Faendem Samting wea Stap Haed
WASWE, enitaem iu faendem eni spesol samting long ples wea iu tingse bae iu no faendem? Long March 27, 2005, Ivo Laud, wea hem wanfala Jehovah’s Witness long Estonia, hem faendem wanfala spesol samting. Hem faendem datwan taem hem helpem wanfala olo sista Alma Vardja for aotem olo smol haos for keepim olketa samting. Taem tufala aotem wall, tufala lukim wanfala flat pis timba kavarem wanfala saed long post. Tufala aotem datfala timba and lukim wanfala spes wea olketa mekem insaed long post and wea olketa kavarem datwan long semkaen timba. Spes hia hem 10 centimeter waed, 1.2 meter long, and 10 centimeter deep. (1) Ples wea olketa haedem samting! Wanem nao olketa haedem? Hu nao haedem?
Long datfala spes hem garem olketa packet wea olketa pasolem gud long strong pepa. (2) Insaed olketa packet hem olketa buk bilong Olketa Jehovah’s Witness, wea staka nao hem olketa Watchtower study article and samfala study article long 1947. (3) Olketa raetem gud long Estonian languis. Samfala samting insaed long packet showimaot hu nao haedem. Hem olketa pepa wea story abaotem taem wea police kwestinim Villem Vardja, hasband bilong Alma. Hem garem tu pepa wea storyim taem wea hem stap long prison. Why nao disfala brata stap long prison?
Villem Vardja duim waka long Tartu Kongregeson and bihaen long Otepää Kongregeson long Estonia, wea bifor USSR rulim. Luk olsem Villem Vardja lanem truth bifor World War II. Long December 24, 1948, gavman arrestim Brata Vardja from hem duim preaching waka. Police kwestinim hem and spoelem hem nogud from olketa laekem hem for mas talem nem bilong olketa nara Witness. Olketa no letem hem for go long kot bat olketa putim hem long prison long Russia for tenfala year.
Villem Vardja faithful long Jehovah go kasem taem hem dae long March 6, 1990. Waef bilong hem nating savve hem haedem olketa buk hia. Luk olsem, hem no talem waef bilong hem mekem sapos eniwan kwestinim waef bilong hem, bae waef bilong hem no savve. Why nao hem haedem olketa buk? Plande taem Soviet State Security Committee, wea hem nao KGB, savve seknomoa kam long haos bilong Olketa Jehovah’s Witness and lukaotem olketa buk bilong iumi. Luk olsem Brata Vardja haedem samfala buk mekem sapos KGB tekem evri nara buk, samfala stap for olketa brata iusim. Long 1990, olketa faendem samfala nara buk tu wea Villem Vardja haedem olsem. Olketa faendem long Tartu, wea hem long south part long Estonia.
Why nao olketa buk hia barava spesol? Olketa buk hia wea olketa copyim gud and haedem gud hem showimaot olketa Witness barava tinghae long spiritual kaikai wea olketa kasem long datfala taem. (Matt. 24:45) Waswe, iu tinghae long olketa buk wea iu kasem distaem? Wanfala nao The Watchtower long Estonian languis, wea hem stap long winim 170 nara languis tu.