Mifala Poor Bat Hapi for Worshipim Jehovah

Taem mi thri year, olketa sendem dadi, uncle and grandadi long wanfala raf prison bikos olketa no join insaed long war. Uncle and grandadi bilong mi dae long prison. Long 1947, taem dadi kam bak bihaen long World War II, baksaed bilong hem brek finis. Nomata olsem, dadi gohed strong for worshipim Jehovah.

OLKETA BIG SAMTING WEA HAPPEN LONG MIFALA

Taem mi naen year, olketa sendem famili bilong mifala and staka handred nara Witness long Moldova for go long Siberia. Long July 6, 1949, staka long mifala go insaed wanfala train for karem buluka. Mifala travel for 6,400 kilometer and bihaen 12-fala day mifala kasem Lebyazhe train station. Olketa police weitim mifala and olketa divaedem mifala long olketa smol grup. Then olketa sendem mifala long olketa difren ples long datfala area. Grup bilong mifala stap long smol building wea wanfala skul iusim bifor. Mifala barava taed and sorre tumas. Wanfala sista singim tune bilong wanfala song wea olketa Witness raetem long taem bilong World War II, then evriwan singim datfala song witim hem. Datfala song hem olsem:

“Olketa sendem go farawe staka brata.

Olketa brata go long north and long east.

From olketa brata duim waka bilong God, olketa kasem barava nogud persecution.”

Gogo, evri Sunday mifala savve go long wanfala haos wea stap 13 kilometer from ples bilong mifala for studyim Bible. Staka taem nomata hem dark, mifala savve lusim ples bilong mifala long early morning and wakabaot long snow wea kasem weist bilong mifala. Hem savve cold tumas kasem minus 40 degrees Celcius. Winim 50 pipol nao mifala savve hipap long wanfala smol rum. Mifala savve singim tu-thri song for startim meeting. Then wanfala brata bae prea and bihaen datwan mifala storyim samfala subject from Bible. Then gogo, mifala singim samfala song moa, then gohed storyim moa samfala Bible subject. Disfala meeting savve gohed for wan hour or winim datwan. Olketa meeting hia savve barava strongim faith bilong mifala!

OLKETA NARA SAMTING FOR DEAL WITIM

Gogo, long 1960 olketa Witness free for go bak long kantri bilong olketa. Nomata mifala poor, mi savve go bak moa long Moldova. Long there nao mi meetim Nina, wea hem wanfala Witness gele. Mami, dadi and tufala grani bilong hem tu olketa Witness. Mitufala marit and go bak long Siberia. Long 1964, gele bilong mitufala Dina hem born. Then son bilong mitufala Viktor, hem born long 1966. Tufala year bihaen, mifala muv go long Ukraine and stap long wanfala smol haos long Dzhankoy, wanfala taon wea stap samting olsem 160 kilometer from Yalta, long Crimean peninsula.

Gavman tambuim waka bilong Olketa Jehovah’s Witness long Crimea, olsem olketa duim long evri ples long Soviet Union. Nomata olsem, mifala savve duim preaching waka and olketa no spoelem mifala. Datwan mekem samfala Witness for no gohed strong. Olketa tingse from olketa kasem hard taem long Siberia, hem stret nomoa for waka hard for kasem material samting.

OLKETA NAMBAWAN CHANGE

Long March 27, 1991, gavman letem Olketa Jehovah’s Witness for registerim waka bilong olketa long Soviet Union. So mifala plan for holem olketa spesol convention wea bae gohed for tufala day long sevenfala ples long Ukraine. Famili bilong mifala plan for go long convention long Odessa, Ukraine, wea bae kamap long August 24. Mi go wan month bifor convention for redyim wanfala big soccer stadium for datfala convention.

Staka taem bihaen mifala waka for full day, mifala sleep nomoa antap long olketa stul long datfala stadium. Staka Witness woman kam for klinim area bilong datfala stadium. Mifala torowem staka rabis wea hem samting olsem 70 ton. Olketa wea waka for lukaotem ples for olketa visitor stap go faendem ples long datfala taon for 15,000 pipol wea bae kam long convention. Then seknomoa, wanfala big samting happen!

Long August 19, faevfala day nomoa bifor convention hem start, olketa arrestim Mikhail Gorbachev wea hem president bilong USSR long datfala taem, taem hem holiday long wanfala ples klosap long Yalta. Olketa cancelim nao datfala convention bilong mifala. Pipol wea bae kam start for ringim convention office and sei, “Waswe, bae mifala cancelim bas and train ticket bilong mifala?” Olketa wea organizem convention prea abaotem datwan and then sei long olketa, “Iufala kam!”

Olketa brata gohed prea and redyim olketa samting for datfala convention. Olketa wea waka long transport department go for meetim olketa visitor wea kam from olketa difren ples long Soviet Union and tekem olketa long ples wea olketa bae stap. Evriday olketa member bilong Convention Komiti go for story witim olketa bigman bilong datfala taon. Bat evritaem olketa no changem tingting bilong olketa.

JEHOVAH ANSAREM PREA BILONG MIFALA

Long Thursday, August 22, tufala day bifor convention start, olketa member bilong Convention Komiti kam bak and sei olketa appruvim convention for gohed! Mifala hapi tumas taem mifala singsing and prea for startim datfala convention. Bihaen program long Saturday, mifala evriwan stap for story and meetim olketa wea mifala no lukim for longtaem. Faith bilong olketa Christian hia strong tumas and olketa winim olketa bigfala test.

Insaed long winim 22 year bihaen datfala convention, waka bilong olketa witness gohed gud long Ukraine. Olketa buildim staka Kingdom Hall. Long 1991, namba bilong olketa pablisa hem 25,000 nomoa, bat distaem hem winim 150,000 pablisa!

MIFALA GOHED FOR WORSHIPIM JEHOVAH

Famili bilong mi stap yet long datfala sem haos long Dzhankoy. Population bilong datfala taon hem samting olsem 40,000 pipol. Taem mifala arrive from Siberia long 1968, tu-thri Witness famili nomoa stap long Dzhankoy, bat distaem sixfala kongregeson nao stap long datfala taon.

Famili bilong mi kamap big tu. Distaem fofala genereson long famili bilong mi nao gohed worshipim Jehovah. Olketa genereson hia nao, mi and waef bilong mi, olketa pikinini bilong mitufala, olketa granpikinini bilong mitufala, and olketa pikinini bilong olketa granpikinini bilong mitufala.