Waswe, Jesus Storyim Hellfire?
SAMFALA pipol wea biliv long hellfire sei Jesus storyim diswan long Mark 9:48 (or verse 44, 46). Long hia, Jesus storyim olketa worm wea no savve dae and fire wea gohed olowe. Sapos eniwan askem iu wanem nao mining bilong toktok hia, wanem nao bae iu talem olketa?
Samfala Bible transleison garem semkaen toktok long verse 44, 46, and 48.a New World Translation Bible talem olsem: “Sapos eye bilong iu mekem iu for sin, aotem datwan and torowe. Hem moabeta for iu go insaed long kingdom bilong God witim wanfala eye nomoa winim wei for garem tufala eye and olketa torowem iu go long Gehenna. Long there nao olketa worm no savve dae and fire hem gohed olowe.”—Mark 9:47, 48.
Samfala sei toktok bilong Jesus hem minim bihaen rabis man hem dae, soul bilong hem bae safa olowe. Long disfala Spanish Bible, Sagrada Biblia bilong University bilong Navarre, hem talem olsem: “Lord bilong iumi talem [toktok hia] for minim man safa long hell. Plande taem olketa sei ‘worm wea no savve dae’ nao hem bigfala sorre wea kasem olketa wea stap long hell, and ‘fire wea gohed olowe’ nao hem pain wea man kasem long body taem hem stap long hell.”
Bat markem toktok bilong Jesus witim lastfala verse long buk bilong Isaiah.b Jesus storyim nao datfala toktok long Isaiah chapter 66. Luk olsem Isaiah storyim olketa wea go aot “from Jerusalem for go long Hinnom Valley (Gehenna), wea hem nao ples wea olketa savve sakrifaesim olketa man bifor (Jer 7:31) and bihaen olketa savve torowem rabis long ples hia.” (The Jerome Biblical Commentary) Samting wea Isaiah 66:24 storyim hem no pipol wea safa, bat hem story abaotem body bilong pipol wea dae finis. Samting wea no dae nao hem olketa worm, no olketa man wea laef or olketa soul wea no savve dae. So wanem nao Jesus hem minim taem hem talem datfala toktok?
Tingim samting wea wanfala Catholic buk El evangelio de Marcos talem abaotem Mark 9:48. Long Análisis lingüístico y comentario exegético, Volume II, hem sei olsem: “[Datfala] toktok hem kam from Isaiah (66,24). Profet hem storyim tufala difren samting wea olketa savve duim long body bilong pipol wea dae finis. Bae olketa letem body bilong man for rotten or bae olketa bonem . . . Wei for storyim olketa worm and fire long sem verse hem helpem man luksavve samting hem finis evribit nao. . . . Tufala samting hia showimaot hard tumas for eni samting stopem datwan (‘gohed olowe, no savve dae’). Body bilong man wea dae finis bae no gohed laef, bat fire and olketa worm nomoa bae gohed laef. Fire and olketa worm barava finisim nao eni samting wea dae finis. Dastawe disfala toktok no storyim man wea dae finis bae hem safa olowe, bat hem minim olketa hia bae dae nao and olketa bae no laef bak moa. Taem olketa dae, olketa finis nao. So [fire] hem piksarem man finis evribit.”
Olketa wea savve trufala God hem lovem pipol and hem laek duim samting wea stret evritaem, bae olketa minim wanem nao Jesus hem talem. Jesus no sei olketa rabis man bae safa for olowe long hellfire, bat taem olketa man hia dae, maet olketa no kasem chance nao for laef bak moa long future.
[Olketa Footnote]
a Olketa oldfala copy bilong Bible wea stret no garem verse 44 and 46. Olketa savveman sei maet bihaen nao pipol addim go tufala verse hia long Bible. Wanfala savveman, Archibald Thomas Robertson, talem olsem: “Olketa oldfala copy bilong Bible wea barava stret no garem tufala verse hia. Olketa copy bilong Western and Syrian (Byzantine) nao garem tufala verse hia. Tufala verse hia talem nomoa sem toktok wea stap long verse 48. Dastawe mifala [aotem] verse 44 and 46 from olketa no stap long firstaem.”
b “Olketa bae go aot and lukim body bilong olketa man wea dae finis wea sin againstim mi. Olketa worm wea kaikaim olketa hia olketa bae no dae and fire bilong olketa bae gohed olowe, and long tingting bilong olketa man, olketa hia barava rabis samting.”—Isa. 66:24.