Iufala Young Wan, Winim Olketa Hevi wea Iu Kasem

“Toktok bilong iufala mas . . . olsem iufala putim solt long hem, mekem iufala savve hao for givim ansa long evri man.”​—⁠COL. 4:⁠6.

1, 2. Hao nao tingting bilong staka young wan abaotem wei for difren, and why nao olsem?

STAKA pipol kasem hevi for duim nogud samting from olketa narawan, and maet iu tu kasem sem samting. Maet samwan talem iu for duim samting wea iu savve hem no stret. Hao nao iu feel taem datwan hem happen? Christopher wea 14 year sei: “Samfala taem mi feel olsem mi laek haed nomoa, or for olsem olketa skulfren mekem olketa no ting long mi olsem mi difren.”

² Waswe, samting wea olketa fren bilong iu duim barava affectim iu? Sapos olsem, why nao iu tingse datwan hem happen? Waswe, hem bikos iu laekem olketa for acceptim iu? Hem no rong for laekem narawan for acceptim iu. Olketa bigman tu laekem pipol for acceptim olketa. No eniwan laekem narawan for les long hem. Bat iumi luksavve taem iumi duim samting wea stret, samfala pipol bae no hapi long iumi. Jesus tu kasem datwan. Nomata olsem, Jesus evritaem duim samting wea stret. Samfala kamap disaepol bilong hem, bat olketa narawan ting daonem Son bilong God and “tingim hem olsem hem man nating nomoa.”​—⁠Isa. 53:⁠3.

Hem Isi Tumas for Followim Narawan

3. Why nao hem nogud for followim standard bilong olketa fren bilong iu?

³ Maet samfala taem iu laek for followim standard bilong olketa fren bilong iu mekem olketa no les long iu. Datwan hem no stret samting for duim. Olketa Christian shud “finis for olsem pikinini” wea ‘olsem boat long sea wea olketa wave pushim hem olobaot.’ (Eph. 4:​14) Hem isi for olketa smol pikinini followim wei bilong olketa narawan. Bat from iu young, bae gogo iu kamap big. So sapos iu bilivim olketa standard bilong Jehovah bae helpem iu, hem gud tumas for followim olketa samting wea iu bilivim. (Deut. 10:​12, 13) Sapos iu no duim datwan, hem olsem iu letem narawan nao for kontrolem laef bilong iu.​—⁠Readim 2 Peter 2:​19.

4, 5. (a) Wanem nao Aaron duim taem hem kasem hevi, and wanem nao iu savve lanem from datwan? (b) Wanem nao maet olketa fren duim for mekem iu duim samting wea no stret?

⁴ Wantaem brata bilong Moses, Aaron, kasem bigfala hevi from olketa narawan. Olketa Israelite talem hem for wakem wanfala god for olketa, and Aaron duim nao wanem olketa laekem. Aaron hem no man wea savve fraet. Bifor datfala samting happen, hem go witim Moses for story long Pharaoh, bigman bilong Egypt. Aaron nating fraet for talemaot message bilong God long Pharaoh. Bat taem olketa Israelite putim hevi long Aaron, Aaron duim wanem olketa laekem. Tru tumas, hem isi for followim wanem olketa narawan laekem! Aaron no fraet for againstim king bilong Egypt bat hem fraetem olketa Israelite.​—⁠Ex. 7:​1, 2; 32:​1-4.

⁵ Samting wea kasem Aaron showimaot hem no olketa young wan and olketa wea laek duim nogud samting nomoa wea kasem hevi from olketa narawan. Hevi from olketa narawan savve affectim iu and olketa wea laek for duim stret samting tu. Maet olketa fren bilong iu accusim iu, tok spoelem iu, or trae forcem iu for duim danger samting bikos olketa laek mekem iu for duim samting wea no stret. Hem no isi for winim olketa hevi wea iu kasem. So for againstim hevi wea iu kasem iu need for garem faith long wanem iu bilivim.

“Lukluk Gud Long Iufala Seleva”

6, 7. (a) Why nao hem important for garem faith long wanem iu bilivim, and hao nao iu savve garem datwan? (b) Olketa wanem kwestin nao iu savve ting raonem for strongim faith bilong iu?

⁶ For winim hevi wea iu kasem from olketa young wan, iu mas garem faith hao biliv bilong iu and standard wea iu followim hem stret. (Readim 2 Corinthians 13:⁠5.) Datwan bae helpem iu for no fraet nomata iu savve shame. (2 Tim. 1:​7, 8) Nomata sapos iu no fraet, maet hem no isi for iu duim samting wea stret sapos iu no barava bilivim datwan. So hem gud for iu pruvim long iuseleva wanem iu lanem from Bible hem tru! Firstaem hem gud for ting raonem olketa main teaching long Bible. Olsem example, iu bilivim God hem stap and iu herem olketa narawan tu talem why olketa bilivim datwan. So tingim, ‘Wanem nao mekem mi for barava bilivim God hem stap?’ Datfala kwestin hem no for mekem iu daotem wanem iu bilivim bat for strongim faith bilong iu. Tingim tu, ‘Wanem nao mekem mi for bilivim Bible hem kam from God?’ (2 Tim. 3:​16) ‘Wanem nao mekem mi for bilivim iumi stap long “olketa last day”?’ (2 Tim. 3:​1-5) ‘Wanem nao mekem mi for bilivim mi bae kasem gud samting taem mi followim olketa standard bilong Jehovah?’​—⁠Isa. 48:​17, 18.

⁷ Maet iu fraet for tingim olketa kwestin hia nogud iu no savve long ansa. Bat datwan bae olsem iu go long kanu and iu fraet for chekim container bilong petrol nogud hem finis! Sapos petrol hem finis, iu need for savve long datwan mekem iu refillim moa. Long sem wei tu, hem gud for luksavve long wanem iu daotem and duim samting for strongim faith bilong iu.​—⁠Acts 17:⁠11.

8. From hem no wise for durong, wanem nao iu savve duim for strongim faith bilong iu long datwan?

⁸ Tingim disfala example. Bible talem iu for “ranawe from eni samting wea switim [iu] for durong.” Why nao hem wise for iu followim datfala law? Tingim wanem nao mekem olketa young wan duim nogud samting hia. Tingim tu olketa reason why man wea durong hem “sin againstim body bilong hem.” (1 Cor. 6:​18) Then comparem olketa reason and tingim: ‘Wanem nao hem stret samting for duim? Waswe, hem gud nomoa for durong?’ Tingim tu, ‘Hao nao bae mi feel sapos mi durong?’ Maet olketa narawan hapi long wanem iu duim, bat hao nao bae iu feel taem iu stap witim dadi and mami or witim olketa brata and sista long Kingdom Hall? Taem iu trae for prea long God, bae iu feel hao? Waswe, bae iu willing for duim samting wea God no hapi long hem bikos iu laek for mekem olketa skul fren hapi?

9, 10. Sapos iu trustim wanem iu bilivim, hao nao bae datwan helpem iu?

⁹ Sapos iu teenager, iu kasem taem wea iu start for lane for garem “gudfala tingting.” (Readim Romans 12:​1, 2.) Hem gudfala taem for ting raonem why iu kamap wanfala Jehovah’s Witness. Datwan bae helpem iu for trustim wanem iu bilivim. Then taem iu kasem hevi from olketa narawan, bae iu no fraet for talem ansa long olketa. Bae iu feel olsem disfala sista wea 21 year. Hem sei: “Taem mi winim hevi wea mi kasem from olketa narawan, datwan mekem olketa luksavve long wanem mi bilivim. Mi no Christian long nem nomoa, bat religion bilong mi hem spesol and important long mi. Hem main samting wea affectim tingting bilong mi, olketa goal bilong mi, wei bilong mi, and evri samting wea mi duim.”

¹⁰ Hem tru, iu mas waka hard for duim samting wea stret. (Luke 13:24) Bat tingim diswan: Sapos iu shame or sei sorre bikos iu laek for duim stret samting, olketa narawan bae luksavve long datwan and maet olketa putim moa hevi long iu. Bat sapos iu strong long wanem iu bilivim, maet iu sapraes for lukim olketa stop for putim hevi long iu.​—⁠Markem witim Luke 4:​12, 13.

“Ting Raonem Hao for Ansa”

11. Wanem gud samting nao bae iu kasem sapos iu redi firstaem for eni hevi wea kamap?

¹¹ Nara important samting wea savve helpem iu for winim hevi wea iu kasem, hem for redi firstaem. (Readim Proverbs 15:28.) Datwan minim for ting raonem firstaem olketa samting wea savve happen. Wei for duim olsem savve stopem bigfala problem for kamap. Olsem example, maet taem iu wakabaot, iu lukim samfala skul fren smoke. Sapos iu go pas long olketa, maet olketa laek givim smoke long iu! From iu luksavve long problem wea savve kamap, wanem nao iu savve duim? Proverbs 22:3 sei: “Man wea garem savve hem lukim trabol and hem protectim hemseleva.” Sapos iu no go pas long olketa, maet iu no kasem eni problem. Datwan no showimaot iu fraet bat hem wise samting for duim.

12. Wanem nao gud samting for duim taem samwan kwestinim iu?

¹² Wanem nao bae iu duim sapos iu no savve go from olketa skul fren? Wanem nao bae iu talem sapos wanfala long olketa no bilivim iu and hem sei long iu, “Hao, iu no frenim eniwan yet?” Hem important for followim disfala kaonsel long Colossians 4:6: “Toktok bilong iufala mas evritaem kaen and olsem iufala putim solt long hem, mekem iufala savve hao for givim ansa long evri man.” Olsem scripture hia showimaot, wanem iu talem bae depend nomoa long wanem hem happen. Maet iu no need for storyim staka samting abaotem Bible, bat talem simpol ansa nomoa. Olsem example, taem samwan askem iu sapos iu frenim eniwan, maet iu sei, “Iu no need for savve long datwan.”

13. Why nao hem important for garem wei for luksavve taem iu ansarem narawan?

¹³ Plande taem Jesus no talem staka samting sapos hem luksavve man wea askem kwestin bae no tinghae long wanem hem talem. Taem Herod askem Jesus staka kwestin, Jesus no talem eni samting. (Luke 23:​8, 9) Sapos samwan askem kwestin wea no showimaot respect, plande taem hem gud for kwaet nomoa. (Prov. 26:4; Eccl. 3:​1, 7) Bat maet iu luksavve samwan askem kwestin bikos hem laek savve long biliv bilong iu abaotem sex, nomata sapos firstaem hem tok spoelem iu. (1 Pet. 4:⁠4) Sapos olsem, maet iu need for explainim why iu followim wanem Bible talem. No fraet for duim datwan. Hem gud for “redi evritaem for givim ansa” long man wea askem kwestin.​—⁠1 Pet. 3:​15.

14. Wanem nao hem gud for duim taem samwan laek forcem iu for duim nogud samting?

¹⁴ Maet samfala taem iu savve putim hevi go bak long skul fren. Bat iu mas duim datwan long wei wea showimaot respect. Olsem example, sapos skul fren laek forcem iu for smoke, iu savve sei, “No thankiu” and then sei, “Mi tingse samwan olsem iu bae no laek smoke!” Waswe, iu lukim wei for duim datwan hem olsem iu mekem datfala hevi go bak long skul fren? Winim wei for explainim why iu no smoke, wanem iu talem long skul fren savve mekem hem for ting raonem why hem smoke.a

15. Wanem taem nao hem gud for iu go from olketa skul fren, and why nao olsem?

¹⁵ Wanem nao bae iu duim sapos olketa skul fren gohed for putim hevi long iu? Hem gud for go from olketa. Sapos iu gohed for stap witim olketa, bae hem isi for iu duim wanem olketa laekem. Iu shud no feel nogud taem iu go from olketa bikos datwan showimaot iu no letem olketa for kontrolem iu and iu mekem Jehovah hapi.​—⁠Prov. 27:⁠11.

‘Plan Gud Firstaem Mekem Iu Kasem Gud Samting’

16. Wanem kaen hevi nao maet iu kasem from olketa narawan wea sei olketa Christian?

¹⁶ Maet samfala taem iu kasem hevi for duim nogud samting from olketa nara young wan wea sei olketa worshipim Jehovah. Olsem example, waswe sapos iu go long hapitaem wea wanfala young wan arrangem bat no eni bigman stap for lukaftarem iufala? Waswe sapos wanfala young wan wea sei hem Christian tekem kam alcohol long hapitaem bat iu and olketa narawan wea stap no kasem age wea law letem man for drink? Staka samting savve kamap wea iu mas followim konsens bilong iu wea followim Bible. Wanfala sista wea 16 year hem sei: “Mi and sista bilong mi go aot from movie bikos pipol long movie tok swear tumas. Olketa narawan wea mifala go tugeta gohed for lukluk nomoa long datfala movie. Dadi and mami barava hapi long wanem mitufala duim. Bat olketa narawan kros long mitufala bikos wanem mitufala duim mekem olketa feel olsem olketa duim nogud samting.”

17. Taem iu go long hapitaem, wanem nao iu savve duim mekem iu followim olketa standard bilong God?

¹⁷ Datfala experience showimaot taem iu followim konsens bilong iu wea followim Bible datwan savve mekem narawan feel nogud. Bat duim samting wea stret. Redi firstaem. Bifor iu go long hapitaem, garem plan for go from datfala hapitaem sapos samting hem no stret long tingting bilong iu. Samfala young wan garem plan for ringim dadi and mami mekem olketa savve pikim olketa sapos datwan happen. (Ps. 26:​4, 5) Wei for ‘plan gud firstaem savve mekem iu kasem gud samting.’​—⁠Prov. 21:⁠5.

‘Hapi Long Young Laef Bilong Iu’

18, 19. (a) Why nao iu savve Jehovah laekem iu for hapi? (b) Wanem nao tingting bilong Jehovah long olketa wea winim hevi wea olketa kasem?

¹⁸ Jehovah wakem iu for enjoyim laef, and hem laekem iu for hapi. (Readim Ecclesiastes 11:⁠9.) Tingim, hapi wea olketa young wan kasem taem olketa duim sin hem for “lelebet taem nomoa.” (Heb. 11:25) Tru God laekem iu for hapi for olowe. So taem iu kasem hevi for duim samting wea God sei hem no stret, tingim hao samting wea Jehovah askem iu for duim hem for helpem iu evritaem.

¹⁹ From iu young, iu need for luksavve nomata iu laek for mekem olketa skul fren hapi, maet long olketa year bihaen staka long olketa no rememberim nem bilong iu. Bat taem iu winim olketa hevi, Jehovah lukim datwan and hem bae nating forgetim iu and wei wea iu faithful. Hem bae ‘blessim iu olsem hem openem skae and letem rain kam daon. Iu bae kasem staka gud samting winim wanem iu tingim.’ (Mal. 3:​10) And taem iu no strong, hem bae givim holy spirit for helpem iu tu. Tru tumas, Jehovah savve helpem iu for winim olketa hevi wea iu kasem from narawan!

[Footnotes]

Waswe, Iu Tingim Yet?

• Hevi wea iu kasem from narawan savve mekem iu for duim wanem?

• Hao nao wei for garem faith helpem iu for winim hevi wea iu kasem?

• Bifor iu kasem eni test, wanem nao iu savve duim for redi firstaem?

• Why nao iu savve Jehovah tinghae long wei wea iu faithful?

[Piksa long page 8]

Why nao Aaron wakem datfala gold buluka?

[Piksa long page 10]

Redi firstaem mekem iu savve wanem for talem