‘God Rememberim Evri Gud Samting wea Hem Duim’
THEODORE JARACZ, wea hem wanfala member bilong Governing Body bilong Olketa Jehovah’s Witness, hem dae and finisim waka wea hem duim long earth long Wednesday morning, June 9, 2010. Hem 84 year and hem and waef bilong hem Melita marit for 53 year. Olketa wea laef yet long famili bilong hem, hem waef bilong hem, wanfala sista, and thrifala pikinini bilong sista bilong hem.
Brata Jaracz born long September 28, 1925, long Pike County, Kentucky, America. Hem baptaes long August 10, 1941, taem hem 15 year. Taem hem 17 year, hem start for regular pioneer. Hem duim full-taem service for klosap 67 year.
Long 1946, taem Brata Jaracz hem 20 year, hem attendim mek-seven class bilong Gilead Skul. Bihaen hem graduate, hem duim traveling waka long Cleveland, Ohio, long America. Long 1951, hem kasem assignment for lukaftarem waka long Australia branch. Yearbook of Jehovah’s Witnesses long 1983 sei Brata Jaracz “barava encouragem olketa brata long Australia from hem evritaem organize gud and strong for duim preaching waka.”
Taem Brata Jaracz go bak long America, hem maritim Melita Lasko, long December 10, 1956. Tufala duim circuit and distrik waka long staka ples long America. Klosap long end bilong 1974, Brata Jaracz kamap member bilong Governing Body bilong Olketa Jehovah’s Witness.
Iumi bae nating forgetim Brata Jaracz bikos hem barava waka hard and faithful long Jehovah. Hem duim waka bilong hem long organization witim full heart bilong hem. Hem lovem and lukaftarem waef bilong hem and fren gud witim Jehovah. Hem evritaem tingim narawan firstaem. (1 Cor. 13:4, 5) Wei wea hem evritaem duim stret samting and sorre long pipol barava showimaot hem interest long narawan. From hem lovem pipol and tingim olketa, hem gohed strong for duim preaching waka.
Nomata iumi barava sorre for lusim Brata Jaracz wea iumi lovem and wea waka hard long Bethel, iumi hapi long wei wea hem faithful long Jehovah for staka year. Iumi savve ‘hem faithful go kasem taem hem dae and hem kasem datfala kraon bilong laef.’ (Rev. 2:10) Iumi savve tu ‘God rememberim evri gud samting wea hem duim.’—Rev. 14:13.