Forgiveness blo Jehovah—Why Iumi Appreciatim

1-2. Hao nao situation blo iumi hem olsem datfala young man wea paragraf 1 storyim?

IMAGINIM wanfala young man wea grow ap lo rich famili. Wanday, wanfala sorre samting happen, parents blo hem dae lo accident. Taem hem herem, hem sorre tumas. Bat then, hem herem nara samting moa. Hem faendaot parents blo hem spoelem evri selen blo olketa and garem big kaon. Tingim hao hem feel, instead for hem inheritim riches, hem mas peim bak big kaon, and pipol wea parents blo hem kaonem, olketa demandim bak payment blo olketa. Datfala kaon hem big tumas and hem no fit for peim bak.

² Situation blo iumi tu hem lelebet olsem datfala young man. Original parents blo iumi, Adam and Eve, tufala perfect and stap insaed lo wanfala beautiful paradaes. (Gen. 1:27; 2:​7-9) Tufala garem chance for enjoyim laef olowe. Bat, wanfala samting happen. Tufala lusim chance for tufala laef olowe lo Paradaes. So wat kaen inheritance nao tufala givim lo olketa pikinini blo tufala? Bible sei: “Sin hem kasem evriwan long world bikos long wanfala man [Adam] nomoa. From olketa sin, olketa dae, dastawe evriwan dae bikos evriwan sin.” (Rome 5:12) Inheritance wea iumi kasem from Adam hem sin, wea result blo hem nao dae. Sin wea iumi inheritim hem olsem big kaon wea no eniwan lo iumi fit for peim off.—Ps. 49:8.

3. Why nao sin blo iumi hem olsem “kaon”?

³ Jesus storyim hao olketa sin blo iumi, hem olsem “kaon.” (Matt. 6:​12, ftn; Luke 11:4) Taem iumi duim sin, hem olsem iumi garem kaon lo Jehovah. Iumi mas peim price wea Jehovah askem for datfala sin. Sapos iumi no peim datfala kaon, Jehovah bae only cancelim taem iumi dae.—Rome 6:​7, 23.

4. (a) If iumi no kasem help, wat nao bae happen lo iumi olketa sinner? (Psalm 49:​7-9) (b) Lo Bible, wat nao datfala word “sin” hem minim? (Lukim box “Sin.”)

⁴ Hao, hem fitim for iumi kasem bak evri samting wea Adam and Eve lusim? Hard for iumiseleva kasem bak datwan. (Readim Psalm 49:​7-9.) If iumi no kasem help, iumi bae no garem hope for future or for resurrect. Taem iumi dae, bae iumi olsem olketa animal nomoa.—Eccl. 3:19; 2 Pet. 2:12.

5. Hao nao loving Dadi blo iumi helpem iumi for peim off kaon wea iumi inheritim? (Lukim piksa.)

⁵ Tingim bak young man wea iumi storyim lo paragraf 1, hao nao bae hem feel if wanfala rich man offer for peim off evri kaon blo hem? For sure, datfala young man bae barava appreciatim and willing for acceptim datwan. Lo sem wei, loving Dadi blo iumi Jehovah givim wanfala present for peim off kaon or sin wea iumi inheritim from Adam. Jesus sei olsem: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) And tu, datfala sem present hem mekem hem possible for iumi garem gud relationship witim Jehovah.

6. Wat nao samfala toktok lo Bible wea iumi bae storyim lo disfala article, and why nao olsem?

⁶ Hao nao disfala nambawan present helpem iumi for kasem forgiveness for “sin” or kaon blo iumi? For helpem iumi savve lo ansa, bae iumi story raonem samfala toktok lo Bible olsem, reconcile, atonement, kavarem sin, ransom, kamap free, and God ting lo man olsem hem raeteous. Lo disfala article, bae iumi discussim mining blo olketa toktok hia. Taem iumi ting raonem wat olketa toktok hia minim, datwan bae helpem iumi for barava appreciatim wat Jehovah duim for forgivim iumi.

RECONCILE: GOAL BLO JEHOVAH

7. (a) Wat nao nara samting wea Adam and Eve lusim? (b) From iumi olketa pikinini blo Adam and Eve, wat nao iumi barava needim? (Rome 5:​10, 11)

⁷ Taem Adam and Eve lusim chance for laef olowe, tufala lusim tu spesol relationship wea tufala garem witim Dadi blo tufala, Jehovah. Bifor Adam and Eve sin, tufala part lo famili blo God. (Luke 3:38) Bat taem tufala disobey, Jehovah no letem tufala for part lo famili blo hem, and datwan happen taem tufala no garem yet eni pikinini. (Gen. 3:​23, 24; 4:1) So iumi olketa pikinini blo tufala need for reconcile witim Jehovah. (Readim Rome 5:​10, 11.) Datwan minim, iumi need for duim samting for mekem iumi garem gud relationship witim hem moa. Wanfala reference buk sei Greek word wea olketa iusim for “reconcile,” hem savve minim for duim samting for “mekem wanfala enemy kamap fren.” Interesting samting, Jehovah nao man wea duim samting firstaem for mekem diswan hem possible. Wat nao hem duim?

ATONEMENT: ARRANGEMENT BLO JEHOVAH FOR KAVAREM SIN

8. (a) Wat nao atonement? (b) Wat nao arrangement for kavarem sin?

⁸ Atonement hem arrangement wea Jehovah mekem for helpem iumi olketa sinner for garem gud relationship witim hem moa. Insaed diswan, hem wei for exchangem wanfala samting witim nara samting wea garem sem value. Datwan savve mekem iumi kasem bak samting wea lus or for replacem samting wea distroe. Olketa Christian Greek Scripture tu storyim arrangement wea Jehovah mekem for kavarem sin wea datwan helpem iumi for fren bak witim hem. (Rome 3:25) Disfala arrangement helpem iumi for mek peace witim God and garem gud relationship witim hem.

9. Wat nao temporary arrangement wea Jehovah mekem for olketa Israelite kasem forgiveness?

⁹ For helpem olketa Israelite fren gud witim Jehovah, hem mekem wanfala temporary arrangement for olketa kasem forgiveness for sin blo olketa. Lo Israel, wantaem evri year, olketa savve celebratem Atonement Day, or Day for Kasem Forgiveness. Lo datfala day, hae priest savve offerim olketa animal sakrifaes on behalf lo olketa pipol. Nomata olketa mekem olketa animal sakrifaes, datwan no savve barava kavarem sin blo olketa man bikos iumi man winim olketa animal. Bat taem olketa Israelite repent and gohed offerim sakrifaes wea Jehovah laekem, hem willing for forgivim sin blo olketa. (Heb. 10:​1-4) And tu, datfala arrangement and wei wea olketa mas evritaem sakrifaesim olketa sin offering, hem mekem olketa Israelite luksavve dat olketa sinner and olketa barava needim wanfala permanent arrangement for stretem disfala situation.

10. Wat nao permanent arrangement wea Jehovah mekem for pipol kasem forgiveness for sin?

¹⁰ Jehovah disaedem finis wanfala permanent arrangement for pipol kasem forgiveness. Hem arrange for Son blo hem wea hem lovem tumas, for offerim sakrifaes “wantaem nomoa for sin bilong plande pipol.” (Heb. 9:28) Jesus givim “laef bilong hem, wea datwan hem ransom for baem bak staka pipol.” (Matt. 20:​28, ftn.) Wat nao ransom?

RANSOM: DATFALA PRICE

11. (a) Lo Bible, wat nao ransom hem minim? (b) Hu nomoa fit for peim datfala ransom?

¹¹ Lo Bible, ransom nao price blo datfala payment wea Jehovah givim for kavarem sin and mekem iumi for reconcile witim hem.a Lo tingting blo Jehovah, ransom mekem hem possible for iumi kasem bak samting wea lus. Hao? Tingim, Adam and Eve lusim perfect laef and chance for laef olowe. So price blo datfala ransom bae hem mas garem sem value witim samting wea lus. (1 Tim. 2:6) Only person wea fit for peim, hem mas wanfala adult man wea (1) perfect; (2) garem chance for laef olowe lo earth; and (3) willing for givim or sakrifaesim laef blo hem for iumi. Datwan nomoa savve mekem iumi kasem bak, or kavarem, datfala laef wea Adam lusim.

12. Why nao Jesus fit for peim price blo datfala ransom?

¹² Tingim thrifala reason why Jesus fit for peim price blo datfala ransom. (1) Hem perfect—“no enitaem hem duim sin.” (1 Pet. 2:22) (2) Hem garem chance for laef olowe lo earth. (3) Hem willing for dae and givim laef blo hem for iumi. (Heb. 10:​9, 10) From Jesus hem perfect man, hem semsem witim first man, Adam, taem hem no sin yet. (1 Cor. 15:45) So taem Jesus dae, hem fit for kavarem sin blo Adam, wea minim, replacem wat Adam hem lusim. (Rome 5:19) Taem olsem, Jesus kamap “lastfala Adam.” Iumi no needim eni nara perfect person for kam and peim moa wat Adam hem lusim. Jesus dae “wantaem nomoa” and datwan hem for olowe.—Heb. 7:27; 10:12.

13. Wat nao difference between atonement arrangement and ransom?

¹³ So, wat nao difference between atonement arrangement and ransom? Atonement arrangement hem wat God duim for mekem olketa man kasem bak gud relationship witim hem. Ransom hem nao price blo datfala payment wea Jehovah givim for kavarem sin. Datfala price hem nao blood blo Jesus wea hem givim on behalf lo iumi.—Eph. 1:7; Heb. 9:14.

RESULT: IUMI KAMAP FREE AND GOD TING LO IUMI OLSEM RAETEOUS

14. Wat nao bae iumi storyim, and why nao olsem?

¹⁴ Wat nao gud samting iumi kasem from atonement arrangement? Bible iusim samfala toktok wea helpem iumi luksavve lo olketa benefit blo datfala arrangement. Mining blo olketa toktok hia join tugeta, bat each toktok helpem iumi for luksavve hao atonement arrangement hem openem wei for iumi kasem forgiveness from Jehovah. Taem iumi ting raonem olketa toktok hia, bae iumi lukim tu hao datwan affectim each wan lo iumi.

15-16. (a) Lo Bible, hao nao disfala toktok kamap free hem join witim ransom? (b) Wat nao benefit wea iumi kasem from datwan?

¹⁵ Bible iusim disfala toktok kamap free, for storyim wei wea ransom hem releasem, or baem iumi bak, wea datwan hem result blo datfala payment. Aposol Peter sei olsem: “Iufala savve finis, silver and gold wea savve rasta hem no sevem iufala [or mekem iumi kamap free] from evri samting wea iufala duim wea hem iusles and wea iufala kasem from olketa grani bilong iufala. Bat samting wea sevem iufala nao hem datfala spesol blood bilong Christ, wea datwan hem olsem blood bilong wanfala pikinini sheepsheep wea hem no sik and no eni kill long body bilong hem.”—1 Pet. 1:​18, 19.

¹⁶ Ransom sakrifaes mekem iumi kamap free from wei wea sin and dae rul ovarem iumi olsem king. (Rome 5:21) So, iumi barava appreciatim wat Jehovah and Jesus duim for mekem iumi kamap free thru lo blood, or laef blo Jesus.—1 Cor. 15:22.

17-18. (a) Wat nao hem minim for God ting lo iumi olsem iumi raeteous? (b) Wat nao benefit wea iumi kasem from datwan?

¹⁷ Disfala toktok God ting lo iumi olsem iumi raeteous, hem minim God bae no keepim record blo olketa nogud samting wea iumi duim and hem rabemaot or deletem olketa sin blo iumi. Nomata Jehovah duim datwan, hem still keepim standard blo hemseleva saed lo justice. Wei wea hem ting lo iumi olsem iumi raeteous, hem no depend lo samting wea iumiseleva duim, and hem no minim dat hem acceptim nomoa for iumi duim sin. From iumi garem faith lo atonement arrangement and lo price blo ransom wea hem peim, Jehovah iusim datwan for deletem evri kaon blo iumi.—Rome 3:24; Gal. 2:16.

¹⁸ Wat nao each wan lo iumi kasem from datwan? Gud samting wea olketa wea bae rul witim Jesus lo heven kasem, hem nao God ting lo olketa olsem olketa pikinini blo hem wea raeteous finis. (Titus 3:7; 1 John 3:1) God forgivim sin blo olketa. Hem olsem God deletem criminal record blo olketa, so olketa qualify for rul lo Kingdom. (Rome 8:​1, 2, 30) Gud samting wea olketa wea garem hope for stap lo earth kasem, hem nao God ting lo olketa olsem olketa fren blo hem wea raeteous, and hem forgivim sin blo olketa. (Jas. 2:​21-23) Big crowd wea laef thru lo Armageddon, garem chance for laef olowe and no dae. (John 11:26) “Pipol wea raeteous” and “pipol wea no raeteous” wea dae, bae garem chance for resurrect. (Acts 24:15; John 5:​28, 29) Gogo, evri servant blo Jehovah lo earth wea obey bae kamap “free olsem olketa pikinini bilong God.” (Rome 8:21) Lo datfala taem iumi bae barava reconcile witim Dadi blo iumi Jehovah, and datwan hem nambawan blessing wea iumi kasem from datfala atonement arrangement!

19. Hao nao situation blo iumi hem change for kamap gud? (Lukim tu box “Wat Iumi Kasem.”)

¹⁹ Tru nao, situation blo iumi hem olsem datfala young man wea iumi storyim lo paragraf 1 wea lusim evri samting and inheritim big kaon wea hem no fit for peim. Bat iumi hapi tumas bikos Jehovah helpem iumi. Bikos lo atonement arrangement for kavarem sin blo iumi and payment blo ransom wea Jehovah provaedem, situation blo iumi hem change. Taem iumi garem faith lo Jesus Christ iumi savve kamap free from sin and dae. God savve aotem olketa sin blo iumi, and deletem criminal record blo iumi. And samting wea barava important, iumi savve garem gud relationship witim loving Dadi blo iumi lo heven, Jehovah, distaem.

20. Wat nao bae iumi discussim lo next article?

²⁰ Taem iumi ting raonem wat Jehovah and Jesus duim for iumi, iumi barava appreciatim datwan. (2 Cor. 5:15) If tufala no helpem iumi, bae iumi no garem eni hope nao! Bat wat nao gud samting wea each wan lo iumi kasem from forgiveness blo Jehovah? Hem nao wat bae iumi discussim lo next article.