Truth Nao Medicine Bilong Hem!

Taem tufala pioneer long Kenya go insaed wanfala haos, olketa sapraes for lukim wanfala man hem leidaon long bed. Hem garem smol body nomoa, and tufala hand bilong hem barava short. Taem tufala storyim promis bilong God for mekem ‘man wea kripol klae olsem wanfala deer,’ man hia barava smile big.—Isa. 35:6.

Nem bilong disfala man, hem Onesmus, and distaem hem klosap 40 year. Taem hem born hem garem wanfala sik wea olketa kolem osteogenesis imperfecta, wea nara nem bilong sik hia hem brittle bone disease. Bon bilong hem isi tumas for brek. From no eni medicine savve finisim datfala sik, Onesmus savve hem bae kasem pain and iusim wheelchair long full laef bilong hem.

Onesmus laek for studyim Bible. Bat mami bilong hem no laekem hem for go long olketa Christian meeting nogud hem garekil and kasem bigfala pain moa. So olketa brata recordim olketa meeting mekem Onesmus savve lisin long hem long haos. Bihaen hem study for faevfala month, Onesmus disaed hem laek for go long olketa meeting, nomata maet datwan kosim problem for hem.

Waswe, taem Onesmus attendim olketa meeting, datwan mekem hem kasem bigfala pain moa? Nomoa. Onesmus sei: “Long taem bilong olketa meeting, pain bilong mi katdaon.” Long tingting bilong hem, from hem lanem truth nao hem feel gud. Mami bilong hem hapi for lukim son bilong hem barava hapi, so hem tu laek for studyim Bible. Mami bilong hem savve sei: “Truth nao medicine bilong son bilong mi.”

No longtaem bihaen, Onesmus kamap anbaptaes pablisa. Gogo hem baptaes and distaem hem ministerial servant. Nomata tufala leg and wanfala hand bilong hem dae, Onesmus laek duim moa samting long waka bilong Jehovah. Hem laek auxiliary pioneer bat hem hol bak for apply. Why nao olsem? Bikos hem savve hem mas depend long narawan for pushim wheelchair bilong hem. Taem hem storyim diswan long olketa brata and sista, olketa promis for helpem hem. So olketa helpem Onesmus, and hem auxiliary pioneer.

Taem Onesmus laek for regular pioneer, hem warim sem samting. Bat wanfala day taem hem readim text, datwan nao encouragem hem. Datfala text hem Psalm 34:8, wea sei: “Trustim Jehovah mekem iufala savve lukim wei wea hem gud tumas.” Bihaen hem ting raonem datfala scripture, Onesmus disaed for regular pioneer. Distaem, fofala day evri week hem duim preaching waka and hem garem samfala Bible study wea gohed gud. Long 2010, hem attendim Pioneer Service Skul. Onesmus hapi tumas bikos wanfala long tufala brata wea meetim hem long firstaem nao hem wanfala instructor long datfala skul!

Dadi and mami bilong Onesmus dae finis, and distaem olketa brata and sista long kongregeson nao lukaftarem hem. Hem barava tinghae long olketa blessing wea hem kasem distaem, and hem luk forward long taem wea “no eniwan bae sei: ‘Mi sik.’”—Isa. 33:24.