3 | Hao Olketa Bible Example Savve Helpem Iumi

BIBLE STORYIM . . . Olketa faithful man and woman wea “olsem iumi nomoa.”—JAMES 5:17.

Wat Datwan Minim

Bible garem staka story blo olketa man and woman wea experiencem olketa difren kaen feeling. Taem iumi readim experience blo olketa, iumi savve faendem wanfala Bible example wea garem sem situation olsem iumi.

Hao Diswan Savve Help

Iumi need for savve dat olketa narawan minim hao iumi feel. Especially taem iumi deal witim sik lo mind. Taem iumi readim Bible, iumi lane abaotem olketa narawan wea tingting and feeling blo olketa semsem olsem iumi. From datwan, iumi luksavve ino iumiseleva nomoa kasem hard taem olsem and iumi no feel olsem iumi stap seleva taem iumi deal witim stress and olketa samting wea affectim feeling blo iumi.

Bible garem staka toktok blo olketa wea feel olsem olketa no wei nao. Hao enitaem iu feel olsem, ‘Mi givap nao’? Moses, Elijah and David tu feel olsem.—Numbers 11:14; 1 Kings 19:4; Psalm 55:4.
Bible storyim wanfala woman wea nem blo hem, Hannah wea “barava feel nogud” bikos hem no savve garem pikinini and nara waef blo hasband blo hem tok spoelem hem evritaem.—1 Samuel 1:6, 10.
Bible storyim wanfala man wea nem blo Job wea garem sem feeling olsem iumi. Nomata hem garem strong faith hem barava sorre and hem sei: “Mi givap long disfala laef nao. Mi les nomoa fo laef.”—Job 7:16, SIPB.

Taem iumi lane abaotem olketa Bible example hia wea deal witim olketa negative feeling olsem, datwan strongim iumi tu for deal witim olketa samting wea mekem iumi wari.

Hao Bible Hem Helpem Kevin

Hao Bipolar Disorder Affectim Mi

“Mi faendaot mi garem bipolar disorder taem mi klosap kasem fifti years old. Samfala taem mi feel dat mi savve deal witim eni problem wea kasem mi. Bat lo olketa nara taem, mi feel olsem mi no fit for laef nomoa.”

Hao Bible Helpem Mi

“Wanfala Bible example wea helpem mi hem aposol Peter. Hem duim olketa mistek wea mekem hem feel iusles. Bat instead for hem gohed tingim datwan, Peter stap witim olketa fren wea tingim hem. Taem mi sik tumas, mi savve tingim nomoa olketa wik point blo mi and datwan mekem mi feel iusles. Olsem Peter, mi lane for fren gud witim olketa fren blo mi wea helpem mi for no givap.

“Nara Bible example wea barava comfortim mi hem King David. Staka taem hem wari abaotem situation blo hem, and regretim olketa mistek wea hem duim bifor. Datwan helpem mi bikos samfala taem, mi tu duim or talem samting wea mi regretim. Toktok blo David lo Sams 51 comfortim mi. Lo verse 3 (SIPB), David sei: ‘Mi luksave nao long olketa ravis wei blong mi, oltaem mi savegud nao long olketa sin blong mi.’ Diswan barava storyim hao mi feel taem mi depress from hem hard for mi ting positive abaotem mi seleva. Bat disfala toktok blo David lo verse 10 (SIPB) fitim mi tu: ‘God, plis yu mekem tingting blong mi fo hemi klin finis. Plis yu mekem mi fo kamap niu an stap strong olowe long yu.’ Mi tu askem God for helpem mi garem stret tingting abaotem miseleva. And lo Psalm 51 verse 17 hem comfortim mi. Hem sei: ‘God blo mi, iu bae no lusim man wea heart blo hem barava sorre and pisis.’ Disfala verse mekem mi sure dat God lovem mi.

“Taem mi tingim olketa Bible example and wat God givim mi distaem, mi strongim hope blo mi for future. Olketa promis lo Bible hem real lo mi and datwan barava helpem mi for no givap.”