AN̈KEJAYOʼOYI 17

¿Juʼuts Jesús?

Edición impresa

Siiga duroj tan̈kuyujkaʼaba jempɨk iwat y jempɨk nɨm Jesús jesɨk jaʼy ityi yɨʼɨm naxyukmɨ, tañixpɨktaʼmpa jeʼm jɨɨxiyaj y jeʼm jaamoʼoyiyaj iga maaj takkunuʼkpa jeʼ y jeʼm iJaatun̈, Jehová. ¿Juʼptam jempɨk maaj tagaʼman̈jakpa y tan̈kusuʼnɨytyaʼmpa? ¿Yjuutypɨk wɨap tan̈watkiʼpstaʼm Jesús?

1. ¿Juutypɨk Jesús iwɨakwiñkejpa jeʼm iJaatun̈?

Dende pekam Jesús iwaganaity iJaatun̈ sɨn̈yukmɨ y iwɨixpɨkneʼ. Jeʼyukmɨ ijɨɨspa, ijaampa y iwatpa juʼuts jeʼ (maayɨʼ Juan 5:19). Jesús iwɨakwiñkej jeʼm jɨɨxi iniitywɨʼɨp iJaatun̈, jeʼ nɨm: «Jém aixñewɨɨp aɨch, iixñet́im jém anJa̱tuŋ Dios» (Juan 14:9). Siiga duroj iñixpɨkpa Jesús, majtyim in̈wɨixpɨkpa Jehová. Juʼuts akwiñkejoʼoyi jeʼm yaʼachan̈jamoʼoyi ikwiñkejwɨʼɨp Jesús ikwiñkejpatyim iga Jehová tsaam mityoyba mimich.

2. ¿Juutypɨk ikwiñkej Jesús iga ityoyba iJaatun̈?

Jesús nɨm: «Aŋwatpa juuts apɨɨmɨ́ypa jém anJa̱tuŋ Dios iga jém it́yajwɨɨp yɨ́p mundo ijo̱dóŋa̱yajiñ iga tsa̱m antoypa jém anJa̱tuŋ Dios» (Juan 14:31). Jesɨk jaʼy ityi yɨʼɨm naxyukmɨ, Jesús ikwiñkej iga tsaam ityoyba iJaatun̈, jeʼyukmɨ ikupɨk mex iga in̈an̈kamok kutɨʼɨchiyaj. Jesús tsaam idyɨk ikusuʼnɨʼyba in̈maday tun̈gakyaj juʼuts jeʼm iJaatun̈ y iyooxpaʼtyaj iga iamigojayajiñ Jehová (Juan 14:23).

3. ¿Juutypɨk ikwiñkejneʼ Jesús iga tsaam toyoʼyba?

Jeʼm Biblia nɨmpa iga Jesús ityoyba «jeʼm ityyajwɨʼɨp naxyukmɨ» (Proverbios 8:31). Ikwiñkej yɨʼp toyoʼoyi jesɨk ianmajan̈chiʼ y iyooxpaʼt tun̈gakyaj. Iwat milagrojyaj, jeempɨgam ikwiñkej iga yaʼachan̈jaamoʼyba y tsaam pɨmiɨy (Marcos 1:40-42). Dyaʼ idyɨk neejaixoʼyba. Ikpoʼks y ichiʼ tuum an̈jogoʼoyi ityumpɨy jempɨk ikumaton̈yajpa idyɨk. Jesús tsaam ityoyba jeʼm ityyajwɨʼɨp yɨʼɨm Naxyukmɨ, jeʼyukmɨ yaʼacha y kaʼ por taɨchtyam, pero maaj ityoyba jempɨk ikupɨkyajpa jeʼm in̈kiʼmayoʼoyiyaj (maayɨʼ Juan 15:13, 14).

MAAJ TAN̈WƗKUYUJKAIÑ

Majnam tañixpɨktaʼmiñ Jesús y tanaʼmiñ juutypɨk wɨap tantoyoy y tanyooxpadoy juʼuts jeʼ iwatpa.

4. Jesús ityoyba iJaatun̈

Jesús takwiñkejayñeʼ juutypɨk tanakwiñkejaʼyba Dios iga tantoyba. Maytyaʼamɨ Lucas 6:12 y maytyaʼamɨtyim Juan 15:10 y 17:26. Jesɨk immaytyaʼmum tumtum texto, an̈mattaʼamɨ tyi iñjɨɨstaʼmpa y kutson̈taʼamɨ:

Siiga tan̈watkiʼpstamtoʼoba Jesús, ¿juutypɨk wɨap tanakwiñkejtaʼm iga tantoyba Jehová?

Jesús sɨʼ iwat an̈wejpadoʼoyi. — Jesús juchixkej in̈wejpaʼtpa idyɨk iJaatun̈ sɨn̈yukmɨpɨk, iga tsaam ityoyba.

5. Jesús tsaam ityeguedaap jempɨk yaʼachayajpa

Jesús tsaam idyɨk ityeguedaap jempɨk yaʼachayajpa. Mex iga soʼpsneum idyɨk, jeʼ ipɨk jeʼm ipɨɨmi y jeʼm itiempo iga yooxpadoʼyba. Maytyaʼamɨ Marcos 6:30-44 y an̈mattaʼamɨ tyi iñjɨɨstaʼmpa y kutson̈taʼamɨ:

Kun jempɨk tammaytyaʼm, ¿juutypɨk ikwiñkej Jesús iga tsaam ityeguedaap tun̈gakyaj? (Aʼmtaʼamɨ jeʼm versículos 31, 34, 41 y 42).
¿Tyi ianmajan̈chiʼ Jesús iga yooxpadoʼyiñ? (Aʼmtaʼamɨ jeʼm versículo 34).
Iga Jesús iwatkiʼps jeʼm iJaatun̈, ¿juutypɨk tayooxpaʼtneʼ jeʼm iakwiñkejoʼoyi iga majnam tanixpɨguiñ Jehová?
¿Juutypɨk tanakwiñkejtaʼmpa iga tanteguedataʼmpa tun̈gakyaj juʼutstyim iwat Jesús?

Jesús ikwiʼk tsaam jaʼyan̈ pɨxɨñtyam, yomtam y tsɨxtyam kun cinco kaxtyanañi y wɨsteen tɨʼɨpɨ. Jeʼm ikuyujkɨʼɨwiñyaj ikusajyaj.

6. Jesús tsaam yooxpadoʼyba

Jesús tsaam yooxpadoy mex iga dyaʼ idyɨk tumiñɨy, y taanmajan̈chiʼiba iga tayooxpadoytyaʼmiñtyim. Maytyaʼamɨ Hechos 20:35 y an̈mattaʼamɨ tyi iñjɨɨstaʼmpa y kutson̈taʼamɨ:

Juʼuts nɨm Jesús, ¿tyi tamaymaywattaʼmpa?

Aʼmtaʼamɨ jeʼm VIDEO y an̈mattaʼamɨ tyi iñjɨɨstaʼmpa y kutson̈taʼamɨ:

VIDEO: «Más tamaymay iga tachióypa que iga tachiit́a̱p» (tuum jaakaʼ) (4:00)

¿Juutypɨk wɨap tanchioytyaʼm mex iga dyaʼ tajaya tumiñɨytyaʼm?

¿Iñjoodon̈am idyɨk?

Jeʼm Biblia tan̈kejaʼyba iga tanan̈wejpaʼdyiñ Jehová ikuyukmɨ Jesús (maytyaʼamɨ Juan 16:23, 24). Siiga jeempɨgam tan̈watpa sɨʼ tanakwiñkej iga tantsoowaixpa tyityam Jesús iwat iga tanamigojataʼmiñ Jehová.

WEEÑI NƗMYAJPA IGA: «Dios dyaʼ ityeguedaap jempɨk yaʼachayajpa».

Jesús iwɨwatkiʼps iJaatun̈, ¿juutypɨk ikwiñkej iga Jehová tateguettam?

JEMPƗK TAN̈KUYUJKAʼ

Jesús ityoyba iJaatun̈, ityoybatyim ityumpɨy jeʼm ityyajwɨʼɨp yɨʼɨm Naxyukmɨ. Jeʼ iwɨwatkiʼps iJaatun̈, jeʼyukmɨ siiga maaj tañixpɨkpa, majtyim tañixpɨkpa Jehová.