‘Pipol Lukluk Strong Long Mi’

Taem Charlotte White wea duim full-taem service arrive long Louisville, Kentucky, America, staka pipol lukluk long hem bikos hem pushim wanfala suitcase wea garem olketa wheel.

DATWAN happen long 1908, and staka pipol long taon lukluk long niu samting wea Sista Charlotte White pushim wea hem nao Dawn-Mobile. Hem sei: “Staka pipol story abaotem datwan and lukluk strong long mi.”

Olketa Bible Student, wea hem nao nem bilong Olketa Jehovah’s Witness bifor, luksavve olketa need for talem narawan tru samting wea olketa lanem long Bible. Staka lane abaotem Bible taem olketa studyim olketa buk wea garem title Millennial Dawn.a Samfala Christian go long olketa farawe taon, vilij, and long nara ples for givimaot olketa buk hia long pipol wea interest for lane abaotem Bible.

Long 1908, olketa brata and sista savve salem six-volume long Millennial Dawn for $1.65 (U.S.) wea hem nao kost for printim olketa buk hia. Winim wei for givim olketa buk long haosholder stretawe, olketa brata and sista raetem haomas buk nao haosholder laekem and tekem for hem long narataem. Wanfala man komplen and sei selen wea pipol givim for olketa buk hia hem smol tumas!

Wanfala sista wea nem bilong hem Malinda Keefer storyim hao hem savve tekem go bak 200 go kasem 300 buk evri week for olketa haosholder wea interest. Bat wei wea staka pipol laek readim Millennial Dawn buk mekem problem kamap. Olsem example, mek-six volume garem 740 page! Wanfala Wastaoa sei hevi bilong 50-fala buk hem 18 kilogram and hem hevi tumas for olketa pablisa karem especially olketa sista.

Brata James Cole wakem wanfala niu samting for mekem hem isi for karem olketa buk. Hem wakem wanfala frame wea garem tufala wheel wea man savve foldim. Man savve putim suitcase antap long datfala frame and iusim screw for holem. From James Cole savve iusim datwan for karem olketa hevi buk, hem sei: “Mi no need for spoelem shoulder bilong mi nao.” Long 1908, hem showim wanem hem wakem long olketa brata and sista wea hipap long convention long Cincinnati, Ohio. Long tufala saed bilong frame hem garem raeting wea sei Dawn-Mobile, bikos main samting wea olketa putim long suitcase hem olketa volume bilong Millennial Dawn. Taem pablisa iusim datwan olowe, hem savve pushim long wan hand nomoa nomata suitcase hem fulap long staka buk. Olketa savve adjustim Dawn-Mobile for fitim tol bilong each pablisa and hem savve pushim long eni road. Bihaen pablisa preach finis, hem savve foldim olketa wheel bilong datfala Dawn-Mobile mekem hem isi for hem karem go bak.

Olketa sista wea duim full-taem ministry savve tekem Dawn-Mobile and no need for peim, bat olketa nara pablisa savve peim long $2.50 (U.S.). Sista Malinda Keefer wea hem nao long piksa savve tumas hao for iusim Dawn-Mobile. Nomata suitcase hem fulap long olketa buk, hem savve pushim long wan hand nomoa and long semtaem hem karem tu basket wea garem samfala buk moa. Malinda Keefer faendem staka pipol wea interest long Bible long wanfala mining taon long Pennsylvania, America. Hem akrosim wanfala bridge thri or fofala taem long day for givim olketa buk.

Long 1987, wanfala pilot wakem wanfala niu kaen suitcase wea garem wheel, wea staka pipol distaem iusim long airport or long taon. Bat winim 100 year go finis, olketa Bible Student hapi taem pipol lukluk long olketa taem olketa iusim Dawn-Mobile for duim preaching waka.

[Footnote]

[Blurb long page 32]

Sista Malinda Keefer akrosim wanfala bridge thri or fofala taem long day for givim olketa buk

[Blurb long page 32]

Hem isi for iusim Dawn-Mobile for karem olketa buk