olketa talemaot for eniwan wea witnessim datwan for mas reportim, bat hem no reportim datwan, hem sin nao and hem mas kasem panis for datwan.”—Lev. 5:1, NW.

17. Sapos olketa announcem samwan hem no wanfala Jehovah’s Witness distaem, hao nao iumi shud treatim datfala man?

    • “No fren witim eni brata wea hem durong or hem greedy or worshipim idol or tok spoelem nara pipol or savve drunk or demandim selen. Nomata for sidaon and kaikai witim man olsem, iufala mas no duim tu.”—1 Cor. 5:11.

    • “Sapos eniwan hem kam long iufala and hem no tekem kam disfala teaching, iufala mas no welkamim hem for kam insaed haos bilong iufala and iufala mas no sei hello long hem.”—2 John 10.

18. Why nao olketa wea iu fren gud witim shud olketa wea lovem Jehovah?

    • “Fren wetem waes man, bae yu waes. Fren wetem krangge man, bae yu safa.”—Provebs 13:20.

    • “No letem eniwan laea long iufala. Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.”—1 Cor. 15:33.

19. Why nao Olketa Jehovah’s Witness no teksaed lo politik?

    • “Olketa no olsem pipol long world, olsem mi [Jesus] tu no olsem pipol long world.”—John 17:16.

20. Why nao iu shud obeyim gavman?

    • “Iufala evriwan mas stap anda long olketa wea rul, bikos no eniwan savve garem paoa for rul sapos God no letem hem. Eni paoa wea olketa garem, God nao givim datwan long olketa.”—Rome 13:1.

21. Sapos law blo olketa man talem iu for duim samting wea againstim law blo God or stopem iu for duim samting wea God talem, wanem nao bae iu duim?

    • “God nao hem ruler wea mifala mas obeyim, no olketa man.”—Acts 5:29.

22. Wanem nao samfala scripture wea savve helpem iu for no olsem pipol lo world taem iu chusim waka?

    • “Nao olketa pipol long wol bae i no faetem moa olketa long narafala kantri, an no tisim moa olketa yanga fo faet.”—Maeka 4:3.

    • “Pipol bilong mi, sapos iufala no laek join witim hem [Bigfala Babylon] long sin bilong hem, and no laek kasem olketa nogud samting wea bae kasem hem, iufala mas go aot from hem nao.”—Rev. 18:4.

23. Wanem kaen hapitaem bae iu chusim (wea minim tu olketa movie, TV, and nara samting olsem), and wanem kaen hapitaem bae iu rejectim?

    • “Jehovah . . . heitim eniwan wea laekem raf fasin.”—Ps. 11:5, NW.

    • “Barava heitim olketa rabis samting and hol strong long samting wea hem stret.”—Rome 12:9.

    • “Gohed for tingim evri samting wea tru, evri samting wea important, evri samting wea raeteous, evri samting wea klin, evri samting wea mekem man garem love, evri samting wea fit for kasem respect, evri samting wea hem gud, and evri samting wea fit for kasem praise.”—Phil. 4:8.

24. Why nao Olketa Jehovah’s Witness no join insaed worship witim olketa nara religion?

    • “Hem nating fitim for iufala drink long kap bilong Jehovah and long semtaem drink long kap bilong olketa demon.”—1 Cor. 10:21.

    • “Jehovah hem sei: ‘. . . No stap witim olketa moa. No tasim samting wea no klin.’ ‘Sapos iufala duim olsem, bae mi nao lukaftarem iufala.’”—2 Cor. 6:17.

25. Wanem nao samfala Bible principle wea savve helpem iu for disaed sapos iu bae joinim wanfala celebration or nomoa?

    • “Olketa gohed fo maritim olketa [hiden pipol], an falom tu olketa kastom blong olketa. Olketa wosipim olketa narafala god. An wei ya hemi kamap wanfala trap nomoa wea hemi kasem olketa evriwan.”—Sams 106:35, 36.

    • “Olketa hu i dae finis, olketa nating save long enisamting.”—Eklesiastes 9:5.

    • “Olketa no olsem pipol long world, olsem mi tu no olsem pipol long world.”—John 17:16.

    • “Long bifor iufala gohed for duim olketa samting wea pipol long world duim. Iufala nating shame for duim rong samting. Iufala no kontrolem feeling for barava laek duim nogud samting and iufala ova tumas for drink. Iufala join insaed olketa wild party, drunk olowe, and join insaed olketa rabis samting wea pipol duim for worshipim idol.”—1 Pet. 4:3.

26. Hao nao olketa example lo Bible savve helpem iu for disaed sapos iu bae celebratem birthday or nomoa?

    • “Long mektri de, . . . king ya hemi mekem wanfala fist fo makem taem wea hemi bon. Hemi mekem wanfala bikfala kaikai, an hemi kolem olketa bikman blong hem fo kam. An long ae blong olketa narafala bikman blong hem, hemi aotem kam tufala man blong hem ya moa, wea tufala stap long prisin. Man ya wea fastaem hemi bos long olketa man fo lukaftarem waen blong hem, hemi putum hem baek moa long waka blong hem. Bat man ya wea fastaem hemi bos long olketa man fo mekem bred blong hem, olketa kilim hem dae, an hangem bodi blong hem long wanfala pos.”—Jenesis 40:20-22.

    • “Taem olketa celebratem birthday bilong Herod, gele bilong Herodias dance for evriwan wea stap, and Herod barava hapi long dance bilong hem. So hem promis for givim hem eni samting wea hem askem. Mami bilong hem talem hem wanem for askem. So gele hia hem sei: ‘Mi laekem iu for givim mi hed bilong John Baptaesa long wanfala pleit.’ So hem sendem olketa go long prison for katemaot hed bilong John.”—Matt. 14:6-8, 10.

27. Why nao iu laek for followim direction blo olketa elder?

    • “Olketa wea leadim iufala and lukaftarem iufala mas givim ansa for hao olketa duim diswan. So obeyim and stap anda long olketa mekem olketa hapi for lukaftarem iufala bikos sapos nomoa, datwan bae spoelem iufala.”—Heb. 13:17.

28. Why nao hem important for iu and famili blo iu for markem taem for evritaem readim and studyim Bible?

    • “Olketa pipol ya i hapi bikos olketa falom Lo blong [Jehovah], an oltaem olketa gohed fo ridim an tingting long hem evri de an evri naet. Olketa ya i olsem olketa tri wea i grou long gudfala graon wea hemi garem wata. Olketa tri ya i gohed fo garem frut long barava taem blong olketa, an lif blong olketa i no save dae. An long sem wei ya tu, evrisamting wea olketa pipol ya i gohed fo duim i kamap gudfala.”—Sams 1:2, 3.

29. Why nao iu barava laek for attendim and tekpart lo olketa meeting?

    • “Mi bae talemaot nem blo iu lo olketa brata blo mi. Lo midol blo kongregeson mi bae praisem iu.”—Ps. 22:22, NW.

    • “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.”—Heb. 10:24, 25.

30. Wanem nao main important waka wea Jesus talem iumi for duim?

    • “So iufala go and teachim pipol long evri kantri for kamap disaepol bilong mi. Baptaesim olketa . . . . Teachim olketa for followim evri samting wea mi laekem iufala for duim.”—Matt. 28:19, 20.

31. Wanem kaen tingting nao Jehovah laekem iumi for garem taem iumi givim olketa donation for sapotim Kingdom waka or for helpem olketa brata and sista blo iumi?

    • “Mekhae long [Jehovah] long wei wea yu givim go fas kaikai from gaden blong yu long hem.”—Provebs 3:9.

    • “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.”—2 Cor. 9:7.

32. Wanem nao samfala hard taem wea olketa Christian expectim bae kasem olketa?

    • “Olketa wea nara pipol spoelem olketa from olketa duim samting wea stret, bae hapi, bikos Kingdom bilong God hem bilong olketa. From iufala olketa disaepol bilong mi, pipol bae tok daonem and spoelem iufala and talem enikaen nogud samting abaotem iufala wea no tru. Nomata olsem, iufala bae hapi nomoa. Iufala mas barava hapi bikos iufala bae kasem bigfala blessing long heven. Olketa spoelem olketa profet bifor long sem wei tu.”—Matt. 5:10-12.

33. Why nao for baptaes olsem wanfala Jehovah’s Witness hem bigfala privilege?

    • “Toktok blo iu hem mekem heart blo mi barava hapi, bikos mi garem nem blo iu, Jehovah God.”—Jer. 15:16, NW.