Wat Nao Iumi Savve Duim for Klin Mekem God Hapi lo Iumi?

Tingim wanfala mami wea lovem smol boy blo hem and hem redyim hem for go skul. Hem mek sure hem swim and olketa kaleko blo hem neat and klin. Diswan mekem hem healthy and olketa narawan luksavve parents blo hem lukaftarem hem gud. Dadi blo iumi Jehovah tu laekem iumi for klin. Hem laekem iumi for klin lo body, tingting, and wei blo iumi. Taem iumi klin, iumi kasem gud samting and Jehovah tu kasem praise.

1. Wat nao iumi savve duim for klin lo body?

Jehovah sei: “Iufala mas holy.” (1 Peter 1:16) For holy hem minim for iumi mas klin lo body and wei blo iumi. Taem iumi swim evritaem, keepim olketa kaleko, haos, and trak blo iumi neat and klin, datwan savve mekem iumi klin. Iumi savve help tu for klinim Kingdom Hall blo iumi. Taem iumi klin lo olketa samting hia, datwan givim praise lo Jehovah.​—2 Corinth 6:3, 4.

2. For iumi klin, wat nao samfala wei wea iumi shud no garem?

Bible sei for “iumi mas klinim from body bilong iumiseleva eni samting wea savve mekem body or tingting bilong iumi for no klin.” (2 Corinth 7:1) Diswan minim, iumi shud no duim eni samting wea bae spoelem body or tingting blo iumi. Olketa samting wea iumi tingim shud mekem Jehovah hapi, so iumi traem best blo iumi for no garem eni nogud tingting. (Psalm 104:34, NW) Iumi mas traem best tu for no talem rabis toktok.​—Readim Colossae 3:8.

Wat moa samfala samting wea savve mekem body or tingting blo iumi for no klin? Samfala drug savve spoelem body blo iumi. So iumi no smokem tobacco, kaikaim bilnat or coca leaf, and no mis iusim olketa drug. Taem iumi duim olsem, iumi healthy and iumi respectim laef wea hem present from God. Iumi traem best tu for keepim wei blo iumi klin taem iumi waka hard for no duim masturbation and for no lukluk lo pornography. (Sams 119:37; Ephesus 5:5) Hem no isi for lusim olketa nogud wei hia, bat Jehovah savve helpem iumi for duim datwan.​—Readim Aesaea 41:13.

DIG GO MOA

3. For klin lo body hem givim praise lo Jehovah

From law wea Jehovah givim lo nation blo Israel bifor, iumi luksavve hem important lo Hem for pipol blo hem mas klin. Readim Eksodas 19:10 and 30:17-21, then discussim tugeta olketa kwestin hia:

• Wat iu lanem lo olketa verse hia abaotem tingting blo Jehovah saed lo wei for klin lo body?

• Wat nao iu savve duim for keepim body klin?

Iumi needim taem and mas waka hard for keepim body klin. Bat iumi savve duim datwan nomata wea nao iumi stap or iumi rich or iumi poor. Pleim VIDEO, then discussim tugeta disfala kwestin.

VIDEO: God Lovem Pipol wea Klin (4:10)

• Why nao pipol wea iumi preach lo olketa bae barava respectim Jehovah taem olketa lukim iumi keepim klin olketa samting wea iumi garem?

4. Lusim olketa nogud wei

Sapos iu man for smoke or iusim drug, maet iu savve hem hard for lusim datfala nogud wei. Wat nao savve helpem iu? Tingim hao hem savve spoelem iu. Readim Matthew 22:37-39, then discussim tugeta hao wei for smokem tobacco and for mis iusim drug savve spoelem . . .

• frenship blo man witim Jehovah.

• famili blo man and olketa narawan wea stap raonem hem.

Mekem plan for lusim wanfala nogud wei.a Pleim VIDEO.

VIDEO: Kontrolem Seleva (2:47)

Readim Philippi 4:13, then discussim tugeta kwestin hia:

• Taem man prea, studyim Bible, and go lo meeting evritaem, hao nao datwan savve helpem hem for lusim eni nogud wei wea hem garem?

5. Waka hard for lusim nogud tingting and olketa nogud wei

Readim Colossae 3:5, then discussim tugeta olketa kwestin hia:

• Hao nao iumi savve pornography, sexting,b and masturbation no klin lo eye blo Jehovah?

• Iu tingse hem stret for Jehovah expectim iumi for klin lo tingting and wei blo iumi? Why nao olsem?

Lukim samting wea iumi savve duim for lusim olketa nogud tingting. Pleim VIDEO.

VIDEO: Duim Samting for Keepim Tingting blo Iumi Klin (1:51)

Jesus storyim wanfala illustration wea showim iumi mas duim samting for keepim wei and tingting blo iumi klin. Readim Matthew 5:29, 30, then discussim tugeta disfala kwestin:

• Samting wea Jesus talem hem no minim for iumi katem eni part lo body blo iumi, bat hem minim for iumi mas duim samting. Wat nao man mas duim for no garem nogud tingting?c

Sapos iu waka hard for lusim olketa nogud tingting, Jehovah tinghae lo hard waka blo iu. Readim Sams 103:13, 14, then discussim tugeta disfala kwestin:

• Sapos iu stragol witim wanfala nogud wei, hao nao scripture hia encouragem iu for no givap?

No givap sapos iu foldaon moa!

Hem isi for tingim, ‘Mi hard nao! Ating mi givap nomoa!’ Tingim diswan: Taem man wea ranran hem stambol and foldaon, datwan no minim hem lus lo datfala resis and bae hem no go bak tu for startim moa resis. Olsem tu, taem iu foldaon moa lo nogud wei blo iu wea iu lusim finis, datwan no minim hem hard nao for changem wei blo iu. And tu, datwan no minim iu hard waka nating nomoa. Hem normal samting for man foldaon moa. So no givap! Jehovah bae helpem iu for lusim datfala nogud wei.

MAIN POINT

Iumi mekem Jehovah hapi taem iumi keepim body and mind blo iumi klin and garem gudfala wei.

Review

• Why nao hem important tumas for iumi klin?

• Wat nao iumi savve duim for klin lo body?

• Wat nao iu savve duim for gohed garem gudfala tingting and gudfala wei?

FAENDAOT MOA

Wat nao samfala simpol samting wea iu savve duim for klin lo body nomata iu garem lelebet samting nomoa?

Health and Wei for Klin​—Wasim Hand (3:01)

Read abaotem olketa samting wea iu savve duim for stop smoke.

“Samting wea Man Savve Duim for Lusim Smoke” (Awake!, May 2010)

Read abaotem hao pornography savve spoelem man.

“Pornography​—Waswe, Hem Savve Spoelem Man?” (Wastaoa, September 1, 2013)

Read abaotem wanfala man wea addict lo pornography hem lusim datfala nogud wei.

“Staka Taem Mi Fail Gogo Mi Win” (Wastaoa No. 4 2016)