Waswe, Olketa Jehovah’s Witness Christian?

Ia. Mifala olketa Christian bikos:

• Mifala trae for barava followim olketa teaching and wei bilong Jesus Christ.—1 Peter 2:21.

• Mifala bilivim Jesus nomoa man wea savve sevem iumi, “bikos no eni man moa long earth hem kasem paoa from God for sevem iumi.”—Acts 4:12.

• Taem eniwan hem kamap wanfala Jehovah’s Witness, hem baptaes long nem bilong Jesus.—Matthew 28:18, 19.

• Mifala prea long God long nem bilong Jesus.—John 15:16.

• Mifala bilivim Jesus nao Hed, wea minim God givim hem paoa ovarem evri man.—1 Corinth 11:3.

Bat long samfala wei mifala difren from olketa nara religion wea sei olketa Christian. Wanfala example nao, long biliv bilong mifala, Bible sei Jesus hem Son bilong God, no part bilong wanfala Trinity. (Mark 12:29) Mifala no biliv long teaching wea sei soul no savve dae, and mifala no lukim eni pruv insaed Bible for sei God hem bonem pipol insaed hell for olowe, or wea sei olketa wea lead long Christian worship mas garem spesol title wea mekem olketa for important winim nara pipol.—Ecclesiastes 9:5; Ezekiel 18:4; Matthew 23:8-10.