Juutypɨk wɨap tanaity paz jesɨk sɨʼ tanyaʼacha

1. ¿Tyiapaʼap «jém wɨbɨc jɨ̱xi» tachiʼipaʼap Dios, y juutypɨk tawɨwadaʼyba? (Filipenses 4:6, 7).

ITY tuum paz iga jaʼyan̈yaj dyaʼ iixpɨkyajpa. Jeʼ «jém wɨbɨc jɨ̱xi» iga Dios chioʼyba, y ipɨktson̈yajpa jempɨk iniityyaj tuum wɨnanɨgoʼoyi kun iJaatun̈ sɨn̈yukmɨpɨk. Jesɨk tanaitypa jeʼm paz iga Dios tachiʼiba wɨɨ tanan̈jaam (maayɨʼ Filipenses 4:6, 7). Tanaitytyaʼm tuum wɨnanɨgoʼoyi kun jempɨk ityoyyajpa Jehová y tuum wɨnanɨgoʼoyi kun jeʼm Dios «iniit́wɨɨp jém wɨbɨc paz» (1 Tes. 5:23). Tanaitytyaʼmpa jeʼm paz tachiʼipaʼap Dios jesɨk tañixpɨktaʼmpa, jesɨk tanaidyaytyaʼmpa confianza y jesɨk tan̈kupɨktaʼmpa. Yɨʼp paz tayooxpaʼtpa iga odoy tan̈yaʼguiñ jesɨk tanan̈teeñkamoktaʼmpa tan̈kapɨk kutɨʼɨchiyaj.

2. ¿Juutypɨk tanjoodon̈tam iga wɨap tanaidyaytyaʼm jeʼm Dios ipaz?

² ¿Wɨapsɨ tanaidyay jeʼm Dios ipaz jesɨk sɨʼ tanyaʼacha? ¿Tyi wɨap tan̈wat jesɨk tuum kaʼakuy jobity an̈pɨkpa, jesɨk naspa tuum emergencia, jesɨk itypa an̈aajiyaj o jesɨk tayaʼachwattamtaap? Yɨʼpyaj nasɨyoʼoyiyaj wɨap tatsɨgan̈jeʼk. Pero Jesús ichiʼ yɨʼp an̈kiʼmayoʼoyi jeʼm ikuyujkɨʼɨwiñyaj: «Odoy aŋyáctaamɨ [iñanmajom], odoy cɨ̱ŋtaamɨ» (Juan 14:27). Jaʼyan̈ tɨwɨtam y yoomtɨwɨtam iwatneyaj jempɨk nɨm Jesús. Kun jeʼm Jehová iyooxpadoʼoyi ijaamneyaj paz jesɨk in̈an̈kamokyajpa tan̈kapɨk kutɨʼɨchiyaj.

TANAIDYIÑ PAZ JESƗK JOBITY AN̈PƗKPA TUUM KAʼAKUY

3. ¿Juutypɨk wɨap takkaʼyay jeʼm paz jesɨk itypa tuum epidemia o tuum pandemia?

³ Tuum epidemia o tuum pandemia jobitytyi wɨap ikukagay tañityi. Tan̈kujɨɨstaʼmiñ juutypɨk jeʼm pandemia del COVID-19 ikukagayay jaʼyan̈yaj iityi. Jesɨgam jaʼyan̈yaj akwaʼkyajta juutypɨk idyɨk yɨʼp pandemia ikukagayayñeyaj iityi, jaʼyan̈yaj nɨmyaj iga dyaʼ idyɨk tɨgɨyba imoon̈iyaj. Majtyim jaʼyan̈a jempɨk iniityyaj ansiedad y depresión, jempɨk ukyajpa y ipɨkyajpa droga, jeʼm violencia doméstica y jempɨk nakkaʼayajtatoʼoba. Siiga jobity an̈pɨkneʼ tuum kaʼakuy juuty mich miity, ¿tyi wɨap in̈wat iga odoy pɨɨmi iñjaamiñ jeʼm ansiedad y iniidyiñ jeʼm Dios ipaz?

4. ¿Tyiʼiga tachiʼiba paz tanjoodon̈a jeʼm jɨychagoʼoyi nɨmwɨʼɨp Jesús iga naspa jeʼm in̈an̈pɨgam jaama?

⁴ Jesús ijɨychak iga jeʼm in̈an̈pɨgam jaamayaj itypa «caacuy ju̱t́iŋquej» (Luc. 21:11). Iga tanjoodon̈tam yɨʼp tachiʼiba paz. ¿Tyiʼiga? Iga tanjoodon̈tamam idyɨk iga yɨʼbam naspa, jeʼyukmɨ dyaʼ takupiʼichkaɨʼyba. Tanaʼmpa iga ityumpɨy naspa ixɨʼ juʼutsam Jesús nɨm. Jeʼyukmɨ tan̈kupɨktaʼmpa jeʼm an̈kiʼmayoʼoyi ichiʼiwɨʼɨp jempɨk ityyajpa idyɨk jeʼm in̈an̈pɨgam jaama. Nɨm: «Odoy cɨ̱ŋtaamɨ» (Mat. 24:6).

5. a) Juʼuts nɨmpa Filipenses 4:8, 9, ¿tyi tan̈waʼgaʼyiñ Jehová jesɨk tuum kaʼakuy jobity an̈pɨkpa? b) ¿Juutypɨk tayooxpaʼtpa jesɨk tan̈kumaton̈ba jeʼm grabaciones de audio de jeʼm Biblia?

⁵ Jesɨk tuum kaʼakuy jobity an̈pɨkpa, dyaʼ tanjoodon̈ tyityam wɨap iñas y wɨapsɨ iga takɨɨn̈ba. Jeʼam iñaskaʼ tuum yoomtɨwɨ iñɨɨyipɨk Desi.b Iga jeʼm COVID-19 ikaʼay jeʼm iachwɨdyay, jeʼm iprimo y jeʼm idoctor, kɨɨn̈batyim idyɨk iga imachiñ yɨʼp kaʼakuy y ikmachiñ iaapa iga tsaamiam idyɨk. Kɨɨn̈batyim idyɨk iga ipatstogoʼyiñ jeʼm iyooxakuy y nakwaʼktaap idyɨk juuty ipɨkpa jeʼm tumiñ iga wɨaiñ ijuyjuyoy y iyojpa jeʼm renta. Pɨɨmi idyɨk ikkobakpijpa y dyaʼ idyɨk wɨap imon̈. Pero wɨa mu iniity jeʼm paz. ¿Juutypɨk? Jeʼm in̈wejpadoʼoyijom iwaʼgaʼyba idyɨk Jehová iga iyooxpaʼdyiñ iniity jeʼm wɨbɨk jɨɨxi (maayɨʼ Filipenses 4:8, 9). Iga «ikumaton̈aʼyiñ» jeʼm Jehová ijɨɨyi, ikumaton̈ba idyɨk jeʼm grabaciones de audio de jeʼm Biblia. Jeʼ nɨm: «Jesɨk ammaton̈ba idyɨk juutypɨk maytyaap, wɨam idyɨk anan̈jaam y akjɨɨspa iga Jehová tsaam ateguet» (Sal. 94:19).

6. ¿Juutypɨk tayooxpaʼtpa jesɨk tan̈kuyujkaʼaba jeʼm Biblia y tanɨkpa jeʼm an̈tuʼumaajiyaj?

⁶ Jesɨk tuum kaʼakuy jobity an̈pɨkpa tsaam kukakpa tañityityam. Pero dyaʼ tantsakpa iga tan̈kuyujkaʼaba jeʼm Biblia y tanɨkpa jeʼm an̈tuʼumaajiyaj. Jeʼm totjaayijomyaj y jeʼm videojomyaj ity nasɨyoʼoyiyaj de tɨwɨtam iga sɨʼtyim iñaskayaj yɨkxpɨk kobakpiijiyaj y dyaʼ ijagan̈tsakneyaj Jehová (1 Ped. 5:9). Jeʼm an̈tuʼumaajiyaj tayooxpaʼtpa iga jeʼm tanjɨɨxi komneiñ kun jeʼm wɨtampɨk jɨɨxiyaj iga tan̈kejaʼyba jeʼm Biblia y jeempɨktyim wɨap taanmajan̈chiʼitya y tananmajan̈chiʼ tun̈gakyaj (Rom. 1:11, 12). Siiga tan̈kujɨɨspa juutypɨk Jehová iyooxpaʼtneʼ jeʼm iyooxakɨʼɨwiñyaj jesɨk mɨmneyaj, jesɨk kɨɨn̈neyaj o najaamyajtaap idyɨk ikutyum, jeʼm tanfe pɨɨmiaap y tan̈wɨkupɨkpa iga jeʼ tayooxpaʼtpatyim.

7. ¿Juutypɨk wɨap tan̈watkiʼpstaʼm jeʼm apóstol Juan?

⁷ Tan̈wattaʼmiñ ityumpɨy juʼtspɨy tawɨap iga tamurutaʼmiñ kun jeʼm tantɨwɨtam. Tuum epidemia o tuum pandemia wɨapsɨ iga dyaʼ taaʼmchiʼiba iga tannuʼusmachiñ o tan̈kɨʼnamatsyajiñ tun̈gakyaj, mex siiga taity an̈tuumjom kun jeʼm tantɨwɨtam. Jesɨk itypa yɨkxpɨk nasɨyoʼoyiyaj wɨapsɨ iga jeextyim tanan̈jaamtaʼm juʼuts jeʼm apóstol Juan iga tsaam idyɨk iaʼmtoʼobam jeʼm iamigo Gayo (3 Juan 13, 14). Pero ijoodon̈ idyɨk iga dyaʼ jobity wɨap iaʼm. Jeʼyukmɨ ikutsaday tuum carta. Siiga dyaʼ wɨap tanakunuʼktamta kun jeʼm tantɨwɨtam, wɨap tanjɨyñɨgayyaj, wɨap tan̈wat tuum videollamada o tan̈kutsadayyajiñ mensaje. Jesɨk tanamuruyajpa jeʼm tantɨwɨtam, tayooxpaʼtpa iga odoy tanjaamiñ iga taity tan̈kutyum y jesɨk majtyim wɨam tanan̈jaam. ¿Y siiga tsaam pɨɨmi tan̈yaʼknetaʼm? Tanamuruyajiñ jeʼm ancianojyaj y tampɨktson̈taʼmiñ jeʼm anmajan̈chioʼoyi tachiʼiyajpaʼap kun toyoʼoyi (Is. 32:1, 2).

TANAIDYIÑ PAZ JESƗK NASPA TUUM EMERGENCIA

8. ¿Juutypɨk wɨap mikkaʼyay jeʼm paz jesɨk iññaskaʼaba tuum emergencia?

⁸ Siiga mich miyaʼachwatneʼ tuum inundación, tuum nasyɨʼɨxi o kujipsnasneʼ jeʼm an̈eymɨ juuty miity, wɨapsɨ iga dyanam in̈kujaʼamayñeʼ jempɨk nas. Y siiga kaʼane algun i iga iñtyoyba o impatstogoyñeʼ tyityam iniity idyɨk, wɨapsɨ iga iñtyoʼyan̈jaampa, min̈yaʼkpa o hasta iñjoʼykaneʼ. Yɨʼp dyaʼ nɨmtoʼoba iga iñtyoyba jeʼm tyidyin̈kej materiales o iga mityogoyay fe. Mich iññaskaʼ tuum tan̈kapɨk nasɨyoʼoyi, y wɨapsɨ iga weeñiyaj dyaʼ aʼman̈jakyajpa iga mich min̈yaʼguiñ o iñjoʼykaiñ (Job 1:11). Pero, dyaʼ tyi ijoo juʼtspɨy tan̈kaʼ jempɨk sɨʼ tannaskaʼ, wɨap tanaitytyaʼm paz. Tanaʼmtaʼmiñ juutypɨk.

9. ¿Juutypɨk tayooxpaʼtpa jempɨk nɨm Jesús iga tanawɨtsaknetamtaiñ jesɨk naspa juʼptyin̈kej emergencia?

⁹ Yɨʼp naxyukmɨ, weeñiyaj ijɨɨsyajpa iga ni keman iñaskayajpa tuum emergencia. Pero taɨchtyam tanjɨɨskupaknetaʼm jempɨk nɨm Jesús. Tanjoodon̈tam iga majtyim itypa jeʼm desastres y weeñiyaj taktsɨʼyñamotpatyim. Jesús iñɨʼmay jeʼm ikuyujkɨʼɨwiñyaj iga wiñtyi iga nuʼkpa jeʼm aktogoyoʼoyi itypa «mɨjpɨc nasyɨɨxi» y tun̈gak yaʼachaajiyaj (Luc. 21:11). Ijɨychaktyim iga jeʼm malojpɨk jɨɨxi tsaam idyɨk jaʼyan̈aap, jeʼyukmɨ sɨɨ tsaam ity malwadoʼoyi, an̈aaji y ataques terroristas (Mat. 24:12). Jesús dyaʼ nɨm iga yɨʼpyaj nasɨyoʼoyiyaj numaaj imalwadaʼyba jempɨk dyaʼ ikupɨkyajpa Jehová. Jeʼyukmɨ jaʼyan̈ Dios iyooxakɨʼɨwiñyaj iyaʼachwatneyajtyim jeʼm desastres (Is. 57:1; 2 Cor. 11:25). Wɨapsɨ iga Jehová dyaʼ iwatpa tuum milagro iga takɨakpudyiñ jesɨk naspa tuum emergencia, pero tachiʼiba tyityam tatogoyaytyaʼm iga odoy pɨɨmi tan̈yaʼguiñ y tanaidyiñ jeʼm paz.

10. ¿Tyiʼiga tanɨmpa iga jesɨk tanawɨtsaktamtaap wiñtyi iga naxiñ tuum emergencia tanakwiñkejtaʼmpa iga tanaitytyaʼm fe? (Proverbios 22:3).

¹⁰ Jesɨk naspa tuum emergencia, maaj dyaʼ jespɨy takobakpijtyaʼmpa siiga tanawɨtsaknetamta. ¿Nɨmtoʼoba yɨʼp iga dyaʼ tanaidyay confianza Jehová? Dyaʼ jesaneʼ. Siiga tanawɨtsaknetaap wiñtyi iga naspa tuum emergencia, yɨʼɨmpɨgam tanakwiñkejpa iga tanaidyay fe iga jeʼ takuixpa. ¿Tyiʼiga tanɨmpa yɨʼɨmpɨk? Iga jeʼm Biblia tan̈kiʼmpa iga tanakuixtyamtaiñ jesɨk itypa tuum peligro (maayɨʼ Proverbios 22:3).c Y, ikuyukmɨ jeʼm totjaayiyaj, jeʼm an̈tuʼumaajiyaj y jeʼm anuncios, jeʼm Jehová iorganización sɨʼ tanɨʼmaytyaʼm iga tanawɨtsaktamtaiñ iga wɨaiñ tanan̈teeñkamoktaʼm juʼptyin̈kej desastre.d ¿Tyi tan̈wattaʼmpa siiga tanaidyaytyaʼm confianza Jehová? Dende sɨɨ tan̈kupɨktaʼmiñ jeʼm an̈kiʼmayoʼoyiyaj, wiñtyi iga naxiñ tuum emergencia.

11. ¿Tyi tan̈kejaytyaʼmpa jeʼm Margaret iakwiñkejoʼoyi?

¹¹ Tan̈kujɨɨstaʼmiñ jempɨk iñaskaʼ tuum yoomtɨwɨ iñɨɨyipɨk Margaret. Jeʼm an̈jagoʼoyiyaj iñɨʼmayyaj iga poʼyiñ iga jeʼm an̈eymɨ juuty ity ityɨk sɨʼ idyɨk ikujipsnas. Iga jaʼyan̈yaj pooyiyaj idyɨk, yaj in̈nuʼkyaj jeʼm carretera y dyam idyɨk i wɨap iñas. Ity idyɨk jaʼyan̈ jookoʼ, y Margaret tsɨʼy jeʼm icarrojom. Pero, iga nawɨtsaknetawum idyɨk, wɨa mu inikɨakputta. Icarterajom ininɨki idyɨk tuum mapa iga iñɨʼɨyɨyaʼyba juʼp tun̈ wɨap idyɨk ipɨk. Wiñtyi oyñeum idyɨk ikɨʼpin̈ juʼutskom, iga jesɨk itypa idyɨk tuum emergencia wɨap iñɨgɨyɨy yɨʼp tun̈jom. Iga nawɨtsaknetawum idyɨk, ikupuj iityi.

12. ¿Tyiʼiga tan̈kupɨktaʼmpa jeʼm an̈kiʼmayoʼoyiyaj tachiʼityapaʼap jesɨk itypa tuum emergencia?

¹² Iga wɨaiñ tanakɨakputta o iga idyiñ orden, jeʼm an̈jagoʼoyiyaj wɨapsɨ iga pɨʼɨmɨyoyyajpa, iga tatsɨʼytyaʼmiñ tantɨkkɨʼɨm o iga taputtaʼmiñ jeʼm an̈eymɨ juuty taity, o wɨapsɨ iga chioyyajpa tun̈gak an̈kiʼmayoʼoyiyaj. Weeñiyaj dyaʼ ikupɨkyajpa yɨʼpyaj an̈kiʼmayoʼoyiyaj iga dyaʼ ichakyajtoʼoba ityɨk. Pero ¿tyi tan̈wattaʼmpa taɨchtyam iga tacristianojtam? Jeʼm Biblia nɨmpa: «Siempre cupɨctaamɨ jém aŋjagooyiyaj, jém iccámneyajwɨɨp jém pɨxiñt́am porque je̱mpam ixunpa jém tánO̱mi Cristo. Taŋcupɨctámpa [...], jém rey, porque je iniit́ jém más mɨjpɨc cargo» (1 Ped. 2:13, 14). Jeʼm Jehová iorganización tachiʼiyajpatyim an̈kiʼmayoʼoyiyaj iga takupujtaʼmpa. Juchixkej takjɨɨstaʼmpa iga tanchiʼiyajiñ jeʼm ancianojyaj tannúmero de teléfono jempɨk sɨʼ tampɨktaʼm, iga wɨaiñ tajɨyñɨgayyaj jesɨk naspa tuum emergencia. ¿Tanchiʼiñeyajum taɨchpɨk? Wɨapsɨ iga jeʼm organización tachiʼiba an̈kiʼmayoʼoyiyaj iga tatsɨʼyiñ tantɨkkɨʼɨm o tapudyiñ o juutypɨk wɨap tanakuixtya jesɨk nɨkpa tajuyjuyoʼoyityam. O wɨapsɨ iga tanɨʼmayyajpa juchix y juutypɨk wɨap tanyooxpaʼtyaj tun̈gakyaj. Siiga dyaʼ takupɨgoytyaʼmpa wɨap tanamalwadaytyamta o tammalwadayyaj jeʼm ancianojyaj iga tsaam tawɨkuixyajpa (Heb. 13:17). Margaret nɨm: «An̈wɨjoodon̈ iga anakɨakputta iga an̈kupɨk jeʼm an̈kiʼmayoʼoyiyaj chioyyajwɨʼɨp jeʼm ancianojyaj y jeʼm organización».

13. ¿Tyi iwatyajpa jaʼyan̈ cristianojyaj ichakneyajwɨʼɨp ityɨk iga iniityyajiñ maymayaaji y jeʼm paz?

¹³ Iga tsaam itypa desastres, guerra o jeʼm an̈aajiyaj, jaʼyan̈ tɨwɨtam ichakneyaj ityɨk. Jeʼeyaj iwatyajpa ityumpɨy juʼtspɨyam wɨayajpa iga in̈yujyajiñ jeʼm joomipɨk iityi y jobitytyi putyajiñ jeʼm an̈matkuy y nɨkyajiñ jeʼm an̈tuʼumaajiyaj. Y seguido in̈matyajpa «jém wɨbɨc aŋma̱t́i», juutypɨgam iwatyaj jeʼm wiñtyipɨk cristianojyaj jesɨgam kupoʼyayyaj iga moj iyaʼachwatyajta (Hech. 8:4). Jeʼm an̈matkuy iyooxpaʼtyajpa iga ijɨɨskupakneyajiñ jeʼm Dios iAn̈jagoʼoyi y dyaʼ jeʼm kobakpiijiyaj sɨʼpaʼap iñaskayaj. Yɨʼɨmpɨgam iniityyajpa jeʼm maymayaaji y jeʼm paz.

TANAIDYIÑ PAZ JESƗK TAYAʼACHWATTAMTAAP

14. ¿Tyiʼiga jeʼm yaʼachwadoʼoyi wɨap iwat iga odoy tanaidyiñ jeʼm paz?

¹⁴ Jesɨk tayaʼachwattamtaap wɨapsɨ iga takkaʼyaytyaap jaʼyan̈ tyidyin̈kej iga tayooxpaʼtpa idyɨk iga tanaidyiñ paz y maymayaaji, juʼuts jesɨk wɨap idyɨk tanan̈tuʼumataʼm, tamputtaʼm jeʼm an̈matkuy y tan̈wattaʼmpa idyɨk tyidyin̈kej y dyaʼ idyɨk takɨɨn̈ba iga tamatstamtaiñ. Jesɨk takkaʼyaytyaap ityumpɨy yɨʼp wɨapsɨ iga takobakpijpa iga dyaʼ tanjoodon̈ tyi wɨap iñas okmɨ. Y dyaʼ malo siiga jeex tanan̈jaam. Pero tanakuixtyaiñ iga jeʼm yaʼachwadoʼoyi odoy takpatstogoʼyiñ tanfe, juʼutstyim Jesús iñɨʼmay jeʼm ikuyujkɨʼɨwiñyaj (Juan 16:1, 2). Jesɨk, ¿tyi wɨap tan̈wat iga tanaidyiñ jeʼm paz jesɨk tayaʼachwattamtaap?

15. ¿Tyiʼiga dyaʼ wɨɨ iga takɨɨn̈taʼmiñ jesɨk tayaʼachwattamtaap? (Juan 15:20; 16:33).

¹⁵ Jeʼm Dios In̈maatyi tanɨʼmaʼyba: «Siiga tantsacpa iga tammalwatpa y tatsɨ́ypa juuts jém Jesucristo ipɨxiñt́am, jesɨk agui tajóyixt́a̱p, tamalwadayt́a̱p» (2 Tim. 3:12). Tuum tɨɨwɨ iñɨɨyipɨk Andréi tan̈kaʼa mu ikupɨk yɨʼpyaj an̈matyiyaj jesɨk dyam aʼmchiʼiyajta iga ikoosteñayyajiñ Dios jeʼm an̈eymɨ juuty ity. Jeʼ ijɨɨspa idyɨk: «Tsaam jaʼyan̈ Testigo ityyaj yɨʼɨm; dyaʼ wɨap amatstamta antumpɨytyam». Pero yɨʼp dyaʼ idyɨk iyooxpaʼtpa y juchixkej kobakpijpa idyɨk. Pero tun̈gak tɨwɨtam ikupɨkyajpa idyɨk iga Jehová iyooxpaʼtyajpa y ni keman ijɨɨsyajpa idyɨk iga jeʼeyaj dyaʼ matsyajtaap. Ijoodon̈yaj idyɨk iga wɨap imatsyajta y dyaʼ idyɨk jespɨy kobakpijyajpa juʼuts Andréi. Jeʼyukmɨ mojtyim ijɨɨs juʼuts jeʼeyaj y ikupɨk iga Dios iyooxpaʼtpa idyɨk. Dyaʼ jaʼy mojom iniity paz, y sɨɨ maymay mex iga in̈teeñkamokpa jaʼyan̈ kobakpiijiyaj. Taɨchtyam wɨaptyim tanjaamtaʼm jeempɨk. Mex iga Jesús nɨm iga tayaʼachwattamtaap idyɨk, pero nɨmtyim iga wɨap idyɨk tan̈kupɨgoytyaʼm (maayɨʼ Juan 15:20; 16:33).

16. ¿Juʼptam an̈kiʼmayoʼoyiyaj tan̈kupɨktaʼmiñ jesɨk tayaʼachwattamtaap?

¹⁶ Jesɨk dyam taaʼmchityamtaap iga tan̈koosteñaytyaʼmiñ Dios wɨap iga jeʼm sucursal o jeʼm ancianojyaj tachiʼiyajpa an̈kiʼmayoʼoyiyaj iga tanakuixtyamtaiñ, wɨaiñ tampɨktson̈taʼm jeʼm wiʼkkuy espiritual y seguido tanan̈mattaʼmiñ jeʼm Dios In̈maatyi juʼtspɨyam tawɨataʼmpa. Takupɨgoytyaʼmiñ mex siiga dyaʼ tan̈wɨkutɨʼɨyɨytyaʼmpa jeʼm an̈kiʼmayoʼoyiyaj tachiʼityapaap (Sant. 3:17). Y odoytyim tanan̈madayyajiñ ityam dyaʼ wɨɨ iga ijoodon̈ayajiñ juuty ityyaj jeʼm tɨwɨtam o tyityam wattaap jeʼm kumunjom (Ecl. 3:7).

17. Juʼutstyim jeʼm apóstolyaj, ¿juʼp jɨɨxi tampɨknetaʼm?

¹⁷ Jeʼm Wookkɨʼɨwiñ in̈teeñkamokpa jeʼm Dios ikumun iga dyaʼ ichakpa iga in̈matpa jeʼm Dios In̈maatyi (Apoc. 12:17). Odoy tanaʼmchiʼiñ iga jeʼm Wookkɨʼɨwiñ y jempɨk in̈jakneʼ tatsɨgan̈jeʼkyajiñ. Jesɨk tanan̈matpa y tanan̈kejpa jeʼm Dios In̈maatyi tamaymayaap y tanaitypa paz, mex iga tayaʼachwattamtaap. En jeʼm wiñtyipɨk siglo, jesɨgam jeʼm teguedɨʼɨyiyaj ipɨʼɨmɨyyaj jeʼm apóstolyaj iga odom in̈kejyajiñ jeʼm Dios In̈maatyi, jeʼeyaj ikupɨkyaj Dios y dyaʼ ijagan̈tsakyaj. Seguido in̈matyaj jeʼm Dios In̈maatyi, y tsaam maymayayaj (Hech. 5:27-29, 41, 42). Jesɨk dyaʼ taaʼmchityamtaap iga tan̈koosteñaytyaʼmiñ Dios, tan̈wɨkujɨɨxiñ juutypɨk tanan̈matpa jeʼm Dios In̈maatyi (Mat. 10:16). Siiga tan̈watpa juʼtspɨyam tawɨap iga tammaymaywatpa Jehová y tanan̈madayyajpa tun̈gakyaj jeʼm Dios In̈maatyi, tanaitypa paz.

JEʼM DIOS INIITYWƗʼƗP PAZ MIWAGANAITYPA

18. ¿Iapaʼap tachiʼiba jeʼm paz tatogoyaywɨʼɨp?

¹⁸ Tan̈wɨkupɨktaʼmiñ iga wɨap tanaitytyaʼm paz mex iga tannaskataʼmpa tan̈kapɨk nasɨyoʼoyiyaj. Siiga tannaskaʼaba yɨʼɨmpɨk tanjɨɨskupaknetaʼmiñ iga jeʼm paz tatogoyaywɨʼɨp jeʼ jeʼm Dios ipaz, yɨʼp nɨmtoʼoba, jeʼm paz iga numaaj Jehová wɨap tachiʼ. Tan̈kupɨktaʼmiñ iga Jehová tayooxpaʼttaʼmpa jesɨk tuum kaʼakuy jobity an̈pɨkpa, jesɨk naspa tuum emergencia o jesɨk tayaʼachwattamtaap. Odoy tantsaktaʼmiñ jeʼm iorganización y tan̈kujɨɨstaʼmiñ jeʼm wɨbɨk nɨgɨyoʼoyi iga jeʼ tajɨykamayñetaʼm. Siiga yɨʼɨmpɨgam tan̈watpa jeʼm Dios tachiʼipaʼap paz tawaganaitypa (Filip. 4:9). Jeʼm tun̈gak kuyujijom, tan̈kɨʼpin̈taʼmpa juutypɨk wɨap tanyooxpaʼtyaj jeʼm tantɨwɨtam iga ijaamyajiñ jeʼm paz tachiʼipaʼap Dios jesɨk in̈teeñkamokyajpa tan̈kapɨk nasɨyoʼoyiyaj.