Keʼe tjago Biblia, keʼe tsuʼen religión tjago thi nduaʼa

1. A kain religión tjago thi ndua

Ngai kainxin religión jii chujni ke rinao sincheʼe thi jian jii. Ko Dio chrjuin tunuʼen ixi thi tencheʼena ko rinao tsengijnana. Aro tsje chujni nchegundana religión para ncheʼena thi jiaʼan (Romanos 10:2; 2 Corintios 11:13-15). Ngai noticia thiʼiná kexrein inchi religión, chunda ke sikun ngai terrorismo, ko kai dixinthena are thetukaʼo chuo país ko asta thi icha jiaʼan, inchi are tsena ko dinthejuakaʼuna xanchinchinchjan. ¡Jiʼi ncheʼe ke chujni ke rinao sincheʼe thi jian jii, tathinthuʼena religión ixi jiʼi! (Detsjeʼe Mateo 24:3-5, 11, 12).

Religión tjago thi ndua, nichja jian de Jehová ko icha religión ncheʼa jiʼi. Nchekaxina Dio ixi thi jiaʼan ke jituʼen ko tjaguʼana keʼe tuʼen naa chujni are tade̱ʼen, ko tjaguna tsje thi tununxiʼan ngai Biblia. Aro Jehová rinao ke chujni satsuana jian kense jeʼe Ndo. Ezequiel 18:4 (TNM) ndachro: “¡Thiʼira jian! Jaʼan juinthachjian, kainxin alma. . . jaña xraa almee naa ndudaʼa, kai almee naa chjan. . . jaʼan juinthachjian. Mexinxin, thi alma ke ncheʼe thi jiaʼan. . . jeʼe thi chunda ke tase̱ʼen” (Detsjeʼe 1 Timoteo 2:3-5).

2. Keʼe tjago Biblia, keʼe tsuʼen religión tjago thi nduaʼa

Naa chujni chruʼa sincheyeʼe Dio are ndachro ke dithikaun, ko xra jincheʼe thi jiaʼan jii (Santiago 4:4). Kainxin religión ke tjago thi nduaʼa, Biblia nchegiʼin “Babilonia rajna jie”, ixi jaña biʼin thi rajna ke beʼe are saʼo thi kuexinxin bachrje religión ke tjago thi nduaʼa, jiʼi kuʼen are ubatho Chrin Suji are nchauen Noé. Ko i seʼa ditjaan, ko Dio tasinthjian kainxin religión ke ncheyeʼe chujni ko ke ncheʼe ke ndakuaʼa thjiʼina (Detsjeʼe Apocalipsis 17:1, 2, 5, 16, 17 ko 18:8).

Aro, Jehová tajitsjeʼe kain chujni ke tethjee sincheʼe thi jian jii ke xra tethjeena religión tjago thi ndua ko jithengijna Ndo na. Kexrein, jiʼi jituʼen are tangina thi tjago Biblia (Detsjeʼe Juan 6:45).

3. Keʼe chunda ke sincheʼe naa chujni ke rinao sincheʼe thi jian jii

Jehová rinao tsengijna chujni ke thjee thi ndakua jii ko dithikauna. Mexinxin, jeʼe danchia ke tsinthuʼeni religión tjago thi nduaʼa. Si denduaxin thjueʼeni Ndo, jaan sincheʼeni thi ndachro Ndo (Detsjeʼe Apocalipsis 18:4).

Ngai siglo NAA, tsje chujni ke juinao rukangi thi jian jii bithuexina kuiʼina juajna ke bikao ni rua̱ʼan Jesús. Jehová kjuague ni teʼi kexrein icha jian ruginthena ko rukjiʼina, ko ke ruchunthiana ngai thi tjago Ndo. Jaña xraa jeʼena, jaʼana kai suthikauna thi tjago Thee Dio ko ke para jaʼana xruʼin naa thi icha renthe juʼo Jehová (Detsjeʼe 1 Tesalonicenses 1:8, 9 ko 2:13).

Jehová anto chee are ni teʼi thinthuʼena religión tjago thi nduaʼa ko rueena religión tjago thi ndua. Kain ni teʼi jian ruxrakauna Ndo, ko kai jian ruxrakauna kainxin ni chuuná ko kai nuʼena ke tsii nchaʼun ke sinthechuna ko i se̱ʼana. A ruenthaxruxiʼan ke Dio runcheʼe jiʼi ixi suixin (Detsjeʼe Marcos 10:29, 30 ko 2 Corintios 6:17, 18).

4. Keʼe sincheʼe Dio para ke kain chujni jian ruxrakao chuuna

Jehová tasinthjian religión tjago thi nduaʼa, ko jaña chujni jian sinthena. I xruʼin kensen sincheyeʼena ko kainxina xrajuʼo tsangina ko sithikauna. Aremée kainxin chujni juʼo sinchesayeʼena Jehová, Dio ke juinthachjianá. Ndaʼa ke anto chrjuin sigeʼe (Detsjeʼe Apocalipsis 18:20, 21 ko 21:3, 4).