Waswe, Iu Tingim Yet?

Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:

• Wanem angel nao God markem for leadim olketa Israelite go aot from Egypt? (Ex. 23:​20, 21)

Bible showimaot angel ‘wea stand for nem bilong Jehovah,’ nao leadim olketa Israelite. Hem nao firstborn Son bilong God, Jesus.​—⁠9/15, page 21.

• Wanem nao savve helpem iu for teachim pikinini for iusim gudfala tingting?

Showim pikinini bilong iu hao for iusim gudfala tingting. (John 13:15) Luksavve long wanem pikinini fit for duim. Taem pikinini start for big, hem gud for givim waka wea hem fit for duim, olsem for keepim hemseleva klin, klinim rum bilong hem, for no leit, and ting long skul waka olsem samting wea hem mas duim. Talem pikinini wanem for duim mekem hemseleva savve duim waka bilong hem.​—⁠10/1, page 19-20.

• Why nao Jesus no kwiktaem go long Lazarus taem hem sik and healim hem?

Taem Jesus kasem Bethany, Lazarus hem stap long grev fofala day finis. Jesus savve sapos hem weit, hem bae givim gudfala witness abaotem Dadi bilong hem, Jehovah. From hem duim datwan, staka pipol biliv long God. (John 11:45)​—⁠10/1, page 30, 31.

• Wanem nao olketa “haefala ples”?

Long staka scripture, olketa “haefala ples” hem olketa main ples wea olketa duim false worship wea maet hem antap long olketa hill, or long olketa nara ples for worship. Samfala taem olketa ples hia garem olketa altar, olketa ston ples and timba post for worship, and olketa nara samting for worship wea God tambuim. (Num. 33:52)​—⁠10/1, page 21.

• Wanem nao samfala excuse wea God no acceptim saed long worship bilong iumi?

‘Hem hard tumas. Mi no laek for duim. Mi busy tumas. Mi no fit for duim. Narawan mekem mi feel nogud.’ Olketa excuse hia hem no gudfala excuse for no duim wanem God talem.​—⁠10/15, page 12-​15.

• Wanem nao samfala samting wea iumi savve duim for mekem meeting hem strongim and encouragem iumi and olketa narawan?

Prepare firstaem. Attend evritaem. Kam early. Tekem kam olketa buk. No busy long nara samting. Tekpart. Givim short koment. Duim assignment bilong iu. Praisem narawan. Story witim narawan bifor and bihaen long meeting.​—⁠10/15, page 22.

• Taem Aaron kasem bigfala hevi and duim wanem olketa narawan laekem, wanem nao iumi lanem from datwan?

Taem Moses no stap, Aaron kasem bigfala hevi from olketa Israelite for wakem wanfala god for olketa and Aaron duim nao wanem olketa laekem. Diswan showimaot hem no olketa young wan nomoa wea kasem hevi from olketa narawan. Hevi from olketa narawan savve affectim olketa olo wea laek for duim stret samting tu. Iumi need for winim olketa hevi wea iumi kasem from narawan.​—⁠11/15, page 8.