Keʼe juajna jian jii para jaʼana

1. Keʼe juajna jian jichjaaná Dio

Dio rinao ke kainxin chujni chrjuin ko jian sinthena. Ko ixi anto thjueʼe chujni. Mexinxin, juinchechjian Nunthe ko kain thi jii nthiʼi. I seʼa ditjaan para ke tasinthjian kainxin thi tangi ko jaña kainxin chujni icha jian sinthena (Detsjeʼe 1 Timoteo 6:19).

Ninaa xi nchixin chruʼa dinthjian kainxin chijni ke jii, chi̱n, ni thi tade̱ʼeni. Aro juiana naa juajna jian: ke i seʼa ditjaan, ko Dio tasinthjian kainxin xi nchixin ke jii nthiʼi ko jeʼe sakeʼe nchixiʼin. Ko aremée chujni jian ruxrakao chuuna ko jian sinthena (Detsjeʼe Apocalipsis 21:3, 4 ko 1 Corintios 15:24).

2. Unda ixi anto renthe juajna jiʼi

Para ke i xruʼin chijni seʼe, Dio tasinthjian kainxin chujni ke ncheʼe thi jiaʼan nthiʼi ngataʼa Nunthe (Sofonías 2:3). Aro kesa sincheʼe jiʼi. Biblia bajin ke rukii nchaʼun ke icha tangi rugeʼe ko jiʼi thi utedukuna jai. Ko jiʼi jitjago ke i seʼa ditjaan ko Dio usincheʼe thi ndachro (Detsjeʼe 2 Timoteo 3:1-5).

3. Keʼe rugunda sunthuʼuna

Rutsjeʼená thi ndachro Biblia para ke jaña tsanginá icha de Dio, jiʼi xraa thi kji̱ʼin naa ndudaʼa xeʼen ndo ixi anto rinao ndo xan. Nthiʼi ndathjuná keʼe sunthuʼuna para ke jian ko chrjuin sunthena jai ko keʼe chunda ke sunthuʼuna para ke ngai nchaʼun tsii sunthechuna ko i se̱ʼaná. Jiʼa kain chujni sinchexruxiʼina ixi sekangi thi ndachro Biblia. Aro dexraxaun ke si sekinthueʼa de sekangi, Dio anto senthanchaun (Detsjeʼe 2 Timoteo 3:12 ko Apocalipsis 14:6, 7).