Waswe, Mi Savve Faendem Samwan wea Worshipim Jehovah?

Samfala singol brata and sista talem semkaen toktok. Olketa savve Jehovah laekem olketa wea worshipim hem for maritim nomoa samwan wea hem “disaepol bilong Christ.” (1 Cor. 7:39) So why nao samfala Christian talem kaen toktok olsem?

WHY SAMFALA GAREM TINGTING OLSEM

Olketa wea talem kaen toktok olsem maet tingse no inaf singol brata stap for olketa singol sista maritim. Datwan nao samting wea happen long staka kantri. Tingim tufala example hia: Long Korea, long evri 100 Witness wea singol, 57 hem olketa sista, and 43 hem olketa brata. Long Colombia, long evri 100 Witness wea singol, 66 hem olketa sista, and 34 hem olketa brata.

Long samfala kantri, wanfala hard samting nao dadi and mami wea no witness maet askem bride price wea hae tumas, and datwan mekem hem no isi for brata wea no garem staka selen for peim bride price. Taem wanfala sista tingim olketa samting hia, maet long tingting bilong hem no eni brata bae laekem hem.a

IMPORTANT FOR TRUSTIM JEHOVAH

Sapos iu garem datkaen tingting samfala taem, no forgetim diswan: Jehovah savve long samting wea kasem iu, and hem barava minim gud feeling bilong iu.—2 Chron. 6:29, 30.

Bat why nao Jehovah talem for mas maritim nomoa wanfala wea worshipim hem? Jehovah laekem pipol bilong hem for kasem gud samting. Hem laek protectim pipol bilong hem from nogud samting wea savve kasem olketa sapos olketa duim samting wea no wise, and tu, hem laekem olketa for hapi. Taem staka Jew long taem bilong Nehemiah maritim olketa wea no worshipim Jehovah, Nehemiah storyim nao nogud example bilong King Solomon. Nomata “God lovem [Solomon], . . . olketa waef bilong hem wea worshipim difren god mekem hem for sin.” (Neh. 13:23-26) So from God laekem pipol bilong hem for kasem gud samting, hem talem iumi for maritim nomoa samwan wea worshipim hem. (Ps. 19:7-10; Isa. 48:17, 18) Olketa tru Christian tinghae long wei wea God lovem olketa, and olketa trustim gudfala advaes wea hem givim. Taem olketa obeyim Jehovah, datwan showimaot olketa luksavve hem nao ruler bilong evri samting.—Prov. 1:5.

Iu bae nating laek for maritim samwan wea “no biliv” wea maet savve leadim iu for lusim God. (2 Cor. 6:14) Staka Christian distaem kasem gud samting from olketa followim disfala advaes. Bat olketa narawan no followim disfala advaes.

IU SAVVE FAENDEM SAMWAN WEA WORSHIPIM JEHOVAH

Maggy,b wanfala sista long Australia, storyim samting wea kasem hem taem hem start for frenim wanfala man wea no worshipim Jehovah. Hem sei: “Mi savve gogo olowe for meetim datfala man so mi missim staka meeting. Kwiktaem nomoa mi wikdaon long spiritual wei nao.” Ratana, wanfala sista long India, hem frenim wanfala boy wea tufala sem class. Boy hia start for studyim Bible bat reason why hem study, hem bikos hem laek for frenim datfala sista nomoa. Gogo, Ratana lusim truth and joinim nara religion for maritim datfala boy.

Narafala example hem bilong Ndenguè, wanfala sista long Cameroon wea marit taem hem 19 year. Man wea hem maritim promisim hem bae hem no stopem hem for gohed long religion bilong hem. Bat tufala week bihaen tufala marit, hasband bilong hem stopem hem for no go long olketa meeting. Ndenguè sei: “Mi barava lonely and stap for krae nomoa. Mi luksavve mi no free nao for duim wanem mi laekem. Mi evritaem sorre tumas from wanem mi duim.”

Hem tru, samfala marit partner wea no worshipim Jehovah olketa kaen and no raf. Bat tingim diswan, hao nao wei wea iu maritim samwan wea no worshipim Jehovah affectim wei wea iu fren witim Jehovah? From iu savve iu no followim advaes bilong Jehovah wea hem lovem iu, hao nao datwan mekem iu feel? And main samting nao, hao nao Jehovah ting long datfala disison wea iu mekem?—Prov. 1:33.

Olketa brata and sista evriwea long world wea maritim samwan wea worshipim Jehovah, olketa luksavve diswan nao best samting for duim. So olketa wea singol wea laek for mekem God hapi olketa chus for maritim nomoa samwan wea worshipim Jehovah. Wanfala example hem Michiko, wanfala singol sista long Japan. Olketa relative bilong hem encouragem hem for maritim wanfala man wea no worshipim Jehovah. And tu, hem lukim olketa fren bilong hem and narawan long kongregeson olketa marit. Hem sei: “Mi savve Jehovah hem ‘hapi God,’ so mi luksavve nomata sapos mi marit or nomoa, mi savve hapi. Nara samting mi barava sure long hem nao wei wea Jehovah bae givim iumi wanem iumi laekem. So nomata iumi laek for marit bat iumi no faendem eniwan, best samting for duim hem for stap singol firstaem.” (1 Tim. 1:11) Gogo, Michiko maritim wanfala naes brata, and hem hapi bikos hem patient and weit.

Samfala brata tu patient and weit bikos olketa laek for faendem wanfala sista wea fitim tingting bilong olketa. Wanfala example nao hem Bill, wanfala brata from Australia. Hem sei hem laekem samfala gele wea no worshipim Jehovah. Bat hem disaed for no showim hem interest long olketa. Why nao olsem? Hem no laek for duim eni samting wea maet leadim hem for “join witim olketa wea no biliv.” Hem interest tu long samfala sista, bat olketa no interest long hem. Bill weit for 30 year bifor hem meetim wanfala sista wea fitim hem. Bill sei: “Mi nating sorre long disison wea mi mekem.” Hem sei tu: “Mi hapi tumas bikos mitufala savve go preaching tugeta, study tugeta, and worship tugeta. Mi hapi for associate witim olketa fren bilong waef bilong mi bikos evriwan worshipim Jehovah. Mitufala iusim olketa Bible principle for helpem mitufala long marit bilong mifala.”

WANEM IU SAVVE DUIM TAEM IU WEIT

Wanem nao iu savve duim taem iu trustim Jehovah and iu weit? Hem gud for ting raonem why nao iu no marit. Sapos main reason iu no marit hem bikos iu obeyim wanem Bible talem for maritim nomoa samwan wea worshipim Jehovah, datwan showimaot iu respectim komand bilong Jehovah. Jehovah hem hapi tumas long iu bikos iu obeyim toktok bilong hem long Bible. (1 Sam. 15:22; Prov. 27:11) Iu savve gohed for prea long God and talem hem “evri feeling bilong iu.” (Ps. 62:8) From iu gohed for prea strong evritaem, datwan bae mekem iu talem olketa gudfala prea. Iu bae barava fren gud witim Jehovah taem iu no givap nomata hem no isi for iuseleva and iu kasem hevi from nara pipol. Iu mas no forgetim diswan, Jehovah hem tingim evriwan wea faithful, and iu spesol long hem. Hem luksavve wanem iu needim and laekem. Hem no promis for givim wanfala marit partner long eniwan. Bat sapos iu laekem tumas for marit, God savve long best samting for iu.—Ps. 145:16; Matt. 6:32.

Maet samfala taem iu garem sem feeling olsem David, wea sei: “Plis Jehovah, iu ansarem mi kwiktaem. Mi no garem eni strong nao. Plis iu helpem mi.” (Ps. 143:5-7, 10) Long olketa taem olsem, hem gud for iu patient and weit for lukim wanem nao Dadi bilong iu long heven bae duim for iu. Taem iu weit, hem gud for iu gohed readim Bible and ting raonem wanem iu readim. Datwan bae helpem iu for savve long olketa komand bilong hem, and bae iu lanem wanem hem duim for helpem pipol bilong hem long bifor. Taem iu gohed for obeyim hem, bae iu luksavve datwan nao barava wise samting for duim.

Wanem nao nara gud samting iu savve duim taem iu singol wea bae mekem iu hapi? Iu savve iusim datfala taem wea iu singol for kamap mature long spiritual wei, and garem olketa gudfala wei olsem wei for luksavve, kaen long narawan, waka hard, lovem God, and for garem gudfala nem. Man wea garem olketa wei hia savve garem gudfala marit. (Gen. 24:16-21; Ruth 1:16, 17; 2:6, 7, 11; Prov. 31:10-27) Taem iu busy long preaching waka and olketa narafala waka long kongregeson, datwan showimaot Kingdom hem first samting long laef bilong iu. Datwan bae protectim iu. Bill, wea iumi storyim finis sei olsem abaotem olketa year wea hem singol: “From mi busy for pioneer, olketa year wea mi singol hem go kwiktaem tumas.”

So waswe, iu savve faendem samwan wea worshipim Jehovah? Yes. Taem iu obeyim komand bilong Jehovah for maritim samwan wea hem “disaepol bilong Christ,” bae iu mekem Jehovah kasem praise, and bae iu hapi and satisfae. Bible sei: “Man wea fraet long Jehovah and willing for obeyim olketa toktok bilong hem, hem hapi. Olketa samting wea garem hae price and olketa richfala samting stap insaed haos bilong hem. And gudfala wei bilong hem bae stap for olowe tu.” (Ps. 112:1, 3) So disaed strong for obeyim komand bilong God for maritim nomoa samwan wea worshipim Jehovah.