Waswe, Gud Nius wea Stap Long Bible Kam From God?

1. Hu nao givim kam Bible?

Bible hem kam from God. Hem iusim 40-fala man nao for raetem. Bible garem 66-fala smol buk. Moses nao raetem first faevfala buk long samting olsem 3,500 year go finis. Aposol John nao raetem lastfala buk winim 1,900 year go finis. Gud nius abaotem wei wea pipol bae laef olowe long earth hem stap insaed long Bible. (Psalm 37:29) Olketa man wea raetem Bible followim tingting bilong God. God iusim holy spirit bilong hem for leadim olketa man hia for raetem Bible. (2 Samuel 23:2) Olketa raetem wanem God talem and no tingting bilong olketa seleva.​—Readim 2 Timothy 3:16; 2 Peter 1:20, 21.

Watchim disfala video Hu Nao Givim Kam Bible?

2. Hao nao iumi savve sure Bible hem kam from God?

Iumi savve Bible kam from God bikos hem barava talem stret wanem bae happen long future. No eni man savve duim datwan. (Joshua 23:14) Olmaeti God nomoa savve lukim wanem bae happen long future bilong olketa man.​—Readim Isaiah 42:9; 46:10.

Bible hem barava spesol and winim olketa nara buk bikos hem kam from God. Olketa givimaot winim tu billion copy bilong Bible long winim 450 languis. Nomata Bible hem oldfala buk, taem hem storyim olketa samting abaotem creation hem stret witim science. And tu, nomata 40-fala man nao raetem Bible, samting wea each wan raetem hem agree witim narawan.a Nara samting, Bible showimaot klia God barava lovem pipol. From datwan, Bible garem paoa for changem laef bilong pipol for kamap gud. Evri samting hia mekem staka million pipol for bilivim Bible hem kam from God.​—Readim 1 Thessalonica 2:13.

Watchim disfala video Hao Nao Iumi Savve Sure Bible Hem Kam From God?

3. Wanem nao Bible storyim?

Wanfala long olketa main samting wea Bible storyim hem datfala gud nius abaotem nambawan plan bilong God for olketa man. Bible storyim hao man hem lusim privilege for stap long paradaes long earth bihaen God wakem firstfala man and woman, and hao God bae mekem earth kamap paradaes moa.​—Readim Revelation 21:4, 5.

Bible garem tu olketa law, principle and advaes. And tu, Bible storyim olketa example long hao God deal witim pipol taem olketa duim gud samting and nogud samting. Iumi minim olketa nambawan wei bilong God from olketa example hia. So Bible savve helpem iu for savve long God. Hem storyim wanem iu savve duim for kamap fren bilong God.​—Readim Psalm 19:7, 11; James 2:23; 4:8.

4. Wanem nao iu savve duim for minim Bible?

Disfala brochure hem iusim sem teknik wea Jesus iusim wea bae helpem iu for minim Bible. Jesus iusim olketa difren scripture for helpem pipol “minim gud olketa Holy Raeting.”​—Readim Luke 24:27, 45.

Datfala gud nius wea kam from God hem interesting winim eni nara samting. Nomata olsem, maet samfala pipol no interest long hem and olketa narawan maet no laek herem. Bat no letem datwan for mekem iu givap. For kasem laef olowe iu mas lane abaotem God.​—Readim John 17:3.