Kwestin From Reader
Wat nao aposol Paul minim taem hem sei hem “olsem pikinini wea born early”? (1 Corinth 15:8)
Lo 1 Corinth 15:8, Paul sei: “Mi, wea olsem pikinini wea born early, mi nao last man wea lukim hem.” Lo bifor, mifala sei Paul hem storyim experience blo hemseleva taem hem lukim vision blo Jesus wea kasem glory lo heven. Hem olsem Saul kasem privilege for born moa, or laef bak for go lo heven olsem wanfala spirit, staka handred year bifor eniwan bae kasem datwan. Bat bihaen mifala studyim gud moa disfala verse, mifala luksavve hem garem difren mining.
Hem tru, Paul storyim taem wea hem kamap wanfala Christian. Bat, wat nao hem minim taem hem sei hem “olsem pikinini wea born early”? Disfala verse maet minim thrifala samting.
Paul no expectim for kamap Christian and hem seke lo datwan. Taem pikinini born early hem samting wea famili no expectim. Olsem tu, taem Saul (wea nem blo hem change for Paul) go lo Damascus for persecutim olketa Christian lo there, hem no expectim for lukim vision blo Jesus wea laef bak lo heven. Paul no expectim bae hem kamap Christian, and olketa Christian wea hem go for persecutim tu sapraes lo datwan. Nara samting, from Paul seke tumas lo big samting wea happen lo hem, datwan mekem hem for no savve lukim eni samting.—Acts 9:1-9, 17-19.
Paul kamap Christian lo “rong taem.” Datfala Greek word wea iumi transleitim “pikinini wea born early,” iumi savve transleitim tu olsem “pikinini wea born lo rong taem.” The Jerusalem Bible transleitim olsem: “Hem olsem mi born lo taem wea no eniwan expectim.” Taem Paul kamap Christian, Jesus hem go bak lo heven finis. Lo verse 4-7 Paul storyim staka wea lukim Jesus bifor hem go ap lo heven, bat Paul no lukim hem. (1 Cor. 15:4-8) So lo datfala vision, Paul garem chance for lukim Jesus, nomata luk olsem datwan hem lo “rong taem.”
Paul showimaot hem hambol. Samfala savveman sei disfala toktok showimaot Paul no tinghae lo hemseleva. Sapos olsem, toktok hia hem minim Paul tingse hem shud no kasem datfala privilege for kamap aposol blo Jesus. Paul sei: “Olketa nara aposol winim mi, and hem no fitim for olketa kolem mi wanfala aposol, bikos mi spoelem olketa long kongregeson bilong God. Bat from God hem kaen long mi nao mi duim disfala waka.”—1 Cor. 15:9, 10.
So taem Paul sei hem “olsem pikinini wea born early,” luk olsem hem minim hem seke and no expectim for lukim Jesus lo vision, hem feel olsem hem kamap Christian lo rong taem, or hem tingse hem no fit for kasem disfala spesol vision. Bat disfala experience hem samting wea Paul barava tinghae lo hem bikos datwan pruvim hao Jesus hem laef bak bihaen hem dae. Dastawe staka taem Paul storyim disfala experience taem hem preach lo pipol abaotem resurrection blo Jesus.—Acts 22:6-11; 26:13-18.