Samfala Ask Olsem

Why Nao Olketa Jehovah’s Witness No Iusim Olketa Idol Taem Olketa Worship?

Evriwea long world, olketa Church olsem Hindu, Buddhist, Catholic, and olketa Orthodox tinghae long wei for iusim olketa idol, image and olketa piksa olsem important samting long worship bilong olketa. Samfala part long Africa, pipol mekem olketa karving from olketa tree and ston for worship, wea olketa tingse wanfala god or spirit bilong wanfala god nao stap long hem.

Bat Olketa Jehovah’s Witness no iusim eni samting olsem idol or piksa long worship bilong olketa. Sapos iu visitim Kingdom Hall bilong olketa, iu bae lukim hao no eni piksa bilong olketa saint or eni image bilong Jesus or Mary.a Why nao olsem? Tingim wanem Bible talem abaotem diswan.

Wanem Nao God Laekem Olketa Israelite for Duim?

Bihaen Jehovah God mekem olketa Israelite kamap free from Egypt, hem talem stret long olketa hao olketa mas worshipim hem nomoa. Mek-tu komandment long Ten Komandment talem olsem: ‘Iu mas no wakem for iuseleva wanfala image bilong eni samting long skae antap or long earth andanit or long wata andanit long earth. Iu mas no baodaon or worshipim olketa, bikos mi Jehovah, God bilong iu, mi nomoa God wea iu mas worshipim.’​—⁠Exodus 20:​4, 5.

Long taem wea God givim olketa komandment hia long Moses, olketa Israelite gohed for wakem wanfala gold buluka, wea semsem witim olketa animal wea olketa long Egypt worshipim. Olketa no nemim datfala image long eni god bilong Egypt. Bat olketa iusim datwan witim worshipim bilong olketa for Jehovah. (Exodus 32:​5, 6) Wanem nao God duim? God barava kros long olketa wea worshipim datfala idol, and Moses hem spoelem datwan nao.​—⁠Exodus 32:​9, 10, 19, 20.

Bihaen Jehovah God talem moa samfala samting abaotem mek-tu komandment. Jehovah talem Moses hao olketa Israelite mas no wakem “eni idol from image bilong man or woman, eni image wea piksarem eni animal long disfala world, eni image wea piksarem bird wea flae long skae, eni image bilong eni samting wea laef long drae ples, eni image bilong eni fish wea laef insaed solwata.” (Deuteronomy 4:​15-​18) Tru nao, olketa Israelite mas no iusim idol long image bilong eni samting for worshipim God.

Nomata olsem, olketa Israelite worshipim olketa idol nomoa. Jehovah stretem olketa taem hem sendem olketa profet for warnim olketa abaotem panis wea olketa bae kasem sapos olketa worshipim idol. (Jeremiah 19:​3-5; Amos 2:⁠8) Olketa Israelite nating followim olketa warning bilong God. Dastawe, long 607 B.C.E., Jehovah letem olketa long Babylon for finisim Jerusalem and tekem olketa olsem prisoner.​—⁠2 Chronicles 36:​20, 21; Jeremiah 25:​11, 12.

Wanem Nao Olketa Christian Long First Century Bilivim?

Taem olketa wea no Jew kamap olketa Christian long first century, olketa no iusim nao olketa idol for worshipim God. Tingim samting wea Demetrius, wanfala man for wakem idol long Ephesus talem abaotem preaching wea Paul duim. Hem sei olsem: ‘Olketa, iufala savve hao from disfala bisnis wea mifala garem nao mekem mifala for rich. And tu, iu lukim and herem hao no long Ephesus nomoa bat klosap long evri distrik bilong Asia disfala Paul hem muvim tingting bilong bigfala sekson and mekem olketa garem difren tingting, and sei hao olketa idol wea olketa wakem long hand hem no god.’​—⁠Acts 19:​25, 26.

Wanem Paul talem pruvim toktok bilong Demetrius. Taem Paul story long olketa Greek long Athens, hem sei olsem: ‘Iumi mas no tingim God olsem gold or silver or ston, olsem olketa piksa and samting wea man nomoa wakem. Hem tru, God hem willing for no tingim moa wei wea pipol bifor no savve gud, bat distaem hem talem evriwan long evri ples for repent.’ (Acts 17:​29, 30) Paul talem gud samting abaotem olketa long Thessalonica abaotem sem samting taem hem sei: ‘Lusim olketa idol and tan go long God.’​—⁠1 Thessalonians 1:⁠9.

Paul and aposol John tu warnim olketa Christian for no iusim idol or image taem olketa worship. Long end bilong first century, John barava talem stret olsem: “Stap klia from olketa idol.”​—⁠1 John 5:​21.

Olketa Jehovah’s Witness obeyim wanem God talem for no iusim image bilong eni samting taem olketa worshipim God. Olketa bilivim wanem God talem, wea hem sei olsem: “Mi nao Jehovah. Hem nao nem bilong mi. Iufala mas mekhae long mi nomoa and praisem mi nomoa, no olketa idol.”​—⁠Isaiah 42:⁠8.

[Footnote]

[Piksa long page 13]

“Mi nao Jehovah. Hem nao nem bilong mi. Iufala mas mekhae long mi nomoa and praisem mi nomoa, no olketa idol.” ​—⁠Isaiah 42:8