Gudfala Religion Mekhae Long Wei for Respectim Toktok Bilong God

JESUS teachim pipol for respectim toktok bilong God, Bible. Diswan showaot klia long samting wea Jesus talem long Devil taem Devil testim hem. (Matthew 4:​4-​11) Olsem example, wanem nao Jesus duim taem Satan talem hem for changem ston for kamap bred? Jesus no laek for duim samting wea Satan laekem, taem hem talem toktok wea iumi savve readim long Deuteronomy 8:3 wea Moses raetem. Wanem nao Jesus duim taem Devil showim and talem bae hem givim Jesus evri samting long disfala world sapos Jesus baodaon long hem? Hem talem toktok from Bible wea stap long Deuteronomy 6:​13 for showimaot hem no laek for duim wanem Satan talem.

Tingim diswan. Jesus iusim toktok from Bible taem hem teach nomata hem barava Son bilong God. Hem no ting nating long toktok bilong God for followim tingting bilong man. (John 7:​16-​18) Bat staka bigman long religion long taem bilong Jesus no respectim toktok bilong God. Why nao olsem? Olketa tinghae long tingting bilong man winim wanem olketa Scripture talem. Jesus tok stret long olketa bigman bilong religion hia: “Kastom bilong iufala hem mekem toktok bilong God hem iusles nomoa. Iufala savve laea tumas! Samting wea Isaiah talem long profesi abaotem iufala hem barava fitim taem hem sei: ‘Long toktok nomoa pipol hia mekhae long Mi bat olketa no lovem Mi. Olketa worshipim Mi nating nomoa bikos olketa teachim nomoa olketa law wea kam from man.’ ”​—⁠Matthew 15:​6-9, Holman Christian Standard Bible.

Staka religion long world nomata olketa Christian or no Christian, olketa sei olketa respectim Bible. Waswe, iu savve long eni religion wea no followim tingting bilong man taem wanfala teaching no semsem witim toktok bilong God? Ting raonem tufala example hia.

TOPIC: Olketa title wea olketa bigman long religion iusim.

WANEM BIBLE TALEM: Jesus tok againstim olketa bigman long religion long taem bilong hem from olketa laekem tumas for garem bignem and for olketa pipol tinghae long olketa. Jesus talem olketa man hia “olketa laek for sidaon long best ples long feast, and taem olketa go insaed sinagog olketa laek for sidaon long olketa chair long front. Olketa laekem pipol long market for mekhae long olketa and for olketa man mas kolem olketa ‘Teacher.’ ” Jesus talem olketa disaepol bilong hem: “Iufala mas no letem eniwan kolem iufala ‘Teacher’ bikos wanfala Masta nomoa iufala garem, bat iufala evriwan olketa brata. And tu, no kolem eniwan long earth dadi bikos wanfala Dadi nomoa iufala garem wea hem stap long heven.”​—⁠Matthew 23:​1-​10, New Catholic Edition of the Holy Bible.

KWESTIN: Waswe, olketa bigman long religion hia laekem pipol for kolem olketa long spesol title and for pipol long community tinghae long olketa? Or waswe, olketa obeyim toktok bilong Jesus for no duim datwan?

TOPIC: Wei for iusim idol long worship.

WANEM BIBLE TALEM: “Iu mas no wakem for iuseleva wanfala image bilong eni samting long skae or long earth or long wata. Iu mas no baodaon long olketa or worshipim olketa.”​—⁠Exodus 20:​4, 5, English Standard Version.

Aposol John raet long olketa Christian olsem: “Iufala mas stap klia from olketa idol.”​—⁠1 John 5:​21, Contemporary English Version.

KWESTIN: Waswe, religion hia obeyim toktok long Bible for no iusim olketa image and idol long worship bilong olketa long God?

Iu Savve Faendem Stretfala Road

Iu savve faendem religion wea lead go long laef nomata staka difren religion hem stap distaem. Plande wei stap for iumi luksavve long “religion wea klin and stret long tingting bilong God.” (James 1:​27, New Revised Standard Version) Olketa scripture wea stap insaed disfala story hem olsem wanfala saen long road wea helpem iu for faendem datfala religion.

Sapos iu laek for savve long ansa long olketa kwestin wea stap long disfala story, askem Olketa Jehovah’s Witness for minim long iu. Followim gudfala wei bilong olketa long first century wea stap long Beroea, taem iu ting raonem wanem iu lanem. Bihaen olketa herem samting wea aposol Paul preach abaotem, “olketa lukluk gud long olketa Holy Raeting for savve sapos samting wea Paul talem hem tru or nomoa.” (Acts 17:​11, Today’s English Version) Iu bae faendem road for kasem laef, sapos iu studyim gud and respectim toktok bilong God olsem olketa long Beroea duim. Iuseleva bae disaed sapos iu laek for followim datfala road or nomoa.