Eye Bilong Jairo Helpem Hem for Worshipim God

Taem Jairo hem born hem garem sik wea olketa kolem spastic quadriplegia wea hem wanfala kaen cerebral palsy.a Brain bilong hem no savve mekem olketa masol for muv long stretfala wei, bat hand and leg bilong hem savve muv olobaot seleva. Samfala taem datwan savve mekem hem for hitim hemseleva or hitim olketa narawan wea stap klosap long hem. Mifala sorre long hem bikos samfala taem mifala mas taengem hand and leg bilong hem witim wheelchair bilong hem for kontrolem datwan.

HEM SAFA START TAEM HEM BABY

Start taem Jairo thrifala month nomoa datfala sik savve mekem hem seksek fogud and gogo hem hafded. Staka taem mami savve holem hem strong and kwiktaem go long hospital bikos hem tingse hem dae nao.

Olketa bon bilong Jairo no grow stret bikos long datfala sik. Taem hem 16 year baksaed bilong hem nogud, so olketa mas operatim baksaed and leg bilong hem. Mi tingim yet hao evri naet Jairo hem savve krae bihaen datfala operation go kasem taem hem kamap gud lelebet.

Jairo mas depend long narawan for helpem hem long evri samting, olsem for kaikai, werem kaleko, and for lei daonem hem long bed. Staka taem Mami and Dadi savve duim datwan. Nomata Jairo mas depend long olketa narawan for helpem hem, Dadi and Mami talem hem for mas depend long God.

GOGO JAIRO START FOR STORY

Dadi and Mami bilong mitufala olketa Jehovah’s Witness, and start taem Jairo hem baby tufala readim olketa Bible story long hem. Tufala savve taem man fren witim God, datwan savve mekem hem hapi. So nomata Jairo garem body wea no strong and savve seksek tumas, tufala savve hem savve garem nambawan hope for future. Bat tufala no sure sapos Jairo hem minim olketa samting wea tufala storyim long hem from Bible.

Wanday, taem Jairo hem smol, Dadi sei long hem, “Plis Jairo, story kam long mi.” Then Dadi sei tu, “Story kam mekem mi savve iu lovem mi!” Taem Jairo herem datwan hem start for krae. Hem trae for tok, bat hem hard tumas long hem. Dadi feel nogud for mekem hem krae. Datwan mekem mifala luksavve Jairo no savve toktok, bat taem hem krae datwan showimaot hem minim wanem Dadi laekem hem for duim.

Gogo, Dadi and Mami lukim hao samfala taem Jairo savve givim saen witim eye bilong hem from hem laek for showimaot feeling bilong hem abaotem samting. Hem savve feel nogud taem mifala no minim wanem hem laekem. Bat taem Dadi and Mami start for minim olketa saen bilong hem and duim wanem hem laekem, hem savve givim bigfala smile. Datwan hem wei bilong hem for talem thankiu.

Wanfala woman wea savve kam for helpem Jairo sei taem mifala askem hem wanfala kwestin hem gud for mifala apim tufala hand. Sapos hem lukluk strong long raet hand datwan minim “ia,” and sapos hem lukluk strong long left hand datwan hem minim “nomoa.”

JAIRO HEM BAPTAES

Evri year, Olketa Jehovah’s Witness savve garem tufala assembly and wanfala convention wea staka pipol savve kam for herem olketa tok from Bible. Jairo evritaem luk hapi tumas taem hem herem tok wea olketa givim long olketa wea bae baptaes. Taem Jairo hem 16 year, Dadi askem hem, “Jairo, iu laek for baptaes?” Stretawe hem lukluk strong long raet hand bilong Dadi. Datwan showimaot hem laek for baptaes. Then Dadi sei, “Waswe, iu prea long God finis for talem hem iu laek for worshipim hem for olowe?” Hem lukluk strong long raet hand bilong Dadi, wea datwan showimaot hem dedicatem finis laef bilong hem long Jehovah.

Bihaen Olketa Jehovah’s Witness story witim Jairo for mek sure hem minim baptism, olketa sei hem fit for baptaes. So long 2004 taem hem 17 year mifala go long wanfala assembly. Bihaen baptism tok, olketa askem hem and olketa narawan, “Waswe, iu dedicatem iuseleva long Jehovah for duim wanem hem laekem?” Jairo luk go ap for showimaot hem agree. Bihaen datwan hem baptaes and kamap wanfala Jehovah’s Witness.

HEM DUIM WANEM GOD LAEKEM

Long 2011, Jairo kasem wanfala computer wea hem savve iusim eye bilong hem for kontrolem. Hem mas lukluk long samting long screen for mekem computer waka. Taem hem lukluk strong long screen or hem satem eye and openem moa, hem olsem taem man clickim mouse long computer. Datfala computer garem olketa piksa long screen. Taem hem lukluk strong long wanfala piksa and satem and openem eye bilong hem, computer hia storyim kam datfala piksa.

Taem Jairo savve long samfala samting moa abaotem Bible, hem laekem tumas for storyim datwan long olketa narawan. Taem famili bilong mifala studyim Bible tugeta evri week, staka taem hem savve lukluk kam long mi then lukluk go long computer bilong hem. Taem hem duim olsem, datwan showimaot hem laekem mi for helpem hem for redyim olketa koment for givim long meeting bilong mifala.

Long taem bilong meeting, Jairo lukluk long screen for faendem piksa wea join witim koment bilong hem. Bihaen hem chusim datwan, computer storyim kam koment bilong hem for evriwan herem. Taem hem duim olsem hem savve hapi tumas. Alex, wanfala young fren bilong Jairo hem sei: “Mi barava tinghae long Jairo taem hem givim olketa koment long meeting.”

Jairo iusim tu computer bilong hem for storyim wanem hem bilivim long olketa narawan. Hem chusim wanfala piksa long computer wea showim wanfala garden wea olketa animal and pipol from olketa difren kantri stap tugeta long peace. Then datfala computer story kam olsem, “Bible storyim taem wea earth bae kamap paradaes and no eniwan bae sik or dae, olsem Revelation 21:4 hem talem.” Sapos man hem interest, Jairo chusim nara piksa and computer bae sei: “Waswe, iu laekem for mi studyim Bible witim iu?” Mifala no tingim grandadi bae sei hem laek for studyim Bible, bat hem agree for duim datwan and mifala hapi for lukim Jairo witim nara Jehovah’s Witness teachim hem. Long August 2014, mifala hapi tumas taem grandadi baptaes long wanfala regional convention long Madrid.

Olketa teacher bilong Jairo lukim hao hem barava lovem God. Rosario, wanfala teacher bilong hem sei: “Sapos mi ting for joinim eni religion, mi bae chus for kamap wanfala Jehovah’s Witness. Mi lukim Jairo garem strongfala faith long God, and datwan mekem hem for hapi nomata hem garem bigfala sik.”

Jairo hapi tumas taem mi readim promis long Bible wea sei: “Long datfala taem, man wea kripol bae jampjamp olsem wanfala deer, and man wea no savve toktok bae hapi tumas bikos hem savve toktok nao.” (Isaiah 35:6) Nomata samfala taem datfala sik mekem Jairo feel sorre, hem traem best for hapi. Hem hapi bikos hem busy for duim wanem God laekem and hem garem staka gudfala fren. Wei wea Jairo hapi and garem strongfala faith showimaot taem man worshipim Jehovah hem savve hapi nomata hem kasem hard taem.