Trust Long Jehovah, God Bilong “Olketa Taem and Season”
“Hem changem olketa taem and season, hem aotem and markem olketa king.”—DAN. 2:21.
WANEM NAO ANSA BILONG IU?
Hao nao creation and olketa profesi wea kam tru pruvim Jehovah savve duim wanem hem talem long barava taem wea hem markem?
From iumi savve Jehovah hem God bilong “olketa taem and season,” wanem nao iumi mas duim?
Nomata wanem samting olketa man duim, why nao Jehovah no need for changem taem wea hem markem for duim wanem hem laekem?
1, 2. Why nao iumi fit for sei Jehovah hem barava savve wanem nao “taem”?
LONGFALA taem bifor Jehovah God wakem olketa man, hem mekem wei for olketa savve markem “taem.” Long mek-foa day wea God wakem evri samting, hem sei: “Olketa samting for givim laet mas showaot long skae for markem day and naet, and olketa bae olsem saen and olketa bae markem olketa season and day and year.” (Gen. 1:14, 19, 26) Datwan nao hem samting wea happen.
2 Bat kam kasem distaem, olketa scientist no savve explainim wanem nao “taem.” Wanfala encyclopedia hem sei no eni man savve minim wanem nao “taem.” Bat Jehovah hem barava savve bikos hem nao wakem skae and earth. Sapos Jehovah laek for savve, hem fit for savve wanem bae happen long future tu. Bible sei Jehovah hem “savve talem firstaem samting wea bae happen, and long bifor kam tu [hem] savve talem olketa samting wea no happen yet.” (Isa. 45:18; 46:10) Bae iumi storyim tufala samting wea bae strongim faith bilong iumi long Jehovah and samting wea Bible talem. Tufala samting hia pruvim Jehovah evritaem duim wanem hem talem long barava taem wea hem markem. First samting hem creation, and mek-tu, hem olketa profesi wea kam tru.
CREATION STRONGIM FAITH BILONG IUMI
3. Wanem nao samfala samting wea barava followim “taem”?
3 Staka samting wea Jehovah wakem nomata hem big or smol olketa barava followim “taem.” Olsem example, olketa atom seksek evritaem long sem speed. Olketa spesol klok wea iusim olketa atom for markem “taem” bae talem stretfala taem nomata bihaen 80 million year. From gogo bilong olketa planet and star barava followim taem, olketa man savve wea nao olketa bae stap long skae and long wanem taem. Diswan mekem olketa man fit for savve long olketa season and for luk followim olketa star for savve wea nao for go. From Jehovah hem wakem olketa atom and star, datwan showimaot hem “garem bigfala paoa” and hem fit for kasem praise from iumi.—Readim Isaiah 40:26.
4. Hao nao wei wea olketa samting wea laef followim “taem” showimaot Jehovah hem wise?
4 “Taem” hem kontrolem evri samting wea laef. Hem kontrolem olketa plant and animal, dastawe staka bird savve wanem taem nao olketa mas flae go for stap long difren ples. (Jer. 8:7) “Taem” hem kontrolem olketa man tu. Olsem example, body bilong iumi hem feel savve taem hem day and taem hem naet. Sapos iumi go insaed plane and flae go long nara kantri wea followim difren taem, maet body bilong iumi needim tu-thri day for getius long datwan. So staka samting wea Jehovah wakem pruvim hem God bilong “olketa taem and season” and hem garem bigfala paoa and wisdom. (Readim Psalm 104:24.) From datwan, iumi barava sure hem fit for duim wanem hem plan for duim!
PROFESI WEA KAM TRU LONG BARAVA TAEM STRONGIM FAITH
5. (a) Wanem nao iumi mas duim sapos iumi laek for savve long future bilong olketa man? (b) Why nao Jehovah fit for talem iumi wanem bae happen long future and long wanem taem?
5 Iumi savve lanem staka samting abaotem olketa wei bilong Jehovah from creation. Nomata olsem, olketa samting hia no helpem iumi for kasem ansa for kaen important kwestin olsem, Wanem nao future bilong olketa man? (Rom. 1:20) For kasem ansa, iumi mas lukluk long samting wea God talem insaed long Bible. Bible storyim staka profesi wea kam tru long barava taem wea God markem. Jehovah savve talem iumi samting wea bae happen bikos hem fit for savve wanem bae happen long future. And tu, olketa profesi long Bible kam tru long barava taem bikos Jehovah savve mekem samting happen followim plan bilong hem and long taem wea hem markem.
6. Wanem nao showimaot Jehovah laekem iumi for minim olketa Bible profesi?
6 God no ting long “taem” long sem wei olsem iumi. Nomata olsem, hem iusim toktok wea iumi olketa man savve minim taem hem storyim samting wea bae happen long taem wea hem markem. (Readim Psalm 90:4.) Olsem example, Revelation hem story abaotem ‘fofala angel wea weitim datfala day and month and year.’ Iumi olketa man minim wanem nao day and month and year. (Rev. 9:14, 15) Taem iumi luksavve olketa profesi kam tru long barava taem wea God markem, datwan strongim faith bilong iumi long God bilong “olketa taem and season,” and long samting wea Bible talem tu. Distaem bae iumi storyim samfala Bible profesi hia.
7. Storyim profesi wea showimaot Jehovah evritaem duim wanem hem promisim long barava taem wea hem talem.
7 Tingim samting wea happen samting olsem six handred year bifor Christ kam long earth. “Long mek-foa year bilong rul bilong Jehoiakim, wea hem son bilong Josiah, king bilong Judah,” Jehovah hem story long Jeremiah abaotem pipol bilong Judah. (Jer. 25:1) Jehovah sei olketa bilong Babylon bae distroem Jerusalem and tekem olketa Jew from Judah go long Babylon. Long there, olketa Jew bae “servem king bilong Babylon for seventi year.” Long 607 B.C.E., hem nao samting wea happen. Army bilong Babylon distroem Jerusalem and tekem olketa Jew from Judah go long Babylon. Bat wanem nao Jehovah sei bae happen taem datfala 70 year hem finis? Jehovah promisim pipol bilong hem taem datfala “seventi year long Babylon” hem finis, hem bae tekem olketa kam bak long hom bilong olketa. (Jer. 25:11, 12; 29:10) Disfala profesi hem kam tru long barava taem. Olketa Jew go bak long hom bilong olketa long 537 B.C.E., taem olketa bilong Media and Persia letem olketa go free from Babylon.
8, 9. Hao nao olketa profesi bilong Daniel showimaot Jehovah hem God bilong “olketa taem and season”?
8 Samting olsem tufala year bifor olketa Jew lusim Babylon, Daniel raetem wanfala profesi wea affectim olketa. Long datfala profesi, God sei datfala Messiah bae kam 483 year bihaen komand hem go aot for buildim moa Jerusalem. King bilong Media and Persia talem datfala komand long 455 B.C.E. Jesus bilong Nazareth hem baptaes long 29 C.E., wea hem 483 year bihaen datwan, and long datfala taem hem kasem holy spirit and kamap Messiah.a—Neh. 2:1, 5-8; Dan. 9:24, 25; Luke 3:1, 2, 21, 22.
9 Tingim tu olketa profesi long Bible abaotem Kingdom bilong God. Bible showimaot Christ bae kamap King long heven long 1914. Olsem example, Bible storyim “saen” wea showimaot Jesus bae stap and hem sei long datfala taem bigfala trabol bae kamap long earth bikos olketa torowem Satan from heven kam daon long earth. (Matt. 24:3-14; Rev. 12:9, 12) Samfala nara profesi helpem iumi for savve long barava taem wea ‘rul bilong olketa kantri’ hem finis and Christ hem kamap King long heven, wea datwan hem happen long 1914.—Luke 21:24; Dan. 4:10-17.b
10. Wanem nao olketa samting wea klosap for happen long barava taem wea Jehovah markem?
10 Klosap nao, “bigfala trabol” wea Jesus talem profesi abaotem bae happen. Bihaen datwan, Jesus bae rul for wan thousand year. Iumi savve sure evri samting hia bae happen long barava taem wea Jehovah markem. Taem Jesus stap long earth, Jehovah markem finis “day and taem” wea olketa samting hia bae happen.—Matt. 24:21, 36; Rev. 20:6.
‘IUSIM GUD TAEM BILONG IU’
11. Sapos iumi biliv end hem klosap, wanem nao iumi mas duim?
11 From iumi savve Christ hem kamap King finis and iumi stap long ‘taem wea world hem gogo for finis,’ wanem nao iumi mas duim? (Dan. 12:4) Staka pipol luksavve olketa problem long world kamap worse, bat olketa no luksavve diswan nao samting wea Bible talem bae happen long olketa last day. Samfala pipol tingse olketa problem hia bae barava worse go moa. Samfala narawan tingse gogo olketa man bae mekem iumi “garem peace and stap gud.” (1 Thess. 5:3) Bat waswe long iumi? Sapos iumi biliv iumi stap long end bilong olketa last day, bae iumi iusim taem bilong iumi for worshipim Jehovah and helpem olketa narawan for savve long hem. (2 Tim. 3:1) Iumi mas mekem olketa wise disison mekem iumi ‘iusim gud taem bilong iumi.’—Readim Ephesus 5:15-17.
12. Wanem nao iumi savve lanem from samting wea Jesus talem abaotem taem bilong Noah?
12 From staka samting long disfala world savve mekem iumi busy, hem no isi for ‘iusim gud taem bilong iumi.’ Jesus sei: “Taem wea Son bilong man hem stap bae hem olsem taem bilong Noah.” Wanem nao happen long taem bilong Noah? God talem Noah hem bae finisim world, and olketa nogud pipol bae draon long wanfala flood wea bae kasem full earth. Noah wea hem man for “preach abaotem samting wea raeteous,” hem faithful for talemaot message bilong God long pipol long datfala taem. (Matt. 24:37; 2 Pet. 2:5) Bat “pipol gohed for kaikai, drink, and marit” and “olketa nating tinghae long samting wea Noah talemaot, gogo Flood hem kam nomoa and evriwan draon nao.” Dastawe Jesus warnim olketa disaepol bilong hem olsem: ‘Iufala mas redi gudfala, bikos Son bilong man bae kam long taem wea iufala nating tingim.’ (Matt. 24:38, 39, 44) Iumi mas olsem Noah, and no olsem pipol long taem bilong hem. Wanem nao bae helpem iumi for redi gudfala?
13, 14. Taem iumi weit for Son bilong man hem kam, iumi mas no forgetim wanem samting abaotem Jehovah?
13 Nomata Son bilong man bae kam long taem wea iumi nating tingim, iumi mas no forget Jehovah evritaem duim wanem hem talem long barava taem wea hem markem. Nomata wanem samting happen long world or wanem nao olketa man plan for duim, Jehovah savve disaedem wanem taem nao samting bae happen and wanem nao bae kamaot from datwan. (Readim Daniel 2:21.) Proverbs 21:1 hem sei: “Heart bilong king hem olsem olketa stream long hand bilong Jehovah. Hem savve changem datwan for followim wanem hem laekem.”
14 Jehovah savve kontrolem olketa samting wea happen mekem plan bilong hem kamap tru long barava taem wea hem markem. Staka big samting wea happen long world mekem olketa Bible profesi kam tru, main wan nao hem olketa profesi wea storyim waka for talemaot gud nius abaotem Kingdom bilong God evriwea long world. Tingim wanem hem happen bihaen gavman bilong Soviet Union hem lusim paoa bilong hem. Staka pipol no tingse olketa bigfala change savve happen kwiktaem olsem long olketa gavman. Bat samting wea kamaot from diswan nao, pipol bilong Jehovah preachim gud nius long plande kantri wea gavman tambuim waka bilong iumi bifor. So iumi mas ‘iusim gud taem bilong iumi’ for gohed worshipim Jehovah, wea hem God bilong “olketa taem and season.”
GAREM FAITH JEHOVAH BAE DUIM SAMTING LONG BARAVA TAEM
15. Wanem nao iumi savve duim for showimaot faith long Jehovah taem organization bilong hem changem samfala samting?
15 For iumi gohed preach long olketa last day distaem, iumi mas garem faith Jehovah bae duim samting followim plan bilong hem long barava taem. From evri samting long world hem gohed for change, maet samfala taem iumi mas changem hao iumi preach. Maet samfala taem organization bilong Jehovah changem samfala samting for helpem iumi duim gud waka bilong iumi for preachim gud nius. Iumi showimaot faith long God bilong “olketa taem and season” taem iumi barava sapotim olketa change hia and faithful for stap anda long Son bilong hem, wea hem “hed bilong kongregeson.”—Eph. 5:23.
16. Why nao iumi savve garem faith Jehovah bae helpem iumi long taem wea iumi needim?
16 Jehovah laekem iumi for no hol bak for prea long hem and for garem faith hem bae helpem iumi long taem wea iumi needim datwan. (Heb. 4:16) Diswan showimaot hem barava lovem and tingim iumi wanwan. (Matt. 6:8; 10:29-31) Iumi showimaot iumi garem faith long Jehovah God taem iumi prea evritaem for help bilong hem and then duim samting followim olketa prea bilong iumi. Iumi no forget for prea for olketa brata and sista bilong iumi tu.
17, 18. (a) Wanem nao Jehovah klosap for duim long olketa enemy bilong hem? (b) Wanem danger samting nao iumi mas keakea long hem?
17 Distaem hem no taem for iumi wikdaon. Hem taem for iumi garem strongfala faith wea bae strongim iumi for gohed duim will bilong God. (Rom. 4:20) Satan and olketa wea hem kontrolem trae for stopem waka wea Jesus komandim iumi for duim. (Matt. 28:19, 20) Nomata Devil hem againstim iumi, iumi savve Jehovah hem “God wea laef, wea hem nao sevem evri difren kaen man, main wan nao olketa wea faithful.” Jehovah “hem savve hao for sevem pipol wea faithful long hem. Hem bae sevem olketa from olketa hard taem.”—1 Tim. 4:10; 2 Pet. 2:9.
18 Klosap nao Jehovah bae finisim disfala nogud world. Iumi no savve hao diswan bae happen and long wanem taem, bat iumi savve Christ bae finisim olketa enemy bilong God long barava taem wea God markem. Then evriwan bae savve Jehovah nao garem raet for rulim full universe. So hem danger samting sapos iumi no gohed for showimaot iumi luksavve long “olketa taem and season” wea iumi stap long hem distaem. Iumi mas keakea nogud iumi start for tingse “evri samting gohed semsem nomoa start kam long taem wea God wakem olketa man.”—1 Thess. 5:1; 2 Pet. 3:3, 4.
“PATIENT FOR WEITIM GOD”
19, 20. Why nao iumi mas patient for weitim Jehovah?
19 Taem Jehovah wakem olketa man, hem laekem olketa for laef olowe mekem olketa savve gohed lane abaotem hem and olketa nambawan samting wea hem wakem. Ecclesiastes 3:11 hem sei: “Evri samting wea [Jehovah] wakem hem luk naes and hem wakem long barava taem bilong olketa. Hem mekem olketa man for savve wei wea taem hem no garem start and no garem end, mekem olketa no savve minim evri samting wea trufala God hem duim.”
20 Iumi hapi tumas bikos Jehovah nating changem plan bilong hem for olketa man! (Mal. 3:6) Bible sei God “hem no olsem wanfala shadow wea savve change.” (Jas. 1:17) Olketa shadow savve change bikos earth hem spin, wea datwan savve mekem olketa man savve markem “taem.” Bat Jehovah no duim samting followim hao olketa man kaontem “taem.” Hem no garem start and hem no garem end. (1 Tim. 1:17) So iumi mas “patient for weitim” Jehovah. (Mic. 7:7) Iumi mas ‘no fraet, and iumi mas strong, iumi evriwan wea patient for weitim Jehovah.’—Ps. 31:24.
[Olketa Footnote]
[Piksa long page 19]
Daniel garem faith olketa profesi bilong God bae kam tru
[Piksa long page 21]
Waswe, iu iusim gud taem bilong iu for duim wanem Jehovah laekem?