Leta From Governing Body

“Hem fitim for iufala teachim nara pipol.” (Heb. 5:12) Tingim datwan! Jehovah, wea hem nambawan teacher long full universe, sei hem fitim for iumi teachim olketa narawan abaotem hem! Taem iumi teachim olketa narawan abaotem Jehovah, nomata insaed long famili, kongregeson, or long ministry, datwan hem nambawan privilege and hem bigfala responsibility. Wanem nao savve helpem iumi for teach gud?

Aposol Paul ansarem datfala kwestin taem hem sei olsem long Timothy: “Gohed waka hard for readim olketa Holy Raeting long olketa narawan, and encouragem and teachim olketa.” Paul sei tu: “Wei for duim olsem bae mekem iu and olketa wea lisin long iu for kasem laef.” (1 Tim. 4:13, 16) Message wea iu talemaot savve sevem laef bilong pipol. So hem important for iu gohed waka hard for kamap gud long wei for read and teachim narawan. Disfala brochure bae helpem iu. Insaed disfala brochure, iu bae lukim:

Each page garem scripture wea storyim wanfala Bible principle wea fitim datfala study or wea showim example long hao for followim datfala study

Jehovah nao hem nambawan teacher. (Aesaea 30:20) Disfala brochure bae helpem iu for kamap gud long wei for read and for teachim narawan. Nomata olsem, iumi savve message wea iumi talemaot hem kam from Jehovah and hem nao leadim pipol kam long hem. (John 6:44) So evritaem prea for holy spirit. Evritaem iusim Bible for teach. Mekhae long Jehovah, and no iuseleva. Trae for helpem olketa wea iu teachim for lovem Jehovah.

Jehovah givim waka long iumi for talemaot message wea barava important. Sapos iu depend “long paoa wea kam from God,” mifala sure iu bae kamap gudfala teacher.—1 Pet. 4:11.

Olketa brata wea waka witim iufala,

Governing Body Bilong Olketa Jehovah’s Witness