Mek-tu Samting

No Comparem Iu Witim Olketa Narawan

WANEM NAO BIBLE TEACHIM? “Duim gud waka bilong iu and iu bae hapi long wanem iu duim. Bat no comparem iu witim olketa narawan.”​—Galatians 6:​4, Contemporary English Version.

WHY NAO HEM NO ISI? Hem wei bilong iumi for comparem iumi witim olketa narawan, samfala taem witim olketa wea no garem staka samting, and staka taem witim olketa wea strong, rich, or savve long staka samting winim iumi. Nomata wanem, wei for comparem iumi witim narawan hem nogud. Iumi tingse pipol savve tinghae long samwan sapos hem garem staka samting or long wanem hem fit for duim. Maet iumi start mekem feeling for jealous kamap and laek winim narawan.​—Ecclesiastes 4:4.

WANEM NAO IU SAVVE DUIM? Ting long iuseleva olsem hao God ting long iu. Letem tingting wea God garem abaotem iu helpem iu for tingim hao iu important. “Man hem lukim samting wea eye nomoa lukim, bat Jehovah,a hem lukim heart.” (1 Samuel 16:7) Samting wea mekem Jehovah tinghae long iumi or nomoa hem samting wea hem lukim long iumi. Hem savve long wanem nao long heart bilong iumi, long tingting and feeling bilong iumi, and wanem iumi laek for duim. (Hebrews 4:​12, 13) Jehovah savve long wanem iu no fit for duim and laekem iu tu for luksavve long datwan. Sapos iu comparem iu witim narawan for savve sapos iu important or nomoa, iu bae praod or evritaem no satisfae. So hem gud for iu hambol and luksavve, iu no savve duim evri samting.​—Proverbs 11:2.

Wanem nao main samting wea iu mas duim mekem God tinghae long iu? God iusim holy spirit for mekem profet Micah for sei: ‘Jehovah laekem iu for duim stret samting, and for barava kaen long narawan, and for no ova tumas taem iu wakabaot witim God bilong iu.’ (Micah 6:⁠8) Sapos iu followim datfala advaes, God bae kea for iu. (1 Peter 5:​6, 7) Diswan nao hem nambawan reason for man satisfae!

[Footnote]

[Piksa long page 5]

Wanem stap long heart bilong iumi nao mekem Jehovah for tinghae long iumi